La Paulus loja lao aka Roma
27:1-12
27
Nggahi b̄a Gubernur b̄a one nami pab̄uaku loja lao aka Italia, ndad̄i la Paulus ro pila-pila dou ra bui ma kalaina d̄onggo d̄i la Yulius, perwira tentara Roma ^dipehe rau kai <<Resimen Kaisar>>. 2 Nami nentemu lopi ma mai ra d̄i Adramitium, edempara laokaimu lopi ede ma wa'ura ne'e loja lao aka sanikina lab̄u d̄i sanaru kengge moti Asia. La Aristarkhus, sab̄ua dou Makedonia ma mai ra d̄i Tesalonika, lao sama rauna lab̄o nami. 3 B̄ala aisanai nami rongga d̄i Sidon. La Paulus nawancuku weha ao kataho b̄a la Yulius. Sia kauna la Paulus lao lamba lenga-lengana loakud̄u siad̄oho loa mbei d̄i sia au-au ^diparaluna. 4 Ra d̄i Sidon nami lao loja walimu. B̄ara angi masambali lab̄o lopi, nami loja ntuwumu b̄atu kengge moti pulau Siprus ma wati ipi b̄oha b̄a angi. 5 Ro nami lojamu d̄i moti ma ncao tando lab̄o Kilikia ro Pamfilia edempara rongga d̄i Mira d̄i dana ro rasa Likia. 6 D̄i Mira Perwira ede rakana sab̄ua lopi ma mai ra d̄i Aleksandria ma ne'e lao loja aka Italia. Ndad̄i sia kauna nami ne'e lopi ede.7 Pila-pila nai ntoina nami lojamu nawancuku ahona ro kai nggonggi podamu, nami ronggamu sampe d̄i tando kota Knidus. Edempara b̄ara angi mbuipu kentena ma mai d̄i tando lopi, nami wati loamu loja d̄i ncai masarambakaina. Ndad̄i nami loja lao d̄o kengge moti pulau Kreta kalalo Tanjung Salmone loakud̄u ta aka nami wati b̄oha b̄a angi. 8 Susa poda nami loja b̄atumu kengge moti pulau ede edempara nami ronggamu d̄i sab̄ua hid̄i ma ngara lab̄u Ntika, wati d̄o'ona lab̄o kota Lasea.
9 Wakatu ede Aruraja Damekai j dou-dou Yahudi wa'ura nggori. Nami wa'ura mboto pakimu wakatu, ndad̄ina wakatu ^dilojakai watid̄u tahona. B̄ara ndedena la Paulus ngoa ro tei katahona ake d̄i siad̄oho, 10 <<Cina ro angi, kananu b̄a nahu, b̄a one nawancuku ^di'ihakai nggara loja ntuwusi ndai. Ndai ^dimarugi na'e poda lai mpoana d̄i wua ro lopi ndai, pala nawa ndai rau ^dimambora.>> 11 Pala perwira ede na'ipipu imbina d̄i dou ma wa'a lopi ro kapten lopi ntewikaisi d̄i au ra nggahi b̄a la Paulus. 12 Hid̄i la^bukai lopi ta ede poda romo wati tahona ^dila^bukai oru b̄usi ai. B̄ara ndedena mboto dou ma b̄atu lopi nangawaku lao loja wali tu'u wi'i hid̄i la^bukai lopi ede b̄ara siad̄oho nane'eku usaha rongga d̄i Feniks ro ngge'e ta aka santoi oru busi ai. Feniks eded̄u hid̄i la^bukai lopi d̄i Kreta ma satando wela ^do-na ro tando d̄i ta wela ^da-na.k
Galo na'e d̄i moti
27:13-44
13 Wakatu ede angi kasiso ma mai d̄o mai. Ndad̄i dou mab̄atu lopi kacaina siad̄oho wa'ura loa loja wali. Ndad̄i siad̄oho salo'a ro ampana jangka edempara loja b̄atuna kengge moti pulau Kreta. 14 Pala wati ntoi sawa'u b̄a ede mai angi kente -- eded̄u d̄i pehekai angi mamai ta Ele wela ^Da-na -- d̄i pulau ede ma ipi kente, 15 ro ^boena lopi nami. B̄ara wati lu'u b̄a aka lopi loja wali aona angi, ndad̄i nami kamidi mpa weki ro co'omu lopi wa'a b̄a angi. 16 Nami anco b̄a balumba saraka aka kengge moti pulau to'i, ma ngara Kauda. Ta ede kai maki podamu nami loamu kamud̄i kantiri lopi ede. 17 Sawa'u b̄a ampa b̄a nami sampa tonda ese lopi, lopi ede katenggo kai ai ra d̄iki pote heko lopi ede. B̄ara dahu ntangga d̄i sarae Sirtis ma tendo, edempara kalondo loja ro co'o lopi b̄atu ta b̄e rawa'akai b̄a angi. 18 Angi na'e ro galo wati dengga-denggana, ndad̄ina b̄ala aisanai wua lopi tampu'ura paki ade moti. 19 B̄ala ai sanai wali dou-dou mab̄atu lopi ede paki rauna tau ro tu'i lopi ede ade moti. 20 Pila-pila nai ntoina nami wati edamu liro ro ntara, ro angi na'e ro galo wati dengga-denggana. Cumpukaina nami wa'ura tawaka.
