Warakai Isa Al Masih
2:1-7
(Mat. 1:18-25)
2
Aipu wakatu ede, Kaisar Agustus kauna sara'a ela ro dou d̄i Karaja'an Roma dafta mena ngarana. 2 Akeku sensus ma sarambakaina rakalampa wakatu la Kirenius ma ndad̄i gubernur dana ro rasa Siria. 3 Ndad̄i sara'a dou wakatu ede lao dafta mena ngarana aka cua-cua kota ndai^dohona.4 La Yusuf rau tu'u wi'ina dana ro rasa Nazaret d̄i Galilea ro laona aka Betlehem d̄i Yudea, hid̄i rawarakai Sangaji Daud; b̄ara la Yusuf londo ro mai la Daud. 5 La Yusuf daftana ngarana lab̄o la Maria dou sod̄ina ma wunga na'e loko. 6 Wakatu siad̄oho d̄i Betlehem rakara wakatuna la Maria d̄i ngganakaina. 7 Sia ngganana ana mone, anana ma sarambakaina. Ana dou to'i ede lombona kai kanefe, edempara karuna d̄i ade hid̄i wi'ikai rapa ^dingaha binata; b̄ara siad̄oho wati rakana uma sewa ^dimarukaina.
Dou-dou ma'ompukai jimba
2:8-20
8 D̄i aimangad̄i ede wara dou-dou ma'ompukai jimba ma wunga jaga jimba-jimbana d̄i so mpori d̄i dana ro rasa ede. 9 We^di lalo mpa mala'eka Ruma katadana weki d̄i siad̄oho, ro cahaya d̄ese ro ntasa Ruma makataroana siad̄oho, ro siad̄oho nawancuku dahuna. 10 Pala nggahi mala'eka ede, <<Aina dahu! B̄a one ade maikai nahu ake, nahu mawa'a Haba Mataho d̄i ru'u b̄a nggomid̄oho – haba ma wancu d̄i neokai ade b̄a sara'a dou. 11 Ainaina ake d̄i kota Daud wa'ura wara Sangaji Makasalamamu eded̄u Al Masih, Ruma. 12 Akeku tandana: Nggomid̄oho d̄ima'eda sab̄ua ana dou to'i ra lombo kai kanefe, ro wunga maruna d̄i ade sab̄ua hid̄i wi'ikai rapa ^dingaha binata.>>
13 We^di lalo mpa d̄i hid̄i ede, wara mala'eka-mala'eka ma kalai ma la^bona. Siad̄oho roi ro wadina Allah Ta'ala. Nggahi siad̄oho, 14 <<^Dese ro ntasara Allah Ta'ala d̄i hid̄i ma wancu ^dese!
Ro taho ro sanara ma wara d̄i dunia, taho ro sanara d̄i ru'u b̄a dou-dou ra kane'ekai b̄a Allah Ta'ala!>>
15 Sawa'u b̄a mala'eka-mala'eka ede tu'u wi'ina siad̄oho ro lao mbalina d̄i saroga, nggahira dou-dou ma'ompukai jimba ede d̄i sab̄ua lab̄o ma kalaina, <<Maira ndai talaoku aka Betlehem ro tatioku lampa rawi ma wa'ura ndad̄i ede, b̄une ra ngoa b̄a Ruma d̄i ndaita.>>
16 Siad̄oho lao lalona, edempara edana la Maria lab̄o la Yusuf, ro ana dou to'i ede ma wunga maru d̄i ade hid̄i wi'ikai ngaha binata.
17 Wakatu eda b̄a dou-dou ma'ompukai jimba ana dou to'i ede, siad̄oho caritana au ra nggahi b̄a mala'eka-mala'eka mab̄oha ana dou to'i ede. 18 Ro sara'a dou mbora mena akana ringa carita dou-dou ma'ompukai binata ede. 19 Pala la Maria nawi'iku samenana au ma ndad̄i ede ^deina adena ro kananu ncau b̄a sia. 20 Dou-dou ma'ompukai jimba ede lao mbalina aka so mpori ro roi ro wadina ro kad̄ese ro kantasana Allah Ta'ala, b̄ara samenana au ra ringa ro edana, nancihi ncao b̄une ra nggahi b̄a mala'eka.
Kelahiran Isa Al-Masih
Sunakai Isa Al Masih ro d̄onggo d̄i Bait Allah – La Simeon ro la Hana
2:21-40
21 Sawa'u b̄a umuna waru nai, ana dou to'i ede pab̄uaku ^disuna. Ro tangarakai b̄a siad̄oho kai ngara Isa, ngara ra mbei b̄a mala'eka sawatipu Sia warana d̄i ade loko ina-Na.
22 Rakara wakatuna la Yusuf ro la Maria kalampakaina lampa rawi karaso weki b̄atu hukum Musa. Ndad̄i siad̄oho wa'ana Ana Dou to'i ede aka Yerusalem ^di^donggokaina d̄i Ruma. 23 B̄ara d̄i ade Hukum Ruma wara ratunti ndake, <<Sanikina ana mone ma sasa'e, pab̄uaku ^di^donggo d̄i Ruma.>> 24 Siad̄oho nane'e rau d̄onggo ro mbei koroba, eded̄u d̄ua mbua kampodu atao d̄ua mbua ana nasi dara, b̄une ra wa'u katantu ade Hukum Ruma.
