KISAH RASUL-RASUL
NGGAHI RO ELI D̄IKARONGGA
Kisah Rasul-Rasul eded̄u Kitab Suci maka^duakaina ra karongga b̄a la Lukas. Isina ma penti poda d̄i ade Kitab Suci Kisah Rasul-Rasul ake eded̄u ngoa kab̄aena mab̄oha b̄uneku dou-dou mab̄atu Isa Al Masih -- kai ^dende ro wa'a b̄a Roh Allah -- ngoa ro kahabana Haba Mataho mab̄oha Isa Al Masih <<d̄i Yerusalem, d̄i sara'a dana ro rasa Yudea, Samaria, ro saraka aka sumpu dunia>> (1:8). Kitab ake eded̄u carita ruku ro rawi dou ma'imbi d̄i Isa Al Masih ra tampu'ukai d̄i ade woha dou-dou Yahudi edempara mbou rerona ndad̄i sab̄ua agama d̄i ru'u b̄a sara'a dana ro rasa d̄i dunia. Dou ma ratunti Kitab ake na'iuku weki b̄a one na'ipiku paraluna ngoa kapoda d̄i dou-dou ma bacana b̄a one dou-dou ma'imbi d̄i Isa Al Masih laina sab̄ua bahaya politik d̄i ru'u b̄a karaja'an Roma, malaisi agama Kristen eded̄u ^dimpurunakai agama Yahudi.
Kisah Rasul-Rasul wara tolu mbua bagian. D̄i ade tolu mbua bagian ede wara naha mbou rerona Haba Mataho mab̄oha Isa Al Masih d̄i sara'a dana ro rasa ro tu'u uma sambea ro ibadakai dou-dou ma imbi d̄i Isa Al Masih: (1) tampu'u rukuna dou-dou ma imbi d̄i Isa Al Masih d̄i Yerusalem sawa'u b̄a Isa Al Masih hanta kane'e lao ese saroga; (2) naha mboto wali aka dana ro rasa makalai d̄i Palestina; ro (3) naha ncewi mboto wali d̄i dana ro rasa d̄i kompe ro pei Moti Woha sampe aka dana ro rasa Roma.
Sab̄ua lampa rawi ma penti wali d̄i ade Kitab Kisah Rasul-rasul ake eded̄u karawi Roh Allah ma mai kai kuasana d̄i dou-dou ma'imbi d̄i Yerusalem d̄i ainaina Pentakosta. D̄i ade sara'a mandad̄i ra tunti d̄i ade Kitab ake tadana b̄a one Roh Allah ede mad̄ende ro wa'a ncauna ro makatenggona gereja ro dou-dou mana'ekaina. Haba rangoa ro tei b̄a agama Kristen d̄i jaman masarambakaina ake ratunti ade sab̄ua hotoba. Samenana mandad̄i ratunti d̄i ade Kitab ake nakatadaku b̄a one na'ipiku kuasana haba ede d̄i ade mori ro woko dou-dou ela Al Masih ro d̄i ade masama-sama imbi ade gereja.
Isi
Ka'ambi weki d̄ingoa ro kahabakai 1:1-26
a. Parenta ma cumpukaina ro sake ra d̄i Isa Al Masih 1:1-14
b. Dou macepena la Yudas 1:15-26
Ngoa ro kahaba d̄i Yerusalem 2:1–8:3
Ngoa ro kahaba d̄i Yudea ro d̄i Samaria 8:4–12:25
Karawi la Paulus 13:1–28:31
a. Lampa ro lao masarambakaina d̄ingoa ro kahabakai Haba Mataho 13:1–14:28
b. Mafaka d̄i Yerusalem 15:1-35
c. Lampa ro lao kad̄ua kalikaina d̄ingoa ro kahabakai Haba Mataho 15:36–18:22
d. Lampa ro lao katolukalikaina d̄ingoa ro kahabakai Haba Mataho 18:23–21:16
e. La Paulus rabui d̄i Yerusalem, Kaisarea, ro d̄i Roma 21:17–28:31