23
La Paulus ntandana anggota-anggota mahkama ede edempara nggahina, <<Cina ro angiku! Sampe d̄i ainaina ake mada moriku kai ade ma raso ro nira d̄i tando Allah Ta'ala.>> 2 Wakatu nggahi ndede la Paulus, Imam Agung eded̄u la Ananias kauna dou ma kad̄i d̄i kompe la Paulus topa asa la Paulus. 3 Edempara nggahi la Paulus d̄i Imam Agung ede, <<Allah Ta'ala tantu ^dimatopa nggomi, dou munafik ma ca'u coro-coro raso! Nggomi dohomu ta ede sapodakaina d̄imaparesa nahu b̄une ra kaukai b̄a hukum Taurat, pala ndai nggomi masapaku hukum ede kai kaumu dou topa nahu!>>4 Dou-dou ma wara ta sab̄ae la Paulus nggahina d̄i la Paulus, <<Nggomi makab̄awa ro katunaku Imam Agung!>> 5 Cambe b̄a la Paulus, <<Mboto kangampu nahu wati ^badeku, cina ro angi b̄a one sia Imam Agung. Poda d̄i ade Kitab Suci wara ratunti, <Nggomi aina kab̄awa ro katunamu dou mana'ekai bangsamu.> >>
6 Eda b̄a la Paulus b̄a one sarundena d̄i ade anggota-anggota mahkama ede dou-dou Saduki ro sarunde walina dou-dou Farisi. B̄ara ndedena nggahi sia d̄i mahkama ede, <<Cina ro angi! Nahu dou Farisi, londo ro mai Farisi. Nahu raparesa ta ake b̄ara nahu imbiku b̄a one dou-dou mamade ^dimamori mbali.>> 7 Wakatu nggahi ndede sia, dou-dou Farisi ro dou-dou Saduki ede tampu'ura cence ncihina, ndad̄ina mbolo ede ncengga ndad̄i d̄ua kalompo. 8 B̄ara dou-dou Saduki manggahi b̄a one dou mamade wati ^dimamori mbali, b̄a one wati wara mala'eka, ro roh-roh wati wara rauna; pala dou Farisi na'imbi d̄i sara'ana ede. 9 Ndad̄i wontura ngango ro ngora ma na'e. Pila-pila dou Farisi ma ndad̄i ahli Taurat tu'u kad̄i ro wati ca'u podana tarima nggahi kalompo Saduki. Nggahi siad̄oho, <<Nami wati rakamu eda rawina mancara d̄i dou ake kone sato'i rau! Kombi poda wara roh atao mala'eka ma nuntu lab̄o sia!>>
10 Ngango ro ngora ede ndad̄i ipi na'e ndad̄ina dou mana'ekai tentara ede nadahuku, cou mab̄ade la Paulus na^boe kalembi b̄a siad̄oho. Ndad̄i sia kauna tentara-tentarana lao weha la Paulus d̄i woha dou-dou ede ro lao wa'a aka kanto.
11 D̄i aimangad̄i sawa'u b̄a ede Isa Al Masih mai kad̄ina d̄i kompe la Paulus ro nggahina, <<Katenggopu ademu! Nggomi wa'ura kapodamu ade ngoa ro kahaba mab̄oha Nahu d̄i Yerusalem. Nggomi pab̄uapu ngoa ro kahaba haba mab̄oha Nahu d̄i Roma rau.>>
Mafaka ne'e hade la Paulus
23:12-22
12 B̄ala aisanai, sid̄i-sid̄i poda, dou-dou Yahudi tampu'ura mafakana. Siad̄oho sumpana wati d̄imangaha atao nono sawatipu b̄a siad̄oho hadena la Paulus. 13 Wara ncewi upa mpuru dou ma kab̄oro weki ade mafakakaina ede. 14 Siad̄oho laona d̄i dou-dou mana'ekai imam ro dou-dou mana'ekai Yahudi ro nggahina, <<Nami wa'ura sumpa sama-samamu, wati d̄imangaha atao nono au-au sawatipu hade b̄a nami la Paulus. 15 B̄ara ndedena, ake nggomid̄oho lab̄o anggota-anggota Mahkama Agama pab̄uapu nggadu rocimu sura d̄i dou mana'ekai tentara Roma ede d̄i rahokaimu loakud̄u sia wa'a mbalina la Paulus satando nggomid̄oho, b̄une-b̄une nggomid̄oho ma ne'e paresa wali parakarana kai ncewi taho wali. Ro nami wa'ura sadia ne'e hade sia sawatipu sia ronggana ta ake.>>