25 D̄i wakatu ede d̄i Yerusalem wara sab̄ua dou ma ngara la Simeon. Sia dou ma taho, ma to'a d̄i Allah Ta'ala ro sia wunga ngenana wakatu Allah Ta'ala ma kasalama Israel. Roh Allah mala^bo ncauna sia, 26 ro Roh Allah nawa'ura ngoa d̄i sia b̄a one sia wati d̄imamade sawatipu b̄a edana Sangaji Makasalama ra sake b̄a Ruma. 27 Kai d̄anda ro wa'a b̄a Roh Allah, la Simeon lu'u d̄i ade Bait Allah. Wakatu ede la Yusuf ro la Maria wa'a kalu'una Isa ma mbuipu to'i ede d̄ikalampakaina upacara b̄une ra parentakai b̄a hukum Taurat. 28 Ndad̄i la Simeon wehana Ana Dou to'i ede ro ce'i-Na, edempara roi ro wadina Allah Ta'ala,
29 <<Ake, Ruma, Ita wa'ura mbeimu au ra sake b̄a Ita.
Co'opu Ada Ita ake made kai taho ro sana.
30 B̄ara mada wa'ura eda b̄a ndaiku
Makasalama ma ramai ra d̄i Ita.
31 Makasalama ede ra sadia b̄a Ita
d̄i ru'u b̄a sara'a bangsa:
32 b̄une santika taroa ma kataroana ncai d̄i ru'u b̄a bangsa-bangsa ma kalai,
d̄imamai d̄i Ita;
eded̄u taroa ma kamaina na'e ro ntoru
d̄i ru'u b̄a ela Ita, Israel.>>
33 Ama ro ina b̄a Ana Dou to'i ede midi adena ringa au ra nggahi b̄a la Simeon mab̄oha ana siad̄oho. 34 Sawa'u b̄a ede la Simeon do'a barekana siad̄oho ro nggahina d̄i la Maria, <<Ana Dou to'i ake wa'ura kad̄ale b̄a Allah Ta'ala ^dimakalelina ro ^dimakasalama mboto dou Israel. Sia d̄imandad̄i tanda ra d̄i Allah Ta'ala, ma wati ca'u b̄a dou mamboto, 35 ro kai ndedena siad̄oho ampona kawara weki. Ncoki ademu ^dimacaki ade ro lokomu b̄une reme peda ma ngaha.>>
36 Wara rau sab̄ua dou nabi siwe ma wa'ura tua poda. Ngarana la Hana, ana la Fanuel, dou suku Asyer. Sawa'u b̄a pidu mba'a nikana, 37 la Hana ndad̄i mbaru mboha, ro ake umuna aru mpuru upa mba'a.b Sia nawara ncau d̄i Bait Allah, aimarai aimangad̄i sia sambea ro ibadana ta ede kai do'a ro puasa. 38 Ncihi ncao wakatu ede sia mai rauna d̄i hid̄i ede, edempara roi ro wadina Allah Ta'ala ro nuntuna mab̄oha Ana Dou to'i ede d̄i sara'a dou mangena wakatu Allah Ta'ala mahori kalosa Yerusalem.
39 Sawa'u b̄a la Yusuf ro la Maria nggori kalampa sara'ana taki b̄une ra parentakai b̄a Hukum Ruma, siad̄oho dula mbalina aka Nazaret d̄i Galilea. 40 Ana Dou to'i ede nanaha na'e ro nanaha tenggo. Sia nawancuku loana timba ro lemba ro nameci ro ca'uku b̄a Allah Ta'ala.
Isa Al Masih d̄i Bait Allah
2:41-52
41 D̄i sanikina mba'a, dou matua Isa nalao aka Yerusalem d̄ikalampakaina Ainaina Aruraja Paskah. 42 Wakatu Isa umuna sampuru d̄ua mba'a, siad̄oho laona aka hid̄i arurajakai ede b̄une ranginakaina. 43 Sawa'u b̄a nggori ndiha ede siad̄oho dulana, pala Ana Dou to'i ede, mbuipu midina d̄i Yerusalem, pala ama ro ina-Na wati ^badena. 44 Kacai b̄a siad̄oho, Sia wara d̄i ade weki dou mamboto ede. Sawa'u b̄a lampana sambia ai, siad̄oho ampona ngupa Sia d̄i ade weki iwa ro wekina ro dou-dou ra pata b̄a siad̄oho. 45 Pala siad̄oho wati rakana eda Sia, ndad̄i siad̄oho dula mbalina aka Yerusalem ro ngupana Ana Dou to'i ede. 46 Sawa'u b̄a tolu nai rangupa, siad̄oho rakana eda Sia d̄i ade Bait Allah. Sia wunga doho kade'ena guru-guru agama Yahudi ro Sia mboto sod̄ina d̄i guru-guru agama ede. 47 Sara'a dou ma ringa nggahi Sia mbora mena akana b̄ara ringana cambe b̄a Isa kai loa poda. 48 Dou matua rauna midi adena eda Sia. Nggahi ina-Na d̄i Sia, <<Ana, b̄ab̄auku Nggomi karawi ndakekai-Mu d̄i nami? Nami darura ademu ngupa Nggomi!>>
49 Cambe b̄a Isa, <<^Ba^bauku itad̄oho ngupakaimu Mada? Sab̄ua wati b̄ade b̄a itad̄oho b̄a one Mada pab̄uaku wara d̄i ade uma Ama-Ku?>> 50 Pala siad̄oho wati loana ka'ao au ra nggahi b̄a Isa ede.
51 Edempara Isa dula samana lab̄o siad̄oho aka Nazaret, ro Sia nato'a ncauku d̄i ina ro ama-Na. Samenana lampa rawi ede wi'i b̄a ina-Na d̄ei adena. 52 Isa nanaha na'e ro nanaha loa timba ro lemba, ro nameci ro ca'u b̄a Allah Ta'ala ro manusia.
Masa Kecil Isa Al-Masih