22
<<Ama ro ompu, ro sara'a cina ro angi! Mada mangoa d̄i horukaiku weki d̄i ita^doho. Takade'e to'ipu!>>2 Wakatu ringa b̄a siad̄oho la Paulus manuntu kai bahasa Ibrani, siad̄oho nanaha midi wali. Edempara la Paulus nuntu walina.3 <<Mada dou Yahudi,>> nggahi la Paulus, <<mada rawarakaiku d̄i Tarsus d̄i dana ro rasa Kilikia, pala mada rakana'e ta ake d̄i Yerusalem ro rangoa ro tei kataho b̄a guru Gamaliel d̄i ade hukum Taurat ra mbei b̄a la Musa d̄i wa'i ro waro ndaita. Sama b̄une cina ro angi sara'a ta ake d̄i ainaina ake, mada rau kawancuku caha karawi d̄i ru'u b̄a Allah Ta'ala.4 Mada wa'ura kancokiku dou-dou mab̄atu ngoa ro tei mab̄ou ede sampe madena. Siad̄oho sara'ana, nataho mamone ro masiwe, wa'u ro leto b̄a mada ro kalu'u b̄a mada d̄i ade uma bui.5 Dou ma na'ekai imam-imam ro sara'a Mahkama Agama naloaku nggahi b̄a one mada wati cowaku. B̄ara siad̄oho edeku ma mbeina d̄i mada sura d̄i lao wa'a aka dou-dou Yahudi d̄i Damsyik. Kai sura ede mada kaloa wa'u ro leto dou-dou ta aka ma imbi d̄i ngoa ro tei ede, ro malao wa'a siad̄oho aka Yerusalem loakud̄u ^dihukum.>>
La Paulus caritana au ra karawina
22:6-16
6 <<Wakatu mada wunga ade lampa ro laokaiku ro ne'era rongga d̄i Damsyik, wakatu aimarai, sab̄ua cahaya ma taroa poda wed̄i lalo mpa londona ra d̄i langi mahekona mada. 7 Mada mbo'oku awa dana edempara ringaku eli manggahi d̄i mada, <Saulus, Saulus! B̄ab̄auku nggomi kancokikaimu Nahu?> 8 Edempara sod̄i b̄a mada, <Cou Ita?> <Nahu Isa Al Masih, dou Nazaret ra kancoki b̄a nggomi,> cambe b̄a Sia. 9 Dou-dou ma wara ta ede ma sama-sama lab̄o mada ma edana cahaya ede, pala siad̄oho wati ringana eli ma nuntu lab̄o mada. 10 Edempara sod̄i wali b̄a mada, <Auku d̄i pab̄ua karawi b̄a mada Ruma?> Cambe b̄a Ruma, <Tu'ura ro lao lu'upu aka Damsyik. Ta aka peade nggomi d̄ingoa mab̄oha sara'a au ra ^dikane'ekai b̄a Allah Ta'ala d̄ikarawi b̄a nggomi.> 11 Mada mbudaku b̄ara cahaya ma taroa tanggiri ede. Ndad̄i lenga^dohoku mad̄anda mada lao lu'u aka Damsyik.
12 Ta ede wara sab̄ua dou ma ngara la Ananias. Sia dou ma to'a ro saleh ro nato'a kalampa hukum Taurat. Sara'a dou Yahudi ma ngge'e d̄i Damsyik nawancuku kaco'ina sia. 13 Sia mai tiona mada, edempara kad̄ina d̄i kompe mada ro nggahina, <Cinaku Saulus, henggapu madamu ro nggomi ^dimaloa eda wali!> Wakatu ede wa'u mada hantaku pahu, edempara edaku la Ananias. 14 Edempara sia nggahina d̄i mada, <Allah Ta'ala b̄a wa'i ro waro ndaita wa'ura kad̄alena nggomi loakud̄u nggomi b̄ademu au ^dikane'ekai b̄a Allah Ta'ala, ro ma eda Isa Al Masih, Ada-Na ma karawina au ra kane'ekai b̄a Allah Ta'ala ro makade'e nggahi ro eli ndai Isa Al Masih. 15 Nggomi d̄imandad̄i dou d̄imangoa ro kahaba d̄i sara'a dou au ra eda ro au ra ringa b̄a nggomi ake. 16 Ake aina ngena kantoi wali. Tu'ura, ro ^donggopu wekimu d̄ikandeu sarani. Rahopu d̄i Allah Ta'ala loakud̄u nggomi ^dikangampu wea dosa-dosamu.> >>
Allah Ta'ala kauna la Paulus hotoba d̄i bangsa makalai ma laina Yahudi.
