La Paulus lao aka Yerusalem
21:1-16
21
Nami rahomu weki d̄i dou-dou mana'ekai ela Ruma d̄i Efesus ede, ro tu'u wi'imu siad̄oho.Edempara nami loja laomu aka pulau Kos; ro b̄ala aisanai nami ronggamu d̄i pulau Rodos. Ta ede nami loja walimu lao aka lab̄u Patara. 2 D̄i lab̄u Patara, nami edamu lopi ma ne'e lao aka Fenisia. Ndad̄i nami ne'emu lopi ede edempara laomu 3 ro lojamu sampe eda b̄a nami pulau Siprus d̄i wela ku'i b̄a nami; nami wati saimu ta ede, pala nami loja walimu lao aka Siria. Nami la^bumu d̄i Tirus, b̄ara ta ede lopi ra nente b̄a nami kalondona wua. 4 D̄i hid̄i ede nami lao lambamu dou-dou ma imbi d̄i Isa Al Masih, ro ngge'e lab̄o siad̄oho pidu nai ntoina. Kai rangoa b̄a Roh Allah siad̄oho ngoa ro tei katahona la Paulus loakud̄u aina lao aka Yerusalem. 5 Pala sawa'u b̄a cumpu wakatuna nami ngge'emu ta ede, nami tu'u wi'imu siad̄oho ro nami lampa ro lao walimu. Siad̄oho sara'ana sama-sama lab̄o wei ro anana lao otona nami sampe aka kengge moti ari mai b̄a kota. D̄i kengge moti ede, nami sara'a doho suju ro sambeamu. 6 Sawa'u b̄a ede nami rahomu weki, edempara nami ne'emu ese lopi ro siad̄oho rau lao dula aka umana.7 Nami loja ntuwumu tampu'u ra d̄i Tirus salalo aka Ptolemais. Ta aka nami lao lambamu cina ro angi ma wara ta aka, edempara ngge'emu sanai lab̄o siad̄oho. 8 B̄ala aisanai nami tu'u wi'imu hid̄i ede, ro rongga d̄i Kaisarea. Ta ede nami lao rakamu guru Injil ma ngara la Filipus, edempara nami ngge'emu d̄i umana. Sia eded̄u sab̄ua dou d̄i ade weki pidu dou rakad̄ale d̄i Yerusalem d̄imabantu rasul-rasul. 9 Upa dou ana siwe sampelana, wa'ura mbei loa ro b̄ade b̄a Allah Ta'ala d̄i ngoa ro kahabakaina haba ma ramai ra d̄i Allah Ta'ala. 10 Sawa'u b̄a pila-pila wakatu ntoina nami ta aka, maira sab̄ua dou nabi ma ramai ra d̄i Yudea ma ngara la Agabus. 11 Sia maina d̄i nami edempara wehana here loko la Paulus. Kai here loko ede sia d̄ikina ed̄i ro rima ndaina edempara nggahina, <<Akeku ra nggahi b̄a Roh Allah: Dou mantau herekai loko ake ^did̄iki b̄une ake d̄i Yerusalem b̄a dou-dou Yahudi, ro ^di^donggo d̄i dou-dou ma laina Yahudi.>>
12 Wakatu ringa b̄a nami nggahi ede, nami lab̄o sara'a cina ro angi ma ngge'e d̄i Kaisarea ede maraho poda-poda d̄i la Paulus loakud̄u sia aina lao aka Yerusalem. 13 Pala cambe b̄a sia, <<Auku onena nggomid̄oho nangimu b̄une ake, nggomid̄oho makamaiku leli ade nahu? Nahu wa'ura rela laina ^diwa'u ro leto mpoa ta aka, pala kone d̄imamade rau b̄ara Ruma Isa.>> 14 La Paulus wati ngawana kade'e au ra ngoa b̄a nami, ndad̄i nami watid̄u kantamu sia. <<Au ra kane'ekai b̄a Ruma mpa ^dimanda^di,>> nggahi b̄a nami.
