La Stefanus kancihina weki
7:1-53
7
Sod̄i b̄a Imam Agung d̄i la Stefanus, <<Sab̄ua poda sara'a au ra nggahi b̄a dou-dou ede?>> 2 Cambe b̄a la Stefanus, <<Cina ro angi ro Ama ro ompu! Taringa ro kade'e to'ipu nuntu mada! Sawatipu wa'i ro waro ndaita la Ibrahim lao ngge'ena aka Haran, wakatu sia mbuipu ngge'ena d̄i Mesopotamia, Allah Ta'ala ma d̄ese ro ntasa katada-Na weki d̄i sia 3 ro nggahi-Na, <Tu'u wi'ipu dana ro rasamu ro iwa ro wekimu. Laopu aka dana ro rasa d̄i tei b̄a Nahu d̄i nggomi.> 4 Edempara la Ibrahim tu'u wi'ina dana ro rasa Kasdim, ro lao ngge'ena aka Haran. Sawa'u b̄a made ama la Ibrahim, Allah Ta'ala kauna la Ibrahim tu'u wi'i hid̄i ede, mai ara dana ro rasa ake hid̄i ngge'ekai b̄a itad̄oho ake. 5 Ta ede Allah Ta'ala wati mbeina dana kone sakopa rau d̄imandad̄i ntau la Ibrahim. Pala Allah Ta'ala sakena b̄a one Sia d̄imambei d̄i la Ibrahim ro d̄i londo ro maina dana ede d̄imandad̄i pasakana. Konena wakatu ede la Ibrahim watipu ntauna ana. 6 Ndakeku Allah Ta'ala nggahina d̄i la Ibrahim, <Londo ro maimu ^dimangge'e kai dou lai rasa d̄i dana ro rasa dou makalai. Dou-dou d̄i dana ro rasa ede d̄imaka'adana siad̄oho kai toku ro kasa ro pakasana siad̄oho karawi ma ipi tani 400 mba'a ntoina. 7 Pala Nahu ^dimahukumna bangsa ma ka'ada siad̄oho, ro siad̄oho ^dimalosa d̄i dana ro rasa ede ro ^dimanemba Nahu d̄i hid̄i ake.> 8 Edempara Allah Ta'ala mbeina atoran suna d̄i la Ibrahim d̄imandad̄i tanda rasakena ede. Ndad̄i sawa'u b̄a wara la Ishak ana la Ibrahim, la Ibrahim sunana anana ede wakatu umuna waru nai. La Ishak suna rauna la Yakub anana. Ro la Yakub rau sunana sampuru d̄ua dou anana, eded̄u ma ndad̄i wa'i ro waro-wa'i ro waro ndaita.9 Wa'i ro waro-wa'i ro waro ndai ede nahiana adena d̄i la Yusuf ari ndai siad̄oho, ndad̄ina siad̄oho landana sia ndad̄i ada dou d̄i Mesir, pala Allah Ta'ala mad̄ende ro wa'a sia, 10 ro mahori sia ra d̄i samenana susa ro ncoki. Allah Ta'ala ma mbeina d̄i sia ruku ro rawi mataho ro loa timba ro lemba wakatu sia lao satandona Fira'un, sangaji Mesir, ndad̄i Fira'un hantana sia ndad̄i gubernur dana ro rasa Mesir ro makuasakaina asi Fira'un. 11 Edempara b̄oha b̄a bala hid̄o ma na'e d̄i sara'a dana ro rasa Mesir ro Kana'an, ndad̄ina dou-dou na'ipiku susa ro ncokina. Wa'i ro waro ndai rau wati loana raka ngaha ro nono. 12 Ndad̄i wakatu ringa b̄a la Yakub b̄a one d̄i Mesir wara gandum, ndad̄i sia kauna anad̄ohona eded̄u wa'i ro waro ndaita lao ta aka. Edeku sarambakaina siad̄oho laona ta aka. 13 Wakatu siad̄oho lao kad̄ua kalikaina, ngoa b̄a la Yusuf d̄i sa'e ro arina ede b̄a one sia eded̄u la Yusuf. Ede ampona b̄ade b̄a sangaji Mesir mab̄oha iwa ro weki la Yusuf. 14 Edempara la Yusuf kauna lao weha ao la Yakub, amana. La Yakub ro samenana iwa ro wekina lao ngge'e aka Mesir -- sara'a wekina, wara 75 dou. 15 Ndad̄i la Yakub lao ngge'ena aka Mesir ro ta edeku sia lab̄o sara'a wa'i ro waro ndai madena. 16 Timba siad̄oho lao wa'a mbalina aka Sikhem ro umbuna d̄i rade ra weli b̄a la Ibrahim kai piti salaka d̄i ana-ana la Hemor d̄i dana ro rasa Sikhem.
