La Petrus lab̄o la Kornelius
10:1-48
10
D̄i Kaisarea wara sab̄ua dou mone ma ngara la Kornelius. Sia eded̄u perwira tentara ^dipehe kai <<Tentara Italia>>. 2 Sia dou ma to'a d̄i Allah Ta'ala ro sara'a iwa ro wekina nanemba Allah Ta'ala. Sia mboto bantuna dou-dou Yahudi ma ncoki mori, ro sia nado'a ncau d̄i Allah Ta'ala. 3 D̄i sab̄ua ainaina takasi ^boe tolu aimarai, sia edana sab̄ua mala'eka Allah Ta'ala ma mai ro ouna sia, <<Kornelius!>>4 Kornelius ntandana mala'eka ede kai dahu, edempara nggahina, <<Io, Ruma?>>
Cambe b̄a mala'eka ede, <<Do'amu ro ncera ro mbura ademu wa'ura tarima b̄a Allah Ta'ala ro Allah Ta'ala nakawaraku nggomi. 5 Ake kaupu pila-pila dou lao aka Yope weha ao la Simon ^dipehe rau kai la Petrus. 6 Sia narongga d̄i uma dou mataki kab̄ua huri ma ngara la Simon, sia nangge'e d̄i kengge moti.>> 7 Sawa'u b̄a lao mala'eka ma nuntu lab̄o la Kornelius ede, la Kornelius ouna d̄ua dou adana d̄i umana ro sab̄ua dou anggota tentara ma to'a ma taki jaga sia. 8 La Kornelius ngoana d̄i siad̄oho au ma wa'ura ndad̄i, edempara kauna siad̄oho lao aka Yope.
9 B̄ala aisanai, siad̄oho wunga ade lampa ro laokaina aka Yope ro nane'empara rongga, la Petrus ne'ena ese uma d̄ine'ekaina do'a. 10 Edempara sia iuna hid̄o poda ro nane'e ngaha. Wunga ka'ambi wea ngaha ro nono, sia kuasakai b̄a Roh Allah. 11 Sia edana langi ma hengga weki ro wara b̄une kaen ma lembo ra kalondo awa dunia, b̄une ra tero d̄i upa mbua padona. 12 Ta d̄ei kaen ede wara mboto pahu binata ma upa mbua e^di, sara'a pahu binata ma rama ro nasi-nasi. 13 Edempara wara eli manggahi d̄i sia, <<Petrus, tu'ura! Sambelepu ro ngahapu!>>
14 Cambe b̄a la Petrus, <<Wati, Ruma! Mada watipu iuku ngaha au-au ma haram atao ma najis.>> 15 Pala eli ede nggahi walina d̄i sia, <<Au ra nggahi b̄a Allah Ta'ala halal, aina wi'ikai b̄a nggomi ede haram.>> 16 Au ra edana ede katada b̄a Ruma sampe tolu kali, edempara kaen ede hantana weki lao ese langi.
17 La Petrus sod̄i b̄a adena auku aona ra katada b̄a Ruma ede. Wakatu mbuipu kananuna ede, dou-dou ra kaukai b̄a la Kornelius rakara uma la Simon ro siad̄oho wa'ura wara d̄i tando tad̄a ncai. 18 Edempara siad̄oho ouna dou ro sod̄ina, <<Sab̄ua ta ake wara dou ma rongga ma ngara la Simon Petrus?>>
19 La Petrus mbuipu kananu ncauna d̄ib̄adekaina auku aona ra katada b̄a Ruma ede, nggahi Roh Allah d̄i sia, <<Petrus, wara tolu doul ma wunga ngupa nggomi. 20 Londo rocipu ro aina mbali mbua ademu b̄atu siad̄oho, b̄a one Nahu ma rakakaina siad̄oho.>> 21 Edempara la Petrus londona ro nggahina d̄i dou-dou ede, <<Nahuku, dou ra ngupa b̄a nggomid̄oho.^Ba^bau ngupakaimu nahu?>>
22 Cambe b̄a siad̄oho, <<Io, Perwira Kornelius ma rakakai madad̄oho mai ta ake. Sia dou ma taho ro ma to'a d̄i Allah Ta'ala, ro nakaco'iku b̄a sara'a dou Yahudi. Sab̄ua mala'eka Allah ma kau sia mai weha ao ita lao aka umana ^diringa ro kade'ekaina au ra nggahi b̄a ita.>> 23 Edempara la Petrus kauna siad̄oho lu'u maru wa'u ta ede.
