La Paulus lao aka Makedonia ro Yunani
20:1-12
20
Sawa'u b̄a dengga ngango ro ngora d̄i Efesus, la Paulus kab̄orona ela Ruma ro kauna kapoda ade siad̄oho.Edempara sia rahona weki d̄i ela Ruma ede ro sia laona aka Makedonia. 2 Sia lao lambana dana ro rasa Makedonia ro mboto ngoa ro tei katahona d̄i dou-dou ma imbi d̄i Isa Al Masih ta aka d̄i katenggokaina ade siad̄oho.Edempara sia laona aka Yunani. 3 Tolu wura ntoina sia ngge'ena ta aka. Edempara sia ka'ambina weki ne'e loja lao aka Siria, wara haba b̄a one dou-dou Yahudi ma wunga mafaka ne'e hade sia. B̄ara ndedena sia dula mbali ta ncai dana ro rasa Makedonia. 4 Sia laona lab̄o la Sopater ana la Pirus dou Berea; la Aristarkhus ro la Sekundus dou Tesalonika, ro la Gayus dou Derbe. La Timotius, Tikhikus ro la Trofimus, dou-dou propinsi Asia. 5 Siad̄oho lao uluna edempara ngenana nami d̄i Troas. 6 Sawa'u b̄a Aruraja Roti Mawati kani ^Buha, nami tu'u wi'imu Filipi ro loja walimu. Lima nai sawa'u b̄a ede nami kab̄oro walimu weki lab̄o siad̄oho d̄i Troas. Ta aka nami ngge'emu pidu nai.7 D̄i ainaina ma sarambakaina d̄i minggu ede,d nami kab̄oromu weki ne'e ngaha sama kai cara sa'e ro ari. La Paulus nuntu ro nggahina lab̄o dou-dou ta ede, b̄ara naisi sia nane'e lao. Sampe b̄oha ai la Paulus mbuipu nuntuna lab̄o dou-dou ede. 8 D̄i ade b̄ili ma esena, hid̄i ka^borokai weki nami ede, wara mboto ilo. 9 Sab̄ua dou mone sampela ma ngara la Eutikhus doho d̄i tantonga. B̄ara la Paulus wati dengga-denggana nuntu ro nggahi, dou mone sampela ede ndad̄i ei poda madana sampe sia maruna d̄i tantonga ede, edempara ma^buna tampu'u d̄i tingka katolukaina saraka awa dana. Wakatu hanta b̄a siad̄oho sia wa'ura made. 10 Pala la Paulus londona edempara maru sanggo^bona ese wawo sarumbu dou mone sampela ede ro pohuna. Nggahi la Paulus, <<Aina dahu, sia mbuipu morina!>> 11 Edempara la Paulus ne'e mbalina ta ese, ro cengga-cenggana roti ro ngaha sama-samana. Sawa'u b̄a ntoi nuntu ro nggahina lab̄o dou-dou sampe aimasubu, edempara la Paulus laona. 12 Dou-dou wa'a kadulana dou mone sampela ma wa'ura mori mbali ede aka umana. Siad̄oho na'ipiku neo ade ro nawancuku ^dihi adena.
La Paulus tu'u wi'ina Troas lao aka Miletus
20:13-16
13 Nami laomu aka lopi edempara lao loja ulumu aka Asos ^dilao weha aokaimu la Paulus ta aka. Sia wa'ura ato kandedena b̄ara sia nane'eku lao lampa ed̄i laina ta moti. 14 Sawa'u b̄a eda angina d̄i Asos, la Paulus roci ne'ena ese lopi edempara nami lojamu lao aka Metilene. 15 Ra d̄i Metilene nami loja walimu, ro b̄ala aisanai nami rongga aka hid̄i ma ncao tando lab̄o pulau Khios. ^Dua nai sawa'u b̄a ede nami ronggamu d̄i pulau Samos ro sanai sawa'u b̄a ede nami rongga d̄i Miletus. 16 La Paulus nawa'ura nggahi b̄a one sia wati saina d̄i Efesus, b̄ara sia wati ne'ena ntoi d̄i dana ro rasa Asia. Sia nawancuku ne'ena roci rongga d̄i Yerusalem d̄i ainaina Aruraja Pentakosta.
