HABA MATAHO
RA KARONGGA ^BA
LA LUKAS
Tampu'ukaina
1:1-4
1
Teofilus ma taho ade,Mboto dou ma wa'ura usaha tunti kataho mab̄oha lampa rawi au ma wa'ura ndad̄i d̄i woha ndaita. 2 Siad̄oho wa'ura usahana tunti ma ncihi ncao b̄une ra karonggana d̄i ndai b̄a dou-dou ma ra'eda madana lampa rawi ma randad̄i ede ra aipu saramba wa'una ro ma ngoa ro kahabana nggahi ro eli Ruma. 3 Sawa'u b̄a palinga rero b̄a mada b̄uneku tampu'u ndad̄ina lampa rawi ede, ndad̄i nggahi b̄a mada, satahona mada ^dimatunti katahona au ma wa'ura ndad̄i ede ndad̄i sab̄ua buku ma taho d̄i ru'u b̄a Ita. 4 Karawikai b̄a mada ede, loakud̄u ^di^badekai b̄a Ita b̄a one au ra wa'u ngoa ro tei d̄i Ita nancihi romo.
Pada Mulanya Saat Penciptaan
Ngoa ro kahaba warakai la Yahya Mataki kandeu raso dou
1:5-25
5 Aipu Herodes mandad̄i sangaji dana ro rasa Yudea,a wara sab̄ua dou imam, ngarana la Zakaria. Sia ede kalompo imam Abia. Ngara weina la Elizabet, londo ro mai imam rau. 6 Mori ro woko la Zakaria lab̄o weina ede nakasanaku ade Allah Ta'ala ro nawancuku to'ana d̄i sara'a parenta Allah Ta'ala. 7 Siad̄oho wati ntauna ana b̄ara la Elizabet nambonggi ro siad̄oho nawa'ura ipi tua.
8 D̄i sab̄ua ainaina, wakatu kalompo Abia rakara wakatu dikalampakaina taki, la Zakaria kalampana taki kai imamkaina d̄i tando Allah Ta'ala. 9 Kai ra'undi, b̄une ranginakai karawi b̄a imam-imam, la Zakaria mab̄oha ^dimalu'u d̄i ade Bait Allah ro ^dimaka'a kamaya. 10 Wunga ade kalampana upacara ka'a kamaya ede, dou mamboto ma sambea ta ari lua. 11 Wakatu ede mala'eka Ruma katadana weki d̄i la Zakaria. Mala'eka ede ki^dina ta sa^bae wana meja hid̄i ka'akai kamaya. 12 Wakatu eda b̄a la Zakaria mala'eka ede, sia nawancuku wed̄i ro dahuna. 13 Pala nggahi mala'eka ede, <<Aina dahu, Zakaria! Allah Ta'ala wa'ura ringana do'amu. Weimu la Elizabet ^dimanggana sab̄ua ana mone. Ro anamu ede pab̄uapu tangarakai la Yahya. 14 Nggomi ^dimaneo ro ^dihi poda ademu ro mboto dou ^dimaneo ro ^dihi ade rau wakatu warakai anamu ede! 15 Sia d̄imandad̄i dou mana'e ro ntoru d̄i tando Ruma, ro sia wati ^dimanono anggo atao nono ^dimawukai. Ratampu'u d̄i ade loko inana, sia kuasakai b̄a Roh Allah. 16 Sia ^dimad̄anda ro wa'a mboto dou Israel mbali d̄i Allah Ta'ala, Ruma siad̄oho. 17 Sia d̄imandad̄i dou ma tenggo ro ma kuasa ra nggadu b̄a Ruma b̄une la Elia. Sia d̄imakatahona ama lab̄o anana, ro dou ma wati to'a d̄i ^dende mbalina d̄i ade fiki ro kananu ma taho. Kai ndedena sia nasadiaku ela Ruma ma patu ro ambi d̄i ru'u b̄a Ruma.>>
18 Edempara sod̄i b̄a la Zakaria d̄i mala'eka ede, <<^Buneku ^di^badekai b̄a mada b̄a one lampa rawi ede ^dimanda^di? Mada wa'ura tua, ro wei mada wa'ura tua rau.>>
