Isa Al Masih Wa'u Ro Leto B̄a Dou
18:1-11
18
Sawa'u b̄a Isa nggori do'ana, Sia lab̄o anamorid̄oho-Na lao aka ipa b̄ae b̄a Sori Kidron. Ta ede wara sab̄ua nggaro, Isa lab̄o anamorid̄oho-Na lu'una ade nggaro ede. 2 La Yudas ma d̄onggo Isa d̄i dou-dou ma musu-Na ede, nab̄adeku hid̄i ede b̄a one Isa wa'ura ntuwu poda kab̄orona weki d̄i hid̄i ede lab̄o anamorid̄oho-Na. 3 Edempara maira la Yudas d̄i hid̄i ede lab̄o wa'ana tentara-tentara Romawi ro pila-pila dou ma taki jaga Bait Allah ra kakai b̄a dou-dou mana'ekai imam ro dou-dou Farisi. Siad̄oho wa'ana d̄aha ro ilo obo. 4 Isa nab̄ade sara'aku au d̄imandad̄i d̄i weki ndai-Na. Ndad̄i Sia mai rakana dou-dou ede ro sod̄ina, <<Cou ngupa nggomid̄oho?>>5 <<Isa, dou Nazaret,>> cambe b̄a siad̄oho.
<<Nahuku Sia,>> nggahi b̄a Isa.
La Yudas ma d̄onggo Isa d̄i dou-dou ma musu-Na kid̄ina ta ede lab̄o siad̄oho. 6 Wakatu Isa nggahina d̄i siad̄oho, <<Nahuku Sia,>> siad̄oho suru menana edempara mbo'ona awa dana. 7 Sod̄i b̄a Isa sakali wali d̄i siad̄oho, <<Cou ngupa nggomid̄oho?>>
<<La Isa, dou Nazaret,>> cambe b̄a siad̄oho.
8 <<Wa'ura nggahi b̄a Nahu, Nahuku Sia,>> nggahi b̄a Isa. <<Ro nggara napodasi Nahu d̄ingupa b̄a nggomid̄oho, co'opu siad̄oho ma kalai ake laona.>> 9 Kai nggahi ndedena, ndad̄ira au ra nggahi b̄a Isa sawatipu b̄a ede: <<Ama, siad̄oho ra d̄onggo b̄a Ita d̄i Mada, wati kone sab̄ua dou rau d̄ico'o b̄a Mada leli.>>
10 La Simon Petrus ma wa'a salona peda, olona pedana edempara fati kakorina fiko wana ada Imam Agung. Ngara ada ede la Malkus. 11 Edempara nggahira Isa d̄i la Petrus, <<Kalu'u mbalipu pedamu ede d̄i lapina! Sab̄ua kananu b̄a nggomi, Nahu wati d̄imanono gla susa ro ncoki ra mbei b̄a Ama d̄i Nahu?>>
Isa Al Masih Lao Wa'a Satando B̄a Dou Aka La Hanas
18:12-14
12 Edempara tentara-tentara Romawi lab̄o perwira ro pila-pila dou ma taki jaga Bait Allah, wa'u ro letona Isa. 13 Sarambakaina siad̄oho lao wa'ana Isa lao satando la Hanas, riana mone la Kayafas. La Kayafas eded̄u ma ndad̄i Imam Agung d̄i mba'ana ede. 14 Ro siaku dou ma parana ngoa ro tei d̄i dou-dou Yahudi, b̄a one natahopu sab̄ua dou ma made d̄i ru'u b̄a sara'ana bangsa.
La Petrus Nggahina B̄a One Sia Wati Patana Isa Al Masih
18:15-18
15 La Simon Petrus ro sab̄ua dou anamori makalai b̄atu slandona Isa. Anamori ma kalai ake napataku b̄a Imam Agung; ndad̄i sia lu'u b̄atuna Isa d̄i sarei uma Imam Agung, 16 La Petrus ngena ta ari lua, d̄i tad̄a. Edempara anamori ma kalai ede lao losa ro nuntuna lab̄o dou siwe ma jaga tad̄a, edempara recena la Petrus lu'u ta d̄ei. 17 Dou siwe majaga tad̄a ede nggahina d̄i la Petrus, <<Oe, sab̄ua laina nggomi rausi sab̄ua dou ade weki anamori dou aka?>>
<<Laina,>> cambe b̄a la Petrus.
18 Wakatu ede b̄usi ai, ndad̄i ada-ada ro dou-dou ma taki jaga Bait Allah kana'ena afi ro siad̄oho niruna afi ta ede. La Petrus laona ta aka ro kid̄i niruna afi lab̄o siad̄oho.