17 Wa'ura ^deni wakatuna Allah Ta'ala kalampana au ra sake-Na d̄i la Ibrahim, bangsa ndai d̄i Mesir nawa'ura naha mboto. 18 Ro wati ntoi sawa'u b̄a ede sab̄ua sangaji makalai ma wati pata la Yusuf, maparenta d̄i Mesir. 19 Sangaji ede nawancuku dab̄aena d̄i bangsa ndai ro na'ipiku toku ro kasana d̄i wa'i ro waro ndaita. Sia kau pakasana paki ana dou to'i ma b̄ou ranggana b̄a inana loakud̄u wati wara dou maka^buana ro madena. 20 D̄i wakatu edeku rangganakai la Musa; sia ana dou to'i ma gaga poda. Tolu wura ntoina sia kana'e b̄a ama ro inana, 21 ro sawa'u b̄a lao paki la Musa, ana siwe Fira'un wehana sia, ro kana'ena b̄une ana ndaina. 22 Sara'a ilmu dou Mesir d̄ingoa ro tei d̄i sia ro sia mandad̄i dou ma ipi ntau kuasa nataho d̄i ade nuntu ro nggahina ro ruku ro rawina.
23 Wakatu la Musa umuna 40 mba'a, wontura ne'e b̄a adena ne'e lao tio ka'ada'an cina ro angina, dou Israel. 24 Edempara sia edana sab̄ua dou d̄i ade weki siad̄oho ma wunga kancoki b̄a sab̄ua dou Mesir; edempara sia horuna dou rakancoki ede ro hadena dou Mesir ede. 25 Kacai b̄a la Musa bangsana naloa ka'ao b̄a one Allah Ta'ala ma wunga kani sia d̄imahori kalosana siad̄oho.Pala siad̄oho wati loana ka'ao. 26 B̄ala aisanai, sia eda rauna d̄ua dou Israel ma wunga ncao, edempara sia celana, ro nane'e kataho siad̄oho.Nggahi sia, < Nggomid̄oho ake sa'e lab̄o ari. B̄ab̄auku ncaokaimu?> 27 Pala dou ma ^boe lengana ede ^dunggina la Musa edempara nggahina, 28 <Cou ma rahanta nggomi ndad̄i dou mana'ekai ro hakim nami? Sab̄ua nggomi mane'e hade nahu rau b̄une nggomi hademu dou Mesir awina?> 29 Ringana nggahi dou ede, la Musa rai tu'u wi'ina Mesir, edempara ngge'ena d̄i dana ro rasa Midian. Ta aka wei sia ngganana d̄ua dou ana mone.
