Isa Al Masih Mori Mbalina
20:1-10
20
D̄i wakatu sid̄i-sid̄i poda d̄i ainaina Ahad ede mbuipu rindi ai, la Maria Magdalena lao aka rade. Sia edana wadu rab̄ontokai rade Isa wa'ura kiri wekina. 2 Edempara sia lao rai rocina ngupana la Simon Petrus ro sab̄ua dou anamori ra meci b̄a Isa, nggahi la Maria d̄i siad̄oho, <<Ruma wa'ura weha b̄a dou d̄i radena, ro nahu wati b̄adeku ta b̄e wi'ikai b̄a dou Sia.>>3 Edempara la Petrus ro anamori ma kalaina ede laona aka rade. 4 D̄uana ede rai rocina, pala anamori makalai ede ma ipi roci rai ntewikaisi la Petrus, ro sia rongga uluna aka rade. 5 Sia tio cad̄eina d̄i ade rade ro edana salolo ma wara ta ede, pala sia wati lu'una. 6 La Simon Petrus wontu kentona, edempara lu'u lalona d̄i ade rade ede. Sia edana salolo ma wara ta ede, 7 pala satob̄e kaen rab̄onto kai pahu Isa watid̄u warana d̄i kompe ede, pala wara d̄i hid̄i makalai wa'ura luru weki. 8 Edempara anamori ma rongga ulu d̄i rade ede, lu'u rauna. Sia eda ro imbina. 9 Sampe wakatu ede siad̄oho watipu loana ka'ao au ra tunti ade Kitab Suci b̄a one Sia pab̄uaku mori mbalina ra d̄i madekaina. 10 Sawa'u b̄a ede, anamori Isa d̄uana ede dulana.
Isa Al Masih Katadana Weki-Na D̄i La Maria Magdalena
20:11-18
11 La Maria Magdalena kid̄ina d̄i tando rade Isa ro nangina. Sia mbuipu nangina ro tio cad̄eina d̄ei rade, 12 edempara edana d̄ua dou mala'eka, kanina kani ro lombo malanta. Siad̄oho dohona d̄i hid̄i rakarukai timba Isa, ma sab̄ua d̄i ao tuta ro ma kalaina d̄i ao ed̄ina. 13 Sod̄i b̄a mala'eka-mala'eka ede, <<Ina, b̄ab̄au nangikaita?>>
Cambe b̄a la Maria, <<Ruma mada wa'ura weha b̄a dou, ro mada wati b̄adeku ta b̄eku rawi'ikai b̄a dou Sia.>>
14 Sawa'u b̄a nggahi ndedena, sia tambarina ro edana Isa ma kid̄i ta ede. Pala sia wati b̄adena b̄a one ede Isa. 15 Sod̄i b̄a Isa d̄i sia, <<Ina, b̄ab̄au nangikaita? Cou ngupata?>>
Kacai b̄a la Maria dou ede ma taki tonggu nggaro, ndad̄i nggahi sia, <<Pa, nggara Itasi ma rawa'a pesona Sia ta ake, tangoato'ipu mada ta b̄e rawi'ikaita Sia loakud̄u mada maweha-Na.>>
16 Nggahi Isa d̄i sia, <<Maria!>>
La Maria tambarina d̄i Isa edempara nggahina kai nggahi Ibrani, <<Rabuni!>> Aona <<Guru>>.
17 <<Aina nentimu Nahu,>> nggahi Isa d̄i sia, <<B̄a one Nahu watipu laoku aka Ama. Pala laopu d̄i cina ro angi Nahu, ro ngoapu d̄i siad̄oho b̄a one Nahu ake mane'e lao aka Ama Nahu ro Amamu, Allah Ta'ala Ruma Nahu ro Allah Ta'ala Rumamu.>>
18 Edempara la Maria lao ngoana d̄i anamori Isa b̄a one sia wa'ura edana Ruma ro b̄a one Ruma wa'ura ngoana d̄i sia sara'ana.
