La Petrus ngoa kab̄aena d̄i ela Ruma aka Yerusalem mab̄oha kandeu sarani la Kornelius
11:1-18
11
Rasul-rasul ro dou-dou ma imbi d̄i sara'a Yudea ringana b̄a one dou-dou ma laina agama Yahudi wa'ura tarima rauna nggahi ro eli Allah Ta'ala. 2 Wakatu rongga la Petrus aka Yerusalem, dou-dou Yahudi ma wa'ura imbi ede, kancarana la Petrus. 3 Nggahi siad̄oho, <<B̄ab̄auku nggomi laokaimu aka uma dou-dou ma watipu rasuna? Ro ngaha sama raumu lab̄o siad̄oho!>> 4 B̄ara ndedena la Petrus ngoa kab̄aena d̄i siad̄oho samenana au ma wa'ura ndad̄i, ratampu'u aipu saramba wa'una. Nggahi la Petrus,5 <<Nahu wunga do'aku d̄i kota Yope, wed̄i lalo mpa eda b̄a nahu ra katada b̄a Ruma. Nahu edaku wara b̄une sando'o kaen ma lembo ra kalondo ra d̄i langi, b̄une ra tero, d̄i upa mbua padona, edempara midina d̄i kompe nahu. 6 Wakatu tio kab̄ae b̄a nahu ta ^deina, nahu edaku binata-binata ma upa mbua ed̄i, binata-binata ma daro, binata-binata ma rama ro nasi-nasi. 7 Edempara ringa b̄a nahu eli manggahi d̄i nahu, <Tu'ura, Petrus! Sambelepu ede ro ngahapu!> 8 Pala cambe b̄a nahu, <Wati, Ruma! Mada watipu ra iuku ngaha ma haram ro ma najis.> 9 Pala eli ede nggahi walina ra d̄i langi, <Au-au ra wa'u nggahi b̄a Allah Ta'ala halal aina nggahimu haram.> 10 Nahu edaku lampa rawi ede sampe tolu kali ro cumpukaina sara'ana hanta mbali lao ese langi. 11 Ncihi ncao d̄i wakatu ede wa'u tolu dou Kaisarea, ma mai weha ao nahu, n wontu d̄i uma raronggakai nahu. 12 Edempara Roh Allah kauna nahu lao sama lab̄o siad̄oho kai wati mbali mbua adeku. Ini dou cina ro angi ake rau b̄atuna nahu lao aka Kaisarea, ro nami sara'ana lu'u d̄i ade uma la Kornelius. 13 Edempara la Kornelius ngoana d̄i nami b̄uneku sia edana sab̄ua mala'eka ma kad̄i d̄i umana ro manggahi, <Kaupu dou lao aka Yope ^dima'ou sab̄ua dou mone ma ngara la Simon ^dipehe rau kai la Petrus. 14 Sia ^dimakaronggana d̄i nggomi haba ^dimakamaina salama d̄i ru'u b̄a nggomi ro iwa ro wekimu.> 15 Wakatu nahu tampu'uku nuntu ro nggahi <<Roh Allah maina d̄i siad̄oho, sama b̄une ma ndad̄i d̄i ndai ntoina aipu sarambana. 16 Edempara kawara b̄a nahu, b̄a one Ruma wa'ura nggahina, <La Yahya makandeu raso dou kai oi, pala nggomid̄oho d̄ikandeu raso kai Roh Allah.> 17 Ndad̄i ncihi poda Allah Ta'ala mbei rauna d̄i dou-dou ma laina agama Yahudi ede, lampa rawi ma sama b̄une rambei-Na d̄i ndai aipu wakatu ndai imbita d̄i Ruma Isa Al Masih. B̄ara ndedena, wati lu'u b̄a aka nahu loaku tapa Allah Ta'ala!>>
18 Sawa'u b̄a ringana ede, siad̄oho watid̄u nggahi walina. Edempara siad̄oho roi ro wadina Allah Ta'ala. Nggahi siad̄oho, <<Nggara ndedesi, dou-dou ma laina dou Yahudi d̄imbei rau wakatu b̄a Allah Ta'ala d̄ipakikaina rawi dosa loakud̄u rakana mori ma sapodakaina ro ma ede ro hi^di!>>
Ela Ruma d̄i Antiokhia
11:19-30
19 Sawa'u b̄a dou-dou hadena la Stefanus, siad̄oho tampu'ura coco rero ro kancokina dou-dou ma imbi d̄i Isa Al Masih, ndad̄ina dou-dou ma imbi mbari mbura rero. Wara ma rai saraka aka Fenisia, ro wara rau ma rai sampe aka Siprus ro Antiokhia. Ro siad̄oho ngoa ro kahabana haba ma ramai ra d̄i Allah Ta'ala d̄i ru'u b̄a dou-dou Yahudi mpoa. 20 Pala d̄i ade weki dou-dou ma'imbi ede, wara dou-dou Siprus ro Kirene, wara rau dou-dou ma lao aka Antiokhia ro ma ngoa ro kahabana Haba Mataho mab̄oha Ruma Isa ede d̄i dou-dou ma laina agama Yahudio rau. 21 Kuasa Ruma wara d̄i siad̄oho ndad̄ina mboto dou ma ndad̄i imbi ro mad̄onggo weki d̄i Ruma.
22 Haba mab̄oha rawi mandad̄i ake rongga rau d̄i ela Ruma d̄i Yerusalem. Ndad̄i siad̄oho kakaina la Barnabas lao aka Antiokhia. 23 Ro wakatu la Barnabas ronggana ta aka, ro edana b̄uneku Allah Ta'ala ma mbei bareka d̄i dou-dou ede, sia na'ipiku neo adena. Edempara sia kauna siad̄oho loakud̄u poda-poda to'ana d̄i Ruma.
24 La Barnabas ake dou ma taho ade ro kuasakai b̄a Roh Allah ro na'imbi poda d̄i Ruma ndad̄ina mboto dou mab̄atu Ruma.
25 Edempara la Barnabas lao ngupana la Saulus aka Tarsus. 26 Sawa'u b̄a eda angina lab̄o la Saulus, sia wa'ana la Saulus lao aka Antiokhia ro samba'a siad̄oho ngge'e samana lab̄o ela Al Masih ta aka ro ngoa ro teina mboto dou. D̄i Antiokhia edeku dou-dou ma imbi d̄i Isa ma sarambakaina d̄ipehekai dou-dou ela Al Masih.
27 Wakatu ede wara pila-pila dou nabi ma ramai ra d̄i Yerusalem lao aka Antiokhia. 28 D̄i ade weki siad̄oho wara sab̄ua dou ma ngara la Agabus. Kai kuasa Roh Allah sia karonggana nggahi ro eli Allah Ta'ala b̄a one d̄i ade dunia d̄imamai bala hid̄o ma ipi na'e. Ro lampa rawi ede ndad̄i rauna wakatu jaman parentakai b̄a Kaisar Klaudius. 29 Ndad̄i Samenana dou ma imbi d̄i Isa Al Masih ede kasamana weki kab̄oro au-au d̄i bantukaina cina ro angi ma ngge'e d̄i Yudea; b̄une ra sanggo b̄a cua-cua ndai siad̄oho. 30 Lampa rawi rasamakai ede kalampa b̄a siad̄oho, edempara la Barnabas ro la Saulus kakai b̄a siad̄oho d̄imalao otona au ra bantu ede d̄i dou-dou mana'ekai ela Ruma.