La Paulus d̄i pulau Malta
28:1-10
28
Sawa'u b̄a rongga nami ta ari lua kai salama, ede ampo b̄ade b̄a nami b̄a one pulau ede ngarana pulau Malta. 2 Ela ro dou ma ngge'e d̄i pulau ede nawancuku tahona d̄i nami. Siad̄oho weha ao katahona nami sara'ana ro kana'ena afi ^diniru b̄a nami b̄ara wa'ura tampu'u londo ura ro nawancuku b̄usi ai. 3 La Paulus kab̄orona sanga-sanga haju, ro tauna d̄i ade afi. Wunga sia karawina ede, wara salona sawa malosa, b̄ara pana afi ede, edempara notona rima la Paulus. 4 Wakatu eda b̄a ela ro dou mangge'e d̄i pulau ede sawa matarambeo d̄i rima la Paulus, siad̄oho nggahina d̄i sab̄ua lab̄o ma kalaina, <<Dou ake tantu wa'ura hadena dou, b̄ara konena sia wa'ura salama d̄i bahaya moti, Dewi Ma'adil wati co'ona sia d̄imamori.>> 5 Pala la Paulus wete pakina sawa ede mab̄u d̄i ade afi ro wati iuna pili kone sato'i rau. 6 Kananu b̄a siad̄oho samporo wali rima la Paulus ^dimawinte atao sia d̄imamade sadeka. Pala sawa'u b̄a ngenana pila-pila wakatu ntoina ro wati wara mandad̄i au-au d̄i sia, lai wali kananu b̄a siad̄oho edempara nggahi siad̄oho b̄a one la Paulus eded̄u dewa.7 Wati d̄o'ona lab̄o hid̄i ede wara dana ntau la Publius, dou mana'e b̄ora d̄i pulau ede. Kai taho poda adena sia tarima aona nami kai dou ma rongga d̄i umana tolu nai ntoina. 8 Wakatu ede ama la Publius wunga maru b̄a henggena, b̄usi pana ro sera. La Paulus lao tiona ama la Publius ma hengge ede edempara do'ana ro tohona rima ese wawo ama ede ndad̄ina ama la Publius ede tahona. 9 B̄ara ma ndad̄i ede, sara'a dou ma supu d̄i pulau ede mai rakana la Paulus, ro siad̄oho sara'ana kataho b̄a la Paulus. 10 Siad̄oho nawancuku kaco'ina nami, ro wakatu nami ne'e lao loja wali, siad̄oho lao wa'ana d̄i lopi sara'a d̄i paralu b̄a nami d̄i ade lampa ro laokaimu.
La Paulus tu'u wi'ina pulau ede lao aka Roma
28:11-15
11 Sawa'u b̄a tolu wura ntoina ta aka, nami tu'u wi'imu pulau ede ro nentemu lopi ma ramai ra d̄i Aleksandria ma santoi oru b̄usi ai lab̄u d̄i pulau ede. Lopi ede wara tandana Deoskuri <<Dewa Ndua Kastor ro Poluks>>. 12 Nami lab̄umu d̄i kota Sirakusa ro ngge'emu ta ede tolu nai ntoina. 13 Ta ede nami loja walimu b̄atu kengge moti saraka aka kota Regium. B̄ala aisanai angi tampu'u mai d̄o maina, nda^dina, ade d̄ua nai nami rongga d̄i kota Putioli. 14 Ta ede nami eda angimu lab̄o pila-pila dou ma imbi d̄i Isa Al Masih, ro b̄ara rece b̄a siad̄oho nami ngge'e lab̄omu siad̄oho pidu nai ntoina. Edempara nami laomu aka Roma. 15 Cina ro angi d̄i Roma ma imbi d̄i Isa ringana haba mab̄oha nami, ndad̄ina siad̄oho maina sampe d̄i Amba Apius ro Pasanggarahan Tolu d̄iweha aokaina nami. Wakatu la Paulus eda angina lab̄o siad̄oho, sia rentana do'a syuku d̄i Allah Ta'ala ro tenggo poda adena.
D̄i Roma
28:16-31
16 Wakatu la Paulus ronggana d̄i Roma, Pamarenta Roma kauna la Paulus ngge'e kese d̄i sab̄ua uma kai rajaga b̄a sab̄ua dou tentara.
