La Paulus d̄i Korintus
18:1-17
18
Sawa'u b̄a ede la Paulus tu'u wi'ina Atena ro laona aka Korintus. 2 D̄i Korintus sia eda angina lab̄o sab̄ua dou Yahudi ma ngara la Akwila dou dana ro rasa Pontus. La Akwila b̄oupu maina ra d̄i Italia lab̄o weina la Priskila. Siad̄oho maina aka Korintus b̄ara Kaisar Klaudius wa'ura kauna sara'a dou Yahudi losa d̄i Roma. La Paulus lao rakana siad̄oho ^duana, 3 edempara ngge'ena ta ede lab̄o siad̄oho ro karawi sama-samana lab̄o siad̄oho, b̄ara ngupakai ngaha siad̄oho sama b̄une la Paulus, eded̄u ndawi kema. 4 Pala sanikina ainaina Sabat, la Paulus lao nuntu ro nggahina lab̄o dou d̄i uma sambea ro ibadakai ^dingupakaina ncai loakud̄u dou-dou Yahudi ro dou-dou Yunani, imbi d̄i Isa Al Masih.5 Sawa'u b̄a la Silas ro la Timotius tu'u wi'ina Makedonia, la Paulus kanina sara'a wakatuna d̄i ngoa ro kahabakaina Nggahi ro eli Allah Ta'ala d̄i dou-dou Yahudi b̄a one Isa Al Masih edeku Sangaji Makasalama ra sake b̄a Allah Ta'ala. 6 Pala b̄ara dou-dou ma wati ca'u ro makasungge-sunggena, ndad̄i la Paulus furana kalu^bu d̄i kani ro lombona d̄imandad̄i tanda kawarakai d̄i siad̄oho b̄ara rawina ma ncara. Nggahi sia, <<Nggara ihasi nggomid̄oho, ede ncara ndaimu! Nahu kawa'ura hori weki! Tampu'u ake nahu d̄imalao aka dou-dou ma laina Yahudi.>> 7 Edempara la Paulus tu'u wi'ina siad̄oho ro lao ngge'ena d̄i uma ma wara d̄i kompe uma sambea ro ibadakai ede. Uma ede uma sab̄ua dou ma laina Yahudi, pala sia nanemba Allah Ta'ala. Ngara dou ede la Titius Yustus. 8 La Krispus, dou mana'ekai uma sambea ro ibadakai ede lab̄o sara'a iwa ro wekina na'imbi d̄i Isa. Ro mboto rau dou Korintus makalaina maringa haba ra karongga b̄a la Paulus, ro siad̄oho na'imbiku d̄i Isa Al Masih edempara siad̄oho kandeu sarani.
9 D̄i sab̄ua aimanga^dina, la Paulus katada b̄a Ruma d̄i ade nifina, nggahi Ruma d̄i la Paulus, <<Aina dahumu! Ngoa ro kahaba ncaupu Nggahi ro eli Ruma. 10 B̄ara Nahu malab̄ona nggomi. Wati kone sab̄ua dou rau maloana karawi ma dab̄ae d̄i nggomi, b̄ara mboto dou d̄i kota ake eded̄u dou-dou Nahu.>> 11 B̄ara ndedena la Paulus ngge'ena d̄i Korintus samba'a ini wura ntoina ro ngoa ro teina Nggahi Ro Eli Allah Ta'ala d̄i siad̄oho.
12 Wakatu la Galio mandad̄i gubernur Akhaya, dou-dou Yahudi kasab̄uana weki d̄i aokaina la Paulus ro lao wa'ana sia aka kanto pengadilan. 13 Siad̄oho b̄ab̄u ro lo'ona, <<Dou ake ma siwi ro recena dou mamboto loakud̄u nembana Allah Ta'ala kai cara ma wati ncihi ncao lab̄o hukum Taurat!>>
14 Wunga ne'e cambe b̄a la Paulus, la Galio wa'ura nggahina d̄i dou-dou Yahudi, <<Oe dou-dou Yahudi! Nggara lampa rawi ra da'awa ake sapana atoran atao sab̄ua lampa rawi ma'iha, poda nahu patu ^dimalembo ade ringa da'awamu ake. 15 Pala nggara ake eded̄u cence ncihi mab̄oha nggahi ro eli ro ngara-ngara ro hukum-hukum ndaimu! Ndad̄i ndai nggomi^dohoku ^dimapab̄ua kanggorina. Nahu wati ne'eku paresa lampa rawi-lampa rawi b̄une ake!>> 16 Edempara la Galio katesana siad̄oho d̄i kanto pengadilan. 17 Ndad̄i dou-dou Yahudi ede wa'u ro letona la Sostenes, dou mana'ekai uma sambea ro ibadakai ede, ro ^boena sia d̄i tando meja pengadilan. Pala la Galio wati poda kandad̄i auna d̄i lampa rawi ede.
