HABA MATAHO
RA KARONGGA ^BA
LA YAHYA
Nggahi Ro Eli Allah Ta'ala ma wa'ura ndad̄i manusia
1
Aipu sarambakaina, sawatipu kandad̄i dunia, Nggahi Ro Eli wa'ura wara.Nggahi Ro Eli ede wara sama-sama lab̄o Allah Ta'ala
ro Nggahi Ro Eli ede eded̄u Allah Ta'ala
2 Ra'aipu saramba wa'una Sia wara sama-sama lab̄o Allah Ta'ala.
3 Samenana ma wara rakandad̄i b̄a Sia,
ro d̄i samenana ma wara ede,
wati kone sab̄ua rau ma loa ndad̄i nggara watisi b̄ara Sia.
4 Nggahi Ro Eli ede fu'u mori,a
ro mori ede eded̄u taroa d̄i ru'u b̄a manusia.
5 Taroa ede nakataroaku d̄imarindi,
ro marindi ede wati loana kuasakai taroa ede.
6 Maira dou ra nggadu b̄a Allah Ta'ala,
ngarana la Yahya.
7 Sia maina d̄imangoa ro kahaba mab̄oha taroa ede,
loakud̄u sara'a dou d̄ima'imbi.
8 Ndai sia laina taroa ede,
pala sia pab̄uaku ngoa ro kahabana mab̄oha taroa ede.
9 Taroa masapodakaina ma kataroa sanikina manusia,
wa'ura mai d̄i dunia.
10 Nggahi Ro Eli wa'ura wara d̄i dunia,
dunia rakandad̄i b̄a Sia,
pala dunia wati patana Sia.
11 Sia maina d̄i dana ro rasa ndai-Na
pala dou-dou d̄i dana ro rasa ede wati tarimana Sia.
12 Pala sara'a dou ma tarima
ro ma imbi d̄i Sia;
siad̄oho ede d̄imbei b̄a Sia hak d̄imandad̄i ana-ana Allah,
13 siad̄oho ede ranggana laina b̄ara kane'e hawa nawasu manusia,
malaisi ramaina ra d̄i Allah Ta'ala.
14 Nggahi Ro Eli wa'ura ndad̄i manusia,
Sia ngge'ena d̄i woha ndaita,
ro ndai wa'ura edata d̄ese ro ntasa-Na.
D̄ese ro ntasa ratarima b̄a Sia
kai Ana makese weki ma ramai ra d̄i Ama.
Kai ncai Sia, ndai taloaku eda Allah Ta'ala
ro ta'iuku meci ro ca'u-Na d̄i ndai.
15 La Yahya maina d̄imandad̄i sakasi mab̄oha Sia,
sia ngoa ro kahabana:
<<Akeku Sia ra nggahi b̄a nahu:
Sia d̄imamai kento sawa'u b̄a nahu,
pala Sia nancewi na'e ntewikaisi nahu,
b̄a one sawatipu b̄a wara nahu, Sia nawa'ura wara.>>
16 Sia b̄ini b̄a meci ro ca'u;
ma wati d̄imacumpu,
Sia ma barekana ndaita.
17 Hukum Taurat ra karongga b̄a la Musa.
Pala meci ro ca'u ro taho ade Allah Ta'ala
ramaina kai ncai Isa Al Masih.
18 Wati wara kone sab̄ua dou rau ma parana eda Allah Ta'ala,
selasi Ana ma kese weki ra d̄i Ama,
ma sama lab̄o Ama ro ma rapu poda lab̄o Sia.
Sia edeku ma katadana d̄i ndai mab̄oha Ama.
Nuntu ro nggahi la Yahya mab̄oha weki ndaina
1:19-28
19 Dou-dou mana'ekai Yahudi d̄i Yerusalem kauna imam-imam ro dou-dou Lewi lao d̄i la Yahya ro sod̄i d̄i sia, <<Nggomi ake cou?>>
20 La Yahya ngoa ntirina, <<Nahu laina Sangaji Makasalama.>>
21 <<Nggara ndedesi, nggomi ake cou?>> Sod̄i b̄a siad̄oho. <<Sab̄ua nggomi ake la Elia?>>
<<Laina,>> cambe b̄a la Yahya.
<<Sab̄ua nggomi ake Nabi ra sake ede?>>b Sod̄i b̄a siad̄oho wali.
<<Laina,>> cambena.
22 <<Nggara ndedesi, ngoapu d̄i nami cou nggomi ake?>> Nggahi siad̄oho, <<Loakud̄u cambe b̄a nami d̄i dou-dou ma rakakai nami. Auku nggahi b̄a nggomi mab̄oha weki ndaimu?>>
23 Cambe b̄a la Yahya, <<Nahu ake dou ra nggahi b̄a Nabi Yesaya:
<Dou ma ou nggao d̄i so sarae:
Kapiripu ncai d̄i ru'u b̄a Ruma.> >>
24 D̄i ade weki dou-dou ra kakai ede wara pila-pila dou Farisi.c 25 Sod̄i b̄a siad̄oho d̄i la Yahya, <<Nggara podasi nggomi laina Sangaji Makasalama, laina la Elia, ro lai rauna Nabi ra sake ede, b̄ab̄auku nggomi kandeu rasokaimu dou?>>
26 Cambe b̄a la Yahya, <<Nahu kandeu rasoku dou kai oi. Pala d̄i woha nggomid̄oho wara Sia, pala wati pata b̄a nggomid̄oho. 27 Sia namai kento sawa'u b̄a nahu, pala kone d̄imasalo'a wea ai sadopa-Na nahu wati patuna.>>
