Pidu dou ra kad̄ale d̄imabantu rasul-rasul
6:1-7
6
Dou-dou mab̄atu Isa naha ntoina nanaha mboto. Wakatu ede dou-dou Yahudi ma nuntu kai bahasa Yunani, wati ca'una d̄i dou-dou Ibrani mantau dana ro rasa ede. Dou-dou Yahudi ma nggahi Yunani ede nggahina, <<Dou-dou siwe nami ma mbaru mboha wati rakana ru'u ^diparaluna sanai-nai b̄une ra cengga d̄i dou-dou.>> 2 B̄ara ndedena, sampuru d̄ua rasul ede kab̄oro sara'ana dou mab̄atuna ro nggahina d̄i siad̄oho, <<Wati tahona nggara nami denggasi ngoa ro kahaba nggahi ro eli Allah Ta'ala, b̄ara kab̄ua ngaha ro nono. 3 Ndad̄i, natahopu nggomid̄oho kad̄alemu pidu dou d̄i ade weki nggomid̄oho ma wati iha ngarana ro ra kuasakai b̄a Roh Allah ro naloa timba ro lemba, ^diloa kau b̄a nami kalampa taki ake; 4 loakud̄u nami ma do'a ro mangoa ro kahabana nggahi ro eli Allah Ta'ala mpoa mpa.>>5 Sara'a dou ma imbi d̄i Isa ede nangawa b̄atu b̄une ra kaukai b̄a rasul-rasul ede. Edempara siad̄oho kad̄alena la Stefanus, sab̄ua dou ma imbi poda d̄i Isa ro kuasakai b̄a Roh Allah. Siad̄oho kad̄ale rauna: la Filipus, Prokhorus, Nikanor, Timon, Parmenas, ro la Nikolaus dou Antiokhia, sia laina dou Yahudi pala nawa'ura lu'u agama Yahudi. 6 Pidu dou ede wa'a b̄a siad̄oho lao satando rasul-rasul, edempara rasul-rasul ede do'a ro rahona bareka Ruma d̄i ru'u b̄a siad̄oho.
7 Ndedeku nggahi ro eli Allah Ta'ala nanaha ipi mbou ro dou-dou ma imbi ro ma b̄atu Isa d̄i Yerusalem rau nanaha mboto. Ro mboto rau imam-imam ma imbi d̄i Isa.
La Stefanus wa'u ro leto b̄a dou
6:8-15
8 La Stefanus nawancuku bareka b̄a Allah Ta'ala, ndad̄ina sia karawina mboto b̄isa ro guna ro lampa rawi ma na'e d̄i woha ela ro dou. 9 Pala wara dou-dou ma wati ca'u sia; siad̄oho eded̄u dou anggota d̄i uma sambea ro ibadakai ^dipehe kai Uma Sambea Ro Ibadakai Dou-dou Libertini.f Anggota-anggotana eded̄u dou-dou Yahudi ra d̄i Kirene ro Aleksandria. Siad̄oho lab̄o dou-dou Yahudi ra d̄i Kilikia ro Asia ma cence ncihi lab̄o la Stefanus. 10 Pala siad̄oho wati loana cambe au ra nggahi b̄a la Stefanus, b̄ara Roh Allah mambeina d̄i sia loa timba ro lemba ^diloakaina nuntu ro nggahi. 11 B̄ara ndedena siad̄oho ufana pila-pila dou ^dimanggahi, <<Nami wa'ura ringamu dou ake ma kab̄awa ro katunana Nabi Musa ro Allah Ta'ala!>> 12 Ndedeku siad̄oho sad̄u'una dou-dou, ro dou-dou ma tuakai Yahudi ro ahli-ahli Taurat. Edempara siad̄oho lao wa'u ro letona la Stefanus ro lao wa'a satandona aka Mahkama Agama. 13 Ro siad̄oho wa'a rauna dou-dou ma mbei sakasi cowa mab̄oha la Stefanus. Nggahi sakasi-sakasi ede, <<Dou ake nakab̄awa ro katuna ncauku Bait Allah ma raso ro nakab̄awa ro katunaku hukum Taurat. 14 Madad̄oho wa'ura ringamu nggahi sia, b̄a one Isa dou Nazaret ede d̄imad̄umba Bait Allah ake, edempara rungka sara'ana rawi rasa ra nginakai b̄a ndai ra kaukai b̄a Nabi Musa d̄i ndaita!>> 15 Samenana dou ma wara d̄i ade sidang Mahkama Agama ede ntandana la Stefanus. Ro wakatu ede pahu la Stefanus d̄i'edamu b̄une pahu mala'eka.