SURA PAULUS
D̄I RU'U B̄A ELA RUMA ^DI
ROMA
NGGAHI RO ELI D̄IKARONGGA
Sura la Paulus d̄i ru'u b̄a Ela Ruma d̄i Roma Sura ake ratunti ^disadiakaina siad̄oho wakatu la Paulus lao lambana siad̄oho.^Bune raniana, la Paulus nakarawi samporo wakatu d̄i woha dou-dou ela Al Masih ma wara ta aka, sawa'u b̄a ede kai bantu b̄a siad̄oho, sia nane'e lao aka Spanyol. La Paulus tuntina sura ake d̄ingoa kab̄aekaina ao ro ma'anana mab̄oha agama Kristen ro ngoa ro tei-ngoa ro teina ma mod̄a d̄ipab̄ua karawi b̄a ela Al Masih ro d̄i ru'u mori ro wokona ela Al Masih ede.
Sawa'u b̄a karonggana salam d̄i ru'u b̄a ela Ruma d̄i dana ro rasa Roma, ro ngoana d̄i siad̄oho mab̄oha do'ana d̄i ru'u b̄a siad̄oho, la Paulus karonggana isi surana ake: <<Kai Injil ede, Allah Ta'ala turu teina b̄uneku carana hubungan manusia lab̄o Allah Ta'ala ndad̄i taho mbali; carana eded̄u kai imbi d̄i Allah Ta'ala, ra'aipu saramba wa'una sampe cumpukaina>> (1:17).
Sawa'u b̄a ede la Paulus b̄ila-b̄ilana isi surana ede. Samenana dou – nataho dou Yahudi – ro dou ma laina dou Yahudi – paralu taho hubungana lab̄o Allah Ta'ala, b̄ara sara'ana sama-sama wara ade kuasakai b̄a dosa. Hubungan manusia lab̄o Allah Ta'ala ndad̄i taho mbali nggara manusia na'imbisi d̄i Isa Al Masih. Edempara la Paulus ngoa kab̄aena mab̄oha mori mab̄ou d̄i'iu b̄a manusia nggara nakasa^buasi wekina lab̄o Al Masih. Mori mab̄ou ede wokona b̄ara warana hubungan ma b̄ou lab̄o Allah Ta'ala, dou ma wa'ura imbi d̄i Isa Al Masih, namori dame lab̄o Allah Ta'ala, ro Roh Allah nahori kalosaku dou ede ra d̄i kuasakai b̄a dosa ro made. D̄i ade pasal 5-8 la Paulus ngoa kab̄ae rauna d̄i ne'e b̄a Hukum-hukum Allah ro kuasa Roh Allah d̄i ade mori ro woko dou ma'imbi. Edempara la Paulus ngoa kab̄aena b̄a one dou Yahudi ro dou ma laina dou Yahudi lu'u ade nia Allah Ta'ala d̄i ru'u b̄a ela manusia. La Paulus nggahina b̄a one dou Yahudi ma tula Isa Al Masih wa'ura lu'u ade nia Allah Ta'ala ^dibantukai manusia kai dasa rahmat-Na kai ncai Isa Al Masih. La Paulus na'imbi podaku b̄a one dou Yahudi wati d̄imatula ncau-ncau Ruma Isa. Cumpukaina la Paulus tuntina mab̄oha b̄uneku carana dou pab̄uaku mori kai ela Al Masih, ma penti poda cara kalampa meci ro ca'u ade hubungan lab̄o dou-dou makalai. B̄ara ndedena la Paulus kad̄alena ma penti-penti poda b̄une awa ake: Karawi wea d̄i ru'u b̄a Allah Ta'ala, d̄i pab̄ua kalampa b̄a ela Al Masih d̄i ru'u b̄a negara ro d̄i ru'u b̄a sasama ela Al Masih, ro mboto pahu masa'ala ma ntau hubungan lab̄o ade mpida. La Paulus ^bontona surana ake kai nggahi ro eli b̄a weki ndaina ro roi ro wadina Allah Ta'ala.
Isi
Masarambakaina ro isi caritana 1:1-17
Manusia maparalu salamakai 1:18–3:20
Ncai d̄isalamakai ra d̄i Allah Ta'ala 3:21–4:25
Mori mab̄ou b̄ara kasab̄ua weki lab̄o Al Masih 5:1–8:39
Israel ade nia b̄a Allah Ta'ala 9:1–11:36
Ruku ro rawi ela Al Masih 12:1–15:13
^Bontokai ro salam 15:14–16:27