Hukuman Allah Ta'ala
2:1-16
2
B̄ara ndedena, cina ro angi, cousi nggomid̄oho d̄i ne'ekaimu kancara dou makalai? Nggomid̄oho wati ntaumu au-au ^dihorukaimu weki! B̄a one nggara nggomid̄oho makancarasi dou makalai, sapodakaina ndai nggomid̄oho makarawiku ma sama b̄une ra karawi b̄a siad̄oho, ndad̄i nggomid̄oho ma^ba^buku hukuman d̄i weki ndai raumu. 2 Pala ndai ta^badeku b̄a one Allah Ta'ala mab̄ab̄ukaina hukuman d̄i dou-dou ma karawi b̄une ede, ndad̄i au ra karawi b̄a Allah Ta'ala ede ncihi. 3 Pala nggomid̄oho, cina ro angi, ndai nggomid̄oho makarawi rauku b̄une ra b̄ab̄u ro lo'okaimu d̄i dou-dou makalai! Kacai b̄a nggomid̄oho ma loaku hori weki ra d̄i hukuman Allah Ta'ala? 4 Atao nggomid̄oho ma wi'ikai mpa mod̄ana ncera ro mbura ade Allah Ta'ala ro lembo ade Allah Ta'ala ma ndede na'e? Tantu nggomid̄oho mab̄adeku b̄a one Allah Ta'ala katadana ncera ro mbura ade-Na b̄ara ne'e b̄a Sia loakud̄u nggomid̄oho tobamu ra d̄i dosa-dosamu. 5 Pala nggomid̄oho tera ademu ro wati ne'emu rungka ruku ro rawimu. B̄ara ndedena, ndai nggomid̄oho ma naha sala'iku hukuman d̄i ru'u b̄a ndaimu d̄i wakatu Ainaina Kiama, wakatu Allah Ta'ala katadana mbani-Na ro b̄ab̄una kai hukuman ma adil. 6 Allah Ta'ala d̄imacola cepena d̄i sanikina dou ma ncihi ncao lab̄o rawina. 7 Allah Ta'ala d̄imambei mori ma sapodakaina ro ma ede ro hid̄i d̄i siad̄oho ma caha karawi mataho ^dirakakaina rawi ma d̄ese ro ntasa, ma taho poda ro ma ede ro hid̄i. 8 Pala dou-dou ma kapenti d̄i ru'u b̄a weki ndaina ro wati ne'ena to'a d̄i Allah Ta'ala, malaisi na^batuku lampa rawi ma dab̄ae, Allah Ta'ala nambani podaku d̄i dou-dou ede. 9 Sanikina dou ma ca'u karawi dab̄ae ^dimasusa ro ^dimancoki; saramba-rambakaina d̄i ru'u b̄a dou Yahudi, ro d̄i ru'u b̄a bangsa-bangsa makalaina. 10 Pala samenana dou ma ca'u karawi ma taho d̄ikad̄ese ro kantasa ro ^dikaco'i b̄a Allah Ta'ala; saramba-rambakaina d̄i ru'u b̄a dou Yahudi, ndede rauku d̄i ru'u b̄a bangsa-bangsa makalai. 11 B̄a one Allah Ta'ala wati ntanda kalaina samenana dou.12 Dou-dou bangsa makalai madosa kai wati b̄adena hukum Taurat. Ndad̄i siad̄oho d̄ihukum ari mai b̄a hukum ede. Pala dou-dou Yahudi karawina dosa sawa'u b̄a b̄adena hukum ede; b̄ara ndedena siad̄oho ^di b̄ab̄au kai dasa hukum ede. 13 B̄ara laina dou ma b̄ade hukum Taurat ma ncihi d̄i tando Allah Ta'ala, malaisi b̄ara karawina au ra tunti ade hukum ede. 14 Dou-dou bangsa makalai wati patana hukum Taurat. Pala nggara siad̄oho b̄ara kane'e ndaina karawina au ra parentakai b̄a hukum ede, ade ndai siad̄oho ma kandad̄ina hukum d̄i ru'u b̄a siad̄oho, konena wati pata b̄a siad̄oho hukum Taurat. 15 Ruku ro rawi siad̄oho edeku makatadana b̄a one hukum Taurat wara ratunti d̄ei ade siad̄oho.Ade mpida siad̄oho rau ma ndad̄i sakasi ro fiki ro kananu siad̄oho ^dimacua lo'o angi atao cua horu weki. 16 Ndedeku d̄imandad̄i peade d̄i ainaina ra wa'u katantukai ede. D̄i ainaina ede, Allah Ta'ala kai ncai Isa Al Masih, d̄imaparesa ncihi ro ncara d̄i samenana rahasia ade ro fiki ro kananu samenana dou. Lampa rawi ede ncihi ncao b̄une Injil rangoa ro kahaba b̄a nahu.
