SURA PAULUS
D̄I RU'U B̄A ELA RUMA ^DI
ROMA
Salam
1
Sura ake ranggadu b̄a la Paulus ada Isa Al Masih, ma ndad̄i rasul ro ra wa'u karaso b̄a Allah Ta'ala ^dimangoa ro kahaba Injil-Na. 2 Injil ede wa'ura sake b̄a Allah Ta'ala ratampu'u aipu jaman ma'ulu wa'u kai ncai nabi-nabi-Na ro wa'ura tunti ade Kitab Suci. 3 Injil ede mab̄oha Ana Allah,1 Isa Al Masih, Ruma ndaita. Sacara manusiakaina, Sia eded̄u londo ro mai la Daud, 4 pala sacara Roh, Sia ede Ana Allah ma ntau kuasa ma ipi na'e kai mori mbalina sawa'u b̄a made-Na. 5 Kai ncai Sia rauku, Allah Ta'ala kad̄alena nahu ndad̄i rasul, loakud̄u nahu ^dimangoa ro tei d̄i sara'a bangsa, loakud̄u siad̄oho imbi ro to'ana d̄i Isa Al Masih. 6 Nggomid̄oho rau ma wara d̄i Roma lu'u d̄i ade weki sara'a bangsa ede, nggomid̄oho wa'ura kad̄ale d̄imandad̄i ela Isa Al Masih. 7 B̄ara ndedena nahu tuntiku sura d̄i ru'u b̄a nggomid̄oho.Raho-raho to'i mpa Allah Ta'ala, Ama ndaita ro Ruma Isa mbeina bareka ro taho ro ntai d̄i ru'u b̄a nggomid̄oho.
Do'a syuku
1:8-15
8 Saramba-rambakaina, nahu marenta syuku d̄i Allah Ta'ala kai ncai Isa Al Masih b̄ara nggomid̄oho sara'ana; b̄a one wa'ura mbou d̄i sara'a dunia mab̄oha imbi nggomid̄oho. 9 Nahu kawara ncauku nggomid̄oho nggara kado'asi. Allah Ta'ala ma b̄adena b̄a one au ra nggahi b̄a nahu ede, napodaku. B̄a one nahu ma karawi wea kai kapoda ade d̄i ru'u b̄a Allah Ta'ala eded̄u ngoa ro kahabaku Injil mab̄oha Ana-Na. 10 Nahu mado'a d̄i Allah Ta'ala, raho-raho to'i mpa nahu kaloa lao lamba nggomid̄oho. 11 B̄a one nahu kawancu podaku ne'e eda angi lab̄o nggomid̄oho loakud̄u nahu cengga-cenggaku au ra mbei b̄a Roh Allah ^dikatenggokai nggomid̄oho. 12 Aona nggahi nahu ede eded̄u b̄ara ndai sama-sama wa'ura imbita d̄i Isa Al Masih, Ruma ndaita, ndad̄i ndai taloa cua katenggo angi.
13 Cina ro angi! D̄i ne'e b̄a nahu loakud̄u nggomid̄oho b̄ademu b̄a one wa'ura ntuwu poda nahu ne'eku lao lamba nggomid̄oho pala wara mpa ma dompona. D̄i ne'e b̄a nahu loakud̄u d̄i woha nggomid̄oho rau au ra karawi b̄a nahu wara onena b̄une ra wa'u karawi b̄a nahu d̄i woha dou-dou ma laina bangsa Yahudi d̄i hid̄i-hid̄i ma kalai. 14 B̄ara nahu kantau taki d̄ipab̄ua karawi d̄i samenana bangsa: nataho ma wa'ura taho ruku ro rawina ro ma watipu taho ruku ro rawina, ma ntau ilmu ro ma watipu ntau ilmu. 15 B̄ara ndedena nahu kane'e poda ngoa ro kahaba Injil ede d̄i nggomid̄oho ma ngge'e d̄i Roma rau.