21 Pila-pila nai ntoina dou-dou ede wati ngaha ro nonona. Ndad̄i la Paulus lao kad̄ina d̄i woha siad̄oho ro nggahina, <<Cina ro angi! Paira b̄atumu nggahi nahu ro wati loja tu'u wi'imu pulau Kreta, ndai wati iu sara'a iha leli ro rugi b̄une ake. 22 Pala ake rau nahu maraho poda-poda d̄i nggomid̄oho katenggopu ademu. Wati kone sab̄ua dou rau d̄i ade weki nggomid̄oho ^dimamade; pala lopi ndai ake mpa ^dimambi'a sambura. 23 B̄ara aka sanga^dina mala'eka ma ramai ra d̄i Allah Ta'ala ra nemba b̄a nahu, eded̄u Allah Ta'ala ma kantauna nahu, maina d̄i nahu. 24 Nggahi mala'eka ede, <Aina dahu, Paulus! B̄ara nggomi d̄imalao satando Kaisar. Ro b̄ara taho ade Allah Ta'ala d̄i nggomi, sara'a dou ma loja lab̄o nggomi d̄imasalama b̄ara nggomi.> 25 B̄ara ndedena, cina ro angiku, pab̄uapu katenggo ademu! B̄ara nahu ka'imbi d̄i Allah Ta'ala b̄a one sara'ana d̄imandad̄i b̄une ra nggahi-Na d̄i nahu. 26 Pala lopi ndai ake ^dimantangga d̄i kengge moti sab̄ua pulau.>>
27 D̄i aimangad̄i ma kasampuru upa naikaina nami mbuipu anco b̄a balumba d̄i Moti Adria. Takasi b̄oha ai, dou mab̄atu lopi iuna b̄a one lopi siad̄oho wa'ura ^deni lab̄o kengge moti. 28 Ndad̄i siad̄oho d̄ikina wadu kai ai d̄i uku tiokaina d̄ei moti. Palasi hid̄i ede d̄eina ne'empara upa mpuru mete. Wati ntoina sawa'u b̄a ede siad̄oho uku walina, edempara b̄adena d̄ei moti d̄i hid̄i ede takasi tolu mpuru mete. 29 Siad̄oho nadahuku lopi ntangga d̄i wadu taka, ndad̄i siad̄oho kalondona upa mbua mangga ta ari keto lopi, d̄i ne'e b̄a siad̄oho roci taroa ai. 30 Kai wati b̄ade b̄a dou ma kalai ade lopi, dou-dou ma b̄atu lopi nane'eku rai tu'u wi'i lopi ede. Siad̄oho kalondona sampa tonda awa oi b̄une-b̄une siad̄oho mane'e kalondo mangga d̄i tuta lopi. 31 Pala nggahi la Paulus d̄i perwira ro tentara-tentara ma wara d̄i lopi ede, <<Nggara watisi midina d̄i lopi dou-dou mab̄atu lopi ake, nggomid̄oho sara'ana wati wara ma salama.>> 32 B̄ara ndedena tentara-tentara ede dompona ai sampa tonda ede, ndad̄ina sampa tonda ede oro wa'a b̄a oi moti.
33 Sawatipu b̄ala ai, la Paulus kauna siad̄oho sara'a ngaha ro nono. Nggahi la Paulus, <<Wa'ura sampuru upa nai ntoina nggomid̄oho sara'ana ma ngena mpa kai darura ro wati ngahamu au-au. 34 Nahu makau nggomid̄oho ngaha wa'upu sato'i. Ede taho d̄i ru'u b̄a nggomid̄oho, d̄i tenggo walikaimu. B̄ara nggomid̄oho sara'a d̄imasalama ro wati ^dimakura au-au.>> 35 Sawa'u b̄a nggahi ndedena la Paulus wehana roti ro do'a syukuna d̄i Allah Ta'ala d̄i tando siad̄oho sara'ana. Sawa'u b̄a ede cengga-cenggana roti ede, edempara ngahana. 36 Ndad̄i siad̄oho sara'ana tenggo mbali adena ro ngaha samana. 37 Sara'a weki ma wara d̄i lopi ede wara 276 dou. 38 Sawa'u b̄a ngaha ro nono, siad̄oho pakina gandum ra wua ade lopi d̄ei moti loakud̄u lopi wati ipi tanina.
39 Wakatu wa'ura taroa ai, dou-dou ma b̄atu d̄i lopi edana mangokaina, pala siad̄oho wati b̄adena dana ro rasa au ede. Siad̄oho edana sab̄ua moti tumpu ma piri kenggena. Ndad̄i siad̄oho nane'eku lao lab̄u lopina ta aka nggara loasi. 40 Ndad̄i ai-ai mangga ede dompo sara'ana edempara mangga-mangga ede co'ona mimi d̄i ade moti. Wakatu ede rau siad̄oho hori rauna ai-ai ra d̄iki kai lopi. Edempara siad̄oho ampana loja d̄i tuta lopi loakud̄u lopi ede wa'a b̄a angi lao aka kengge moti. 41 Pala lopi ede ncorana sarae. Tuta lopi mpangge d̄i sarae ro wati loana ruku, ketona leli ^boe b̄a balumba.
42 Tentara-tentara d̄i lopi ede nane'eku hade sara'a dou-dou ra bui, b̄ara siad̄oho nadahuku wara ma liwa lao aka kengge moti edempara raina. 43 Pala perwira ede matapana siad̄oho ede b̄ara sia nane'eku kasalama la Paulus. Sia kauna sara'a dou ma loa liwa babu ulu ro liwa lao aka kengge moti; 44 ro ma kalaina pab̄uaku b̄atu kentona kai nenti kapenta-kapenta atao au-au ra mbi'akai lopi ede. Ndedeku nami sara'ana salama sampe ta ari kengge moti.