La Paulus dula mbali aka Antiokhia
18:18-23
18 Sawa'u b̄a ede la Paulus mbuipu ngge'e ntoina d̄i Korintus. Edempara sia rahona weki d̄i dou-dou ma imbi ta ede, edempara lao lojana lab̄o la Priskila ro la Akwila lao aka Siria. D̄i Kengkrea, la Paulus ^boruna honggo ra wi'i kanaruna b̄ara wara ra sakena d̄i Ruma.y 19 Wakatu ronggana d̄i Efesus, la Paulus tu'u wi'ina la Priskila ro la Akwila, edempara lu'u kesena d̄i uma sambea ro ibadakai ro nuntuna lab̄o dou-dou Yahudi ta ede. 20 Siad̄oho rahona loakud̄u sia ngge'e ntoi wali lab̄o siad̄oho, pala sia wati ngawana. 21 Kone ade ndedekaina, wakatu sia ne'era lao, nggahi sia, <<Nggara nakane'ekaisi b̄a Allah Ta'ala, nahu d̄imamai wali ta ake.>> Sawa'u b̄a nggahi ndedena, sia tu'u wi'ina Efesus.
22 Sawa'u b̄a londona d̄i Kaisarea, sia laona aka Yerusalem d̄i mbeikaina salam d̄i ela Ruma ta ede, edempara lampa walina lao aka Antiokhia. 23 Sawa'u b̄a ngge'ena ta ede pila-pila wakatu ntoina, sia lao lamba walina dana ro rasa Galatia ro Frigia d̄i katenggokaina imbi dou-dou ma wa'ura imbi ta aka.
La Apolos d̄i Efesus ro Korintus
18:24-28
24 Wakatu ede, aka Efesus mai sab̄ua dou Yahudi ngarana la Apolos ra nggana d̄i Aleksandria. Sia nawancuku loana nuntu ro nggahi ro nawancuku loana mab̄oha Kitab Suci, 25 ro sia wa'ura tei kataho d̄i patakaina ngoa ro tei mab̄oha Isa Al Masih. Ndad̄i kai kapodana ade sia ngoa ro tei kab̄aena mab̄oha Isa, konena sia ampona b̄ade mab̄oha kandeu raso b̄a la Yahya mpoa mpa. 26 Kai disana la Apolos tampu'una nuntu ro nggahi d̄i uma sambea ro ibadakai ro wakatu ringa b̄a la Priskila ro la Akwila au ra ngoa ro teina, siad̄oho recena sia lao aka umana. Ta aka siad̄oho ngoa kab̄ae walina d̄i sia kai mancihi wali mab̄oha nia Allah Ta'ala ma mbei salama manusia kai ncai Isa Al Masih. 27 Edempara la Apolos nane'e lao aka Akhaya. Ndad̄i dou-dou ma imbi d̄i Isa Al Masih d̄i Efesus tuntina sura d̄i ru'u b̄a cina ro angina ma'imbi d̄i Akhaya loakud̄u siad̄oho ngawana tarima ao la Apolos. Ro wakatu la Apolos ronggana d̄i Akhaya, mai sia ede nawancuku wara onena d̄i ru'u b̄a dou-dou ma wa'ura imbi d̄i Isa b̄ara rahmat Allah. 28 B̄ara kai lembo adena, la Apolos naloaku kakoa dou-dou Yahudi ma cence ncihi d̄i tando dou mamboto. Ro sia mbeina bukuti kai ayat-ayat ade Kitab Suci b̄a one Isa Al Masih eded̄u Sangaji Makasalama.