30 Upa mpuru mba'a sawa'u b̄a ede, sab̄ua mala'eka maina d̄i la Musa d̄i so sarae ^deni lab̄o Doro Sinai. Mala'eka ede maina d̄i ade afi makalea d̄i rompa rui. 31 La Musa mbora akana eda lampa rawi ede, ndad̄i sia lao ^denina d̄ib̄adekaina au ma ndad̄i ede. Edempara sia ringana eli Ruma manggahi, 32 <Nahu akeku Allah Ta'ala b̄a wa'i ro waromu; Nahu Allah Ta'ala b̄a la Ibrahim, Ishak, ro la Yakub.> La Musa ^bi^bi b̄ara dahuna ndad̄i wati disa walina ntanda d̄i rompa rui ede. 33 Edempara Ruma nggahi walina, <Runcu wi'ipu sadopa ra kanimu ede, b̄ara dana hid̄i ki^dikaimu ede eded̄u dana ma raso. 34 Nahu wa'ura eda ka^baeku pa'i ro susa ela Nahu d̄i Mesir. Nahu wa'ura ringaku weta siad̄oho ro Nahu kawa'ura londo d̄imahori siad̄oho.Ake, maira! Nahu ^dimakakai nggomi lao mbali aka Mesir.>
35 La Musa edeku ra tula b̄a bangsa Israel ro nggahi siad̄oho, <Cou ma rahanta nggomi ma ndad̄i dou mana'ekai ro hakim nami?> Pala la Musa edeku dou ra kakai b̄a Allah Ta'ala d̄imandad̄i dou mana'ekai ro mambei salama, kai bantu b̄a mala'eka ma mai d̄i sia d̄i rompa rui ma kalea ede. 36 La Musa edeku dou mana'ekaina bangsa Israel losa d̄i Mesir kai karawina lampa rawi ma^bisa ro guna ro lampa rawi-lampa rawi mana'e poda d̄i Mesir, d̄i Moti Kala ro d̄i so sarae santoi 40 mba'a. 37 La Musa rauku ma nggahi d̄i bangsa Israel, <Allah Ta'ala d̄imambeina d̄i nggomi sab̄ua nabi ra kad̄ale d̄i woha ndai nggomid̄oho, sama b̄une Sia ma rakad̄ale nahu.>g 38 La Musa edeku d̄i woha bangsa Israel aka so sarae, ma ndad̄i ncai d̄i ru'u b̄a mala'eka manuntu d̄i sia d̄i Doro Sinai lab̄o wa'i ro waro ndaita. Sia edeku ma ratarimana ra d̄i Allah Ta'ala nggahi ro eli ma mori ^dikaronggakaina d̄i ndaita.
39 Pala wa'i ro waro ndaita wati ngawana to'a d̄i sia. Siad̄oho natula aoku sia ro nane'e dula mbali aka Mesir. 40 Nggahi b̄a siad̄oho d̄i la Harun, <Ndawipu patung-patung d̄i ru'u b̄a nami, loakud̄u berhala-berhala ede ma ^dende ro wa'ana nami. B̄ara nami watid̄u b̄ade walimu au ma wa'ura ndad̄i lab̄o la Musa ede ma rawa'a kalosana nami ra d̄i Mesir!> 41 Edempara wakatu ede siad̄oho ndawina sab̄ua patung ana capi, sawa'u b̄a ede siad̄oho d̄onggo ro mbeina koroba d̄i patung ede ro katu'una ngaha ndiha d̄inembakaina berhala randawi b̄a ndai siad̄oho. 42 Edempara Allah Ta'ala tu'u wi'ina siad̄oho ro co'ona siad̄oho manemba ntara-ntara d̄i langi. Ede ncihi ncao b̄une ra tunti d̄i ade Kitab nabi-nabi,
<Oe dou-dou Israel! Laina d̄i ru'u b̄a Nahu
nggomid̄oho sambelemu binata ro d̄onggo ro mbeimu santoi 40 mba'a d̄i so sarae.
43 Malaisi kema berhala Molokh rawa'a kalei rero b̄a nggomid̄oho
lab̄o patung ntara dewa Refan;
edeku patung ra ndawi b̄a nggomid̄oho ro nembamu.
