La Saulus tobana
9:1-19a
9
Wakatu ede la Saulus na'ipi podaku kadahu ncauna ro hadena dou-dou ma imbi d̄i Ruma Isa. Sia laona aka Imam Agung, 2 ro rahona sura kuasa ^diwa'ana aka dou-dou mana'ekai uma sambea ro ibadakai dou Yahudi d̄i Damsyik, loakud̄u nggara narakasi eda b̄a sia, dou-dou ma imbi d̄i Isa nataho mamone atao masiwe, sia naloa wa'u ro leto siad̄oho ro lao wa'ana aka Yerusalem.3 Wunga ade lampa ro laokaina aka Damsyik, wakatu ^denira lab̄o kota ede, wed̄i lalo mpa taroa ma ramai ra d̄i langi makataroa heko la Saulus. 4 Sia mbo'ona awa dana edempara ringana eli ma nggahi, <<Saulus, Saulus! B̄ab̄auku nggomi kancokikaimu Nahu?>>
5 <<Cou Ita?>> Sod̄i b̄a la Saulus.
Cambe b̄a eli ede, <<Nahu eded̄u Isa Al Masih, ra kancoki b̄a nggomi. 6 Pala ake tu'ura ro lao lu'upu aka kota. Ta aka wara dou d̄imangoa nggomi au d̄i pab̄ua karawi b̄a nggomi.>>
7 Dou-dou ma lampa sama lab̄o la Saulus wed̄i adena, ndad̄ina siad̄oho wati loana nggahi au-au; b̄ara siad̄oho naringaku eli ede pala wati wara edana cou-cou rau. 8 Edempara la Saulus tu'u kad̄ina ro henggana madana, pala wati loana eda au-au wali. Ndad̄i siad̄oho nentina rima la Saulus ro ^dandana sia lu'u aka Damsyik. 9 Tolu nai ntoina sia wati loana eda ro santoi ede sia wati ngaha ro nonona.
10 D̄i Damsyik wara sab̄ua dou ma imbi d̄i Ruma Isa ma ngara la Ananias. B̄une d̄i ade nifi sia edana Ruma manuntu lab̄o sia. Nggahi Ruma d̄i sia, <<Ananias!>>
Cambe b̄a la Ananias, <<Io, mada, Ruma.>>
11 Nggahi Ruma, <<Tu'ura, laopu aka uma la Yudas aka ncai ma ngara Ncai Marombo. So^dipu ta aka dou ma ngara la Saulus ma ramai ra d̄i kota Tarsus. Dou ede wunga do'ana, 12 ro d̄i ade edana rangoa b̄a Ruma ede sia edana sab̄ua dou mone ma ngara la Ananias, mamai raka sia ro tohona rimana loakud̄u sia loa eda mbali.>>
13 Cambe b̄a la Ananias, <<Io Ruma, mada wa'ura ringaku mboto dou ma nuntu mab̄oha dou ake, b̄a one sia wa'ura ipi mboto kancokina dou ma imbi d̄i Ita d̄i Yerusalem. 14 Ro ake sia wa'ura mai ara ake ra kau b̄a dou-dou mana'ekai imam ^dimawa'u ro leto sara'a dou ma imbi d̄i Ita.>>
15 Pala nggahi Ruma d̄i la Ananias, <<Laopu! B̄ara Nahu wa'ura ka^daleku sia d̄imakarawi wea d̄i ru'u b̄a Nahu, loakud̄u sia d̄imangoa ro kahabana mab̄oha Nahu d̄i bangsa-bangsa makalaina ma laina agama Yahudi ro d̄i sangaji-sangaji ro d̄i ela ro dou Israel rau. 16 Ro ndai Nahu d̄imakatadana d̄i sia samenana susa ro ncoki d̄ipab̄ua iu b̄a sia b̄ara imbina d̄i Nahu.>>
17 Edempara la Ananias lao lalona aka uma ede ro tohona rima d̄i la Saulus. Nggahi la Ananias, <<Cinaku, Saulus, Ruma Isa ra eda b̄a ndaimu d̄i woha ncai wakatu maimu ta ake, Siaku ma rakau mai nahu loakud̄u nggomi loa eda mbali ro ^dikuasakai b̄a Roh Allah.>> 18 Wakatu ede wa'u wara ma b̄une fenta uta ma sangkolo losa d̄i mada la Saulus ro sia loa lalona eda. Ndad̄i sia tu'una, edempara kandeu sarani. 19 Ro sawa'u b̄a nggori ngahana, sia ndad̄i tenggo mbali.
La Saulus ngoa ro teina d̄i Damsyik
9:19a-25
La Saulus ngge'ena d̄i Damsyik lab̄o dou-dou ma imbi d̄i Isa Al Masih pila-pila nai ntoina. 20 Sia lao lalona aka uma-uma sambea ro ibadakai ro tampu'ura ngoa ro kahabana b̄a one Isa eded̄u Ana Allah.2
21 Sara'a dou namidi mena adena ringa nuntu ro nggahi la Saulus. Nggahi siad̄oho, <<Sab̄ua laina sia akesi ma wa'ura hade sara'a dou ma imbi d̄i Isa Al Masih d̄i Yerusalem? Sia maina ta ake sab̄ua laina b̄a ne'ena wa'u ro leto ro wa'a siad̄oho d̄i dou-dou mana'ekai imam?>>
22 Pala la Saulus nanaha na'e pangaruna. Bukuti-bukuti ra nggahi b̄a sia mab̄oha Isa Al Masih nawancuku podana b̄a one Isa eded̄u Sangaji Makasalama, sampe dou-dou Yahudi ma ngge'e d̄i Damsyik wati loa walina nggahi au-au.