16 Pala mafaka siad̄oho ede ringa b̄a ana amancawa la Paulus. Edempara sia laona aka kanto ro ngoana lampa rawi ede d̄i la Paulus. 17 Edempara la Paulus ouna sab̄ua dou perwira ro nggahina d̄i sia, <<Lao wa'apu ana dou sampela mone ake d̄i dou mana'ekai tentara; sia wara d̄ine'ena ngoa d̄i dou mana'ekai tentara ede.>> 18 Perwira ede lao wa'ana ana dou sampela ede d̄i dou mana'ekai tentara ro nggahina, <<La Paulus, dou rabui ede, ouna mada ro rahona loakud̄u mada mai wa'a dou sampela ake d̄i tando Ita; b̄ara wara haba ma penti d̄ingoa b̄a sia d̄i ita.>>
19 Dou mana'ekai tentara ede nentina rima ana dou sampela ede, edempara wa'ana sia d̄i sab̄ae b̄a uma ro sod̄ina, <<Au d̄ine'emu ngoa b̄a nggomi d̄i nahu?>>
20 Cambe b̄a ana dou sampela ede, <<Dou-dou Yahudi wa'ura mafakana, siad̄oho nane'e raho d̄i Ita lao wa'a la Paulus d̄i tando Mahkama Agama naisi, siad̄oho nacoro-coro ne'e paresa kab̄ae poda wali parakara ede. 21 Pala ai to'ina b̄atu b̄a Ita au ra raho b̄a siad̄oho ede, b̄ara wara ncewi upa mpuru dou ma wunga cili weki ^dimatapa ao la Paulus d̄i ncai. Siad̄oho sara'a wa'ura sumpana wati d̄imangaha atao nono sawatipu hadena la Paulus. Wakatu ake siad̄oho wa'ura sadiana weki; ngena cambe b̄a Ita mpa.>> 22 Nggahi dou mana'ekai tentara ede, <<Aina ngoamu d̄i cou-cou rau b̄a one nggomi wa'ura mai ngoamu ake d̄i nahu.>> Edempara sia kauna lao dula ana dou sampela ede.
La Paulus lao wa'a peso aka Kaisarea
23:23-35
23 Edempara dou mana'ekai tentara ede ouna d̄ua dou perwira, ro nggahina d̄i siad̄oho, <<Sadiapu 200 tentara lab̄o 70 tentara manente jara ro 200 tentara ma wa'a ^buja d̄imalao aka Kaisarea, ^boe ciwi aimangad̄i ake wa'u. 24 Sadia raupu jara d̄i nente b̄a la Paulus ro wa'a katahopu sia sampe ronggana aka Gubernur Feliks.>> 25 Edempara dou mana'ekai tentara ede tuntina sura, ndake isi sura ede,
26 <<Ma d̄ese ro ntasa Gubernur Feliks. Salam ra d̄i Klaudius Lisias! 27 Dou ake wa'ura wa'u ro leto b̄a dou-dou Yahudi ro siad̄oho nane'era hade sia, pai watisi mai mada lab̄o tentara mahoruna sia; b̄a one mada ringaku sia ede dou Roma. 28 B̄ara mada ne'eku b̄ade au sapodakaina rawina mancara ra b̄ab̄u ro lo'okai b̄a siad̄oho d̄i sia, ndad̄i mada lao wa'aku sia d̄i Mahkama Agama siad̄oho. 29 Palasi sia wati karawina au-au ma patu d̄ihukum kai hukuman made atao ^dibui. Ra ^ba^bukai b̄a siad̄oho d̄i sia b̄ara masa'ala-masa'ala hukum-hukum agama ndai siad̄oho. 30 Edempara wara dou mangoa d̄i mada b̄a one dou-dou Yahudi wara niana madab̄ae d̄i dou ake. Ndad̄i mada nggadu laloku sia d̄i ita Gubernur. Ro mada wa'ura kauku dou-dou ma^ba^bu ro lo'o sia mai wa'a parakara ede d̄i ita.>>
31 Ndad̄i tentara-tentara ede kalampana takina. Siad̄oho wehana la Paulus edempara lao wa'ana d̄i aimangad̄i ede wa'u sampe aka kota Antipatris. 32 B̄ala aisanai siad̄oho co'ona tentara manente jara lampa wali lab̄o la Paulus, ro ndai siad̄oho dula mbalina aka kanto. 33 Wakatu tentara manente jara rongga d̄i Kaisarea, siad̄oho karonggana sura ede d̄i gubernur, edempara d̄onggona la Paulus d̄i sia. 34 Sawa'u b̄a nggori baca b̄a gubernur sura ede, sia sod̄ina d̄i la Paulus, <<Dou ta b̄e nggomi?>> Wakatu ringa b̄a sia b̄a one la Paulus dou Kilikia, 35 nggahi sia, <<Taho! Nahu ^dimaparesana parakara nggomi, nggara dou-dou mada'awa nggomi nawa'usi rarongga ta ake.>> Edempara sia kauna dou bui la Paulus d̄i ade asi Herodes.