28 Sara'ana ede ndad̄ina d̄i Betania, ta ipa b̄ae b̄a Sori Yordan hid̄i la Yahya kandeu rasokaina dou.
Ana Jimba Allah
1:29-34
29 B̄ala aisanai, la Yahya edana Isa Al Masih ma mai raka sia. Edempara nggahi la Yahya, <<Tiopu, Akaku Ana Jimba Allah d̄imafurana dosa dunia. 30 Sia edeku ra nggahi b̄a nahu d̄imamai kento sawa'u b̄a nahu, pala Sia nancewi na'e ntewikaisi nahu, b̄a one sawatipu b̄a wara nahu, Sia nawa'ura wara. 31 Sawatipu b̄a ede, nahu wati b̄adeku cou Sia ede. Sapodakaina nahu mai kandeu rasoku dou kai oi loakud̄u bangsa Israel patana Sia.>>
32 La Yahya nggahi rauna, <<Nahu edaku Roh Allah ma londo b̄une nasi dara ma ramai ra d̄i langi edempara midina ese wawo Sia. 33 Wakatu ede ndai nahu rau watipu pataku Sia. Pala Allah Ta'ala ma kauna nahu kandeu raso kai oi ro wa'ura nggahina d̄i nahu, <Ma'edasi b̄a nggomi Roh Allah ma londo, edempara midina ese wawo sab̄ua dou, Sia edeku d̄imakandeu raso kai Roh Allah.> 34 Nahu wa'ura eda madaku Sia,>> nggahi la Yahya, <<Ro nahu ma nggahi b̄a one Sia edeku Ana Allah.>>1
Anamori Isa Al Masih ma sarambakaina
1:35-51
35 B̄ala aisanai la Yahya lab̄o d̄ua dou anamorina wara d̄i hid̄i ede wali. 36 Wakatu eda b̄a sia Isa Al Masih ma lampa sai hid̄i ede, nggahi sia, <<Tiopu! Akaku Ana Jimba Allah.>>
37 D̄ua dou anamori la Yahya ma ringa nggahi ro eli ede, edempara lao b̄atuna Isa Al Masih. 38 Isa tambarina, ro edana siad̄oho ma wunga lampa b̄atu Sia. Sod̄i b̄a Sia, <<Au ngupamu nggomid̄oho?>>
Cambe b̄a siad̄oho, <<Rabi, ta b̄eku ngge'ekaita?>> (<Rabi> aona Guru.)
39 <<Mai tiopu b̄a ndaimu,>> cambe b̄a Isa Al Masih. Siad̄oho lao samana lab̄o Sia ro edana hid̄i ngge'ekai Sia. Wakatu ede b̄oe upa aimambia. D̄i ainaina ede siad̄oho ngge'ena lab̄o Sia.
40 Sab̄ua dou d̄i ade weki d̄ua dou ede ma wa'ura ringa au ra nggahi b̄a la Yahya ro sawa'u b̄a ede lao b̄atuna Isa, eded̄u la Andreas ari b̄a la Simon Petrus. 41 La Andreas lao ngupa rocina la Simon, sa'ena ede, ro nggahina d̄i sia, <<Nami wa'ura eda angimu lab̄o Al Masih eded̄u Sangaji Makasalama ra sake b̄a Allah Ta'ala!>>d 42 La Andreas lao otona la Simon d̄i Isa.
Isa Al Masih tio kab̄aena la Simon, edempara nggahi-Na, <<Nggomi Simon, ana la Yahya. Nggomi d̄ipehekai la Kefas.>> (Kefas sama mpa lab̄o Petrus, aona: doro wadu.)
43 B̄ala aisanaina Isa Al Masih nane'e lao aka Galilea. Sia eda angina lab̄o la Filipus, ro nggahi-Na d̄i sia, <<Mai b̄atupu Nahu!>> 44 La Filipus dou Betsaida, eded̄u kota hid̄i ngge'ekai la Andreas ro la Petrus. 45 La Filipus eda angina lab̄o la Natanael ro nggahina d̄i sia, <<Nami wa'ura eda angimu lab̄o dou ra pehe b̄a la Musa d̄i ade Kitab Taurat, ra ngoa ro kahaba b̄a nabi-nabi. Sia eded̄u Isa Al Masih, dou Nazaret, ana la Yusuf.>>
46 Pala cambe b̄a la Natanael, <<Sab̄ua lu'u b̄a aka ma taho ramaina ra d̄i Nazaret?>>
<<Mai tiopu b̄a ndaimu,>> cambe b̄a la Filipus.
47 Isa Al Masih edana la Natanael ma mai raka Sia, edempara nggahina mab̄oha la Natanael ede, <<Tiopu, akaku dou Israel masapodakaina. Wati wara mapalasu d̄i sia.>>
48 <<^Buneku loata, Ita patata mada?>> Sod̄i b̄a la Natanael d̄i Isa Al Masih.
Cambe b̄a Isa Al Masih, <<Sawatipu nggomi ou b̄a la Filipus, Nahu wa'ura edaku nggomi awa wombo fu'u ara.>>
49 <<Guru,>> nggahi la Natanael, <<Ita eded̄u Ana Allah!2 Itaku Sangaji bangsa Israel!>>
50 Nggahi Isa Al Masih, <<Sab̄ua nggomi imbimu, b̄ara nggahi b̄a Nahu b̄a one Nahu wa'ura edaku nggomi d̄i wombo fu'u ara? Nggomi d̄ima'eda lampa rawi ma ncewi na'e wali ntewikaisi ede!>> 51 Isa nggahi walina, <<Poda, imbipu, nggomi d̄ima'eda langi ma hengga weki, ro mala'eka-mala'eka Allah ma londo ne'e d̄i Ana Manusia.>>