Isa Al Masih Eded̄u Ncai d̄i laokai aka Ama
14:1-14
14
Nggahi Isa d̄i anamorid̄oho-Na, <<Aina darura mena ademu, imbipud d̄i Allah Ta'ala, ro imbi raupu d̄i Nahu. 2 D̄i uma Ama Nahu mboto hid̄i ngge'ekai. Nahu laoku ta aka d̄imasadia weamu hid̄i d̄i ru'u b̄a nggomid̄oho. Nahu wati d̄imanggahi ndede d̄i nggomid̄oho, nggara watisi ndad̄i ndedena.e 3 Sawa'u b̄a lao sadia wea b̄a Nahu hid̄i d̄i ru'u b̄a nggomid̄oho, Nahu d̄imamai mbali ro weha ao nggomid̄oho, loakud̄u ta b̄e rawarakai Nahu, ta ede rau warakai nggomid̄oho. 4 Aka hid̄i laokai Nahu nggomid̄oho mab̄adeku ncaina.>>5 Edempara nggahi la Tomas d̄i Isa Al Masih, <<Ruma, madad̄oho wati b̄ademu ta b̄eku d̄i laokai Ita, b̄uneku d̄i b̄adekai b̄a madad̄oho ncaina?>>
6 Cambe b̄a Isa, <<Nahuku ncai d̄ipatakai Allah Ta'ala ro d̄irakakai mori. Wati kone sab̄ua dou rau maloa lao aka Ama, nggara watisi kai ncai Nahu. 7 Nggara nggomid̄oho mapatasi Nahu, tantu nggomid̄oho mapataf rauku Ama Nahu. Ake nggomid̄oho wa'ura patamu Sia, ro wa'ura edamu Sia.>>
8 Edempara nggahi la Filipus d̄i Isa, <<Ruma, taturu tei to'ipu d̄i madad̄oho mab̄oha Ama loakud̄u ncihi ade madad̄oho.>>
9 Pala cambe b̄a Isa, <<Wa'ura ntoi poda Nahu wara sama-samaku lab̄o nggomid̄oho ro wati ngge'epu patamu Nahu, Filipus? Dou ma wa'ura eda Nahu, nawa'ura eda Ama. ^Buneku loamu nggahi, <Taturu teito'ipu Ama d̄i madad̄oho?> 10 Filipus! Sab̄ua nggomi wati imbimu, b̄a one Nahu masab̄ua lab̄o Ama, ro Ama masab̄ua lab̄o Nahu? Au ra nggahi b̄a Nahu d̄i nggomid̄oho, laina ra d̄i ndai Nahu, pala Ama ma ndad̄i sab̄ua lab̄o Nahu, Siaku ma karawi sara'ana ede. 11 Imbipu d̄i Nahu, b̄a one Nahu masab̄ua lab̄o Ama ro Ama masab̄ua lab̄o Nahu. Kone wati ndede rauna, imbipu d̄i au ra wa'u karawi b̄a Nahu. 12 Nahu manggahi d̄i nggomid̄oho: Dou ma imbi d̄i Nahu, d̄imakarawi au ra wa'u karawi b̄a Nahu, – sia d̄imanaha karawi ma ncewi na'e wali – b̄a one Nahu malao aka Ama. 13 Ro au-au ra raho b̄a nggomid̄oho kai ngara Nahu, ede d̄ikarawi b̄a Nahu d̄i ru'u b̄a nggomid̄oho loakud̄u Ama d̄ikad̄ese ro kantasa kai ncai Ana. 14 Au-au ra raho b̄a nggomid̄ohog kai ngara Nahu, Nahu d̄imakalampana.>>
Isa Al Masih Sakena B̄a One Sia D̄imambei Roh Allah
14:15-31
15 <<Nggara nggomid̄oho mameci ro ca'usi Nahu, nggomid̄oho makalampaku, sara'a au ra parentakai b̄a Nahu. 16 Nahu d̄imaraho d̄i Ama, ro Sia d̄imambeina d̄i nggomid̄oho Mabantu ma kalaina, d̄imalab̄ona nggomid̄oho santoi-ntoina. 17 Sia eded̄u Roh Allah d̄imakatadana ma poda ro ma ncihi mab̄oha Allah Ta'ala. Dunia wati loana tarima Sia, b̄ara dunia wati eda ro wati patana Sia. Pala nggomid̄oho mapataku Sia, b̄ara Sia ma lab̄ona nggomid̄oho ro d̄imandad̄i sab̄uah lab̄o nggomid̄oho.