15 Sawa'u b̄a ngge'emu ta ede pila-pila wakatu ntoina, nami kamocimu tau ro tu'i nami, edempara laomu aka Yerusalem. 16 Pila-pila dou cina ro angi d̄i Kaisarea lao sama rauna lab̄o nami d̄imalao oto nami aka uma la Manason,g b̄ara d̄i uma sia edeku ^dironggakai b̄a nami. La Manason eded̄u dou Siprus ma wa'ura ntoi imbi d̄i Isa.
La Paulus lao lambana la Yakub
21:17-26
17 Wakatu nami rongga d̄i Yerusalem, cina ro angi ma sama imbi lab̄o ndai ta ede weha aona nami kai sana adena. 18 B̄ala aisanai la Paulus lao samana lab̄o nami lao lamba la Yakub; sara'a dou-dou mana'ekai ela Ruma wara ta ede rau. 19 Sawa'u b̄a wa'ana salam d̄i siad̄oho, la Paulus caritana d̄i siad̄oho sara'a au ra karawi b̄a Allah Ta'ala kai ncai sia d̄i ade woha dou-dou ma laina Yahudi. 20 Sawa'u b̄a ringana carita la Paulus, siad̄oho sara'a roi ro wadina Allah Ta'ala. Edempara siad̄oho nggahina d̄i la Paulus, <<Cinaku Paulus! Ndaimu pab̄uapu b̄ade b̄a one wa'ura pila-pila riwu dou Yahudi ma imbi d̄i Isa Al Masih. Siad̄oho eded̄u dou-dou ma to'a kalampa hukum Musa. 21 Ro ake siad̄oho ringana b̄a one ndaimu mangoa ro tei d̄i sara'a dou Yahudi ma ngge'e d̄i woha bangsa makalaina, loakud̄u horina parenta hukum Musa. Ndaimu d̄imangoa ro tei kataho siad̄oho loakud̄u siad̄oho aina sunana ana-anana atao b̄atu rawi rasa ranginakai b̄a dou Yahudi. 22 Ake dou-dou Yahudi ma wa'ura imbi ede tantu d̄imaringa b̄a one ndaimu wa'ura wara ta ake. Ndad̄i, b̄uneku ake? 23 ^Batupu au ra ngoa ro tei kataho b̄a nami. Wara upa dou ta ake ma wa'ura sake d̄i Ruma. 24 Ndaimu pab̄uapu lao kalampa upacara karaso weki sama-sama lab̄o siad̄oho, ro cola weapu loakud̄u honggo siad̄oho loa ^di^boru.h Kai ndedena d̄imatada d̄i sara'a dou b̄a one au ra ringa b̄a siad̄oho mab̄oha ndaimu wati podana, b̄ara ndai raumu makalampa hukum Musa. 25 Pala mab̄oha dou ma laina Yahudi ma wa'ura imbi d̄i Isa Al Masih, nami wa'ura nggadumu sura d̄i siad̄oho mab̄oha nggahi nami b̄a one siad̄oho wati loana ngaha ro nono ma wa'ura d̄onggo ro mbei d̄i berhala, wati loana ngaha ra'a, atao ngaha binata ma made ra ke'e; ro wati loana karawi lampa rawi ma da^bae.>>
26 Ndad̄i la Paulus lao lab̄ona upa dou ede edempara kalampana upacara karaso weki sama-sama lab̄o siad̄oho d̄i b̄ala aisanaina. Edempara siad̄oho lu'una d̄i Bait Allah d̄i ngoakaina pila nai wali upacara karaso weki ede nggorina ro koroba d̄i ru'u b̄a cua-cua ndai siad̄oho d̄i d̄onggo ro mbei.
