La Petrus lab̄o la Yahya d̄i tando Mahkama Agama
4:1-22
4
Wakatu la Petrus ro la Yahya wunga nuntuna lab̄o dou-dou ede, dou-dou mana'ekai imame ro dou mana'ekai dou ma jaga Bait Allah ro dou-dou Saduki maina d̄i la Petrus ro la Yahya. 2 Siad̄oho na'ipiku mbanina b̄ara la Petrus ro la Yahya manggahi d̄i dou-dou b̄a one Isa Al Masih wa'ura mori mbali ra d̄i madekaina. Ro ede mandad̄i bukuti b̄a one dou ma made ^dimamori mbali. 3 Edempara siad̄oho wa'u ro letona d̄ua dou rasul ede edempara kalu'una ade uma bui sampe aimasid̄i b̄ara wa'ura ngad̄i ai. 4 Pala dou-dou ma wa'ura ringa ngoa ro tei b̄a rasul-rasul ede, mboto ma imbi. Nda^dina weki siad̄oho nanaha mboto sampe takasi 5.000 dou.5 B̄ala ai sanai dou-dou mana'ekai Mahkama Agama, dou-dou mana'ekai Yahudi ro ahli-ahli Taurat kab̄orona weki d̄i Yerusalem. 6 Siad̄oho eda angina lab̄o Imam Agung ma ngara la Hanas, Kayafas, Yahya, la Aleksander, ro sara'a londo ro mai Imam Agung ma wara ta ede. 7 La Petrus ro la Yahya lao wa'a satando b̄a dou aka siad̄oho, edempara sod̄i b̄a siad̄oho, <<Kai kuasa au atao kai ngara cou nggomid̄oho katahokaimu dou ma made ^binci ede?>>
8 La Petrus rakuasakai b̄a Roh Allah, cambena, <<Itad̄oho mana'ekai bangsa ro Itad̄oho anggota mahkama! 9 Madad̄oho d̄iparesa ro sod̄i d̄i ainaina ake b̄ara karawimu mataho d̄i bantukai dou ma made ^binci, ro b̄a one Itad̄oho mane'e b̄ade ra^bunena dou ede loakaina taho. 10 Itad̄oho sara'ana pab̄uaku b̄ademu ro sara'a dou bangsa Israel rau pab̄uaku b̄adena b̄a one dou ma kad̄i ake kai sarumbuna ma tenggo d̄i tando Ita^doho, b̄ara tenggo ro wale ro kuasa ra d̄i Isa Al Masih dou Nazaret ede. Itad̄oho wa'ura salibmu Isa ede, pala Allah Ta'ala wa'ura kamori mbalina Sia. 11 mab̄oha Isa edeku ra tunti ade Kitab Suci,
<Wadu ma wati ra kani b̄a nggomid̄oho, eded̄u dou-dou mataki tu'u uma,
pala wa'ura ndad̄i wadu ma ipi penti.>
12 Kai ncai Isa Al Masih mpoa mpa dou d̄imaraka salama. B̄a one d̄i dunia, ade weki manusia wati wara dou makalai rau ma raka kuasa ra d̄i Allah Ta'ala ^dimakasalamana ndai.>>
13 Dou-dou anggota Pengadilan ede namidi adena, eda disa la Petrus ro la Yahya, au walipu siad̄oho nab̄adeku b̄a one d̄ua dou rasul ede wati rasakolana. Edempara siad̄oho kawarana b̄a one d̄ua dou rasul ede eded̄u dou-dou ma b̄atu Isa Al Masih. 14 Pala siad̄oho wati loana nggahi au-au, b̄ara dou ra wa'u kataho wea supuna ede wara kad̄ina d̄i tando siad̄oho sama-sama lab̄o la Petrus ro la Yahya. 15 Edempara siad̄oho kauna d̄ua dou rasul ede losa d̄i hid̄i sidangkai, edempara siad̄oho mafakana. 16 Nggahi siad̄oho, <<Auku d̄ipab̄ua karawi b̄a ndai d̄i dou-dou ake? Sara'a dou ma ngge'e d̄i Yerusalem wa'ura b̄adena b̄a one lampa rawi ma^bisa ro guna ma na'e ake, ra karawi b̄a siad̄oho.Ndai wati loata kawati rawi ede. 17 Pala loakud̄u lampa rawi ede wati mbou rero walina d̄i woha dou-dou, ndai takadahuku siad̄oho loakud̄u siad̄oho wati loa walina nuntu ro nggahi kone d̄i sab̄ua dou rau kai kanina ngara Isa.>>
18 Ndad̄i siad̄oho kauna d̄ua dou rasul ede lu'u mbali, ro ngoana b̄a one siad̄oho wati loana ngoa ro tei atao nuntu kai ngara Isa Al Masih wali.
