Isa Al Masih Lua B̄a Dou Siwe Kai Mina Mengi D̄̄i Kota Betania
12:1-8
12
Ini nai sawatipu b̄a Ainaina Aruraja Paskah, Isa laona aka Betania, aka hid̄i ngge'ekai la Lazarus ra kamori mbali b̄a Sia. 2 Ta aka Isa ka'ambi wea b̄a siad̄oho ngaha ro nono, la Marta ma ka'ambi wea ngaha ro nono ede. La Lazarus ro dou-dou ma mai doho ngaha sama lab̄o Isa. 3 Edempara la Maria wehana takasi satenga lite mina mengi ma nggali poda co'ina. Sia luana mina ede d̄i ed̄i Isa, edempara osana kai honggona. Uma ede ndad̄i mengi sara'a b̄ara ngolo mina ede. 4 Pala la Yudas Iskariot, sab̄ua dou ade weki anamori Isa – ma sawa'u b̄a ede d̄imad̄onggo Sia d̄i dou-dou ma musu-Na – nggahina, 5 <<^Bab̄auku mina mengi ede wati landa, kai co'i 300 piti salaka,a ro piti ede mbei d̄i dou mancoki mori?>> 6 Nggahi ndedekai la Yudas laina b̄ara sia ma kandad̄i au dou mancoki mori, pala b̄ara sia, dou mampanga. Sia ntuwura wehana piti d̄i kas ra nenti b̄a sia.7 Pala nggahi Isa, <<Co'opu dou siwe ake! Sia karawina ake d̄i ru'u b̄a ainaina umbukai Nahu. 8 Dou mancoki mori nawara ncau d̄i ade woha nggomid̄oho, pala Nahu wati.>>
Mafaka Ne'e Hade La Lazarus
12:9-11
9 Mboto dou Yahudi maringa haba b̄a one Isa wara d̄i Betania, ndad̄i siad̄oho laona ta aka. Siad̄oho laona ta aka laina b̄ara Isa mpoa, pala b̄ara siad̄oho nane'eku eda rau la Lazarus ra kamori mbali b̄a Isa ra d̄i madekaina. 10 Edempara dou-dou mana'ekai imam nane'eku hade la Lazarus rau; 11 b̄ara sia edeku makandad̄ina mboto dou Yahudi tu'u wi'ina siad̄oho ro imbi d̄i Isa.
Isa Al Masih Weha Ao B̄a Dou Kai Ndiha Poda D̄i Yerusalem
12:12-19
12 B̄ala ai sanai wakatu dou mamboto ma wa'ura mai d̄ikandihakaina Paskah ringana b̄a one Isa wunga ade lampa ro laokaina lao aka Yerusalem. 13 Ndad̄i siad̄oho wehana ro'o haju palem edempara lao weha aona Sia, ro kanggica salahona, <<^Dese ro ntasara Allah Ta'ala! Allah Ta'ala ma barekana Sia ma mai kai ngara Ruma. Sangaji Israel!>>
14 Isa mbei b̄a dou sab̄ua keledai ndara, ro nentena. Edempara ndad̄ira b̄une ra tunti d̄i ade Kitab Suci:
15 <<Aina dahu, ana dou siwe Sion!
Tiopu Sangajimu mamai,
manente sab̄ua keledai ndara!>>
16 D̄i wakatu ede anamori Isa watipu loana ka'ao lampa rawi ede. Pala sawa'u b̄a Isa d̄ikad̄ese ro kantasa kai made-Na, ampo nakawara b̄a siad̄oho b̄a one ra karawi b̄a dou-dou ede d̄i ru'u b̄a Sia wara ratunti ade Kitab Suci.
17 Dou-dou ma wara wakatu Isa ou kalosana la Lazarus d̄i ade rade ro kamori mbalina, nanuntu ro nggahi ncauku mab̄oha lampa rawi ede. 18 B̄ara ndedena, dou mamboto ede lao weha aona Isa b̄ara siad̄oho ringana haba b̄a one Siaku ma wa'ura karawi ma b̄isa ro guna ede. 19 Ndad̄i dou-dou Farisi nggahina d̄i sab̄ua dou lab̄o ma kalaina, <<Ndai wati loata karawi au-au! Tiopu, sara'a dunia ma lao b̄atu Sia!>>
Isa Al Masih Ngoana Mab̄oha Wakatu Madekai-Na
12:20-36
20 D̄i ade weki dou-dou ma lao aka Yerusalem mane'e lao sambea ro ibada wakatu ndihakai ede wara rau pila-pila dou Yunani. 21 Siad̄oho mai rakana la Filipus ro nggahina, <<Cina, nggara loasi, nami mane'e eda angi lab̄o Isa.>> La Filipus ede, dou Betsaida dana ro rasa Galilea.