22:17-30
17 <<Mada lao mbaliku aka Yerusalem, ro wakatu mada wunga do'aku d̄i Bait Allah, mada kuasakai b̄a Roh Allah. 18 Wakatu ede mada edaku Ruma; ro nggahina d̄i mada, <Tu'u wi'i rocipu Yerusalem, b̄ara dou-dou ta ake wati d̄imatarima au ra ngoa ro kahaba b̄a nggomi ede mab̄oha Nahu.> 19 Nggahi mada, <<Ruma, siad̄oho nab̄ade podaku b̄a one mada mawa'ura lu'u d̄i uma-uma sambea ro ibadakai ^dimawa'u ro leto siad̄oho ro kalu'u ade uma bui ro kancokiku dou-dou ma imbi d̄i Ita. 20 Ndede rau wakatu ada Ita la Stefanus rahade, ndai mada wara ta ede ro kasatuju sia ^dihade. Mada ma ratongguna kani ro lombo dou-dou ma rahade sia.> 21 Pala nggahi wali Ruma d̄i mada, <Nggomi pab̄uapu laomu, b̄ara Nahu ^dimakau nggomi lao d̄i hid̄i ma d̄o'o d̄i dou-dou ma laina Yahudi.> >>
22 Dou-dou mbuipu ringa ro kade'ena nuntu ro nggahi la Paulus, pala ma cumpukaina ede siad̄oho kanggica kana'e podana, <<Hadepu dou b̄une ede. Sia wati tahona d̄iwi'i kamori!> 23 Wunga kanggicana, siad̄oho hambuna jumbana, ndad̄ina kalu^bu tanto^bu wa'a b̄a angi. 24 Ndad̄i dou mana'ekai tentara Roma ede kauna dou lao wa'a la Paulus aka kanto loakud̄u d̄iparesa kai toku ro kasa d̄ib̄adekai b̄ab̄auku dou-dou Yahudi kanggica ndedekaina d̄i sia. 25 Pala wakatu la Paulus wa'ura d̄iki d̄i ne'e cambo, nggahi la Paulus d̄i perwira ma kad̄i ta ede, <<Sab̄ua loaku ^dicambo sab̄ua dou ela ro dou Roma sawatipu paresa wa'u sia?>>
26 Ringana nggahi ede, perwira ede laona aka dou mana'ekai tentara ro nggahina, <<Au d̄ine'emu karawi? Dou ake dou Roma!>>
27 Edempara dou mana'ekai tentara ede lao rakana la Paulus ro sod̄ina, <<Ngoapu, sab̄ua poda nggomi dou Roma?>>
<<Io,>> cambe b̄a la Paulus, <<Mada dou Roma.>> 28 Nggahi rau dou mana'ekai tentara ede, <<Nahu nda^diku dou Roma kai racola nggaliku!>>
Cambe b̄a la Paulus, <<Pala mada dou Roma ra aipu ranggana b̄a inaku.>> 29 Wakatu ede wa'u anggota-anggota tentara ma ne'e paresa la Paulus ede, suruna ro dou mana'ekai tentara ede ndad̄i dahu b̄ara sia wa'ura kauna ndante la Paulus, sapodakaina la Paulus eded̄u dou Roma.
La Paulus d̄i tando Mahkama Agama
22:30–23:11
30 Dou mana'ekai tentara Roma ede nane'e podaku b̄ade auku sapodakaina makamaina dou-dou Yahudi kancara la Paulus. B̄ara ndedena b̄ala aisanai sia ouna dou-dou mana'ekai imam ro Mahkama Agama mai kab̄oro weki. Edempara la Paulus hori b̄a dou rantena, ro wa'ana aka tando siad̄oho sara'a.