19 Pala cambe b̄a la Petrus ro la Yahya, <<Takananu to'ipu b̄a weki itad̄oho b̄e ma ncihi d̄i tando Allah Ta'ala: b̄atu parenta itad̄oho atao b̄atu parenta Allah Ta'ala. 20 Ba one wati lu'u b̄a aka madad̄oho denggamu nuntu ro nggahi mab̄oha au ra wa'u eda ro ringa b̄a ndai mada^doho.>> 21 Anggota-anggota sidang ede wati rakana kone sab̄ua rau rawi ma ncara ^dihukumkaina la Petrus ro la Yahya. Ndad̄i siad̄oho kadahu kapodana d̄ua dou rasul ede, edempara horina siad̄oho ^dua, b̄a one sara'a dou maroi ro wadi Allah Ta'ala b̄ara au ma wa'ura ndad̄i ede. 22 Dou rakataho wea supuna kai b̄isa ro guna ede, umuna wa'ura ncewi 40 mba'a.
Do'a Ela Ruma
4:23-31
23 Sawa'u b̄a hori b̄a dou la Petrus ro la Yahya, siad̄oho dula mbalina aka lenga^dohona, ro ngoa sara'ana au ra nggahi b̄a dou-dou mana'ekai imam ro dou-dou ma tuakai Yahudi d̄i siad̄oho. 24 Sawa'u b̄a ringa b̄a lenga^dohona ede, siad̄oho do'a sama-samana kai sab̄ua ade d̄i Allah Ta'ala. Nggahi siad̄oho, <<Ruma, Ita marakandad̄ina langi ro dana ro moti lab̄o sara'a isina. 25 Kai Roh-Mu, Ita wa'ura nuntu ro nggahimu kai ncai wa'i ro waro mada^doho, la Daud, eded̄u ada Ita; Ita wa'ura nggahita,
<B̄ab̄auku dou-dou, ma wati pata Ruma ipikai mbanina;
b̄ab̄auku bangsa-bangsa wara nia b̄a adena ma wati wara onena?
26 Sangaji-sangaji dunia sadia ncauna weki ^dilewa ro lakakaina,
ro dou-dou mana'ekaina kasab̄uana weki ^di'aokaina Ruma ro Sangaji Makasalama.
27 B̄a one poda romo Herodes ro la Pontius Pilatus wa'ura mbolona lab̄o dou-dou ma wati pata Ruma ro dou-dou Israel d̄i kota ake. Siad̄oho kab̄orona weki ^di'aokaina Isa Al Masih, Ada-Mu ma raso ede, ra wa'ura hanta b̄a Ita ndad̄i Sangaji Makasalama. 28 Siad̄oho kasab̄uana weki d̄ikarawikaina au-au, ra wa'u katantu ulu b̄a Ita b̄a one ede ^dimanda^di. Ro Ita makatantuna ede kai kuasa ro kai rakane'ekai b̄a ndai Ita. 29 Ake Ruma, tatio to'ipu siad̄oho makadahu mada^doho. Ro takau to'ipu mada^doho, ada-ada Ita ake, mangoa ro kahaba haba ma ramai ra d̄i Ita loakud̄u madad̄oho disa. 30 Ta bantu to'ipu b̄a Ita loakud̄u dou-dou masupu ^dikataho kai rawi ma^bisa ro guna ro lampa rawi-lampa rawi ma na'e d̄imandad̄i kai ncai kuasa ro kai tenggona ngara Isa, ada Ita ma raso ede.>>
31 Sawa'u b̄a siad̄oho nggori sambea ro do'ana, hid̄i ka^borokai weki siad̄oho ede kangginda. Siad̄oho sara'ana kuasakai b̄a Roh Allah, ro siad̄oho tampu'u nuntu ro nggahina kai disa poda mab̄oha haba ma ramai ra d̄i Allah Ta'ala.
Cara mori Ela Ruma
4:32-37
32 Sara'a dou ma imbi ede mori kasab̄ua ade ro kasab̄ua weki. Wati wara kone sab̄ua dou rau d̄i weki siad̄oho ma wi'ikai b̄a one au ra ntauna eded̄u ntau ndaina. Pala au-au ma wara d̄i siad̄oho, ^dikani kasamana. 33 Kai kuasa ma na'e, rasul-rasul ede ngoa ro kahabana b̄a one Isa Al Masih wa'ura mori mbali. Ndad̄i Allah Ta'ala barekana siad̄oho kai remba poda. 34 Ro wati wara kone sab̄ua dou rau d̄i ade weki siad̄oho ma kura au-au. B̄ara siad̄oho ma ntau dana atao uma, nalandaku dana atao umana ede; edempara piti co'i ralandakaina ede, siad̄oho wa'ana 35 ro d̄onggona d̄i rasul-rasul. Edempara piti ede cengga-cenggana d̄i sanikina dou ma ncihi ncao b̄une ra paraluna.
36-37 Ndede rau la Yusuf. Sia landa rauna dana ntauna, edempara piti co'i ralandakaina ede wa'a b̄a sia ro d̄onggona d̄i rasul-rasul. La Yusuf ede eded̄u sab̄ua dou londo ro mai Lewi, ra nggana d̄i Siprus; rasul-rasul napehe rauku sia kai Barnabas aona Marere wea ade.