KISAH RASUL-RASUL
1
Teofilus ma taho ade,D̄i ade buku nahu ma sarambakaina wa'ura tunti sara'a b̄a nahu au ra karawi ro ngoa ro tei b̄a Isa ra'aipu tampu'u karawi-Na, 2 sampe d̄i ainaina Sia hanta b̄a Allah Ta'ala ne'e ese saroga. Sawatipu b̄a Sia ne'ena ese saroga, kai kuasa Roh Allah, Sia ngoa ro teina rasul-rasul ra ka^dale-Na. 3 Sawa'u b̄a Isa madena, Sia mori mbalina. Santoi 40 nai Sia ntuwu katadana weki d̄i rasul-rasul b̄a one Sia poda-poda wa'ura mori mbali. Siad̄oho edana Sia, ro Sia nuntuna lab̄o siad̄oho mab̄oha Karaja'an Allah. 4 D̄i sab̄ua ainaina wakatu Sia kab̄orona weki lab̄o sia^doho,a Sia mbeina parenta ake d̄i siad̄oho, <<Aina tu'u wi'imu Yerusalem. Ngenapu ta ede sampe Ama mambeimu au ra wa'u sake-Na, eded̄u au ra wa'u ngoa b̄a Nahu d̄i nggomid̄oho ntoina. 5 B̄a one Nabi Yahya makandeu raso dou kai oi, pala d̄i pila-pila nai wali, nggomid̄oho d̄ikandeu raso kai Roh Allah.>>
Isa Al Masih hanta b̄a Allah Ta'ala ne'e ese saroga
1:6-11
6 Wakatu rasul-rasul ede kab̄orona weki lab̄o Isa, siad̄oho sod̄ina d̄i Sia, <<Ruma, sab̄ua ake Ita mane'e katu'u mbali Karaja'an bangsa Israel?>>
7 Cambe b̄a Isa, <<Ama Nahu ^dimakatantuna ainaina ro wakatuna. Wati paralu b̄ade b̄a nggomid̄oho, b̄a one ede hak Ama. 8 Pala nggomid̄oho d̄imaraka kuasa, nggara Roh Allah nawa'usira mai d̄i nggomid̄oho.Ro nggomid̄oho d̄imandad̄i sakasi d̄i ru'u b̄a Nahu d̄i Yerusalem, d̄i sara'a Yudea, Samaria, ro sampe d̄i sumpu dunia.>> 9 Sawa'u b̄a Isa nggori nggahi ndedena, Sia hanta lao ese saroga d̄i tando mada siad̄oho, ro Sia b̄onto b̄a apu, ndad̄ina siad̄oho wati loana eda Sia wali.
10 Wakatu siad̄oho mbuipu ^dongana langi, wunga Isa hanta ne'e ese Saroga, wed̄i lalo mpa d̄ua dou ma kani, kani ro lombo malanta makid̄i d̄i kompe siad̄oho. 11 <<Oe, dou-dou Galilea,>> nggahi b̄a d̄ua dou ede, <<B̄ab̄auku nggomid̄oho ngge'e mpa kad̄imu ta ede ro ntandamu langi? Isa, ra eda b̄a nggomid̄oho ra hanta kane'e ese saroga d̄i tando nggomid̄oho ede, d̄imamai mbali b̄une cara ede rau.>>
La Matias Ma Cepena La Yudas
1:12-26
12 Edempara rasul-rasul ede dula mbalina aka Yerusalem ra d̄i Doro to'i Zaitun. Doro to'i ede hid̄ina takasi sakilo d̄o'ona lab̄o Yerusalem. 13 D̄i Yerusalem siad̄oho laona aka uma hid̄i maru saikaina, edempara ne'ena ese b̄ili ma ese. Rasul-rasul ede eded̄u la Petrus, Yahya, Yakub ro la Andreas, Filipus ro la Tomas, Bartolomeus ro la Matius, la Yakub ana la Alfeus, Simon dou Zelot ro la Yudas ana la Yakub; 14 Siad̄oho ede kai sab̄ua ade kab̄orona weki ro do'a samana. Siad̄oho do'a sama-samana lab̄o dou-dou siwe, wara rau la Maria ina Isa, ro ari^doho-Na.
15 D̄i sab̄ua ainaina, wakatu siad̄oho wunga kab̄orona weki -- wara takasi 120 dou ma mai ta ede -- la Petrus tu'u ki^dina, sia nane'e nuntu. Nggahi sia, 16 <<Cina ro angi! Au ra tunti d̄i ade Kitab Suci, ede pab̄uaku nda^dina. Ntoina kai ncai la Daud, Roh Allah wa'ura ngoana mab̄oha la Yudas eded̄u dou mana'ekai dou-dou ma wa'u ro leto Isa ede. 17 La Yudas eded̄u sab̄ua dou d̄i ade weki ndaita, ro sia wa'ura kad̄ale rau b̄a Isa d̄imakarawi sama-sama lab̄o ndaita.>>
18 La Yudas ake wa'ura rakana dana radena ra'ufakai rawina ma da^bae. Sia wa'ura mab̄u ro made kai ncea lokona sampe losa sara'a isi lokona. 19 Sara'a dou ma ngge'e d̄i Yerusalem nab̄adeku mab̄oha lampa rawi ede. B̄ara ndedena d̄i ade bahasa siad̄oho, tangarakaina dana ede Hakal-Dama, aona <Dana ra'a>.
20 <<B̄a one d̄i ade Kitab Zabur wara ratunti ndake,
<Co'opu hid̄i ngge'ekaina ndad̄i lingi;
aina kone sab̄ua dou rau ma ngge'ekaina.>
Wara ratunti rau,
<Co'opu ^borana weha b̄a dou makalai.>
21-22 B̄ara ndedena, pab̄uaku wara dou ma b̄atu ndai d̄imandad̄i sakasi b̄a one Ruma Isa wa'ura mori mbali ra d̄i madekaina. Dou ede pab̄uaku sab̄ua dou d̄i ade weki dou-dou ma sama-sama ncau lab̄o ndai aipu wakatu ndai ^batuta Isa, ra aipu la Yahya tampu'u kandeu rasona doub sampe wakatu Isa hanta ne'e ese saroga d̄i woha ndaita.>>
23 Edempara dou-dou ma imbi ma wara ta ede, kad̄alena d̄ua dou, eded̄u la Yusuf ^dipehe rau kai la Barsabas, sia ^dipehe rau kai la Yustus, lab̄o la Matias. 24-25 Edempara siad̄oho do'ana, <<Ruma, Ita mab̄adeku ade samenana dou. La Yudas wa'ura mab̄u ra d̄i ^borakaina eded̄u rasul ro sia nawa'ura made. Ndad̄i tateipu d̄i mada^doho, couku d̄i ade weki d̄ua dou ake ^dikad̄ale b̄a Ruma d̄imbei taki ma cepena la Yudas.>> 26 Edempara ngara d̄ua dou ede undi b̄a siad̄oho ro ngara la Matias ma losa. Ndad̄i sia hanta b̄a siad̄oho ndad̄i rasul d̄imab̄atu sama-sama lab̄o sampuru sab̄ua dou rasul ma kalaina.