La Paulus rahona paresa mboda parakarana d̄i Kaisar
25:1-12
25
Tolu nai sawa'u b̄a la Festus rongga d̄i dana ro rasa Yudea, sia tu'u wi'ina Kaisarea ro lao aka Yerusalem. 2 Ta aka dou-dou mana'ekai imam ro dou-dou matuakai Yahudi ngoana d̄i sia ra b̄ab̄u ro lo'okai b̄a siad̄oho d̄i la Paulus. Siad̄oho siwi ncauna la Festus 3 loakud̄u kai taho adena d̄i siad̄oho, sia ngawana kau dou lao wa'a la Paulus aka Yerusalem; b̄ara siad̄oho wa'ura mafakana ne'e hade la Paulus d̄i woha ncai. 4 Pala cambe b̄a la Festus, <<La Paulus wunga bui b̄a nami d̄i Kaisarea; ro ndai nahu rau wati ntoi walina d̄imadula mbali ta aka. 5 Ndad̄i, natahopu dou-dou ma penti d̄i ade weki nggomid̄oho d̄imalao sama lab̄o nahu aka Kaisarea d̄imawa'a parakara sia ta aka, nggara napodasi wara karawina mancara.>>6 Sawa'u b̄a la Festus ngge'ena d̄i Yerusalem takasi waru atao sampuru nai wali, sia lao dula mbalina aka Kaisarea. B̄ala aisanai sia katu'una sidang pengadilan ro kauna dou mai wa'a satando la Paulus. 7 Wakatu rongga la Paulus, dou-dou Yahudi ma wa'ura mai ra d̄i Yerusalem ma kad̄i hekona, ro tampu'ura b̄ab̄u ro lo'ona ma tani d̄i sia. Pala siad̄oho wati loana mbei bukuti mab̄oha b̄ab̄u ro lo'okaina ede. 8 D̄i ade horukaina weki ndaina, nggahi la Paulus, <<Mada wati wara karawiku ma ncara d̄i hukum Taurat atao d̄i Bait Allah ro d̄i Kaisar Roma.>>
9 Pala la Festus nane'eku weha ade dou Yahudi. Edempara sod̄i b̄a sia d̄i la Paulus, <<Sab̄ua mangawa nggomi lao aka Yerusalem d̄iparesa d̄i tando nahu ta aka mab̄oha au ra b̄ab̄u ro lo'okai ede?>>
10 Cambe b̄a la Paulus, <<Mada wunga ki^diku d̄i tando mahkama Kaisar Roma; ro d̄i hid̄i edeku mada pab̄ua ^diparesa. Ndai ita mab̄adeku b̄a one mada wati wara ncaraku d̄i dou Yahudi. 11 Nggara mada kawa'usi rasapaku hukum ro karawiku ma patu d̄i^ba^bu kai hukuman made, mada nira adeku made. Pala nggara nawatisi podana au ra b̄ab̄u ro lo'okai b̄a siad̄oho ede, wati kone sab̄ua dou rau maloana d̄onggo mada d̄i siad̄oho.Mada maraho paresa mboda d̄i pengadilan Kaisar!>>
12 Sawa'u b̄a mafaka lab̄o dou-dou mataki ngoa ro tei kataho, nggahi la Festus, <<Raho b̄a nggomi d̄iparesa mboda d̄i pengadilan Kaisar, ndad̄i nggomi pab̄uapu lao satando wa'u Kaisar.>>
La Paulus d̄i tando sangaji Agripa ro amancawana ma ngara la Bernike
25:13-27
13 Pila-pila nai sawa'u b̄a ede, Sangaji Agripa ro amancawana la Bernike maina d̄i Kaisarea ^dimarentana nggahi taho ro ntai d̄i ru'u b̄a la Festus. 14 Sawa'u b̄a siad̄oho wara pila-pila nai ta ede, la Festus ngoa kab̄aena parakara la Paulus d̄i Sangaji Agripa. Nggahi la Festus, <<Ta ake wara sab̄ua dou ra bui ra tu'u wi'i b̄a la Feliks. 