Kuasa Injil
1:16-17
16 Nahu wati ^dimamaja b̄ara imbiku d̄i Injil ede, b̄a one Injil ede eded̄u tenggo ro wale Allah Ta'ala d̄ikasalamakaina samenana dou ma imbi, saramba-rambakaina d̄i ru'u b̄a dou Yahudi, ro d̄i ru'u b̄a dou-dou bangsa ma kalai rauna. 17 B̄a one d̄i ade Injil ede wara nggahi ro eli Allah Ta'ala ma ngoa ro tei b̄uneku carana hubungan manusia lab̄o Allah Ta'ala loakaina taho mbali; carana eded̄u kai imbi d̄i Allah Ta'ala, ratampu'u aipu sarambakaina sampe cumpukaina. Ede sama b̄une ra tunti ade Kitab Suci, <<Dou ma imbi d̄i Allah Ta'ala, ndad̄i hubungan lab̄o Allah Ta'ala ndad̄i taho mbali, dou ede ^dimamori taho ro sana!>>a
Ncarana manusia
1:18-32
18 Ra d̄i saroga Allah Ta'ala nakatadaku mbani-Na d̄i samenana dosa ro rawi dab̄ae manusia, b̄ara rawi madab̄ae natapa ro dompoku manusia d̄i ade lampa rawi ma poda ro ma ncihi mab̄oha Allah Ta'ala. 19 Au ra b̄ade b̄a manusia mab̄oha Allah Ta'ala nawa'ura tada poda d̄ei ade manusia, b̄ara ndai Allah Ta'ala nawa'ura katada ede d̄i manusia. 20 Ra aipu Allah Ta'ala tampu'u kandad̄ina dunia, kuasa Allah Ta'ala ma wati tada, eded̄u ka'ada'an-Na kai Allah Ta'alakaina ro kuasa-Na ma ede ro hid̄i wa'ura loa ka'ao b̄a manusia kai ncai samenana au ra wa'u kandad̄i-Na. Ndad̄i manusia wati ntauna alasan au-au d̄ikancihikaina weki. 21 Manusia napataku Allah Ta'ala, pala manusia wati lia ro horomana Sia kai Allah Ta'alakaina ro wati rentana syuku d̄i Sia. Pala manusia nafiki ro kananuku lampa rawi ma wati wara onena; ade siad̄oho nawa'ura ndad̄i rindi. 22 Siad̄oho na'iuku wekina loa timba ro lemba, sapodakaina siad̄oho nasampula. 23 Laina Allah Ta'ala ma ede ro hid̄i d̄inemba b̄a siad̄oho, malaisi patung-patung mantau pahu ro ma loa made; eded̄u manusia, nasi, binata ma upa mbua ed̄i ro binata ma rama.
24 B̄ara ndedena Allah Ta'ala naco'o mpa siad̄oho kuasakai b̄a au ra kane'ekai b̄a adena karawi ma dab̄ae, ndad̄ina siad̄oho karawina lampa rawi-lampa rawi ma dab̄ae d̄i weki ndaina. 25 Allah Ta'ala ma poda, cepe b̄a siad̄oho kai ma palasu. Laina Marakandad̄i sara'a ma wara, malaisi rakandad̄i edeku d̄inemba ro d̄ikarawi wea b̄a siad̄oho.Sapodakaina Marakandad̄ina edeku ma pab̄ua d̄iroi ro wadi santoi-ntoina! Amin.
26 B̄ara ndedena Allah Ta'ala co'ona siad̄oho b̄atu nawasuna ma da^bae. Dou-dou siwe watid̄u mai ade walina d̄i dou-dou mone b̄une ranginakai ra karawi b̄a manusia, malaisi namaikaiku adena d̄i sasama siwena. 27 Ndede rauku dou mone; siad̄oho watid̄u maru campona lab̄o dou siwe b̄une ranginakai, malaisi namaru campoku lab̄o sasama monena. Nda^dina natarimaku ufana ma ncihi ncao lab̄o rawi siad̄oho ma dab̄ae ede.
28 B̄ara manusia na'iuku wekina b̄a one siad̄oho wati paraluna pata Allah Ta'ala, ndad̄i Allah Ta'ala naco'o mpa fiki ro kananu siad̄oho ndad̄i dab̄ae, ndad̄ina siad̄oho nakarawiku lampa rawi-lampa rawi ma sapodakaina ma wati loa d̄ikarawi. 29 Ade siad̄oho b̄ini b̄a samenana ma dab̄ae, ma wati poda; b̄ini kai b̄a na'e ade, ma'iha ro madab̄ae, ro hiana ade; b̄ini kai b̄a ne'e hade angi, ncao, tipu ro wi'i d̄ei ade rawi lenga. Siad̄oho naca'u nuntu ka'iha dou makalai, 30 naca'u nuntu ka'iha ngara dou makalai, siad̄oho nasombo ro kura ngaja ro wati ca'una d̄i Allah Ta'alab ro naca'u nuntu ro nggahi cowa. Siad̄oho naloa ngupa cara-cara mab̄ou d̄ikarawikaina ma da^bae. Siad̄oho na'aoku dou-dou matua; 31 siad̄oho wati ne'ena kaco'i dou makalai; siad̄oho wati to'ana ro wati ntauna kasi ade d̄i sasama manusia. 32 Siad̄oho nab̄adeku, b̄a one nggahi b̄a hukum Allah, dou ma karawi samenana ede patu d̄ihukum made. Kone ade ndedekaina siad̄oho ngge'e mpa karawina lampa rawi ede; ro wati kantana dou makalai karawi b̄une ede.