La Paulus d̄i Efesus
19:1-12
19
Wakatu la Apolos mbuipu warana d̄i Korintus, la Paulus wunga lampa kalilina dana ro rasa ede, edempara rakara d̄i Efesus. Ta aka sia eda angina lab̄o pila-pila dou ma wa'ura imbi d̄i Isa Al Masih. 2 Sod̄i b̄a sia d̄i siad̄oho, <<Sab̄ua nggomid̄oho wa'ura tarimamu Roh Allah wakatu nggomid̄oho imbimu d̄i Isa?>>Cambe b̄a siad̄oho, <<Watipu. Nami watipu ringamu b̄a one wara Roh Allah.>>
3 <<Nggara ndedesi, kai kandeu sarani ma ^bena nggomi^doho?>> Sod̄i b̄a la Paulus.
<<Kai kandeu raso b̄a la Yahya,>> cambe b̄a siad̄oho. 4 Edempara nggahi la Paulus, <<La Yahya kandeu rasona dou d̄i katadakaina b̄a one dou-dou ede wa'ura toba ra d̄i dosa-dosana. Pala wakatu ede rau la Yahya ngoana d̄i dou-dou Israel b̄a one siad̄oho pab̄uaku imbina d̄i Dou d̄imamai kento sawa'u b̄a sia, eded̄u Isa Al Masih.>>
5 Wakatu ringana nggahi ede, siad̄oho rahona loaku^du, siad̄oho d̄ikandeu sarani kai ngara Ruma Isa. 6 Ro wakatu la Paulus tohona rima ese wawo siad̄oho, Roh Allah kuasakaina siad̄oho, edempara siad̄oho tampu'ura nuntu ro nggahina kai mboto bahasa ro karonggana haba ma ramai ra d̄i Allah Ta'ala. 7 Mboto weki siad̄oho wara takasi sampuru d̄ua dou.
8 Tolu wura ntoina la Paulus kai disana nuntu ro nggahi ncau lab̄o dou-dou d̄i uma sambea ro ibadakai ro cence ncihina lab̄o siad̄oho loakud̄u siad̄oho imbina mab̄oha Karaja'an Allah. 9 Pala pila-pila dou d̄i ade weki dou-dou ede matera tuta ro wati ngawana imbi. D̄i tando sara'a dou ma kab̄oro weki ta ede siad̄oho kasungge-sunggena ngoa ro tei mab̄oha au ra kane'ekai b̄a Allah Ta'ala ma kasalama manusia kai ncai Isa. B̄ara ndedena la Paulus tu'u wi'ina siad̄oho, edempara lao lab̄ona dou-dou ma imbi d̄i Isa aka hid̄i teikai la Tiranus. Ta ede saniki ainaina sia nuntu ro nggahina lab̄o dou-dou.z 10 Sia karawi ncauna lampa rawi ede d̄ua mba'a ntoina sampe sara'a dou ma ngge'e d̄i propinsi Asia, nataho dou Yahudi ro bangsa makalaina, siad̄oho sara'ana nakade'eku nggahi ro eli Ruma.
11 Allah Ta'ala karawina lampa rawi ma^bisa ro guna ma na'e kai ncai la Paulus. 12 Nggara dou nawa'asi pasapu atao kaen herekai loko ra parana kani b̄a la Paulus ro tohona d̄i dou-dou ma supu, supu siad̄oho nambora ro roh setan rau nalosa ra d̄i siad̄oho.
Ana-ana la Skewa
19:13-20
13 Wara pila-pila sando dou Yahudi ma lampa rero, makatesa kalosa roh setan ra d̄i dou-dou. Sando-sando ede coba-coba rauna katesa roh-roh setan kai ngara Ruma Isa. Nggahi siad̄oho d̄i roh-roh setan ede, <<Kai ngara Isa Al Masih ra ngoa ro kahaba b̄a la Paulus ede, nahu ma katesa kalosa nggomi!>> 14 Wara pidu dou ana mone ana b̄a dou mana'ekai imam ma ngara la Skewa. Pidu dou anana ede karawi rauna b̄une ede.
15 Pala nggahi roh setan ede d̄i siad̄oho, <<Nahu kapata Isa Al Masih ro la Paulus rau, pala nggomid̄oho cou?>>
16 Edempara dou ma ralu'ukai b̄a roh setan ede nggoncuna ro kumpana siad̄oho kai mbani poda sampe siad̄oho mboto ncuwuna ro rai losa sarondana ra d̄i uma ede. Siad̄oho rai sarondana b̄ara kani ro lombona sipa-sipa b̄a dou ra lu'ukai b̄a roh-roh setan ede. 17 Sara'a dou Yahudi ro dou bangsa makalai ma ngge'e d̄i Efesus ringana haba mab̄oha au ma ndad̄i ede, edempara siad̄oho ndad̄i dahu. Ndad̄i ngara Ruma Isa nanaha roi ro wadi b̄a dou. 18 Mboto dou ma wa'ura ndad̄i imbi d̄i Isa, mai mangakuna d̄i tando dou mamboto ruku ro rawi siad̄oho ntoina. 19 Ro siad̄oho ma ngina kalampa ilmu sihi, kab̄orona buku-bukuna ro ka'ana d̄i tando dou mamboto. Co'i buku-buku ede nggara reke sara'asi wara takasi 50.000 piti salaka.a 20 Kai cara ede, Nggahi Ro Eli Rumab nanaha mbou ro nanaha tenggo pangaruna.