Imam Agung Paresana Ncihi Ro Ncara Isa Al Masih
18:19-24
19 Imam Agung sod̄ina Isa mab̄oha anamorid̄oho-Na ro mab̄oha ngoa ro tei-Na. 20 Cambe b̄a Isa, <<Mada kanuntu ro nggahi ntiri ncau d̄i tando dou mamboto. Mada kaca'u ngoa ro tei ncau d̄i uma-uma sambea ro ibadakai ro d̄i Bait Allah, hid̄i ranginakai b̄a dou Yahudi kab̄orokaina weki. Mada wati paranaku nuntu cili au ra nggahiku. 21 Ndad̄i b̄ab̄auku ita sod̄ikaimu Mada? Sod̄ipu d̄i siad̄oho ma wa'ura ringa ngoa ro tei b̄a Mada. Tantu siad̄oho nab̄adeku au ra nggahi b̄a Mada.>>
22 Wakatu nggahi ndede Isa, sab̄ua dou d̄i ade weki tentara ma wara ta ede topana Isa ro nggahina, <<Disa poda Nggomi nuntu b̄une ede d̄i Imam Agung!>>
23 Cambe b̄a Isa, <<Nggara warasi au ra nggahi b̄a Nahu ma ncara, nggahi wa'upu ta ake auku ma ncara! Pala nggara napodasi au ra nggahi b̄a Nahu ede, b̄ab̄auku nggomi topakaimu Nahu?>>
24 Edempara la Hanas kauna dou lao wa'a Isa ra ndante ede aka Imam Agung ngarana la Kayafas.
La Petrus Nggahi Walina B̄a One Sia Wati Patana Isa Al Masih
18:25-27
25 La Simon Petrus mbui ngge'epu kid̄i niruna afi ta ede. Sod̄i b̄a dou-dou d̄i sia, <<Sab̄ua laina nggomi rausi anamori dou aka?>> Pala la Petrus kawatina, ro nggahi sia, <<Laina!>>
26 Sab̄ua dou ada Imam Agung, eded̄u iwa ro weki dou ra fati kakori b̄a la Petrus fikona, manggahi, <<Nggomi ra eda b̄a nahu d̄i nggaro ede ma sama-sama lab̄o Sia.>>
27 Edempara la Petrus kawati walina, <<Wati,>> – ro wakatu ede wa'u koko lalo janga.
Isa Al Masih Lao Wa'a Ba Dou Aka La Pilatus
18:28-38a
28 Sid̄i-sid̄i poda, siad̄oho lao wa'ana Isa ra d̄i uma Kayafas lao aka asi gubernur Roma. Ndai dou-dou Yahudi wati lu'una d̄i ade asi ede, loakud̄u siad̄oho wati najisna, b̄ara siad̄oho nane'e b̄atu ngaha ro nono Paskah. 29 B̄ara ndedena, la Pilatus losa rakana siad̄oho ro sod̄ina, <<Auku rawina ma ncara ra b̄ab̄ukai b̄a nggomid̄oho d̄i dou ake?>>
30 Cambe b̄a siad̄oho, <<Nggara Sia watisi wara ncarana, madad̄oho wati d̄imawa'a Sia d̄i Ita Gubernur.>>
31 Nggahi la Pilatus d̄i siad̄oho, <<Wehapu Sia ro paresapu ncihi ro ncarana b̄atu hukum ndai nggomid̄oho!>>
Pala cambe b̄a dou-dou Yahudi ede, <<Madad̄oho wati loamu hukum made dou.>> 32 Ake ndad̄ina loakud̄u ndad̄ira au ra nggahi b̄a Isa mab̄oha cara made-Na.
33 La Pilatus lu'u mbali d̄i asi ro ouna Isa, edempara sod̄ina, <<Sab̄ua poda Nggomi Sangaji dou Yahudi?>>
34 Cambe b̄a Isa, <<Sab̄ua sod̄imu ake ramaina ta ndai ita atao wara dou makalai ma wa'ura ngoa ita mab̄oha Mada?>>
35 Cambe b̄a la Pilatus, <<Sab̄ua nahu ake dou Yahudi? Ma d̄onggo Nggomi d̄i nahu eded̄u bangsa ndai Nggomi ro dou-dou mana'ekai imam. Au ra wa'u karawi b̄a Nggomi?>>
36 Nggahi Isa, <<Karaja'an Mada, laina d̄i dunia ake. Paisi Karaja'an Mada ramaina ra d̄i dunia ake, tantu ada-ada Mada d̄ima'aona loakud̄u Mada wati d̄id̄onggo d̄i dou-dou Yahudi. Pala ncihi romo Karaja'an Mada laina ra d̄i dunia ake!>>
37 Edempara sod̄i b̄a la Pilatus d̄i Sia, <<Nggara ndedesi, Nggomi sangaji?>>
Cambe b̄a Isa, <<Ndai Ita ma nggahi b̄a one Mada ake sangaji. Mada ranggana ro maiku d̄i dunia ake d̄i ru'u sab̄ua mpa d̄i ne'e, eded̄u ma mbei saksi mab̄oha lampa rawi ma poda ro ma ncihi. Dou ma ramai ra d̄i ma poda ro ma ncihi naringa ro kade'eku Mada.>>
38 Sod̄i b̄a la Pilatus d̄i Sia, <<Auku aona lampa rawi ma poda ro ma ncihi?>>
Isa Al Masih B̄ab̄ukai Hukuman Made
18:38b–19:16
Edempara la Pilatus losa walina ro nggahina d̄i dou-dou Yahudi, <<Nahu wati wara rakaku rawina ma ncara kone sab̄ua rau d̄i Sia ake. 39 Pala b̄une ranginakai b̄a nggomid̄oho, nahu ma hori sab̄ua dou rabui d̄i Ainaina Aruraja Paskah. Sab̄ua mangawa nggomid̄oho loakud̄u nahu mahori sangaji dou Yahudi ake d̄i ru'u b̄a nggomid̄oho?>>
40 Cambe b̄a siad̄oho kai kanggica menana, <<Wati, aina Sia, pala la Barabas!>> La Barabas eded̄u sab̄ua dou parampo.