Isa Al Masih Katadana Weki-Na D̄i Anamorid̄oho-Na
20:19-23
19 D̄i ainaina Ahad ede wa'u, wakatu wa'ura aimangad̄i, anamori Isa kab̄oro menana weki d̄i sab̄ua uma ro wole sara'ana tad̄a, b̄a one siad̄oho nadahuku d̄i dou-dou Yahudi. Wed̄i lalo mpa Isa mai ro kid̄ina d̄i woha siad̄oho ro nggahina, <<Salam taho ro ntai d̄i ru'u b̄a nggomid̄oho.>>
20 Sawa'u b̄a nggahi ndedena, Sia teina d̄i siad̄oho rima ro loko-Na. Wakatu edana Ruma, siad̄oho neo poda adena. 21 Edempara nggahi Isa d̄i siad̄oho sakali wali, <<Salam taho ro ntai d̄i ru'u b̄a nggomid̄oho. ^Bune Ama ma ranggadu Nahu, ndede rau Nahu manggadu nggomid̄oho.>> 22 Edempara Sia ufina nawa-Na d̄i siad̄oho ro nggahina, <<Tarima aopu Roh Allah. 23 Nggara nggomid̄oho makangampu weasi dosa dou ndad̄i Allah Ta'ala rau d̄imakangampu wea dosamu. Nggara nggomid̄oho watisi kangampu weamu dosa dou, Allah Ta'ala rau wati d̄imakangampu wea dosana.
Isa Al Masih katadana weki d̄i la Tomas
20:24-29
24 La Tomas d̄i'ou rau kai <<La Didimus>>, sab̄ua dou d̄i ade weki sampuru d̄ua dou anamori Isa, wati warana ta ede sama-sama lab̄o ma kalaina wakatu Isa katadana weki d̄i siad̄oho. 25 Ndad̄i anamori Isa ma kalaina manggahi d̄i la Tomas, <<Nami wa'ura edamu Ruma!>>
Pala cambe b̄a la Tomas, <<Sawatipu eda b̄a nahu rara'a paku d̄i rima-Na, ro sawatipu cub̄u b̄a nahu kanggeku d̄i rara'a suwuna ede ro sawatipu cub̄uku rima nahu d̄i loko-Na, nahu wati peheku d̄ima'imbi.>>
26 Saminggu sawa'u b̄a ede, anamori Isa kab̄oro walina weki d̄i hid̄i ede, ro la Tomas wara rau ta ede. Sara'a tad̄a wa'ura wole. Pala Isa mai ro kid̄ina d̄i woha siad̄oho, edempara nggahina, <<Salam taho ro ntai d̄i ru'u b̄a nggomid̄oho.>> 27 Edempara nggahi Isa d̄i la Tomas, <<Tiopu rima Nahu, ro cub̄upu kanggemu ta ake. D̄alapu rimamu ro cub̄upu d̄i loko Nahu. Aina mbali mbua wali ademu, pala imbira!>>
28 Nggahi la Tomas d̄i Isa, <<Io Rumaku ro Allah Ta'alaku!>>
29 Ndad̄i nggahi Isa d̄i sia, <<Nggomi imbimu b̄ara wa'ura edamu Nahu, taho ro sanara dou ma imbi kone wati edana Nahu!>>
D̄i Ne'e B̄a Dou Ma Tunti Kitab Ake
20:30-31
30 Mbuipu mboto walina lampa rawi ma b̄isa ro guna ma kalai ra karawi b̄a Isa d̄i tando anamorid̄oho-Na, pala wati ratunti d̄i ade kitab ake. 31 Pala sara'ana ake, ratunti loakud̄u nggomid̄oho imbimum b̄a one Isa eded̄u Sangaji Makasalama, Ana Allah,9 ro b̄ara imbimu d̄i Sia, nggomid̄oho rakakaimu mori.