19 Cambe b̄a mala'eka ede, <<Nahu ake Jibril. Nahu ma karawi wea d̄i ru'u b̄a Allah Ta'ala. Nahu rakakai b̄a Allah Ta'ala ^dimakarongga haba mataho ake d̄i nggomi. 20 Au ra nggahi b̄a nahu, d̄imandad̄i nggara rakasira wakatuna. Pala b̄ara nggomi wati imbimu, nggomi peade wati ^dimaloa nuntu ro nggahi; nggomi ^dimampongi saraka au ra nggahi b̄a nahu ede nda^dina.>>
21 Wakatu ede, mboto dou ta ari lua ma ngena losa la Zakaria. Siad̄oho midi mena adena b̄ab̄auku ntoikaina la Zakaria d̄i ade Bait Allah. 22 Ro wakatu la Zakaria losana, sia watid̄u loana nuntu ro nggahi lab̄o siad̄oho.Sia mbeina tanda kai rimana. Ndad̄i dou-dou na^badera b̄a one sia wa'ura edana sab̄ua lampa rawi ma na'e ra katada b̄a Allah Ta'ala.
23 Sawa'u b̄a nggori kalampana taki d̄i Bait Allah, la Zakaria lao dulana aka umana. 24 Wati ntoi sawa'u b̄a ede, la Elizabet wei la Zakaria na'e lokona, edempara nggempena d̄i ade umana lima wura ntoina. 25 Nggahi sia, <<Akeku rawi Ruma d̄i ru'u b̄a nahu ro Allah Ta'ala kamborana maja nahu.>>
Ngoa ro kahaba mab̄oha warakai Isa Al Masih
1:26-38
26 Wakatu la Elizabet wa'ura ini wura lokona, Allah Ta'ala kauna mala'eka Jibril lao aka Nazaret, sab̄ua kota d̄i dana ro rasa Galilea. 27 Allah Ta'ala kauna mala'eka Jibril lao raka sab̄ua dou siwe sampela, ma ngara la Maria. Dou siwe ede wa'ura ndad̄i dou sod̄i la Yusuf, londo ro mai Sangaji Daud. 28 Mala'eka ede mai rakana la Maria d̄ei umana ro nggahina, <<Taho ro sanara nggomi ra bareka b̄a Ruma! Ruma mala^bo ncauna nggomi!>>
29 Ringana nggahi mala'eka ede la Maria wed̄i adena, ndad̄ina nggahi b̄a adena auku aona salam ede. 30 Edempara nggahi mala'eka ede d̄i sia, <<Aina dahu, Maria, b̄ara nggomi wa'ura kad̄ale b̄a Allah Ta'ala. 31 Nggomi ^dimana'e loko ro ^dimanggana ana mone, ro pab̄uapu Sia ede tangarakai Isa. 32 Sia ^dimana'e ro ntoru ro ^dipehe kai Ana Allah1 Ma Wancu ^Dese Ro Ntasa. Allah Ta'ala dimakandad̄ina Sia sangaji b̄une Sangaji Daud, wa'i ro waro b̄a Sia. 33 Ro Sia d̄imandad̄i sangaji d̄i ru'u b̄a londo ro mai la Yakub santoi-ntoina ro Karaja'an-Na wati ^dimanggori.>>
34 Nggahi la Maria d̄i mala'eka ede,<<Pala mada mbuipu sampelaku, b̄uneku loana ndad̄i lampa rawi ede?>>
35 Cambe b̄a mala'eka ede, <<Roh Allah d̄imamai d̄i nggomi, ro kuasa Allah Ta'ala ^dimakuasakaina nggomi. B̄ara ndedena ana ^dinggana b̄a nggomi ede ^dipehekai Raso, Ana Allah. 36 D̄i ^badekai b̄a nggomi: La Elizabet, cinamu ede wa'ura na'e loko ini wura, kone nawa'ura tua ro nggahi b̄a dou b̄a one sia nambonggi. 37 B̄a one au d̄i ne'e b̄a Allah Ta'ala, sara'a ^dimanda^di.>>
38 Edempara nggahi la Maria, <<Mada ake ada Ruma; co'opu ndad̄ina d̄i mada b̄une ra nggahi b̄a ita.>> Edempara mala'eka ede tu'u wi'ina la Maria.