15 Wakatu mada wara d̄i Yerusalem, dou-dou mana'ekai imam ro dou-dou matuakai Yahudi mai wa'ana parakara dou ake ro rahona loakud̄u mada ma ^ba^bukaina kai hukuman d̄i ru'u b̄a dou ede. 16 Pala cambe b̄a mada b̄a one dou Roma wati loana d̄onggo ndede lalo sab̄ua dou ra b̄ab̄u ro lo'o ^dihukum, dou ede sawatipu ncao tandona lab̄o dou-dou ma b̄ab̄u ro lo'ona ro mbei wakatu d̄i horukaina wekina ra d̄i au ra b̄ab̄u ro lo'okai ede. 17 Ndad̄i, wakatu siad̄oho maina ta ake, mada wati ngena ntoiku. B̄ala ai sanai mada katu'u laloku sidang pengadilan ro kauku mai wa'a dou ede ade sidang. 18 Wakatu dou-dou ma^ba^bu ro lo'ona tu'u kad̄i ro karonggana au ra b̄ab̄u ro lo'okai b̄a siad̄oho, siad̄oho wati wara karonggana rawi mancara kone sato'i rau b̄une ra kacai b̄a mada ^dikarongga b̄a siad̄oho. 19 Siad̄oho wati sab̄ua nggahina lab̄o sia mab̄oha agama ndai siad̄oho ro mab̄oha sab̄ua dou ma ngara Isa. Dou ede wa'ura made, pala la Paulus nanggahi kapodaku b̄a one dou ede mori. 20 Mada mbora akaku b̄a one b̄uneku carana mada loakaiku raka nuntu ro nggahi mapoda mab̄oha parakara ede, sod̄i b̄a mada d̄i la Paulus sab̄ua sia nangawa lao aka Yerusalem d̄iparesa wea parakarana ta aka. 21 Pala la Paulus rahona paresa mboda parakarana ede; sia rahona loakud̄u sia ngge'e mpa d̄i ade uma bui sampe parakarana kanggori b̄a Kaisar. B̄ara ndedena mada kauku dou loakud̄u sia ngge'e mpa ^dibui, sampe wakatu d̄i nggadukai b̄a mada sia d̄i Kaisar.>> 22 Edempara nggahi la Agripa d̄i la Festus, <<Ndai nahu rau mane'e ringa b̄a ndaiku nuntu dou ede.>> <<Naisi Ita maloaku ringa nuntu sia,>> cambe b̄a la Festus.
23 B̄ala ai sanai sangaji Agripa lab̄o la Bernike maina kai upacara na'e ro ntoruna. Siad̄oho lu'una d̄i hid̄i sidangkai lab̄o dou-dou mana'ekai lewa ro laka lab̄o dou-dou mapenti d̄i kota ede. Kai parenta b̄a Festus, la Paulus wa'a kalu'u d̄i ade sidangkai ede. 24 Edempara nggahi Festus, <<Sangaji Agripa ro dou-dou ma wara ta ake! Dou ake wa'ura da'awa b̄a sara'a bangsa Yahudi d̄i mada, nataho d̄i Yerusalem ro ma wara ta ake. Siad̄oho raho pab̄uana ro kanggica menana b̄a one sia wati patuna d̄iwi'i kamori. 25 Pala mada wati rakaku eda ra karawina mancara ma patu d̄i^ba^bu kai hukuman made. Ro b̄ara ndai sia wa'ura rahona parakarana d̄iparesa d̄i pengadilan Kaisar, mada wa'ura nggahiku b̄a one sia ^dinggadu b̄a mada d̄i Kaisar. 26 Pala mada wati ntauku bukuti rawi ncarana mab̄oha weki ndai sia ratunti ade sura mada ^dinggaduku d̄i Kaisar. B̄ara ndedena mada mai wa'a satandoku sia d̄i itad̄oho sara'ana, ma penti poda d̄i tando ma d̄ese ro ntasa Sangaji Agripa! Loakud̄u sawa'u b̄a paresa ake, wara nggahi ^ditunti b̄a mada ade sura. 27 B̄ara ^di'iu b̄a mada, wati patuna nggadu sab̄ua dou rabui watisi wara sura ^dingoakai au ra rawina ma ncara ra b̄ab̄u ro lo'o b̄a dou d̄i sia.>>