La Paulus wa'u ro leto b̄a dou d̄i Bait Allah
21:27-36
27 Wakatu pidu nai rakatantukai ede ne'era nggori, pila-pila dou Yahudi ra d̄i Asia edana la Paulus d̄i ade Bait Allah. Siad̄oho sa^du'una dou mamboto, edempara nentina la Paulus 28 ro siad̄oho kanggica salahona, <<cina ro angiku dou-dou Israel, bantu to'ipu! Akeku douna ma lao d̄i sanikina dana ro rasa ro mangoa ro tei d̄i sara'a dou ma wati ncihi ncao lab̄o bangsa Israel, ma wati ca'u hukum Musa ro ma wati ca'u Bait Allah ake. Ro ake wali nanaha wa'aku dou-dou malaina Yahudi lu'u d̄i Bait Allah ro kasampu ro nggelena hid̄i ma raso ake!>> 29 Siad̄oho nggahi ndedekai b̄ara siad̄oho wa'ura edana la Trofimus dou Efesus ede ma lampa sama-sama lab̄o la Paulus d̄i kota Yerusalem; ro kacai b̄a siad̄oho wa'ura wa'ana sia d̄i ade Bait Allah.
30 Sara'a kota ndad̄i ngango ro ngora, ro sara'a dou rai kanggudu mena. Siad̄oho wa'u ro letona la Paulus ro randa kalosana sia ra d̄i ade Bait Allah. Wakatu ede wa'u tad̄a Bait Allah kempa b̄a siad̄oho. 31 Wakatu dou-dou ma rakatu'u ngango ro ngora ede ngupana ncai ne'e hade la Paulus, ngoa b̄a dou d̄i dou-dou mana'ekai tentara Roma b̄a one sara'a dou d̄i kota Yerusalem wunga ngangona. 32 Dou mana'ekai tentara ede ou lalona pila-pila dou perwira ro tentara edempara lao rocina lab̄o siad̄oho d̄i hid̄i ngango ro ngorakai ede. Wakatu eda b̄a dou mamboto ede dou mana'ekai tentara ro tentara-tentarana, siad̄oho dengga lalona kancoki la Paulus. 33 Dou mana'ekai tentara ede lao rakana la Paulus edempara nentina sia, ro kauna dou leto sia. Edempara sod̄i b̄a dou mana'ekai tentara ede mab̄oha couku la Paulus ede ro au ra karawina. 34 Cambe b̄a sarunde dou ede ndake ro sarunde walina macambe ndede. B̄ara nawancuku ngangona ndad̄ina dou mana'ekai tentara ede wati rakana b̄ade au sapodakaina ma nda^di. B̄ara ndedena sia kauna dou lao wa'a la Paulus aka kanto. 35 Wakatu siad̄oho wa'ana la Paulus rakara aka a'u, dou-dou makatu'u ngango ro ngora ede mbani podana ndad̄i la Paulus pab̄uaku ^diwa'a kalei b̄a tentara-tentara. 36 Siad̄oho lampa b̄atu b̄a dou-dou makatu'u ngango ro ngora ede ro ma kanggica, <<Hadepu sia!>>
La Paulus horuna wekina
21:37–22:5
37 Wunga ne'ena lu'u ade kanto, nggahi la Paulus d̄i dou mana'ekai tentara ede, <<Sab̄ua loa mada nuntu lab̄o ita samporo?>>
<<Palasi nggomi maloa nuntu Yunani>> nggahi b̄a dou mana'ekai tentara ede. 38 <<Nggara ndedesi, nggomi laina dou Mesir ma ntoina ma katu'u ngango ro ngora ro ma wa'a rai 4.000 dou ma kangango rasa ma wa'a ^daha lao aka so sarae?>>
39 Cambe b̄a la Paulus, <<Mada dou Yahudi; mada dou kota Tarsus, kota ma penti d̄i Kilikia. Takau to'ipu mada nuntu lab̄o dou-dou ede.>>
40 Ndad̄i sawa'u b̄a la Paulus kau nuntu ro nggahi, la Paulus kad̄ina d̄i a'u, edempara mbeina tanda kai rimana. Sara'a dou ndad̄i midi mena. Edempara la Paulus nuntuna lab̄o siad̄oho kai nggahi Ibrani. Nggahi la Paulus,