Isa Al Masih Waca Weana Ed̄i Anamorid̄oho-Na
13:1-20
13
Ainaina ede, sanai sawatipu b̄a Aruraja Paskah. Isa wa'ura b̄adena b̄a one wa'ura raka wakatuna Sia d̄imatu'u wi'i dunia ake ro nalao mbali aka Ama-Na. Sia nameci ro ca'uku dou-dou ma imbi d̄i Sia d̄i dunia, ro Sia nangge'e mpa meci ro ca'una siad̄oho sampe santoi-ntoina.2 Isa ro anamorid̄oho-Na wunga ngaha samana. Iblis wa'ura kalu'una niana d̄ei ade la Yudas ana la Simon Iskariot d̄id̄onggokaina Isa d̄i dou-dou ma musu-Na.b 3 Isa nab̄adeku b̄a one Ama-Na wa'ura d̄onggo sara'ana kuasa d̄i Sia. Sia nab̄ade rauku b̄a one Sia ramaina ra d̄i Allah Ta'ala ro d̄imadula mbali d̄i Allah Ta'ala. 4 Edempara Isa tu'u kid̄ina ro runcuna jumba-Na. Sia d̄ikina loko-Na kai kaen. 5 Sawa'u b̄a ede, Sia luana oi d̄i sab̄ua basi, edempara tampu'una waca wea ed̄i anamorid̄oho-Na ro osa kamangona kai kaen ra here d̄i loko-Na. 6 Ndad̄i rakara Sia d̄i la Simon Petrus. Nggahi la Simon, <<Ruma, sab̄ua Ita mane'eku waca wea ed̄i mada?>>
7 Cambe b̄a Isa, <<Nggomi wati loamu ka'ao au ra karawi b̄a Nahu ake, pala peasi nggomi d̄imaloa ka'ao.>>
8 Nggahi b̄a la Petrus,<<Aina, Ruma, ai to'ina waca weata ed̄i mada!>>
Pala cambe b̄a Isa, <<Nggara watisi waca wea b̄a Nahu ed̄i nggomi, nggomi wati d̄imaraka ru'u d̄i Nahu.>>
9 Nggahi la Simon Petrus, <<Nggara ndedesi, Ruma, aina ed̄i mada mpoa, pala rima ro tuta mada rau!>>
10 Nggahi Isa d̄i sia, <<Dou ma wa'ura ndeu, nawa'ura raso sara'a sarumbuna, dou ede wati porina d̄ikaraso wali, selasi ed̄ina.c Nggomid̄oho ake wa'ura raso, pala wati sara'ana.>> 11 Isa nawa'ura b̄ade couku d̄imad̄onggo Sia d̄i dou-dou ma musu-Na. B̄ara ndedena nggahi Sia, <<Nggomid̄oho ake wa'ura raso, pala wati sara'ana.>>
12 Sawa'u b̄a Isa waca weana ed̄i siad̄oho, Sia kani mbalina jumba-Na ro doho mbalina. Edempara nggahi Sia d̄i siad̄oho, <<Sab̄ua maloa ka'ao b̄a nggomid̄oho au ra karawi b̄a Nahu d̄i nggomid̄oho b̄oupu ede? 13 Nggomid̄oho oumu Nahu Guru ro Ruma. Au ra nggahimu ede ncihi romo b̄a one Nahuku Guru ro Ruma. 14 Nggara Nahu ake Ruma ro Guru nggomid̄oho ma waca wea ed̄imu, nggomid̄oho pab̄ua raupu waca kali cempe ed̄i d̄ohomu. 15 Nahu mambei conto ma taho ake d̄i nggomid̄oho, loakud̄u nggomid̄oho karawi raumu au ra karawi b̄a Nahu d̄i nggomid̄oho. 16 Nahu ma nggahi d̄i nggomid̄oho: Sab̄ua dou ada wati ncewi esena ntewikaisi rumana atao sab̄ua dou ra kakai wati ncewi esena ntewikaisi lab̄o dou ma rakakaina. 17 Nggara wa'usi b̄ade b̄a nggomid̄oho sara'ana ake, ndad̄i taho ro sanara nggomid̄oho, nggara makalampasi b̄a nggomid̄oho.
