Kisah Rasul-Rasul 26

2 <<Ma d̄ese ro ntasa Sangaji Agripa! Mada neo poda adeku d̄i ainaina ake loaku karongga nuntu ro nggahi d̄i horukaiku weki d̄i tando Sangaji mab̄oha sara'a au ra b̄ab̄u ro lo'okai b̄a dou-dou Yahudi d̄i mada; 3 ma penti poda b̄a one Sangaji mab̄ade poda rawi rasa ra nginakai ro masa'ala dou Yahudi. B̄ara ndedena, mada maraho poda-poda d̄i Ita takade'e to'ipu nuntu ro nggahi mada kai lembo ade.

4 Sara'a dou Yahudi nab̄adeku mori ro woko mada ra'aipu to'i-to'i mada. Siad̄oho nab̄adeku b̄a one aipu tampu'u sampela mada, mada wa'ura moriku d̄i ade woha bangsa ndai mada d̄i Yerusalem. 5 Ntoi wa'ura siad̄oho b̄adena mab̄oha mada. Ro nggara nane'esi b̄a siad̄oho, siad̄oho naloaku ngoa b̄a one ra'aipu saramba wa'una mada wa'ura moriku kai dou Farisi ro b̄atu sara'aku atoran ma ipi tenggo d̄i ade agama ndaita. 6 Ro ake mada makid̄i ta ake d̄iparesa b̄ara mada imbiku d̄i au ra sake b̄a Allah Ta'ala d̄i wa'i ro waro ndaita. 7 Au ra sake ede rau d̄ine'e b̄a sampuru d̄ua suku bangsa Israel, ndad̄ina siad̄oho sambea ro ibada d̄i Allah Ta'ala aimarai aimanga^di. Sangaji ma d̄ese ro ntasa, b̄ara mada imbiku d̄i au ra sake ede mada kancara b̄a dou-dou Yahudi. 8 B̄ab̄auku ita^doho, dou-dou Yahudi wati imbikaimu b̄a one Allah Ta'ala makamori mbali dou mamade?

9 Ntoina ndai mada rau manggahi b̄a one mada pab̄uaku karawi sara'a ^di'aokaiku Isa dou Nazaret ede. 10 Ro poda romo edeku ra wa'u karawi b̄a mada d̄i Yerusalem. Kai sura kuasa ra mbei b̄a dou-dou mana'ekai imam, mada wa'ura kalu'uku d̄i ade uma bui mboto dou-dou ma to'a d̄i Allah Ta'ala. Mada rau kangawa loakud̄u siad̄oho ede d̄i^ba^bu kai hukuman made. 11 Mboto poda mada kancokiku siad̄oho d̄i uma-uma sambea ro ibadakai, mada pakasaku siad̄oho loakud̄u wati imbina d̄i Isa Al Masih. B̄a ipi fa'a adeku d̄i siad̄oho, ndad̄ina mada cocoku siad̄oho sampe d̄i kota-kota makalaina ari mai b̄a dana ro rasa Israel.>>

12 <<Kai au ra kane'ekai ede rau mada wa'aku sura kuasa d̄i dou-dou mana'ekai imam ro laoku aka Damsyik. 13 Sangaji ma d̄ese ro ntasa, wakatu mada wara d̄i woha ncai, wakatu mbolo ninu, wed̄i lalo mpa mada edaku sab̄ua cahaya ma mai ra d̄i langi ma ncewi taroa ntewikaisi taroa liro. Cahaya ede makataroa hekona mada ro dou-dou ma lampa lab̄o mada. 14 Madad̄oho sara'a mbo'o suncu d̄i dana. Edempara mada ringaku eli ma nggahi d̄i mada kai nggahi Ibrani, <Saulus, Saulus! B̄ab̄auku nggomi kancokikaimu Nahu? Nggomi d̄ima'iu susa ro ncoki ndaimu nggara ma'ao ncausi Nahu ma ndad̄i Rumamu.> 15 Edempara sod̄i b̄a mada, <Cou Ita?> Ro cambe b̄a Ruma, Nahu Isa ra kancoki b̄a nggomi. 16 Tu'u ro ki^dira! Nahu katadaku weki d̄i nggomi b̄a ne'eku hanta nggomi d̄imandad̄i dou makarawi wea Nahu. Nggomi pab̄uapu ngoa ro kahabamu d̄i dou makalai au ra eda b̄a nggomi d̄i ainaina ake mab̄oha Nahuⁱ ro mab̄oha au ra kaukai b̄a Nahu d̄i nggomi d̄i wakatu ma kento. 17 Nahu d̄imahori nggomi ra d̄i bangsa Israel ro d̄i bangsa ma kalai ma laina Yahudi. Nahu ^dimakau nggomi lao d̄i siad̄oho 18 d̄imahengga wea mada siad̄oho, loakud̄u siad̄oho losa ra d̄i ma rindi ro lu'u d̄i hid̄i ma taroa; loakud̄u siad̄oho hori weki d̄i ade pangarukai b̄a Iblis, edempara kuasakai b̄a Allah Ta'ala. Ndad̄i kai imbina d̄i Nahu, dosa-dosa siad̄oho wa'ura kangampu wea ro siad̄oho d̄imandad̄i ela Allah Ta'ala ra ka^dale.> >>

