La Ananias lab̄o la Safira
5:1-11
5
Waraku sab̄ua dou mone ma ngara la Ananias ro weina ma ngara la Safira. Siad̄oho rau landana salo^be danana. 2 Piti co'i danana ede sarundena wi'i b̄a la Ananias d̄i ru'u b̄a ndaina ro sarunde walina d̄onggona d̄i rasul-rasul. Rawi sia ede b̄ade rau b̄a weina. 3 Edempara nggahi la Petrus d̄i sia, <<Ananias b̄ab̄auku nggomi co'okaimu Iblis makuasakai ademu, ndad̄ina nggomi cowamu d̄i Roh Allah. Nggomi wi'imu sarundena co'i dana ede d̄i ru'u ndaimu? 4 Dana ede ntau nggomi sawatipu b̄a landamu. Ro sawa'u b̄a landamu, piti co'i dana ede mbuipu ntau nggomi rau. Ndad̄i b̄ab̄auku warakaina nia d̄i ademu karawi b̄une ede? Laina manusia ra cowakai b̄a nggomi, pala d̄i Allah Ta'ala!>> 5 Ndede ringa b̄a la Ananias nggahi ede, sia mbo'ona edempara madena. Sara'a dou ma ringa au ma ndad̄i ede na'ipiku dahuna. 6 Edempara dou-dou sampela mone mai salolo katahona timba la Ananias, edempara wa'a kalosana ro lao umbuna.7 Takasi tolu jam sawa'u b̄a ede, wei la Ananias lu'una. Sia wati b̄adena au ma wa'ura nda^di. 8 Nggahi la Petrus d̄i sia, <<Ngoa to'ipu d̄i nahu: Sab̄ua dana ra landa b̄a nggomi ro rahimu ede, sandake mpa co'ina?>> <<Io, poda sandede mpa co'ina,>> cambe b̄a wei la Ananias.
9 Edempara nggahi la Petrus d̄i sia, <<B̄ab̄auku nggomi lab̄o rahimu kasamakaimu weki ^dicobakaimu Roh Ruma? Ringa ro kade'epu! Dou-dou ma lao umbu rahimu wa'ura dula. Siad̄oho ^dimakalei kalosa nggomi rau.>> 10 Wakatu ede wa'u wei la Ananias ede mbo'o ro madena d̄i tando la Petrus. Ro wakatu lu'u dou-dou mone sampela ede, siad̄oho edana sia wa'ura made. Edempara siad̄oho kalei kalosana timba la Safira ro lao umbuna d̄i kompe rade rahina. 11 Ndad̄i sara'a dou ma imbi ede ro dou-dou ma kalaina ma ringa mab̄oha lampa rawi ede, ndad̄i dahu mena.
Tanda-tanda ro lampa rawi ma b̄isa ro guna
5:12-16
12 Rasul-rasul karawina ma b̄isa ro guna ro tanda-tanda ma ipi na'e d̄i woha ela ro dou. Nda^dina sara'a dou ma imbi naca'u kab̄oro weki d̄i Katere Sulaiman d̄i Bait Allah 13 Ro dou makalai wati wara ma disa mai kab̄oro weki lab̄o dou-dou ma imbi ede. Pala dou-dou ma imbi ede nawancuku kaco'i b̄a ela ro dou. 14 Ro naha ntoi nanaha mboto dou-dou ma imbi d̄i Ruma -- nataho dou mone ro dou siwe. 15 B̄ara rawi ma randad̄i ede, ndad̄ina dou-dou ma supu wa'a b̄a dou kai sarangge atao kai dipi, edempara toho wi'ina d̄i ncai, loakud̄u dou ma supu ede hina b̄a ninu la Petrus, nggara nalampa saisi b̄a la Petrus hid̄i ede. 16 Mboto poda dou-dou ma ramai ra d̄i kota-kota d̄i kompe ro pei Yerusalem. Siad̄oho wa'ana dou-dou masupu ro ra lu'ukai b̄a roh-roh setan. Ro dou-dou ede kataho sara'a b̄a rasul-rasul.
Rasul-rasul kancoki b̄a dou
5:17-42
17 Imam Agung ro sara'a dou ma b̄atuna eded̄u kalompo dou-dou Saduki. Siad̄oho tampu'ura kasusana rasul-rasul b̄ara siad̄oho hiana adena. 18 Rasul-rasul ede wa'u ro leto b̄a siad̄oho, edempara kalu'una d̄i ade uma bui hid̄i rabuikai ela ro dou. 19 Pala aimangad̄i ede, sab̄ua mala'eka Ruma mahenggana ta^da-ta^da uma bui, edempara wa'a kalosana rasul-rasul ede. Nggahi mala'eka d̄i rasul-rasul ede, 20 <<Lao ki^dipu d̄i Bait Allah ro ngoa ro kahabapu d̄i dou-dou mab̄oha mori ma b̄ou ake.>> 21 Edempara rasul-rasul ede b̄atuna au ra ngoa b̄a mala'eka ede. Si^di-sid̄i poda siad̄oho laona aka Bait Allah ro tampu'ura ngoa ro teina ta ede.
