D̄i Tesalonika
17:1-9
17
La Paulus ro la Silas lampa ro lao walina ta ncai dana ro rasa Amfipolis ro Apolonia edempara ronggana d̄i Tesalonika. Ta aka wara uma sambea ro ibadakai dou Yahudi. 2 Ndad̄i la Paulus lao rauna aka uma sambea ro ibadakai ede -- b̄une ra nginakaina karawi b̄a sia nawarasi sab̄ua uma sambea ro ibadakai dou Yahudi -- edempara nuntu ro nggahina lab̄o dou-dou ta ede mab̄oha ayat-ayat Kitab Suci. Sia karawina ede tolu kali pimpi-pimpi ainaina Sabat. 3 Kai dasa ayat-ayat Kitab Suci sia ngoa kab̄aena ro mbeina bukuti b̄a one Sangaji Makasalama ra sake b̄a Allah Ta'ala wati loana wati, pab̄uaku iuna susa ro ncoki ro mori mbali ra d̄i madekaina. <<Isa Al Masih ra ngoa ro kahaba b̄a nahu d̄i nggomid̄oho, Siaku Sangaji Makasalama ra sake ede,>> nggahi la Paulus. 4 Pila-pila dou ndad̄i imbi edempara b̄atuna la Paulus ro la Silas; ndede rau mboto dou-dou Yunani ma dahu d̄i Allah Ta'ala, ro mboto wali dou-dou siwe ra kaco'i b̄a dou.5 Pala dou-dou Yahudi hiana adena. Siad̄oho ouna dou-dou ma dab̄ae ma lampa datantu d̄i ncai-ncai ro ndawina kalompo ^dimakangango rasa. Edempara siad̄oho kangangona d̄i sara'a kota ede ro lao deina uma dou ma'imbi ma ngara la Yason d̄i ngupakaina la Paulus ro la Silas, b̄ara siad̄oho nane'eku wa'a la Paulus ro la Silas lao satando dou mamboto. 6 Pala wakatu siad̄oho wati rakana eda la Paulus ro la Silas, siad̄oho randana la Yason ro pila-pila dou ma'imbi ma kalaina d̄i tando dou-dou mana'ekai dana ro rasa d̄i kota ede. Siad̄oho kanggicana, <<Dou-dou ma kangango sara'a dana ro rasa, wa'ura mai ta ake rau, 7 ro la Yason wa'ura tarimana siad̄oho d̄i umana. Siad̄oho sara'a sapana atoran-atoran Kaisar Roma, siad̄oho nggahina b̄a one wara wali sangaji makalai ma ngara Isa.>> 8 Kai nggahi ndedena, siad̄oho nakamaiku ngango ade dou mamboto ro dou-dou mana'ekaina d̄i kota ede. 9 Edempara dou-dou mana'ekaina ede kauna la Yason ro dou-dou ma'imbi ma kalaina cola kai piti loakud̄u siad̄oho ^dihori.
La Paulus ro la Silas d̄i Berea
17:10-15
10 D̄i aimangad̄i ede wa'u, dou-dou ma'imbi d̄i kota ede kauna la Paulus ro la Silas tu'u wi'i kota ede ro kauna lao aka Berea. Sawa'u b̄a ronggana ta aka, la Paulus ro la Silas laona aka uma sambea ro ibadakai dou Yahudi. 11 Dou-dou Yahudi d̄i Berea nancewi taho adena ntewikaisi lab̄o dou-dou Yahudi d̄i Tesalonika. Kai neo adena siad̄oho kade'ena haba mab̄oha Isa Al Masih, ro sanikina ainaina siad̄oho tana'o kab̄aena Kitab Suci d̄ib̄adekaina sab̄ua ngoa ro tei b̄a la Paulus ede napodaku. 12 Mboto d̄i ade weki siad̄oho ma imbi d̄i Isa, ro mboto poda dou-dou ma tuakai Yunani ma ndad̄i imbi; nataho dou siwe ro dou mone. 13 Wakatu ringa b̄a dou-dou Yahudi d̄i Tesalonika b̄a one la Paulus mangoa ro kahaba rauna Nggahi ro eli Allah Ta'ala d̄i Berea, siad̄oho rau maina d̄i Berea, ro sa^du'una dou-dou ro kamaina darura dou-dou ta ede. 14 Cina ro angi ma imbi Ruma d̄i Berea ede lao oto rocina la Paulus aka kengge moti, pala la Silas lab̄o la Timotius mbuipu ngge'ena d̄i kota ede. 15 Sawa'u b̄a lao otona la Paulus sampe aka Atena, cina ro angi ede dula mbalina aka Berea kai wa'ana nggahi ra nggadu b̄a la Paulus loakud̄u la Silas ro la Timotius b̄atu kento rocina sia.