La Maria lao lambana la Elizabet
1:39-45
39 Pila-pila wakatu sawa'u b̄a ede, la Maria laona aka sab̄ua kota d̄i Yudea aka dana ro rasa doro-doro. 40 Sia laona aka uma la Zakaria, ro wakatu sia wunga lu'una, sia mbeina salam d̄i la Elizabet. 41 Wakatu la Elizabet ringana eli salam la Maria, ana ade loko la Elizabet rukuna. Ndad̄i la Elizabet kuasakai b̄a Roh Allah, 42 edempara nggahi la Elizabet, <<Nggomiku ma ipi bareka b̄a Allah Ta'ala d̄i ade weki samenana dou siwe! Ro Allah Ta'ala ma bareka rauna ana ma wara d̄ei lokomu! 43 Cousi nahu ake sampe ina Ruma mai rakana nahu? 44 Ndede ringa b̄a nahu eli salam nggomi, ana d̄i ade loko nahu ruku neo adena. 45 Taho ro sanara nggomi, b̄ara imbimu au ra sake b̄a Ruma d̄i nggomi ede ^dimanda^di!>>
La Maria rawa roi ro wadina Ruma
1:46-56
46 Nggahi la Maria,
<<Adeku maroi ro wadi Ruma,
47 ro nawa ro sarumbuku na'ipiku neo adena
b̄ara Allah Ta'ala, Rumaku.
48 Sia kawarana nahu, ada-Na ma b̄awa ro tuna!
Tampu'u ake sara'a bangsa
^dimanggahi d̄i nahu taho ro sanara.
49 B̄a one Allah Ta'ala Ma Wancu Na'e Kuasa
makandad̄ina lampa rawi mana'e d̄i nahu.
Taho rasora ngara-Na.
50 Ruma nakatada ncauku ncera ro mbura ade-Na
d̄i ru'u b̄a dou ma to'a ro ma dahu d̄i Sia.
51 Kai kuasana ma na'e,
Sia kambari mburana dou ma sombo,
ro kakacona au ra nia b̄a siad̄oho.
52 Sia kalondo ro kadenggana sangaji -sangaji
ro hanta-Na dou-dou ra kab̄awa ro katuna b̄a dou.
53 Dou mahid̄o ^dipaha kambocu b̄a Sia kai samenana mataho,
Sia katesana dou mantau ro wara, lao kai rima ntaru.
54 Sia bantuna Israel ada-Na,
b̄une au ra sake-Na
d̄i wa'i ro waro ndaita.
55 Ruma wati nefana au ra sake-Na,
Sia nancera ro mbura adena d̄i la Ibrahim
ro d̄i londo ro maina sampe santoi-ntoina.>>
56 Takasi tolu wura ntoina la Maria ngge'ena lab̄o la Elizabet, ede ampona dula aka umana.
Warakai la Yahya Mataki kandeu raso dou
1:57-66
57 Rakara wakatuna d̄i ru'u b̄a la Elizabet d̄i ngganakaina. Sia ngganana ana mone. 58 Dou-dou d̄i kompe ro peina, ro cina ro angina maringa haba b̄a one taho ade Ruma d̄i la Elizabet, ro siad̄oho neo ade rauna.