23 Sawa'u b̄a pila-pila nai ntoina dou-dou Yahudi mafakana ne'e hade la Saulus. 24 Pala mafaka siad̄oho ede raka b̄ade b̄a sia. Aimarai aimangad̄i siad̄oho ngena aona d̄i tad̄a lawa kota d̄ine'ekaina hade sia. 25 Pala d̄i sab̄ua aimanga^di, dou-dou mab̄atu la Saulus lao weha aona sia, edempara kalondona sia kai garanji ta ari mai b̄a tembo kota.
La Saulus d̄i Yerusalem
9:26-31
26 La Saulus laona aka Yerusalem, ro ta aka sia ngupana ncai d̄i ka^borokaina weki lab̄o dou-dou ma imbi d̄i Isa Al Masih. Pala dou-dou nadahuku d̄i sia, b̄ara siad̄oho wati imbina b̄a one sia wa'ura poda-poda imbi d̄i Isa. 27 Pala la Barnabas mai rakana sia, edempara lao wa'ana sia d̄i rasul-rasul. La Barnabas ade lampa ro laokaina aka Damsyik, sia ngoa kab̄aena d̄i siad̄oho ra b̄unena la Saulus edana Ruma d̄i woha ncai ro b̄uneku Ruma manuntu ro nggahi lab̄o sia. La Barnabas ngoa rauna mab̄oha b̄uneku la Saulus disakaina ngoa ro tei d̄i Damsyik kai ngara Isa. 28 Edempara la Saulus ngge'e lab̄ona siad̄oho, ro disana ngoa ro tei kai ngara Isa d̄i sara'a dana ro rasa Yerusalem. 29 Sia nuntu ro nggahina ro cence ncihina lab̄o dou-dou Yahudi rau ma nuntu kai bahasa Yunani, pala siad̄oho nangupaku ncai d̄ine'ekaina hade sia. 30 Wakatu dou-dou ma imbi makalai b̄adena mab̄oha lampa rawi ede, siad̄oho lao wa'a pesona la Saulus aka Kaisarea. Edempara nggaduna sia aka Tarsus.
31 Ndad̄i ela Ruma d̄i sara'a Yudea, Galilea, ro Samaria taho ro sana morina, ro nemba ro to'a d̄i Ruma. Naha ntoi nanaha mboto dou ma imbi d̄i Ruma b̄ara Roh Allah ma bantuna siad̄oho.
La Petrus d̄i kota Lida ro Yope
9:32-43
32 D̄i sab̄ua ainaina la Petrus lao lampana d̄i sanikina dana ro rasa. Ade lampa ro laokaina ede, sia lao saina d̄i ela Ruma ma ngge'e d̄i Lida. 33 Ta aka sia eda angi lab̄o sab̄ua dou mone ma ngara la Eneas, ma supu made ^binci ro wati loana tu'u d̄i hid̄i marukaina waru mba'a ntoina. 34 Nggahi la Petrus d̄i la Eneas, <<Eneas, Isa Al Masih makatahona nggomi. Tu'ura ro kamocipu hid̄i marukaimu.>> Wakatu ede wa'u la Eneas tu'una. 35 Sara'a ela ro dou d̄i dana ro rasa Lida ro Saron ma edana la Eneas, edempara siad̄oho sara'ana ndad̄i imbi d̄i Ruma.
36 D̄i Yope wara sab̄ua dou siwe ma ngara la Tabita. Sia sab̄ua dou ma imbi d̄i Isa Al Masih. Ngarana d̄i ade nggahi Yunani eded̄u la Dorkas. Dorkas ao ro ma'anana eded̄u maju. Sia nakarawi ncau mataho ro nabantu ncauku dou-dou mancoki mori. 37 Wakatu ede sia b̄oha b̄a supu edempara madena. Sawa'u b̄a nggori kandeu b̄a dou timbana, siad̄oho karuna timba ede d̄i b̄ili ma esena. 38 Rasa Yope wati ipi d̄o'ona lab̄o rasa Lida. Ndad̄i wakatu ringa b̄a dou-dou ma imbi d̄i Isa d̄i rasa Yope b̄a one la Petrus wara d̄i rasa Lida, siad̄oho kauna d̄ua dou lao raka la Petrus kai nggaduna nggahi, <<Mai roci to'ipu aka hid̄i mada^doho.>> 39 La Petrus tu'u lalona ro lao b̄atuna siad̄oho.Sawa'u b̄a ronggana ta aka, sia lao wa'a b̄a dou d̄i b̄ili ma esena. Sara'a dou siwe mbaru mboha ta ede mai hekona la Petrus ro nangi salahona ro teina d̄i sia ^baju-^baju ro jumba-jumba ra nda'u b̄a la Dorkas d̄i ru'u b̄a siad̄oho wakatu sia mbuipu morina. 40 La Petrus kauna losa siad̄oho, edempara sia doho sujuna ro do'ana. Sawa'u b̄a ede sia satandona d̄i timba la Dorkas ro nggahina, <<Tabita, tu'ura!>> Edempara la Tabita henggana madana, ro wakatu edana la Petrus, sia tu'u dohona. 41 Ndad̄i la Petrus nentina rima ro bantuna sia tu'u ki^di. Edempara la Petrus ouna dou-dou ma imbi ta ede sama-sama lab̄o dou-dou siwe mbaru mboha ede, edempara d̄onggona la Tabita ma wa'ura mori mbali ede d̄i siad̄oho. 42 Haba mab̄oha au ma ndad̄i ede wa'ura mbou d̄i sara'a rasa Yope, ndad̄i mboto dou ma imbi d̄i Isa, Sangaji Makasalama siad̄oho. 43 La Petrus ngge'ena d̄i Yope ede pila-pila nai wali d̄i uma dou ma taki kab̄ua huri ma ngara la Simon.