B̄ala aisanai la Petrus tu'una ro lao samana lab̄o siad̄oho.Pila-pila dou ma imbi Ruma d̄i Yope malao b̄atu rau. 24 Sanai sawa'u b̄a ede siad̄oho ronggana aka Kaisarea. Ta aka siad̄oho wa'ura ngena b̄a la Kornelius lab̄o iwa ro wekina ro lenga-lenga taho lab̄ona ra unda b̄a sia. 25 Wakatu rongga la Petrus, la Kornelius mai weha aona sia ro sujuna d̄i tando la Petrus. 26 Pala la Petrus bantuna sia tu'u kid̄i, ro nggahina, <<Tu'ura! Nahu manusia rau.>> 27 Wakatu mbuipu nuntuna lab̄o la Kornelius, la Petrus lu'una d̄i ade uma. Ta ede sia edana mboto dou makab̄oro weki. 28 Edempara nggahi sia d̄i siad̄oho, <<Ndai nggomid̄oho mab̄adeku b̄a one dou Yahudi nakantaku b̄a agamana mai lamba atao mai kab̄oro weki lab̄o dou-dou bangsa makalai. Pala Allah Ta'ala wa'ura katadana d̄i ndai nahu b̄a one nahu wati loa wi'ikai najis atao haram d̄i cou-cou rau. 29 B̄ara ndedena wakatu nggomi kaumu nahu mai, nahu wati tani adeku mai. Ndad̄i ake nahu kane'e b̄ade b̄ab̄auku kaukaimu mai nahu.>>
30 Cambe b̄a la Kornelius, <<Tolu nai ma rawa'u, takasi wakatu b̄une ake, mada wunga do'akum d̄i uma ^boe tolu aimambia. Wed̄i lalo mpa sab̄ua dou mone ma kad̄i d̄i tando mada. Kani ro lombo dou ede nawancuku lanta kancilona. 31 Nggahi mala'eka ede, <Kornelius! Allah Ta'ala wa'ura ringana do'a nggomi ro nakawaraku ncera ro mbura ademu. 32 Ndad̄i kaupu dou lao aka rasa Yope, ou dou ma ngara la Simon ^di'ou rau kai la Petrus. Sia wunga ronggana aka uma sab̄ua dou ma taki kab̄ua huri ma ngara la Simon; umana ede d̄i kengge moti.> 33 B̄ara ndedena mada kau rociku dou lao weha ao ita. Ro kai sana poda ademu ita maimu ta ake. Ake madad̄oho sara'ana wa'ura kab̄oro weki ta ake d̄i tando Allah Ta'ala ^dimakade'e sara'a au ra kaukai b̄a Allah Ta'ala d̄i Ita ro ^dikaronggata d̄i mada^doho.>>
34 Edempara nggahi la Petrus, <<Ake nahu poda-poda wa'ura ^badeku b̄a one Allah Ta'ala wati ntanda kalaina dou. 35 Kone dou bangsa b̄e wali, nggara nato'a ro nadahusi d̄i Allah Ta'ala ro nakarawisi au ma poda ro ma ncihi dou ede, natarimaku b̄a Allah Ta'ala. 36 Cina ro angi wa'ura b̄ademu isi haba ra karongga b̄a Allah Ta'ala d̄i bangsa Israel. Haba ede eded̄u nggahi ro eli Allah Ta'ala mab̄oha taho ro sana kai ncai Isa Al Masih, eded̄u Ruma b̄a samenana dou. 37 Nggomid̄oho wa'ura b̄ade raumu au ma wa'ura ndad̄i d̄i sara'a Yudea, eded̄u ra tampu'u d̄i Galilea sawa'u b̄a kandeu raso ra kaukai b̄a la Yahya. 38 Nggomid̄oho mab̄ade rauku b̄a one Allah Ta'ala wa'ura kad̄alena Isa Al Masih dou Nazaret ede ro mbeina d̄i Sia Roh Allah ro kuasa. Isa nawa'ura lao ta b̄e-b̄e d̄ikarawikaina ma taho; Sia katahona sara'a dou ra kuasakai b̄a Iblis, b̄ara Allah Ta'ala malab̄ona Sia. 39 Nami akeku dou-dou ma wa'ura eda madana samena au ra karawi b̄a Sia d̄i dana ro rasa dou Yahudi ro d̄i Yerusalem. Ro siad̄oho wa'ura salib ro hadena Sia. 40 Pala d̄i ainaina ma katolukaina Allah Ta'ala makamori mbalina Sia ra d̄i madekaina ro katadana Sia d̄i manusia; 41 wati d̄i sara'a dou, malaisi d̄i nami mpoa mpa ra wa'u kad̄ale ulu b̄a Allah Ta'ala d̄imandad̄i sakasi-sakasi-Na: Nami ngaha ro nonomu lab̄o Sia sawa'u b̄a Sia mori mbali ra d̄i madekaina. 42 Ro Sia makauna nami ngoa ro kahaba Haba Mataho d̄i dou-dou ro mambei sakasi b̄a one Siaku ra hanta b̄a Allah Ta'ala d̄imandad̄i Hakim d̄i ru'u b̄a dou-dou ma mbuipu mori ro d̄i ru'u b̄a dou-dou ma wa'ura made. 43 Sara'a nabi wa'ura nuntuna mab̄oha Sia. Nggahi siad̄oho b̄a one sara'ana dou ma imbi d̄i Isa, ^dikangampu wea dosana kai kuasa ma ramai ra d̄i Isa.>>
44 Wakatu la Petrus nuntu ro nggahina, Roh Allah londo ro kuasakaina d̄i sara'a dou ma ringa haba ede. 45 Dou-dou Yahudi ma imbi d̄i Isa ro ma b̄atu la Petrus ra d̄i Yope, sara'ana dou mbora akana eda Allah Ta'ala ma mbei rau Roh-Na d̄i dou-dou bangsa makalai ma laina dou Yahudi. 46 B̄ara siad̄oho ringana dou-dou ede ma nuntu ro nggahi kai mboto bahasa ro roi ro wadina na'e ro ntoru Allah Ta'ala. Edempara nggahi la Petrus, 47 <<Ta tiopu, dou-dou ake wa'ura tarimana Roh Allah b̄une ndaita. Ndad̄i sab̄ua naloa dou kanta siad̄oho d̄ikandeu sarani kai oi?>> 48 Edempara la Petrus kauna siad̄oho kandeu sarani kai ngara Isa Al Masih. Sawa'u b̄a ede, raho b̄a siad̄oho loakud̄u la Petrus ngge'e lab̄ona siad̄oho pila-pila nai wali ntoina.