La Paulus ncengga ngina lab̄o dou-dou mana'ekai ela Ruma d̄i Efesus
20:17-38
17 D̄i Miletus la Paulus kakaina dou lao aka Efesus loakud̄u dou-dou mana'ekai ela Ruma ta aka mai eda angina lab̄o sia. 18 Wakatu rongga siad̄oho, nggahi la Paulus d̄i siad̄oho, <<Cina ro angi mab̄adeku b̄uneku nahu moriku salama ake d̄i woha nggomid̄oho ratampu'u ainaina sarambakaina rongga nahu d̄i Asia sampe nahu tu'u wi'iku hid̄i ede. 19 Kai kab̄awa weki ro kai mboto mboho oi madaku, nahu karawiku d̄i ru'u b̄a Ruma ro mboto susa ro ncoki d̄i iu b̄a nahu b̄ara nia dab̄ae dou-dou Yahudi mane'e hade nahu. 20 Nggomid̄oho mab̄adeku b̄a one nahu wati mbali mbua adeku ngoa d̄i nggomid̄oho auku ma ntau one d̄i ru'u b̄a nggomid̄oho.Nahu mangoa ro tei nggomid̄oho d̄i saniki mbolokai weki ro d̄i uma-uma. 21 Nataho d̄i ru'u b̄a dou-dou Yahudi ro d̄i ru'u b̄a dou-dou bangsa makalaina, nahu ngoa ro kawara ncauku siad̄oho loakud̄u siad̄oho tobana ra d̄i dosa-dosana ro mai raho kangampu d̄i Allah Ta'ala, ro imbi d̄i Ruma Isa Al Masih. 22 Pala ake b̄ara nahu ma to'a d̄i parenta Roh Allah, nahu malao aka Yerusalem. Ro nahu wati ^badeku au d̄imandad̄i d̄i ru'u b̄a nahu ta aka. 23 Sab̄ua mpa b̄ade b̄a nahu b̄a one d̄i saniki kota, Roh Allah wa'ura ngoa kapodana d̄i nahu b̄a one nahu ^dimalu'u ade uma bui ro d̄ima'iu susa ro ncoki. 24 Pala nahu wati kandad̄i auku d̄i moriku ake, sura nahu loa kanggori takiku ra imbikai b̄a Ruma Isa d̄i nahu ro sura nahu to'aku sampe cumpukai moriku d̄imangoa ro kahaba Haba Mataho ede mab̄oha nawancuku tahona Allah Ta'ala d̄i samenana dou.
25 Nahu wa'ura mai lambaku cina ro angi sara'ana ro wa'ura ngoa ro kahaba rauku mab̄oha Karaja'an Allah. Ake d̄i iu b̄a nahu wati d̄ima'eda angi wali lab̄o nggomid̄oho. 26 B̄ara ndedena ainaina ake nahu mangoa poda-poda d̄i nggomid̄oho b̄a one nawarasi d̄i weki nggomid̄oho ma leli peade, ede laina ncara nahu. 27 Nahu wati paranaku tu'u wi'i takiku d̄ingoa ka^baekaiku d̄i nggomid̄oho samenana au ra kane'ekai b̄a Allah Ta'ala. 28 Pab̄uapu nggomid̄oho sandaka weki ndaimu ro sandaka raupu sara'a ela Ruma ra wa'u d̄onggo b̄a Roh Allah d̄i nggomid̄oho ^dimasandakana; b̄ara nggomid̄oho wa'ura hanta d̄imandad̄i dou ma jaga ro sandaka ela Ruma ede. Pab̄uapu nggomid̄oho jaga ro sandakamu ela Allah Ta'alae ede b̄une dou ma ompukai jimba ma jaga ro sandaka jimbana, b̄a one Allah Ta'ala wa'ura kandad̄ina ela-Na ede ntau ndai-Na kai ^boho ra'a Ana ndai-Na.f 29 Nahu kab̄adesawa'u b̄a lao nahu tantu d̄imamai dou-dou b̄une lako doro ma nggange d̄i ade woha nggomid̄oho.Ro dou-dou rajaga ro sandaka b̄a nggomid̄oho ede ^dingaha b̄a lako doro ede. 30 Kone d̄i ade weki nggomid̄oho rau ^dimawontu dou-dou d̄imangoa ro kahabana haba ma wati poda. Siad̄oho karawi ndedekaina loakud̄u dou-dou ma wa'ura imbi d̄i Isa Al Masih ndad̄i santuda ro b̄atuna siad̄oho. 31 B̄ara ndedena aina kabare! Kawarapu b̄a one tolu mba'a ntoina kai mboto mboho oi mada, aimarai aimangad̄i nahu wati dengga-denggaku ngoa ro tei d̄i sanikina dou d̄i ade weki nggomid̄oho.
32 Ake nahu ma d̄onggona nggomid̄oho d̄i Allah Ta'ala loakud̄u Sia ma jaga ro sandaka nggomid̄oho ro loakud̄u nggomid̄oho nentimu haba mab̄oha rahmat Allah. Allah Ta'ala mantau kuasa d̄i katenggokaina nggomid̄oho ro mbeina d̄i nggomid̄oho bareka-bareka ra wa'u sadia wea b̄a Sia d̄i ru'u b̄a sara'a Ela-Na. 33 Wati parana nahu ne'eku masa ro salaka atao kani ro lombo d̄i cou-cou rau. 34 Ndai nggomid̄oho ma^badeku, b̄a one kai tenggo ro wale ndaiku, nahu karawiku d̄i rakakaiku au d̄i paralu b̄a nahu ro lenga^dohoku ma b̄atu nahu. 35 D̄i ade sara'ana lampa rawi nahu wa'ura mbeiku conto mataho d̄i nggomid̄oho b̄a one kai karawi kapoda ade b̄une ake ndai pab̄uaku bantuta dou-dou ma wati tenggo. B̄ara ndai pab̄uaku kawara d̄i au ra nggahi b̄a ndai Ruma Isa, <Natahopu mbei ntewikaisi tarima ao.> >>
36 Sawa'u b̄a la Paulus nggori nuntu ro nggahina, sia sujuna lab̄o siad̄oho sara'a edempara do'ana. 37 Siad̄oho sara'ana nangi ro pohu ro ngiluna la Paulus ro nggahina salama taho ro ntai ade lampa ro laokaita. 38 Siad̄oho nawancuku ncoki poda adena, b̄ara nggahi la Paulus, <^ba one siad̄oho wati d̄ima'eda sia wali. Edempara siad̄oho lao otona sia sampe aka lopi.>