18 Au ra nggahi b̄a Nahu ake laina mab̄oha nggomid̄oho sara'ana. Nahu kab̄ade cou-cou ra wa'u kad̄ale b̄a Nahu. Pala au ra tunti ade Kitab Suci, pab̄uaku ndad̄ina, eded̄u <Dou ma ngaha sama lab̄o Nahu, d̄ima'ao Nahu.> 19 Lampa rawi ede karongga b̄a Nahu d̄i nggomid̄oho ake, sawatipu ndad̄ina loakud̄u nggara nandad̄isi lampa rawi ede, nggomid̄oho d̄ima'imbi b̄a one Nahuku Sia ede. 20 Nahu manggahi d̄i nggomid̄oho: Cou matarima ao dou ra nggadu b̄a Nahu, natarimaku Nahu. Ro cou matarima Nahu, natarimaku Sia ma ranggadu Nahu.>>
Isa Al Masih Ngoa Ro Kawarana La Yudas
13:21-30
21 Sawa'u b̄a nggahi ndede Isa, Sia na'ipiku lalai ade-Na, edempara nggahi Sia, <<Nahu ma nggahi d̄i nggomid̄oho, sab̄ua dou d̄i ade weki nggomid̄oho d̄imad̄onggo Nahu d̄i dou-dou ma musu Nahu.>>
22 Anamorid̄oho-Na cua ntandana angina kai mbora mena akana b̄ara wati b̄adena couku dou ra nggahina ede. 23 Anamori ma ipi meci ro ca'u b̄a Isa dohona d̄i kompe Isa. 24 La Simon Petrus mbeina tanda d̄i sia, loakud̄u sod̄ina d̄i Isa couku dou ra nggahi b̄a Isa.
25 Ndad̄i anamori-Na ede mai peduna Isa, ro sod̄ina, <<Cousi dou ra nggahi b̄a Ita Ruma?>>
26 Cambe b̄a Isa, <<Dou d̄imbei b̄a Nahu roti ra d̄eta b̄a Nahu ade mangko, siaku douna.>> Edempara Isa wehana satob̄e roti, d̄etana d̄i ade mangko ro mbeina d̄i la Yudas ana la Simon Iskariot. 27 Sawa'u b̄a la Yudas tarimana roti ede, Iblis lu'una d̄i adena. Edempara nggahi b̄a Isa d̄i sia, <<Karawi rocipu au d̄ine'emu kalampa b̄a nggomi.>> 28 Wati kone sab̄ua dou rau d̄i ade weki siad̄oho ma doho ngaha ro nono ta ede maloana ka'ao b̄ab̄auku Isa nggahi ndedekaina d̄i la Yudas. 29 Wara ma kacai Isa ma kau la Yudas weli au-au d̄i paralu d̄ingaha ndihakai ede atao mbei piti d̄i ru'u b̄a dou mancoki mori – b̄ara la Yudas eded̄u dou ma taki nenti piti kas siad̄oho.
30 Sawa'u b̄a la Yudas tarimana roti ede, sia losa lalona. Wakatu ede wa'ura rindi ai.
Parenta Ma B̄ou
13:31-35
31 Sawa'u b̄a lao la Yudas, nggahi Isa, <<Ake Nahu eded̄u Ana Manusia d̄ikad̄ese ro kantasa ro Allah Ta'ala d̄ikad̄ese ro kantasa kai ncai Sia. 32 Nggara Allah Ta'ala d̄ikad̄ese ro kantasa kai ncai Sia, Sia rau d̄ikad̄ese ro kantasa b̄a Allah Ta'ala kai weki ndai-Na. Ro Allah Ta'ala d̄imakad̄ese ro kantasa rocina Sia. 33 Ana-ana-Ku, Nahu wati d̄imangge'e ntoi wali lab̄o nggomid̄oho. Nggomid̄oho d̄imangupa Nahu, pala b̄une ra wa'u nggahi b̄a Nahu d̄i dou-dou Yahudi, ndede rau d̄i nggahi b̄a Nahu d̄i nggomid̄oho; aka hid̄i d̄i laokai b̄a Nahu, nggomid̄oho wati loamu lao ta aka. 34 Nahu ma mbei nggomid̄oho parenta ma b̄ou eded̄u meci ro ca'upu d̄i sab̄ua lab̄o ma kalaina. Sama b̄une Nahu mameci ro ca'u nggomid̄oho, ndede rauku nggomid̄oho pab̄uapu cua meci ro ca'u angimu. 35 Nggara nggomid̄oho macua meci ro ca'usi angimu, sara'a dou d̄imab̄ade b̄a one nggomid̄oho anamori Nahu.>>
Isa Al Masih Ngoa Ro Kawarana B̄a One La Petrus D̄imakawati Pata Isa Al Masih
13:36-38
36 Sod̄i b̄a la Simon Petrus d̄i Isa,<<Ruma, Ita mane'e lao ta b̄eku?>> Cambe b̄a Isa, <<Ta b̄e ralaokai Nahu, nggomi watipu loamu lao b̄atu ake. Pala peasi nggomi d̄imalao b̄atu Nahu.>>
37 Sod̄i wali b̄a la Petrus,<<Ruma, b̄ab̄auku mada wati loaku lao b̄atu Ita ake? Mada kangawa te'e nawa d̄i ru'u b̄a Ita, Ruma!>>
38 Cambe b̄a Isa, <<Sab̄ua poda nggomi mangawa te'e nawa d̄i ru'u b̄a Nahu? D̄i b̄ademu, sawatipu koko janga peasi, nggomi wa'ura tolu kali nggahimu b̄a one nggomi wati patamu Nahu!>>