D̄i Atena
17:16-34
16 La Paulus wunga ngenana la Silas ro la Timotius d̄i Atena, sia ncoki adena eda kota ede b̄ara b̄ini b̄a patung-patung. 17 B̄ara ndedena d̄i uma sambea ro ibadakai, la Paulus nuntu ro nggahina lab̄o dou-dou Yahudi ro dou-dou makalaina ma nemba Allah Ta'ala ta ede. Ndede rauku d̄i amba-amba sanikina ainaina sia nuntuna lab̄o dou-dou ta ede. 18 Guru-guru ma b̄atu kalompo Epikuros ro mab̄atu kalompo Stoa macence ncihi lab̄o sia. Pila-pila dou d̄i ade weki siad̄oho manggahi, <<Dou ake au ^badena? Ilmuna sato'i mpa, pala sia wale asana!>> Pila-pila dou makalaina manggahi, <<Sia nangoa ro kahabaku mab̄oha dewa-dewa bangsa makalai.>> Nggahi ndedekai siad̄oho, b̄ara la Paulus manuntu ro nggahi mab̄oha Isa Al Masih ro mab̄oha mori mbali sawa'u b̄a made.x 19 Edempara siad̄oho lao wa'ana la Paulus aka hid̄i mbolokai di Doro to'i Areopagus. Ta aka nggahi siad̄oho d̄i sia, <<Nami mane'e b̄ade tana'o mab̄ou ra ngoa ro kahaba b̄a nggomi ede. 20 B̄a one nggomi makatadana lampa rawi d̄i mborakai b̄a aka d̄i ringa b̄a fiko nami. B̄ara ndedena nami mane'e b̄ade ao ro ma'anana.>> 21 B̄a one sara'a dou Atena ro dou-dou lai rasa ma ngge'e ta ede nawancuku ca'una kampoi wakatu mantaru d̄i kade'ekaina nuntu ro nggahi mab̄oha lampa rawi-lampa rawi ma ^bou.
22 Wakatu la Paulus kad̄ina d̄i tando dou-dou ma kab̄oro weki d̄i Areopagus ede, nggahi la Paulus, <<Oe dou-dou Atena! Eda b̄a nahu ade samenana lampa rawi nggomid̄oho mawancuku to'amu d̄i agamamu. 23 B̄ara wakatu lampa kalili b̄a nahu kotamu ro tio ka^baeku hi^di-hid̄i sambea ro ibadakaimu, nahu eda rauku sab̄ua hid̄i d̄i d̄onggo ro mbeikai koroba; d̄i hid̄i ede wara ratunti, <D̄i ru'u b̄a Allah Ta'ala Ma Wati Rapata.> Allah Ta'ala ra nemba b̄a nggomid̄oho pala wati patamu ede, Sia edeku rangoa ro kahaba b̄a nahu d̄i nggomid̄oho. 24 Allah Ta'ala ma rakandad̄ina dunia ake lab̄o sara'a isina, Sia Ruma makuasa kai langi ro dana. Sia wati ngge'ena d̄i ade uma-uma berhala ra ndawi b̄a manusia. 25 Sia rau wati paraluna bantu b̄a manusia, b̄ara Siaku ma mbei mori ro woko ro nawa ro samenana au-au d̄i manusia. 26 Ra d̄i sab̄ua dou manusia Sia kandad̄ina samenana bangsa ro kauna siad̄oho ngge'e d̄i sara'a dana ro rasa d̄i dunia. Sia rauku ma katantuna aipu saramba wa'una, b̄une aiku ro ta b̄eku siad̄oho loakaina mori. 27 Allah Ta'ala karawina ede loakud̄u siad̄oho ngupa rerona Sia. Ro raho-raho to'i mpa siad̄oho eda angina lab̄o Sia d̄i wakatu siad̄oho ngupa rerona Sia. Pala sapodakaina Allah Ta'ala wati d̄o'ona lab̄o ndaita. 28 B̄une ra nggahi b̄a dou, <Ndai mori ro rukuta ro wara d̄i dunia ake b̄ara kuasa Sia.> Sama rau lab̄o ra nggahi b̄a pila-pila dou ma loa patu. Nggahi siad̄oho,
<Ndai sara'ana eded̄u ana-ana Allah.>3 29 B̄a one ndai eded̄u ana-ana Allah, ndai wati loata wi'ikai Allah Ta'ala sama b̄une patung ra ndawi kai masa ro salaka ro wadu rapa'a kai loa manusia. 30 Jaman sampula ndai ede wa'ura nefa b̄a Allah Ta'ala, pala ake Sia kauna samenana dou d̄i sara'a dunia loakud̄u siad̄oho tobana ra d̄i dosa-dosa siad̄oho. 31 B̄ara Sia wa'ura katantuna wakatu d̄iparesa ro ^dihukumkai sara'a dunia ake kai adil. Taki ede d̄ikalampa b̄a sab̄ua dou ra wa'u kad̄ale b̄a Allah Ta'ala d̄i ru'u b̄a ede. Ro loakud̄u sara'a dou imbi podana d̄i lampa rawi ede, Allah Ta'ala wa'ura kamori mbalina dou ede ra d̄i madekaina!>>
32 Wakatu ringa b̄a dou-dou ede mab̄oha mori mbali sawa'u b̄a made, wara d̄i weki siad̄oho maharikai la Paulus. Pala wara rau ma nggahi, <<Nami mane'e ringa wali nggomi nuntu ro nggahimu mab̄oha lampa rawi ake.>> 33 Sawa'u b̄a ede la Paulus tu'u wi'ina hid̄i mbolokai ede. 34 Pala wara d̄i ade weki siad̄oho ma b̄atu la Paulus ro imbi d̄i Isa Al Masih, d̄i ade wekina ma imbi ede eded̄u: La Dionisius anggota majelis Areopagus, ro sab̄ua dou siwe ma ngara la Damaris, ro pila-pila dou wali.