Ngango ro ngora d̄i Efesus
19:21-41
21 Sawa'u b̄a nggori samenana ma ndad̄i ede kai ra ^dende ro wa'a b̄a Roh Allah la Paulusc laona aka Yerusalem, sia lampa saina Makedonia ro Akhaya. Nggahi la Paulus, <<Sawa'u b̄a nahu laoku ta aka, nahu pab̄uaku lao aka Roma rau.>> 22 Ndad̄i sia kauna d̄ua dou d̄i ade weki dou-dou ma bantuna, eded̄u la Timotius lab̄o la Erastus d̄imalao ulu aka Makedonia, sia mbuipu ngge'ena pila-pila wakatu ntoina d̄i propinsi Asia.
23 Takasi d̄i wakatu edeku ndad̄ina ngango ro ngora ma na'e d̄i Efesus b̄ara ngoa ro tei mab̄oha Isa Al Masih. 24 B̄ara d̄i kota ede wara sab̄ua dou mataki nde^de salaka ma ngara la Demetrius, ma ndawi uma-uma berhala d̄i ru'u b̄a Dewi Artemis. Karawi dou ede nakamaiku arujiki ma mboto d̄i ru'u b̄a dou-dou makarawina. 25 B̄ara ndedena sia kab̄orona dou-dou makarawina sama-sama lab̄o dou-dou ma nde^de salaka ma kalaina, ro nggahina, <<Cina ro angi! Nggomid̄oho wa'ura b̄ademu b̄a one ndai rakata arujiki b̄ara karawi ake. 26 Ake nggomid̄oho wa'ura eda ro ringa b̄a ndaimu au ra karawi b̄a la Paulus ede. Nggahi sia b̄a one au ra ndawi b̄a manusia laina dewa. Ro sia wa'ura kandad̄ina mboto dou ma imbi d̄i ngoa ro teina, laina d̄i Efesus ake mpoa, pala ne'empara sara'a dana ro rasa Asia rau. 27 Iha ^di'iu b̄a ndai eded̄u au ra karawi b̄a ndai ake d̄imaraka ngara ma iha. Ro laina ede mpoa, malaisi uma Dewi Artemis watid̄u ^dikaco'i rau ro na'e ro ntoruna ^ditonda ro le^di; sapodakaina sia dewi d̄iroi ro wadi b̄a sara'a dou ma wara d̄i Asia ro d̄i sara'a dunia!>>
28 Ndede ringa b̄a dou-dou nggahi ede siad̄oho mbani podana, edempara siad̄oho kanggicana, <<D̄ese ro ntasara d̄i ru'u b̄a Artemis, dewi dou Efesus!>> 29 Ndad̄i ngango ro ngora ede nanaha na'e d̄i sara'a kota. Edempara kalompo dou-dou mangango ede wa'u ro letona la Gayus lab̄o Aristarkhus, eded̄u dou-dou Makedonia lenga ma lab̄ona la Paulus d̄i ade lampa ro laona, edempara randana siad̄oho lao aka stadion d̄i kota ede. 30 La Paulus nane'e lu'u b̄atu siad̄oho, pala dou-dou ma imbi d̄i Isa ta aka makantana sia. 31 Pila-pila dou mana'ekai propinsi Asia ede rau, ma kasoba angi lab̄o la Paulus, kauna dou lao ngoa la Paulus loakud̄u sia aina lao katada weki d̄i stadion ede. 32 Wakatu ede dou-dou ma kab̄oro weki d̄i stadion ede wa'ura ndad̄i ngango poda. Wara ma kanggica ndake, wara ma kanggica ndede, b̄ara mboto d̄i ade weki siad̄oho ma wati b̄ade b̄ab̄auku siad̄oho ka^borokaina weki ta ede. 33 Sarundena d̄i ade weki dou-dou ede makacai la Aleksander fu'u maikaina ngango ede b̄ara siaku ra^dunggi cad̄ei b̄a dou-dou Yahudi. Ndad̄i la Aleksander mbeina tanda kai rimana d̄i rahokaina wakatu d̄i horukaina weki d̄i tando dou-dou ede. 34 Pala ndede eda b̄a siad̄oho b̄a one sia dou Yahudi, siad̄oho kanggica kana'ena d̄ua jam ntoina, <<D̄ese ro ntasara d̄i ru'u b̄a Artemis, Dewi dou Efesus!>>
35 Edempara panitera kota ma wa'una kamidi ngango ro ngora dou mamboto ede. Nggahi sia, <<Dou-dou Efesus! Sanikina dou nab̄adeku b̄a one Efesus ake kota majaga ro sandakana uma Dewi Artemis ro patung wadu maraso ma rama^bu ra d̄i langi. 36 Wati kone sab̄ua dou rau ma loana kawati lampa rawi ede. B̄ara ndedena midipu ro aina karawi au-au sawatipu kananu katahomu. 37 Dou-dou ake, rawa'a b̄a nggomid̄oho ta ake laina b̄ara siad̄oho wa'ura rampona uma berhala atao b̄ara siad̄oho wa'ura kab̄awa ro katunana dewi, ruma ndai. 38 Nggara la Demetrius lab̄o dou-dou makarawina ede ma ne'e da'awa dou, co'opu siad̄oho wa'ana parakarana ede aka pengadilan. Pengadilan natarima aoku lampa rawi ede ro dou-dou mana'e b̄ora dana ro rasa rau nangge'e mpa warana. 39 Pala nggara nawara walisi ma kalaina d̄i ne'e b̄a nggomid̄oho, ede pab̄uaku ^dikanggori ade mbolo na'e ma saha. 40 B̄ara au ma wa'ura ndad̄i d̄i ainaina ake loa d̄i ihakai b̄a ndai. Ndai loa d̄iwi'ikai makatu'una ngango ro ngora, b̄ara wati wara alasan au-au ndad̄ikaina ngango ro ngora ake.>> 41 Sawa'u b̄a nggahi ndede, panitera kota ede kauna dou mamboto ede lao dula.