B̄ara ndedena Nahu d̄imawa'a paki kad̄o'o nggomid̄oho sampe ipa b̄ae b̄a dana ro rasa Babel.>
44 Wa'i ro waro ndai d̄i so sarae nantau rau Kema hid̄i edakai angi Allah Ta'ala lab̄o manusia. Kema ede randawi b̄une ra parentakai b̄a Allah Ta'ala d̄i la Musa ro b̄une conto ra katada b̄a Allah Ta'ala d̄i la Musa. 45 Edempara kema ede wa'a wali b̄a wa'i ro waro ndai aipu wakatu siad̄oho lab̄o la Yosua lao weha rampa ro kuasakaina dana ro rasa ndai ade kuasakai b̄a bangsa-bangsa ra katesa b̄a Allah Ta'ala d̄i tando mada siad̄oho.Kema ede wara ta ede sampe jaman la Daud. 46 La Daud nakasanaku ade Allah Ta'ala ro rahona d̄i Allah Ta'ala loakud̄u sia ^dimatu'una sab̄ua uma d̄i ru'u b̄a Allah Ta'ala ra nemba b̄a la Yakubh ede. 47 Pala la Sulaiman ma tu'una uma d̄i ru'u b̄a Allah Ta'ala.
48 Pala Allah Ta'ala Ma Wancu D̄ese Ro Ntasa wati ngge'ekaina d̄i uma ra tu'u b̄a manusia; b̄une ra tunti d̄i ade Kitab,
49 <Langi eded̄u hid̄i dohokai-Ku,
ro dana d̄i lamakai ed̄i-Ku.
Uma auku d̄i ne'e tu'u b̄a nggomid̄oho d̄i ru'u b̄a Nahu?
Ta b̄eku hid̄i d̄i ru'u sanawakai Nahu?
50 Sab̄ua laina ndai Nahu ma rakandad̄ina samenana ma wara?>
Ndedeku nggahi b̄a Allah Ta'ala.
51 Nggomid̄oho nawancuku tera tutamu ro na'ipi podaku nggonggimu to'a d̄i Allah Ta'ala! Fikomu na'ipiku mpingana d̄imatarima nggahi ro eli Allah Ta'ala! Nggomid̄oho sama b̄une wa'i ro waromu; ma ca'u ao Roh Allah! 52 Sab̄ua wara nabi ma wati ra kancoki b̄a wa'i ro waromu? Siad̄oho ma rahade dou-dou ra nggadu b̄a Allah Ta'ala ma wa'ura ngoa ro kahaba ulu mab̄oha maina Ada Allah Ta'ala ma ncihi ro mapoda. Ro ake nggomid̄oho mab̄ab̄una ro ma hadena Ada Allah Ta'ala ede. 53 Mala'eka-mala'eka wa'ura karonggana parenta-parenta Allah Ta'ala d̄i nggomid̄oho, pala nggomid̄oho wati ngawamu ^batu!>>
La Stefanus tob̄a b̄a dou kai wadu
7:54–8:1a
54 Ndede ringa b̄a anggota-anggota Mahkama Agama sara'a au ra nggahi b̄a la Stefanus ede, siad̄oho fa'a adena ro na'ipi podaku mbanina d̄i la Stefanus. 55 Pala la Stefanus ra kuasakai b̄a Roh Allah, sia ^dongana langi, edempara sia edana d̄ese ro ntasa Allah Ta'ala ro Isa makid̄i d̄i hid̄i kuasakai ta sab̄ae wana Allah Ta'ala. 56 Edempara nggahi la Stefanus, <<Tiopu, mada edaku saroga mahengga weki ro Ana Manusia makid̄i d̄i sab̄ae wana Allah Ta'ala!>>
57 Anggota-anggota mahkama ede pulana fiko ro kanggica salahona, edempara kalembina la Stefanus. 58 Siad̄oho randa kalosana sia ari mai b̄a kota edempara tob̄ana kai wadu. Dou-dou ma eda au ma ndad̄i ede wi'ina kani ro lombo siad̄oho d̄i tando sab̄ua dou sampela ma ngara la Saulus. 59 Wakatu siad̄oho wunga tob̄ana la Stefanus, la Stefanus rentana do'a, <<Ruma Isa, tarima aopu roh mada!>> 60 Edempara sia suju ro do'ana kai eli ma na'e, <<Ruma, dosa ake aina tundu b̄a siad̄oho!>> Sawa'u b̄a nggori nggahi ndedena, sia madena.