19
Edempara la Pilatus wehana Isa ro kauna tentara-tentarana cambo Isa. 2 Tentara-tentara ndawina sab̄ua songko sangaji kai sanga haju rui, edempara tohona d̄i tuta Isa. Sawa'u b̄a ede, siad̄oho kakanina kai jumba keta d̄i Sia, 3 edempara siad̄oho nggahi ncau-ncauna d̄i Sia, <<Io sangaji dou Yahudi!>> Edempara siad̄oho topana Sia.4 Sawa'u b̄a ede, la Pilatus losana sakali wali ro nggahina d̄i dou mamboto ede, <<Tiopu! Nahu mawa'a kalosa Sia d̄i nggomid̄oho, loakud̄u d̄ib̄ade b̄a nggomid̄oho b̄a one nahu wati wara rakaku rawina ma ncara kone sato'i rau d̄i Sia.>> 5 Edempara Isa losana kai kanina songko sangaji ra ndawi kai humpa rui ro jumba keta. Nggahi la Pilatus d̄i siad̄oho, <<Tiopu Dou ake.>>
6 Wakatu dou-dou mana'ekai imam ro tentara-tentara edana Isa, siad̄oho kanggicana, <<Salibpu Sia! Salibpu Sia!>>
Nggahi la Pilatus d̄i siad̄oho, <<Wehapu Sia, ro salibpu b̄a ndaid̄ohomu, nahu wati rakaku eda rawi-Na mancara kone sato'i rau d̄i Sia.>>
7 Cambe b̄a dou-dou Yahudi ede, <<Nggahi b̄a hukum madad̄oho, Sia pab̄uaku d̄ib̄ab̄u kai hukuman made, b̄ara Sia nakanahuku weki-Na b̄a one Sia eded̄u Ana Allah.>>8
8 Wakatu ringa b̄a la Pilatus nggahi ndede siad̄oho, sia nanaha ipi dahu wali. 9 Ndad̄i sia lu'u mbalina d̄i ade asi ro sawa'u b̄a wa'a kalu'u Isa, sod̄i b̄a la Pilatus d̄i Sia, <<Nggomi ra ta b̄e maikai-Mu?>>
Pala wati cambe b̄a Isa. 10 Ndad̄i la Pilatus nggahi walina, <<Nggomi wati ne'emu nuntu lab̄o nahu? D̄i b̄ade b̄a Nggomi, nahu mantau kuasa d̄imahori Nggomi ro kuasa d̄imasalib Nggomi!>>
11 Cambe b̄a Isa, <<Nggara watisi mbei b̄a Allah Ta'ala kuasa ede d̄i ita, ita wati ntaumu kuasa au-au d̄i Mada. B̄ara ndedena, dou ma d̄onggo Mada d̄i ita, nana'epu dosa sia ntewikaisi dosa ita.>>
12 Wakatu ringa b̄a la Pilatus nggahi ede, sia na'usahaku hori Isa Al Masih. Pala dou-dou Yahudi nakanggica ntuwu, <<Nggara Ita mahorisi Sia, Ita laina soba Kaisar! Dou ma kanahu weki ndaina sangaji, eded̄u musu Kaisar!>>
13 Wakatu ringa b̄a la Pilatus nggahi ede, sia wa'a kalosana Isa edempara dohona d̄i kadera pengadilan d̄i hid̄i ma ngara Dasa Wadu. D̄i ade bahasa Ibrani ngarana Gabata.
14 Wakatu ede ne'empara b̄oe sampuru d̄ua aimarai, sanai sawatipu b̄a Ainaina Aruraja Paskah. Nggahi la Pilatus d̄i dou-dou ede, <<Ake sangaji nggomid̄oho!>>
15 Siad̄oho kanggica walina, <<Hadepu Sia! Hadepu Sia! Salibpu Sia!>>
Sod̄i b̄a la Pilatus, <<Sab̄ua pab̄uaku salib b̄a nahu sangaji nggomid̄oho?>>
Cambe b̄a dou-dou mana'ekai imam, <<Kaisar ede mpoa mpa sangaji madad̄oho!>> 16 Edempara la Pilatus d̄onggona Isa d̄i siad̄oho ro kauna salib. Siad̄oho weha aona Isa, edempara lao wa'ana Sia.
Isa Al Masih D̄isalib
19:17-27
17 Ndad̄i Isa losana ro tunduna haju salib lao aka hid̄i ma ngara <<Hid̄i Rangka>>. D̄i ade bahasa Ibrani pehe kai b̄a dou Golgota. 18 Ta aka Isa salib b̄a siad̄oho sama-sama lab̄o d̄ua dou makalai ra salib rau; sab̄ua dou d̄i sab̄ae ku'i, sab̄ua dou ta sab̄ae wana ro Isa d̄i wohana. 19 D̄i haju salib Isa, kau b̄a la Pilatus tunti b̄une ake: Isa Dou Nazaret, Sangaji Dou Yahudi>>. 20 Mboto dou Yahudi ma baca au ra tunti ede, b̄ara hid̄i rasalibkai Isa ede wati d̄o'ona lab̄o kota. Ratunti ede kai nggahi Ibrani, Latin ro Yunani. 21 Nggahi dou-dou mana'ekai imam d̄i la Pilatus, <<Aina tunti <Sangaji dou Yahudi>, malaisi tuntipu, <Dou ake manggahi, Nahu Sangaji Dou Yahudi.> >>
22 Pala cambe b̄a la Pilatus, <<Au ra wa'u tunti b̄a nahu, wati loa d̄irungka.>>
23 Tentara-tentara ede sawa'u b̄a nggori salibna Isa, siad̄oho wehana kani ro lombo-Na. Kani ro lombo ede cengga upana: cua-cua raka mena ru'u ndaina. Siad̄oho weha rauna jumba-Na. Jumba ede watira nda'u – ramuna tampu'u ta ese salalo awana. 24 Nggahi mena tentara ede d̄i sab̄ua dou lab̄o ma kalaina, <<Aina dompo-dompo b̄a ndai jumba ake. Mai ndai ta'undiku loakud̄u d̄ib̄adekai couku d̄imarakana.>> Lampa rawi ede ndad̄ina ncihi ncao b̄une ra tunti ade Kitab Suci, eded̄u:
<<Siad̄oho cengga-cenggana kani ro lombo Nahu,
ro ndawina undi d̄i ru'u jumba Nahu.>>
Ro poda romo tentara-tentara ede karawina b̄une ede.