59 Wakatu ana dou to'i ede umuna waru nai, siad̄oho maina d̄i acara suna ana dou to'i ede. Siad̄oho nane'eku tangarakai ana dou to'i ede kai la Zakaria b̄une ngara amana, 60 pala nggahi inana, <<Wati! Sia pab̄uaku tangarakai la Yahya.>>
61 <<Wati wara kone sab̄ua dou rau d̄i ade iwa ro wekimu ma ngara b̄une ede,>> nggahi siad̄oho d̄i sia. 62 Edempara sia^dodo mbeina tanda d̄i la Zakaria ro sod̄ina, <<Couku d̄ine'emu tangarakai anamu?>>
63 La Zakaria rahona salompe wadu lei, edempara tuntina, <<Ngarana la Yahya.>> Siad̄oho sara'ana mbora mena akana. 64 Wakatu ede lalo la Zakaria loa lalona nuntu mbali, edempara sia roi ro wadina Allah Ta'ala. 65 Dou-dou ma wara d̄i kompena ndad̄i dahu, ro haba ede nambou d̄i sara'a dana ro rasa doro-doro Yudea. 66 Sara'a dou ma ringa haba ede mbora akana ro sod̄i menana d̄ei adena, <<^Dimandad̄i auku ana dou to'i ede peade?>> B̄a one Ruma ma lab̄ona sia.
La Zakaria karonggana au ra nggahi b̄a Ruma
1:67-80
67 La Zakaria, ama b̄a ana dou to'i ede, kuasakai b̄a Roh Allah ndad̄ina sia karonggana au ra nggahi b̄a Ruma. Nggahi sia,
68 <<Mai ndai taroi ro wadiku Ruma,
Allah Ta'ala bangsa Israel!
Sia wa'ura mai bantuna ela-Na
ro hori kalosana siad̄oho ra d̄i ade kuasakai b̄a dou-dou ma da^bae.
69 Sia mbeina ndai dou mana'e ro ntoru ^dimakasalamana ndai,
londo ro mai la Daud, ada-Na.
70 ^Bune ra wa'u sake b̄a Allah Ta'ala ntoina,
kai ncai nabi-nabi ra ka^dale-Na
71 b̄a one Sia ^dimakasalama ndai ra d̄i musu ndaita
ro d̄i ade kuasakai b̄a dou-dou ma daca'u ndaita.
72 D̄i katadakaina ncera ro mbura ade-Na d̄i wa'i ro waro ndaita,
Sia mbeina au ra sake-Na ma raso ede.
73-74 Sia sakena kai sumpa d̄i la Ibrahim ama ndai,
b̄a one Sia ^dimakasalama ndai ra d̄i musu ndai,
loakud̄u ndai wati dahuta
karawi d̄i ru'u b̄a Sia,
75 karawi ncau d̄i ru'u b̄a Sia
ro kasana wea ade-Na
santoi mori ndaita.
76 Nggomi, anaku, nggomi ^dipehekai nabi Allah Ma Wancu ^Dese Ro Ntasa.
Nggomi ^dinggadu ulu
d̄imahengga wea ncai d̄i ru'u b̄a Sia,
77 ^dimangoa ro kahaba d̄i ela-Na b̄a one siad̄oho ^dikasalama,
nggara Allah Ta'ala nawa'usira kangampu wea dosa-dosa siad̄oho.
78 Ruma ndai nancera ro mbura adena ro nameci ro ca'u;
Sia maina d̄ikasalamakaina ndai.
^Bune liro
ma wontu d̄i aimasi^di,
79 ndedeku Sia mbeina taroa-Na d̄i sara'a dou
ma mori d̄i ade rindikaina ro made ma samangikai ade
Sia d̄anda ro wa'ana ndaita d̄i ncai
ma lao aka taho ro sana.>>
80 Ana la Zakaria ede nanaha na'e ro nanaha tenggo. Sia ngge'ena d̄i so sarae, sampe rakakai wakatuna sia katadana weki d̄i bangsa Israel.