17 Sawa'u b̄a tolu nai, la Paulus ouna dou-dou ma na'ekai Yahudi d̄i hid̄i ede. Ro sawa'u b̄a kab̄oro weki siad̄oho, nggahi sia d̄i siad̄oho, <<Cina ro angi! Nahu wati wara ncaraku au-au d̄i bangsa ndai, atao sapaku rawi rasa ranginakai ra tarimata ra d̄i wa'i ro waro ndaita. Kone ade ndedekaina nahu wa'u ro leto b̄a dou d̄i Yerusalem ro d̄onggona nahu d̄i dou-dou Roma. 18 Sawa'u b̄a nggori paresa parakara nahu, siad̄oho nane'eku hori nahu, b̄ara nahu wati wara karawiku ma ncara kone sab̄ua rau ma patu d̄ib̄ab̄u kai hukuman made. 19 Pala b̄ara dou-dou Yahudi ma'ao nahu wati tarimana b̄a one parakara ede wa'ura nggori, ndad̄i nahu rahoku paresa mboda parakara nahu ede d̄i Kaisar Roma. Nahu karawiku ede laina b̄a wara d̄ine'eku b̄ab̄u ro lo'o bangsa ndaiku. 20 Ro b̄ara ndedena nahu rahoku eda angi lab̄o nggomid̄oho b̄a ne'eku nuntu ro nggahi lab̄o nggomi^doho; nahu randante, b̄ara imbiku d̄i Al Masih ra ngena-ngena b̄a bangsa Israel.>>
21 Edempara siad̄oho nggahina d̄i sia, <<Nami watipu tarimamu kone salela sura d̄i Yudea mab̄oha nggomi. Ro wati wara kone sab̄ua dou rau ta aka ma mai wa'a haba mab̄oha nggomi atao manuntu ma iha mab̄oha nggomi. 22 Pala nami mane'e ringa rau mab̄oha imbi nggomi, b̄ara nami sara'a wa'ura ringamu dou ma wati ca'u d̄i ngoa ro tei ra'imbi b̄a ndai nggomi ede.>>
23 Edempara siad̄oho lab̄o la Paulus katantuna ainaina d̄i edakai angi wali. D̄i ainaina ede mboto dou ma mai d̄i hid̄i ngge'ekai la Paulus. Tampu'u aimasid̄i saraka aimambia la Paulus ngoa kab̄aena ro kahabana d̄i siad̄oho mab̄oha Karaja'an Allah. Kai kanina ayat-ayat Kitab Taurat ro Kitab Nabi-nabi, la Paulus usahana loakud̄u siad̄oho imbina d̄i Isa Al Masih. 24 D̄i weki dou ma mai ede wara ma imbi d̄i au ra nggahi b̄a la Paulus, pala wara rau ma wati imbi. 25 Edempara doud̄oho ede cua dula mena ndaina kai wati wara kasab̄uana nggahi, sawa'u b̄a la Paulus nggahina d̄i siad̄oho, <<Ncihi romo au ra nggahi b̄a Allah Ta'ala kai ncai Nabi Yesaya d̄i wa'i ro waro nggomid̄oho! 26 Nggahi Allah Ta'ala,
<Laora nggahipu d̄i bangsa ake:
Nggomi d̄imaringa ro ringa wali, pala wati loamu ka'ao;
nggomi d̄ima'eda ro eda wali pala wati b̄ademu au ma wa'ura nda^di.
27 B̄ara fiki ro kananu bangsa ake wa'ura ndad̄i mpula,
fiko siad̄oho wa'ura ndad̄i mpinga ro mada siad̄oho wa'ura kapu weki.
Ake ndad̄ikaina loakud̄u mada siad̄oho wati loana eda,
fiko siad̄oho aina ringana,
fiki ro kananu siad̄oho aina loa ka'ao,
ro aina mbalina d̄i Nahu,
loakud̄u Nahu d̄imakatahona sia^doho.> >>
28 Edempara nggahi la Paulus, <<Cina ro angi pab̄uapu b̄ademu b̄a one haba mab̄oha mori salama ma ramai ra d̄i Allah Ta'ala ake wa'ura kahaba d̄i bangsa-bangsa ma laina Yahudi. Siad̄oho d̄imab̄atuna!>> 29 Sawa'u b̄a la Paulus nggahi ndedena, dou-dou Yahudi ede tu'u wi'ina hid̄i ede ro cence ncihina sab̄ua lab̄o ma kalaina.
30 ^Dua mba'a mpuli ntoina la Paulus ngge'ena d̄i Roma, d̄i uma ra sewa b̄a ndaina. Sia naca'u tarima ao sara'a dou ma mai lamba sia. 31 Kai disa poda, sia ngoa ro kahabana d̄i siad̄oho mab̄oha b̄uneku Karaja'an Allah ro mab̄oha Ruma Isa Al Masih. La Paulus karawina ede kai nuntu ntirina ro wati wara dou ma hakona.