25 D̄eni lab̄o salib Isa kid̄i ina Isa, ina nto'i-Na, la Maria wei la Kleopas, ro la Maria Magdalena. 26 Wakatu eda b̄a Isa ina-Na ro sab̄ua anamori ra meci ro ca'u b̄a Sia ma kid̄i ta ede, nggahi Sia d̄i ina-Na, <<Io, Ina ede ana Ita.>>
27 Edempara nggahi Isa d̄i anamori-Na ede, <<Ede Inamu.>> Tampu'u wakatu ede anamori-Na ede tarima aona ina Isa d̄ingge'e lab̄ona d̄i umana.
Madena Isa Al Masih
19:28-30
28 Isa nab̄adeku b̄a one ake wa'ura nggori sara'ana, ro loakud̄u ndad̄ira b̄une ra tunti d̄i ade Kitab Suci, nggahi Sia, <<Nahu mango wo'oku.>>
29 Ta ede wara sab̄ua mangko b̄ini b̄a oi anggo ngonco. Edempara siad̄oho wehana wunta b̄unga ma pahuna b̄une wolo ra kandole, ro d̄etana d̄i ade anggo ngonco ede, sawa'u b̄a ede cakina kai sumpu haju, edempara d̄ahina d̄i wiwi Isa. 30 Sawa'u b̄a nela b̄a Isa oi anggo ede edempara nggahina, <<Wa'ura nggori!>>
Sawa'u b̄a ede, Sia oko ca'awana tuta-Na ro madena.
Isa Al Masih Tub̄a B̄a Siad̄oho Loko Na'e-Na
19:31-37
31 Dou-dou mana'ekai Yahudi wati ca'una timba dou-dou ra salib ede ngge'e tero weki d̄i haju salib d̄i ainaina Sabat, au walipu Sabat ede Ainaina Aruraja ma penti poda. B̄ara ainaina rasalibkai Isa Al Masih ndad̄ina sawatipu ainaina Sabat ede, dou-dou Yahudi rahona d̄i la Pilatus loakud̄u fokana ed̄i-ed̄i dou-dou ra wa'u salib ro kalondo timba-timba ede ra d̄i haju salib. 32 Ndad̄i tentara-tentara ede lao foka uluna ed̄i d̄ua dou ra salib sama lab̄o Isa. 33 Wakatu siad̄oho rakara d̄i Isa, siad̄oho edana Sia nawa'ura made. Ndad̄i siad̄oho wati fokana ed̄i-Na. 34 Sab̄ua dou tentara ade weki tentara-tentara ede, tub̄ana loko Isa kai b̄uja ro losa lalo mpa ra'a ro oi.
35 Dou ma eda madana au ma ndad̄i ede, siaku ma ngoa ro kahabana lampa rawi ede loakud̄u nggomid̄oho imbi raumu.l Ro au ra nuntu ro nggahi ede napodaku, ro sia nab̄adeku b̄a one ede napodaku. 36 Lampa rawi ede ndad̄ina loakud̄u ndad̄ira b̄une ra tunti ade Kitab Suci, eded̄u, <<Wati kone satako rau peke-Na d̄ifoka>>. 37 D̄i ade Kitab Suci wara ratunti rau: <<Siad̄oho d̄imantandana Sia ra wa'u tub̄a b̄a siad̄oho>>.
Umbukai Isa Al Masih
19:38-42
38 Sawa'u b̄a ede, la Yusuf dou Arimatea lao rahona d̄i la Pilatus d̄iloakaina weha timba Isa. La Yusuf eded̄u anamori Isa ma wati raka b̄ade b̄a dou, b̄ara sia nadahuku d̄i dou mana'ekai Yahudi. La Pilatus nangawa mbei au ra raho b̄a sia, ndad̄i sia lao wehana timba Isa. 39 La Nikodemus, ntoina parana maina d̄i Isa wakatu aimangad̄i, lao sama rauna lab̄o la Yusuf. La Nikodemus ma wa'a marakani lo'i d̄upa ro mina gaharu – sara'ana wara takasi 30 kilo tanina. 40 D̄ua dou ede wehana timba Isa edempara pontena kai salolo sama-sama lab̄o marakani lo'i ma mengi ede kai b̄atu ranginakai umbu dou Yahudi. 41 D̄i hid̄i rasalibkai Isa wara sab̄ua nggaro. D̄i ade nggaro ede wara sab̄ua rade b̄ou, ma watipu rakani umbu kai dou. 42 B̄ara ainaina Sabat nane'empara tampu'u, ro rade ede d̄eni lab̄o hid̄i ede, ndad̄i siad̄oho umbuna Isa ta aka.