8
La Saulus neo ade rauna, hade b̄a dou la Stefanus. La Saulus kancokina ela Ruma
8:1b-3
Ainaina ede wa'u ela Ruma d̄i Yerusalem tampu'ura fou rero ro kancoki b̄a dou, ndad̄ina sara'a dou ma imbi, selasi rasul-rasul, lao ncengga-ncengga wekina d̄i sara'a dana ro rasa Yudea ro Samaria. 2 Dou-dou ma to'a d̄i Allah Ta'ala umbuna la Stefanus ro nangi nduru weana sia kai ncoki mena adena.
3 Pala la Saulus nangupa ncauku ncai ^dikalelikaina ela Ruma. Sia laona aka saniki uma ro randa kalosana dou-dou ma imbi, edempara kalu'una siad̄oho d̄i ade uma bui.
La Filipus d̄i Samaria
8:4-25
4 Dou-dou ma imbi ma wa'ura lao mbari mbura ede ngoa ro kahabana Haba Mataho ma ramai ra d̄i Allah Ta'ala. 5 Ro la Filipus laona aka sab̄ua kotai d̄i Samaria ro ngoa ro kahabana d̄i dou-dou ta aka mab̄oha Al Masih eded̄u Sangaji Makasalama ra sake b̄a Allah Ta'ala. 6 Wakatu ringa b̄a dou-dou nuntu ro nggahi la Filipus ro siad̄oho edana rawi ma^bisa ro guna ra karawina, mboto d̄i ade weki siad̄oho makade'ena au ra nggahi b̄a la Filipus. 7 B̄a one roh-roh madab̄ae wa'ura losa kai kanggica kana'ena ra d̄i dou-dou ra lu'ukai b̄a setan. Dou ma made ^binci ro ma mpako ro ma mpeha mboto ra kataho. 8 Ndad̄i dou-dou d̄i Samaria neo poda adena.
9 D̄i kota ede wara sab̄ua dou mone ma ngara la Simon. Sia ntoi podara kalampana ilmu sihi, ndad̄ina dou-dou Samaria mbora akana. Nggahi sia d̄i siad̄oho b̄a one sia dou ma heba poda. 10 Ndad̄i sara'a dou d̄i kota ede nataho ma na'e ro ma to'i nawancuku kade'e kab̄aena au ra nuntu b̄a sia. Nggahi siad̄oho, <<Dou ake eded̄u dou rakuasakai b̄a Allah Ta'ala ma mbou kai <Kuasa Mana'e ede.>>> 11 Ntoi podara sia kamborana aka dou-dou kai tenggo ilmu sihina, ndad̄i siad̄oho nawancuku b̄atuna nggahi sia. 12 Pala la Filipus ngoa ro kahabana d̄i siad̄oho Haba Mataho mab̄oha Karaja'an Allah ro mab̄oha Isa Al Masih, Sangaji Makasalama ede. Ndad̄i siad̄oho na'imbiku d̄i haba ra karongga b̄a la Filipus, edempara siad̄oho kandeu sarani, nataho dou-dou mone ro dou siwe. 13 Ndai la Simon na'imbi rau d̄i Isa Al Masih. Ro sawa'u b̄a kandeu sarani, sia lao b̄atu ncauna la Filipus. Lampa rawi ma b̄isa ro guna ma ndad̄i ede nakamboraku aka la Simon.
14 Wakatu rasul-rasul d̄i Yerusalem ringana haba, b̄a one dou-dou Samaria wa'ura tarimana nggahi ro eli Allah Ta'ala. B̄ara ndedena siad̄oho kakaina la Petrus ro la Yahya lao ta aka. 15 Sawa'u b̄a rongga la Petrus ro la Yahya ta aka, siad̄oho do'ana d̄i ru'u b̄a dou-dou Samaria loakud̄u siad̄oho rakana Roh Allah, 16 b̄a one Roh Allah watipu mai kuasakaina kone sab̄ua dou rau d̄i ade weki sia^doho; siad̄oho ampo kandeu sarani kai ngara Ruma Isa mpoa. 17 Sawa'u b̄a la Petrus ro la Yahya tohona rima ese wawo tuta dou-dou Samaria ede; edempara siad̄oho tarimana Roh Allah.
