Isa Al Masih Katadana Weki-Na D̄i Pidu Dou Anamori-Na
21:1-14
21
Sawa'u b̄a ede, Isa katadana weki-Na sakali wali d̄i anamorid̄oho-Na d̄i Ndano Tiberias. Ndakeku ndad̄ina lampa rawi ede: 2 D̄i sab̄ua ainaina la Simon Petrus, la Tomas d̄i'ou kai la Didimus, la Natanael dou Kana d̄i Galilea, ana-ana la Zebedeus, ro d̄ua dou anamori Isa ma kalaina, wunga kab̄oro menana weki. 3 Nggahi la Simon Petrus d̄imakalaina, <<Nahu kane'e lao ala uta.>><<Nami rau mane'e lao b̄atu,>> nggahi siad̄oho d̄i sia. Edempara siad̄oho lao nentena sampa. Pala sab̄ala ai ede siad̄oho wati rakana au-au. 4 Wakatu wontu liro, Isa kid̄ina d̄i kengge ndano, pala siad̄oho wati b̄adena b̄a one ede Isa. 5 Isa nggahina d̄i siad̄oho, <<Anad̄oho, nggomid̄oho wara ntaumu uta?>>
<<Io watita,>> cambe b̄a siad̄oho.
6 Nggahi Isa d̄i siad̄oho, <<Wurapu alamu ta sab̄ae wana sampa, nggomid̄oho d̄imaraka uta.>> Edempara wura b̄a siad̄oho alana ede, pala wati wa'una hinti b̄a siad̄oho alana b̄ara mboto poda uta rakana.
7 Nggahi b̄a anamori meci Isa d̄i la Petrus, <<Aka Ruma!>> Wakatu ringa b̄a la Simon Petrus b̄a one ede Ruma, sia kanina b̄ajuna b̄ara sia wati kanina b̄aju edempara babuna ade oi. 8 Anamorina ma kalai lao b̄atuna aka kengge ndano kai sampa, ro hinti salahona ala ma b̄ini b̄a uta. Siad̄oho wati ipi d̄o'ona lab̄o kengge ndano, takasi saratu mete mpa. 9 Wakatu siad̄oho londona d̄i sampa, siad̄oho edana kama'a afi lab̄o uta ta ese wawona ro roti. 10 Nggahi Isa d̄i siad̄oho, <<Mai wa'apu ta ake pila-pila tembe uta ra raka b̄a nggomid̄oho.>>
11 La Simon Petrus ne'ena ese sampa, edempara hinti wa'ana ala d̄i kengge ndano. Ala ede b̄ini b̄a uta ma na'e-na'e; sara'ana wara 153 tembe. Ro kone namboto uta ede, ala wati nci'ina. 12 Nggahi Isa d̄i siad̄oho, <<Mai ngahara.>> Wati kone sab̄ua dou rau d̄i ade weki anamori-Na ma disa sod̄i, <<Cou Ita?>> B̄ara siad̄oho nab̄adeku b̄a one Sia ede Ruma. 13 Edempara Isa mai rakana siad̄oho, wehana roti ede, ro mbeina d̄i siad̄oho. Sia weha rauna uta ro mbei rauna d̄i siad̄oho.
14 Akeku katolu kalikaina Isa katadana weki-Na d̄i anamorid̄oho-Na sawa'u b̄a Sia mori mbali.
Isa Al Masih Lab̄o La Petrus
21:15-19
15 Sawa'u b̄a nggori ngaha siad̄oho, nggahi Isa d̄i la Simon Petrus, <<Simon, ana la Yahya, sab̄ua poda nggomi ma'ipi meci ro ca'u Nahu ntewikaisi siad̄oho ake mameci ro ca'u Nahu?>>
<<Poda, Ruma,>> cambe b̄a la Petrus, <<Ruma mab̄ade b̄a one mada mameci ro ca'u Ita.>>
Nggahi Isa d̄i sia, <<Jaga ro sandakapu jimba-jimba Nahu.>>
16 Kad̄ua kalikaina sod̄i b̄a Isa d̄i sia, <<Simon ana la Yahya, sab̄ua poda nggomi mameci ro ca'u Nahu?>>
<<Poda, Ruma,>> cambe b̄a la Petrus, <<Ruma mab̄ade mada mameci ro ca'u Ita.>>
Nggahi Isa d̄i sia, <<Jaga ro sandakapu jimba-jimba Nahu.>>
17 Katolu kalikaina nggahi Isa d̄i sia, <<Simon ana la Yahya, sab̄ua poda nggomi mameci ro ca'u Nahu?>>
La Petrus ndad̄i lalai adena b̄ara Isa sod̄ina d̄i sia sampe tolu kali. Ndad̄i cambe wali b̄a la Petrus, <<Ruma, Ita mab̄ade sara'ana. Ruma mab̄ade mada mameci ro ca'u Ita!>>
Edempara nggahi Isa d̄i sia, <<Jaga ro sandakapu jimba-jimba Nahu. 18 Nahu ma nggahi d̄i nggomi: Wakatu nggomi mbuipu tenggomu, ndai nggomi mahereku rokamu ro malao ta b̄e rane'e ndaimu. Pala nggara nggomi mawa'usi tua, nggomi d̄ima'ala rimamu, ro dou makalai ma d̄iki nggomi ro mawa'a nggomi ta b̄e ra d̄idane'ekai b̄a nggomi.>> 19 Kai nggahi ro eli ndedena, Isa katadana b̄uneku la Petrus madena peasi d̄imakad̄ese ro kantasana Allah Ta'ala. Sawa'u b̄a ede, nggahi Isa d̄i la Petrus, <<^Batupu Nahu!>>
Isa Al Masih Lab̄o Anamori-Na Ma Kalaina
21:20-24
20 Wakatu la Petrus tambarina, sia edana d̄i kontuna anamori ra meci ro ca'u b̄a Isa ma b̄atu rau. Sia edeku ma doho d̄eni lab̄o Isa aipu wakatu ngaha ro masod̄i d̄i Sia, <<Ruma, couku d̄imad̄onggo Ruma d̄i dou-dou ma musu Ruma?>> 21 Edana sia, sod̄i b̄a la Petrus d̄i Isa, <<Ruma, b̄uneku lab̄o sia ake?>>
22 Cambe b̄a Isa, <<Nggara kane'esi b̄a Nahu sia ngge'e mpa morina sampe mai mbalikai Nahu, ede aina b̄ade nggomi. Pala nggomi b̄atupu Nahu!>>
23 Ndad̄i mboura haba d̄i woha anamori Isa b̄a one anamori ma sab̄ua ede wati d̄imamade. Sapodakaina Isa wati nggahina b̄a one anamori ma sab̄ua ede wati d̄imamade, malaisi: <<Nggara kane'esi b̄a Nahu sia mori sampe mai mbalikai Nahu, ede aina b̄ade b̄a nggomi.>>
24 Anamori ma edeku ma nuntu ro nggahi sara'ana mab̄oha mandad̄i ake. Sia rauku ma wa'ura tuntina. Ro ndai tab̄adeku b̄a one au ra nggahina ede napodaku.
Nggahi Ro Eli Cumpukaina
21:25
25 Mbuipu mboto lampa rawi ma kalaina ra karawi b̄a Isa. Nggara sara'ana ede d̄itunti sab̄ua-sab̄uasi, iu b̄a nahu wati wara hid̄ina d̄i sara'a dunia d̄i wi'i kai sara'a buku ra tunti ede.