Wakatu ede Imam Agung ro dou-dou mab̄atuna maina d̄i hid̄i ede, edempara katu'una sidang mahkama lab̄o dou-dou ma tuakai Yahudi. Edempara siad̄oho kauna dou lao weha ao rasul-rasul ede d̄i uma bui ro mai wa'a satando d̄i siad̄oho. 22 Pala wakatu dou-dou ra kakai ede ronggana aka uma bui, siad̄oho wati wara edana rasul-rasul ede. Ndad̄i siad̄oho dula mbalina, ro ngoana lampa rawi ede d̄i mahkama agama. 23 Nggahi sia^doho,<<Wakatu rongga madad̄oho d̄i uma bui, madad̄oho edamu tad̄a ncai uma bui ede rakunci kataho, ro dou-dou ma jaga wunga jagana d̄i tad̄a ncai. Pala wakatu madad̄oho henggamu tad̄a ncai ede, madad̄oho wati edamu kone sab̄ua dou rau ta ^deina.>> 24 Wakatu ringa b̄a perwira ma taki jaga Bait Allah ro dou-dou mana'ekai imam ringana au ra ngoa ede, siad̄oho darura adena mab̄oha rasul-rasul ede ro dahuna auku ^dimanda^di. 25 Edempara maira sab̄ua dou mone mawa'a haba ake, <<Taringa ro kade'e to'ipu! Dou-dou rabui b̄a itad̄oho ake-ake wunga ngoa ro teina dou mamboto aka Bait Allah!>> 26 Ndad̄i perwira ma taki jaga Bait Allah ede lao samana lab̄o anamorina, lao weha mbalina rasul-rasul ede. Pala wati kai kasa ro tokuna, b̄ara siad̄oho nadahuku d̄i dou mamboto; kombisi dou mamboto ede nato^baku siad̄oho kai wadu.
27 Rasul-rasul ede wa'a kalu'u b̄a siad̄oho lao satando mahkama. Edempara Imam Agung paresana siad̄oho. 28 Nggahi sia, <<Nami wa'ura kanta kapodamu nggomid̄oho aina ngoa ro teimu mab̄oha Dou ede. Pala ake tiopu au ra wa'u karawi b̄a nggomi^doho! Nggomid̄oho ma ngoa ro teiku d̄i sara'a dana ro rasa Yerusalem, ro nggomid̄oho mane'eku b̄ab̄u ro lo'o nami b̄a one namiku ma rakandad̄ina made Dou ede.>>
29 Cambe b̄a la Petrus ro rasul-rasul ma kalaina, <<Madad̄oho pab̄uaku b̄atumu parenta Allah Ta'ala ro laina b̄atu au ra kane'ekai b̄a manusia. 30 Isa ra salib b̄a ita^doho, wa'ura kamori mbali b̄a Allah Ta'ala, Ruma b̄a wa'i ro waro ndaita. 31 Ro Allah Ta'ala wa'ura mbeina d̄i Sia hid̄i ro kuasa ma na'e d̄imandad̄i Mana'ekaina ro Al Masih; loakud̄u bangsa Israel tobana ra d̄i dosa-dosana ro rakana kangampu. 32 Mada^dohoku sakasi-sakasi mab̄oha sara'ana ede -- madad̄oho ro Roh Allah rambei b̄a Allah Ta'ala d̄i dou-dou ma b̄atu parenta-Na.>>
33 Wakatu ringa b̄a anggota-anggota Mahkama Agama ede, siad̄oho mbani podana, ro siad̄oho kasab̄uana nggahi ne'e hade rasul-rasul ede. 34 Pala d̄i ade weki anggota-anggota mahkama ede wara sab̄ua dou Farisi ma ngara la Gamaliel. Sia ede ahli Taurat, dou ede nawancuku lia ro horoma b̄a sara'a dou. Sia tu'u ki^dina, edempara kauna wa'a kalosa rasul-rasul ede samporo. 35 Edempara nggahi sia d̄i Mahkama Agama ede, <<Cina ro angi, dou-dou Israel! Kananu katahopu mab̄oha auku d̄ikarawi b̄a ndai^dohomu d̄i dou-dou ede. 36 Ntoina wara dou ma ngara la Teudas, sia nawi'iku wekina kai dou ma ipi heba, ndad̄ina wara takasi 400 dou mab̄atu sia. Pala sia hade b̄a dou ro sara'ana dou mab̄atuna wa'ura mbari mbura, ro kalompo rauna watid̄u warana. 37 Sawa'u b̄a ede, wakatu sensus, wontu rau la Yudas, dou Galilea. B̄ara pangaruna, mboto rau dou ma b̄atu sia. Pala sia rau hade b̄a dou, ro sara'a dou ma b̄atu sia lao mbari mbura. 38 Ndad̄i ake, ade masa'ala ake, ndaiku ma ngoa ro tei kataho d̄i ndai^dohomu: Aina ka^bune-^bunemu doud̄oho ede, co'opu siad̄oho.Nggara napodasi au ra ngoa ro tei ro au ra karawi b̄a siad̄oho ake eded̄u ra maina ra d̄i manusia tantu d̄imambora. 39 Pala nggara lampa rawi ede ramaina ra d̄i Allah Ta'ala, ndad̄i ndai^dohomu wati wa'umu kakoa siad̄oho.Pala kombisi loa ndad̄i ndai^dohomu ma'aoku Allah Ta'ala.>>
Ngoa ro tei b̄a la Gamaliel ede tarima b̄a mahkama. 40 Ndad̄i kauna dou wa'a kalu'u mbali rasul-rasul ede, edempara cambona ro kantana ngoa ro tei wali mab̄oha Isa. Sawa'u b̄a ede ampona hori siad̄oho. 41 Rasul-rasul ede tu'u wi'ina Mahkama Agama ede kai neo adena, b̄a one Allah Ta'ala wa'ura wi'ikaina siad̄oho patu d̄imaraka b̄awa ro tuna b̄ara Isa. 42 Ro saniki ainaina d̄i Bait Allah ro d̄i uma-uma dou, siad̄oho ngoa ro tei ncauna ro ngoa ro kahabana Haba Mataho mab̄oha Isa b̄a one Siaku Sangaji Makasalama ra sake ede.