18 Wakatu eda b̄a la Simon, b̄a one Roh Allah wa'ura londo d̄i siad̄oho b̄ara rasul-rasul ede tohona rima d̄i siad̄oho, b̄ara ndedena la Simon lao wa'ana piti d̄i la Petrus ro d̄i la Yahya, 19 ro nggahina, <<Tambei to'ipu d̄i mada kuasa ede rau loakud̄u tohosi b̄a mada rimaku d̄i cou-cou rau, dou ede d̄imatarima Roh Allah.>>
20 Pala cambe b̄a la Petrus, <<Ihara nggomi ro pitimu, b̄ara kacai b̄a nggomi au ra mbei b̄a Allah Ta'ala loa ^diweli kai piti. 21 Nggomi wati ntaumu hak d̄i loakaimu b̄atu d̄i ade karawikai nami, b̄ara ade nggomi wati nirana d̄i Allah Ta'ala. 22 B̄ara ndedena rungkapu kananu ro pakipu rawimu madab̄ae ede, ro rahopu kangampu d̄i Ruma loakud̄u Sia kangampu weana kananumu ma dab̄ae ede! 23 B̄a one nahu kab̄adenggomi b̄ini b̄a hiana ade ma pa'i b̄une folu ro nggomi wa'ura kuasakai b̄a rawi mada^bae.>>
24 Edempara nggahi la Simon d̄i la Petrus ro d̄i la Yahya, <<Tabantu to'ipu, rahopu d̄i Ruma loakud̄u aina ndad̄i kone sab̄ua rau d̄i mada au ra nggahi b̄a itad̄oho ede.>>
25 Sawa'u b̄a siad̄oho nuntu ro nggahina ro ngoa ro kahabana nggahi ro eli Ruma, la Petrus ro la Yahya dula mbalina aka Yerusalem. Ro ade dulakaina ede, siad̄oho ngoa ro kahabana Haba Mataho ede d̄i kampo-kampo d̄i Samaria.
La Filipus lab̄o sab̄ua dou Etiopia mana'e b̄ora
8:26-40
26 Sab̄ua mala'eka Ruma nggahina d̄i la Filipus, <<Tu'u ro laora! Lampa lao ^do-puj ta ncai ma londo aka Yerusalem ma lao aka dana ro rasa Gaza.>> Ncai ede nalingi.k 27-28 Edempara la Filipus laona. Wakatu ede wara sab̄ua dou pagawe asi Etiopia ma wunga lao dula aka dana ro rasana. Dou ede sab̄ua dou ma na'e b̄ora ma su'u ro tundu d̄i samenana ntau ro wara Kandake, sangaji siwe dana ro rasa Etiopia. Dou ede wa'ura lao aka Yerusalem d̄i nembakaina Allah Ta'ala ro ake wunga lao mbalina kai karetana. Sia wunga dohona ade kareta ede, ro baca salahona Kitab Nabi Yesaya. 29 Nggahi Roh Allah d̄i la Filipus, <<Lao ^denipu d̄i kareta ede.>> 30 Ndad̄i la Filipus lao ^denina d̄i kareta ede, ro sia ringana dou ma wunga baca Kitab nabi Yesaya. Sod̄i b̄a la Filipus d̄i sia, <<Sab̄ua maloa ka'ao b̄a Ita au ra bacata?>>
31 Cambe b̄a dou ede, <<^Buneku loa ka'ao b̄a nahu, nggara watisi wara dou ma ngoa kab̄aena d̄i nahu?>> Edempara sia recena la Filipus ne'e ese karetana ro doho samana lab̄o sia. 32 Akeku ayat-ayat ra bacana ede,
<<Sia b̄une jimba ra randa ^disambele,
b̄une ana jimba ma wati losa elina wakatu nggunti b̄a dou kerena,
ndedeku Sia wati nggahina kone sampu'u rau.
33 Sia rakab̄awa ro katuna ro da'awa b̄a dou kai wati adil.
Nawa-Na ^diweha ra d̄i dunia
ndad̄i wati wara kone sab̄ua dou rau ma loa nuntu ro nggahi mab̄oha londo ro mai-Na.>>
34 Dou Etiopia mana'e b̄ora ede nggahina d̄i la Filipus, <<Ta ngoa to'ipu d̄i nahu mab̄oha couku ra nggahi b̄a nabi ake? Sab̄ua mab̄oha weki ndaina atao dou makalai?>> 35 Edempara la Filipus tampu'ura nuntu ro nggahina; sia kanina ayat-ayat ede d̄i tampu'ukaina ngoa ro kahabakaina Haba Mataho mab̄oha Isa Al Masih d̄i dou mana'e b̄ora ede. 36 Wunga ade lampa ro laokaina, siad̄oho ronggana d̄i sab̄ua hid̄i ma wara oi. Nggahi dou mab̄ora ede, <<Tiopu! Ede wara oi! Au walipu ma dancihi d̄ikandeu saranikaimu nahu?>>
37 Nggahi la Filipus, <<Nggara Ita ma imbi podasi kai more ademu, Ita loa d̄ikandeu sarani.>>
<<Nahu ka'imbi, Isa Al Masih eded̄u Ana Allah,>>1 nggahi dou Etiopia mana'e b̄ora ede.
38 Edempara dou Etiopia ede kauna kamidi karetana; ro siad̄oho d̄uana ede londona awa oi ro la Filipus kandeu saranina sia. 39 Wakatu siad̄oho losana d̄i oi wed̄i lalo mpa la Filipus weha b̄a Roh Allah. Dou Etiopia mana'e b̄ora ede watid̄u edana la Filipus wali. Kai neo adena dou mana'e b̄ora ede lampa walina. 40 Palasi la Filipus wa'ura wara d̄i Asdod. Ro wakatu sia lampa ro lao walina, sia ngoa ro kahabana Haba Mataho mab̄oha Isa d̄i sanikina kota sampe sia ronggana aka Kaisarea.