Dou Yahudi lab̄o hukum Taurat
2:17–3:8
17 Pala ake b̄uneku ndai nggomid̄oho? Nggomid̄oho makanahu weki dou Yahudi. Nggomid̄oho ma wi'i weki d̄i hukum Taurat ro nggomid̄oho ma ka'eseku wekimu b̄ara hubunganmu lab̄o Allah Ta'ala. 18 Nggomid̄oho marakaku ngoa ro tei ma taho ra d̄i hukum Taurat ede, ndad̄ina nggomid̄oho mab̄adeku au ra kane'ekai b̄a Allah Ta'ala ro mab̄adeku au ma taho ro au ma iha. 19 Nggomid̄oho ma'imbi podaku wekimu b̄a one nggomid̄oho eded̄u dou mad̄anda ro wa'a dou mambuda ro taroa d̄i ru'u b̄a siad̄oho ma wara d̄i ade rindikaina; 20 nggomid̄oho eded̄u dou ma ngoa ro tei d̄i ru'u b̄a dou-dou ma ncoki loa ka'ao ro guru d̄i ru'u b̄a dou-dou ma sampula. Nggomid̄oho ma'imbi podaku b̄a one d̄i ade hukum Taurat, nggomid̄oho mantau sara'a loa ro tingi ro ngoa ro tei ma poda. 21 Nggomid̄oho ma ngoa ro teiku d̄i ru'u b̄a dou makalai; b̄ab̄auku nggomid̄oho wati ngoa ro teikaimu d̄i ru'u b̄a weki ndaimu? Nggomid̄oho mangoa ro teiku loakud̄u dou aina mpanga, sapodakaina ndai nggomi^dohoku mampanga! 22 Nggomid̄oho manggahi, <<Aina jina,>> pala b̄ab̄auku ndai nggomid̄oho karawikaimu jina? Nggomid̄oho mani'i ademu d̄i sara'a berhala, pala b̄ab̄auku ndai nggomid̄oho weha rampakaimu isi uma berhala? 23 Nggomid̄oho maka'ese-eseku wekimu b̄ara ntaumu hukum Taurat, pala b̄ab̄auku ndai nggomid̄oho kab̄awa ro katunakaimu Allah Ta'ala kai wati ^batumu hukum Taurat. 24 D̄i ade Kitab Suci wara ratunti ndake, <<B̄ara nggomid̄oho, dou-dou Yahudi, ndad̄i ngara Allah Ta'ala i'a ro b̄a'a b̄a bangsa-bangsa makalai.>>
25 Nggara nggomid̄oho mato'asi d̄i hukum Taurat, ndad̄i sunamu ede wara onena. Pala nggara nggomid̄oho watisi loamu kalampa au ra kaukai d̄i ade hukum Taurat ede, ndad̄i suna nggomid̄oho wati poda ntauna one. 26 Nggara sab̄ua dou ma laina dou Yahudi ma wati rasuna pala na^batuku hukum Taurat, sab̄ua sia ede wati ra wi'ikai kai dou ma wa'ura suna? 27 Ro dou-dou ma wati rasuna ede ^dimakancarana nggomid̄oho, dou Yahudi, b̄ara nggomid̄oho mantau hukum Taurat ro nggomid̄oho rasuna, pala nggomid̄oho masapaku hukum ede. Siad̄oho wati rasuna, pala siad̄oho nato'aku kalampa hukum Taurat. 28 B̄ara dou Yahudi ma sapodakaina laina ngara mpoana kai dou Yahudi; ro dou ma poda-poda rasuna laina dou rasuna sacara sarumbu mpoana. 29 Pala dou ma poda-poda dou Yahudi eded̄u dou ma ntau ade ro fiki ro kananu ma taho kai dou Yahudikaina; ro suna mapoda-podakaina eded̄u suna d̄i adena rakarawi b̄a Roh Allah, laina ra tunti ade buku. Dou b̄une ede naroiku b̄a Allah Ta'ala, laina d̄iroi b̄a manusia.