HABA MATAHO
RA KARONGGA ^BA
LA YAHYA
NGGAHI RO ELI D̄IKARONGGA
D̄i ade Haba Mataho ra karongga b̄a la Yahya ake, Isa Al Masih d̄i ade Kitab ake eded̄u Nggahi Ro Eli Allah Ta'ala ma ede ro hid̄i ma wa'ura ndad̄i manusia ro ngge'e d̄i ade woha ndaita. ^Bune ra nggahi d̄i ade Kitab ake, Haba Mataho ake ratunti loakud̄u dou-dou ma bacana na'imbiku b̄a one Isa eded̄u Sangaji Makasalama ra sake b̄a Allah Ta'ala – Isa Al Masih eded̄u Ana ndai Allah Ta'ala. Dou ma imbi d̄i Isa Al Masih naloa raka mori ma ede ro hid̄i santoi-ntoina (20:31).
Carita-carita d̄i ade Kitab ake mab̄oha lampa-lampa rawi ma b̄isa ro guna d̄i ade nuntu ro nggahi Isa Al Masih lab̄o dou-dou. D̄i ade carita ede wara dou ma imbi d̄i nuntu ro nggahi Isa ro ndad̄i imbi d̄i Sia, pala wara rau ma wati ca'u Sia ro wati ngawana imbi d̄i Sia.
Sawa'u b̄a sarambakaina ma nggahi b̄a one Nuntu Ro Nggahi Allah Ta'ala ma ede ro hid̄i ede eded̄u Isa Al Masih, d̄i masarambakaina Kitab ake mboto rawi mab̄isa ro guna ra karawi b̄a Isa. Rawi mab̄isa ro guna ede matei katadana b̄a one Isa eded̄u Sangaji Makasalama ra sake b̄a Allah Ta'ala, Sangaji Makasalama ede eded̄u Ana Allah. Cua-cua ngoa mab̄oha rawi mab̄isa ro guna ra d̄i nuntu ro nggahi Isa lab̄o dou-dou. Ra d̄i nuntu ro nggahi ede napodaku au ra karongga b̄a rawi mab̄isa ro guna ede. D̄i ade nuntu ro nggahi ake karongga b̄a one wara dou ma imbi d̄i Isa ro ndad̄i anamori-Na, pala wara rau ma wati ca'u Sia ro wati ngawana imbi d̄i Sia. Pasal 13–17 ratunti kad̄ondo ro paja b̄uneku d̄eni ro rapuna Isa lab̄o anamorid̄oho-Na d̄i aimangad̄i wakatu Sia wunga wa'u ro leto b̄a dou, ro b̄uneku Sia katenggona ade siad̄oho d̄i aimangad̄i ede. Pasal-pasal macumpukaina mangoa kab̄aena mab̄oha b̄uneku Isa wa'u ro leto b̄a dou ro d̄iparesa ncihi ro ncarana, b̄uneku Sia d̄isalib, made ro mori mbalina, ro b̄uneku Sia katadana weki-Na d̄i anamorid̄oho-Na sawa'u b̄a Sia mori mbalina.
Carita mab̄oha dou siwe ra raka eda b̄a dou wunga karawina jina (8:1-11), d̄ikalu'u d̄i ade tanda kuru mana'e b̄a one mboto naskah ro nuntu ra nggahi jaman mantoi wati kalu'una carita ede, ma kalaina kalu'una d̄i sanikina hid̄i.
D̄i ade Kitab ake la Yahya nuntu ro nggahi kapodana ra mbeina, eded̄u mori masapodakaina ro ma ede ro hid̄i, rambei b̄a Allah Ta'ala kai ncai Al Masih. Rambei ede wa'ura tampu'u d̄i dunia, ro loa d̄i'iu b̄a dou-dou ma tarima Isa mandad̄i ncai ma lao aka Allah Ta'ala, ro ma katadana Allah Ta'ala, ro ma mbei mori. Tanda rawa'a b̄a la Yahya eded̄u conto ro ibara ra wehana d̄i lampa rawi sanai-nai d̄i tei katadakaina lampa rawi ma poda kai cara rohani, b̄une: oi, roti, taroa, dou ma ompukai jimba ro jimbana, fu'u anggo ro wuana.
Isi
Masarambakaina 1:1-18
La Yahya Mataki kandeu raso dou ro dou-dou ma sarambakaina mandad̄i anamori Isa Al Masih 1:19-51
Rakarawi b̄a Isa Al Masih d̄i ade woha ela ro dou 2:1–12:50
Ainai-ainai macumpukaina d̄i Yerusalem ro d̄i kompe Yerusalem 13:1–19:42
Isa Al Masih mori mbalina ro katadana weki-Na 20:1-31
^Bontokai: eded̄u Isa Al Masih katada walina weki d̄i Galilea 21:1-25