18 Nahu wati d̄imaco'o wi'i nggomid̄oho ndad̄i b̄une dou kasi pahu. Nahu d̄imamai mbali d̄i nggomid̄oho. 19 D̄isamporo wali mpa wakatuna dunia wati d̄ima'eda Nahu wali. Pala nggomid̄oho d̄ima'eda Nahu. B̄a one Nahu mori ro nggomid̄oho rau d̄imamori. 20 D̄i wakatu edeku nggomid̄oho ampomu b̄ade, b̄a one Nahu wara d̄i ade Ama ro nggomid̄oho sab̄ua lab̄o Nahu, ro Nahu sab̄ua lab̄o nggomid̄oho.
21 Cou-cou ma nenti parenta Nahu ro ma kalampana, sia edeku ma meci ro ca'u Nahu. Ro cou-cou ma meci ro ca'u Nahu, sia ede d̄imeci ro ca'u b̄a Ama-Ku ro Nahu rau d̄imameci ro ca'u sia ro Nahu d̄imamai raka sia.>>
22 La Yudas (laina la Yudas Iskariot) sod̄ina d̄i Isa, <<Ruma, b̄ab̄auku Ruma ngawakaita mai raka madad̄oho ro laina d̄i dunia?>>
23 Cambe b̄a Isa, <<Dou ma meci ro ca'u Nahu, d̄imab̄atu ngoa ro tei b̄a Nahu. Ama Nahu d̄imameci ro ca'una sia. Ama lab̄o Nahu d̄imamai d̄i sia ro ngge'e sama lab̄o sia. 24 Dou ma wati meci ro ca'u Nahu, wati b̄atuna ngoa ro tei b̄a Nahu. Ngoa ro tei ra ringa b̄a nggomid̄oho ede, laina ra maina ra d̄i Nahu, malaisi ra maina ra d̄i Ama ma ranggadu Nahu.
25 Sara'ana ede nggahi b̄a Nahu d̄i nggomid̄oho santoi Nahu mbuipu waraku lab̄o nggomid̄oho. 26 Pala Mabantu eded̄u Roh Allah d̄inggadu b̄a Ama kai ngara Nahu, Siaku d̄imangoa ro tei nggomid̄oho sara'a lampa rawi ro d̄imakawarana nggomid̄oho d̄i sara'ana au ra ngoa ro tei b̄a Nahu d̄i nggomid̄oho.
27 Taho ro ntai d̄iwi'i b̄a Nahu d̄i ru'u b̄a nggomid̄oho. Taho ro ntai ndai Nahu d̄imbei b̄a Nahu d̄i nggomid̄oho. Ra mbei b̄a Nahu ede laina b̄une ra mbei b̄a dunia d̄i nggomid̄oho. Aina darura ademu, aina dahu. 28 Nggomid̄oho wa'ura ringamu nggahi Nahu, <Nahu d̄imalao, pala Nahu d̄imamai mbali d̄i nggomid̄oho.> Nggara nggomid̄oho mameci ro ca'usi Nahu, nggomid̄oho d̄imasana b̄a one Nahu malao aka Ama b̄ara Ama mancewi na'e ntewikaisi Nahu. 29 Nahu mangoana ede d̄i nggomid̄oho ake, sawatipu b̄a ndad̄i sara'ana loakud̄u nggara nandad̄isi lampa rawi ede, nggomid̄oho d̄ima'imbi. 30 Nahu wati d̄imanuntu ro nggahi mancewi mboto wali lab̄o nggomid̄oho, b̄a one wa'ura raka wakatuna dou makuasakai dunia ake maina. Pala sia wati ntauna kuasa au-au d̄i weki Nahu. 31 Pala sara'ana ede pab̄uaku ndad̄ina loakud̄u dunia kawarana weki b̄a one Nahu mameci ro ca'u Ama ro makarawi sara'ana au ra kaukai b̄a Ama d̄i Nahu.
Maira ndai tatu'u wi'iku hid̄i ake.>>