19 <<Bara ndedena, Sangaji Agripa, mada ngge'e mpa b̄atu ro to'aku d̄i au ra eda b̄a mada ra katada b̄a Allah Ta'ala. 20 Kai ngoa ntiri b̄a mada d̄i dou-dou b̄a one siad̄oho pab̄uaku pakina rawina ma dab̄ae ro d̄onggona weki d̄i Allah Ta'ala ro katadana d̄i ade mori siad̄oho b̄a one siad̄oho wa'ura tobana ra d̄i dosa-dosa siad̄oho.Mada ngoaku lampa rawi ede sarambakaina d̄i dou Damsyik, edempara d̄i Yerusalem ro d̄i sara'a Yudea ro d̄i dou-dou ma laina Yahudi. 21 Ndad̄i b̄ara ndedena dou-dou Yahudi wa'u ro letokaina mada d̄i Bait Allah ro nane'eku hade mada. 22 Pala sampe ake mada bantu b̄a Allah Ta'ala, ndad̄ina mada loa kad̄i ta ake ^dimanuntu ro nggahi d̄i sara'a dou -- mana'e ro mato'i. Au ra nggahi b̄a mada ake sama mpa b̄une ra wa'u ngoa ulu b̄a Allah Ta'ala ra karongga b̄a nabi-nabi ro la Musa; 23 eded̄u b̄a one Sangaji Makasalama ra sake b̄a Allah Ta'ala ede pab̄uaku iuna susa ro ncoki, ro mandad̄i dou ma sarambakaina ma mori mbali sawa'u b̄a madena; loakud̄u kai ncai ede, Sia ^dimakahaba mab̄oha taroa -- eded̄u mori d̄i salamakai -- nataho d̄i ru'u b̄a dou-dou Yahudi ro d̄i dou-dou ma laina Yahudi.>>

24 La Paulus mbuipu nuntu ro nggahina mab̄oha horukai wekina ede, la Festus kanggicana, <<Nggomi wa'ura ringu Paulus! Ilmu nggomi ma mboto ede wa'ura kandad̄ina ringu nggomi!>> 25 Pala cambe b̄a la Paulus, <<Mada wati ringuku, Gubernur ma d̄ese ro ntasa. Mada kanggahi mpa ma poda ro ma ncihi ma ralosa ra d̄i kananu ma raso. 26 Ndai ita Sangaji Agripa mab̄ade podana d̄i lampa rawi ede. B̄ara ndedena mada disaku nuntu ro nggahi d̄i tando Sangaji kai nuntu ntiriku. Mada ka'imbi podaku wati kone sab̄ua rau d̄i ade lampa rawi ede ma watipu b̄ade b̄a Sangaji, b̄ara sara'ana ede wati ndad̄ina d̄i hi^di-hid̄i ma cili weki. 27 Ma D̄ese ro ntasa Sangaji Agripa, sab̄ua Ita ma'imbiku d̄i au ra nggahi b̄a nabi-nabi? Nggahi b̄a mada, ita ma'imbiku!>>

28 Edempara nggahi b̄a Sangaji Agripa d̄i la Paulus, <<Kacai b̄a nggomi mod̄a kandad̄i nahu ela Al Masih d̄i ade wakatu samporo ake?>> 29 <<D̄i ade wakatu ma samporo atao ma ^dondo,>> cambe b̄a la Paulus, <<Mada mado'a raho d̄i Allah Ta'ala loakud̄u Sangaji ro Itad̄oho ma ringa ro kade'e nuntu mada d̄i ainaina ake loa d̄imandad̄i b̄une mada -- selasi rante ake!>>

30 Edempara Sangaji, Gubernur, ro la Bernike, ro sara'a ma kalaina tu'u ki^dina. 31 Wunga lampa losana ta ari lua, siad̄oho nggahina d̄i sab̄ua lab̄o ma kalaina, <<Dou ake wati wara karawina ma ncara ma patu d̄ihukum kai hukuman made atao ^dibui.>> 32 Edempara nggahi Sangaji Agripa d̄i la Festus, <<Dou ake loara ^dihori, pai sia watisi rahona paresa mboda parakarana d̄i pangadilan Kaisar.>>