La Paulus da'awa b̄a dou-dou Yahudi
24:1-9
24
Lima nai sawa'u b̄a ede, Imam Agung ma ngara la Ananias ro dou-dou ma tuakai Yahudi lao aka Kaisarea lab̄o sab̄ua dou pengacara ma ngara Tertulus. Siad̄oho mai satandona Gubernur Feliks ro da'awana la Paulus. 2 Wakatu la Tertulus kau lu'u d̄ei tando, sia b̄ab̄u ro lo'ona la Paulus b̄une ake,<<Gubernur ma d̄ese ro ntasa! Ade parentakai b̄a Ita dana ro rasa madad̄oho ndad̄i taho ro sana. Ro kai loa timba ro lemba Ita rau wa'ura mboto ra kataho d̄i ru'u b̄a bangsa mada^doho. 3 Madad̄oho matarima ao sara'ana ede kai renta syuku ta b̄e-b̄e rau. 4 Pala loakud̄u wati mboto paki wakatu Ita, mada maraho d̄i Ita loakud̄u ita ngawata ringa da'awa madad̄oho ma poro ake. 5 Madad̄oho mboto rakamu eda dou ake makangango rasa ma bahaya poda. Ta b̄e-b̄e sia ma kamaina ngango ro ngora d̄i woha dou-dou Yahudi ro sia mana'ekaina dou-dou kalompo Nasrani. 6 Sia rau nane'e kasampu ro kanggele Bait Allah, b̄ara ndedena madad̄oho wa'u ro letomu sia. Madad̄oho mane'e hukum sia kai hukum agama ndai mada^doho. 7 Pala mana'ekai tentara eded̄u la Lisias ma weha rampa sia d̄i mada^doho, 8 ro parentana loakud̄u dou-dou mada'awa sia mai satando d̄i Ita. Nggara Ita maparesasi dou ake, ndai Ita ^dimaringana d̄i sia sara'a parakara ra da'awakai b̄a madad̄oho ake d̄i sia.>> 9 Dou-dou Yahudi ma wara ta ede b̄atu rauna b̄ab̄u ro lo'o la Paulus ro makancihina sara'a au ra nggahi b̄a la Tertulus.
La Paulus horuna weki d̄i tando Gubernur Feliks
24:10-23
10 Edempara gubernur ede mbeina tanda d̄i la Paulus b̄a one sia loara nuntu. Edempara nggahi la Paulus, <<Mada kab̄adeIta mandad̄i hakim dana ro rasa ake wa'ura pila-pila mba'a ntoina. B̄ara ndedena mada sana adeku mai horu weki d̄i Ita. 11 Ita maloaku paresa kab̄ae b̄a one wati ncewina sampuru d̄ua nai ma rawa'u mada laoku aka Yerusalem ne'e lao sambea ro ibada. 12 Ro wati wara dou-dou Yahudi ede maraka eda mada masa^du'u ro macence ncihi kone lab̄o sab̄ua dou rau atao makab̄oro dou ^dimakamaina ngango ro ngora nataho d̄i Bait Allah ro d̄i uma-uma sambea ro ibadakai atao ta b̄e-b̄e d̄i ade kota. 13 Siad̄oho rau wati loana mbei bukuti d̄i Ita mab̄oha b̄ab̄u ro lo'o ra da'awakai b̄a siad̄oho d̄i ru'u b̄a mada. 14 Pala mada mangaku d̄i Ita b̄a one mada manemba Allah Ta'ala b̄a wa'i ro waro madad̄oho kai ncai ngoa ro tei b̄a Isa Al Masih ra wi'ikai b̄a siad̄oho ncara. Pala mada mbuipu imbiku d̄i sara'a hukum ra tunti d̄i ade Kitab Taurat ro hukum ade Kitab Nabi-nabi. 15 Sama b̄une siad̄oho, mada ka'imbi d̄i Allah Ta'ala b̄a one sara'a dou ^dimamori mbali sawa'u b̄a made -- dou-dou mataho, ro dou-dou mada^bae! 16 B̄ara ndedena mada usaha ncauku mori kai raso loakud̄u ade mpidaku raso ro nira d̄i tando Allah Ta'ala ro d̄i tando manusia.
17 Sawa'u b̄a pila-pila mba'a mada wati wara d̄i Yerusalem, mada dula mbaliku ta aka d̄i wa'akaiku piti d̄i bantukai bangsa mada ro d̄i d̄onggo ro mbeikaiku koroba d̄i Allah Ta'ala. 18 Wakatu karawi b̄a mada ede, siad̄oho rakana eda mada d̄i Bait Allah, sawa'u b̄a mada nggori kalampaku upacara karaso weki. Wati wara mboto dou malab̄o mada, ro wati wara ngango ro ngora ta ede wakatu ede. 19 Wara pila-pila dou Yahudi mpa ta aka. Dou-dou ede ra d̄i propinsi Asia. Siad̄oho edeku ma sapodakaina wara ta ake mancunduna d̄i ita au rawi mada ra eda b̄a siad̄oho, nggara nawarasi da'awa b̄a siad̄oho mab̄oha mada. 20 Atao ndai dou-dou ake mpa mangoana au rawi mada ma'iha ra eda b̄a siad̄oho wakatu mada lao wa'a b̄a dou d̄i tando Mahkama Agama. 21 Siad̄oho narakaku ringa sampu'u ake mpa ra nggahi b̄a mada d̄i tando siad̄oho, eded̄u: Nahu d̄iparesa d̄i ainaina ake b̄ara nahu ka'imbi b̄a one dou-dou mamade ^dimamori mbali.>>
22 Edempara Gubernur Feliks ma wa'ura mboto b̄ade mab̄oha ngoa ro tei Isa Al Masih, kanggorina mbolo parakara ede ro nggahi sia, <<Nahu d̄imakanggorina parakara ake, nggara nawa'usi ramai dou mana'ekai tentara eded̄u la Lisias.>> 23 Edempara sia kauna perwira ma ntau su'u ro tundu d̄i la Paulus ede, ngge'e mpa bui la Paulus, pala aina ipi tani, ro aina kantamu lenga^dohona mai wa'a au d̄iparalu b̄a sia.
La Paulus d̄i tando Gubernur Feliks ro la Drusila
24:24-27
24 Pila-pila nai sawa'u b̄a ede mai Gubernur Feliks lab̄o weina ma ngara la Drusila; sia dou Yahudi. Edempara Gubernur Feliks kauna lao weha la Paulus, edempara Feliks kade'ena nggahi la Paulus mab̄oha imbi d̄i Isa Al Masih. 25 Pala wakatu la Paulus nuntu walina mab̄oha ma poda ro ma ncihi ro wa'una pi'i ade, parange, nawasu ro mab̄oha hukuman d̄i Ainaina Kiama, Gubernur Feliks ndad̄i dahu, edempara nggahina, <<Nggomi loara lao ake. Nahu ^dima'ou nggomi wali nggara warasi wakatu.>> 26 Wakatu ede Gubernur Feliks nane'eku raka piti d̄i la Paulus. B̄ara ndedena sia ntuwu poda kauna dou lao weha ao la Paulus ^dimanuntu ro nggahi lab̄o sia.
27 Pala sawa'u b̄a d̄ua mba'a, la Perkius Festus macepena la Feliks ndad̄i gubernur. Ro b̄ara la Feliks mane'e weha ade dou-dou Yahudi, sia co'o wi'ina la Paulus d̄i ade uma bui.