22 Edempara la Filipus lao ngoana lampa rawi ede d̄i la Andreas, ro sawa'u b̄a ede siad̄oho d̄uana ede karonggana d̄i Isa. 23 Isa nggahina d̄i siad̄oho, <<Wa'ura raka wakatuna Nahu eded̄u Ana Manusia d̄ikad̄ese ro kantasa. 24 Nahu manggahi d̄i nggomid̄oho, <<Nggara sanggini gandum watisi nggud̄a d̄i dana ro madena, gandum ede ngge'e mpa sangginina. Pala nggara namadesi isi gandum ede, ampona wara hasina ma mboto. 25 Dou ma meci ro ca'u morina d̄imambora morina. Pala cou-cou ma wati meci nawana d̄i dunia ake, sia d̄imasandakana d̄i ru'u mori ma sapodakaina ro ma ede ro hid̄i. 26 Dou ma ne'e karawi wea Nahu pab̄uaku b̄atuna Nahu, loakud̄u ta b̄e rawarakai Nahu ta ede rauku warakai ada Nahu. Cou-cou ma karawi wea Nahu d̄ikaco'i b̄a Ama Nahu.>>
27 <<Nahu ipi darura ade-Ku; auku d̄inggahi b̄a Nahu ake? Sab̄ua pab̄uaku nggahi b̄a Nahu, <Ama, horipu Mada d̄i wakatu ake?> Pala Mada maiku d̄ima'iu susa ro ncoki ake romo. 28 Ama, d̄ese ro ntasara ngara Ita!>> Edempara wara ringa eli ma ra mai ra d̄i langi manggahi, <<Nahu wa'ura kad̄ese ro kantasaku Sia, ro Nahu d̄imakad̄ese ro kantasa walina Sia.>>
29 Dou mamboto ma wara ta ede maringa eli ede. Nggahi siad̄oho, <<Aka karunggu ai!>> Pala wara rau ma nggahi, <<Laina! Mala'eka manuntu lab̄o Sia!>>
30 Edempara nggahi b̄a Isa d̄i siad̄oho, <<Eli ede, laina d̄i ru'u b̄a Nahu, pala d̄i ru'u b̄a nggomid̄oho. 31 Ake wa'ura raka wakatuna dunia d̄iparesa ncihi ro ncarana b̄a Allah Ta'ala; ake makuasa d̄i dunia ake d̄ikakoa. 32 Pala nggara Nahu d̄ihanta ca'esesi, Nahu d̄imahinti wa'a sara'a dou mai d̄i Nahu.>> 33 Nggahi ndedekai Sia d̄ikatadakaina b̄uneku cara made-Na.
34 Nggahi dou mamboto ede d̄i Sia, <<Nggahi b̄a Kitab Taurat ra nenti b̄a nami, b̄a one Sangaji Makasalama ngge'e mpa mori santoi-ntoina. ^Buneku loamu Nggomi nggahi b̄a one Ana Manusia pab̄uaku d̄ihanta ca'ese? Couku Ana Manusia ede?>>
35 Cambe b̄a Isa, <<D̄i samporo wali mpa taroa ede wara d̄i ade woha nggomid̄oho. Ndad̄i, lampapu santoi taroa ede mbuipu warana, loakud̄u nggomid̄oho aina b̄oha b̄a marindi. Dou ma lampa d̄i ade marindi wati b̄adena ta b̄e laokaina. 36 Imbipu d̄i taroa ede, santoi taroa ede mbuipu warana d̄i nggomid̄oho loakud̄u nggomid̄oho ndad̄imu ana-ana ma taroa.>>
^Bab̄auku Dou-dou Yahudi Wati Imbikaina
12:37-43
Sawa'u b̄a nggahi ndede Isa, Sia tu'u wi'ina hid̄i ede, ro wati ngawana katada weki d̄i siad̄oho. 37 Konena mboto rawi ma b̄isa ro guna ra karawi b̄a Isa d̄i tando siad̄oho, siad̄oho ngge'e mpa wati imbina d̄i Sia. 38 Kai ndedena ndad̄ira au ra nggahi b̄a Nabi Yesaya,
<<Ruma, couku ma imbi d̄i haba rawa'a b̄a madad̄oho?
D̄i couku kuasa Ruma d̄ikatadakai?>>
39 B̄ara ndedena, siad̄oho wati ngawana imbi, b̄ara la Yesaya wa'ura nggahi rauna,
<<Nggahi b̄a Allah Ta'ala,
40 <Nahu makambudana mada siad̄oho,
d̄imakaterana ade siad̄oho;
loakud̄u mada siad̄oho wati loana eda,
fiki ro kananu siad̄oho wati loana ka'ao.
Loakud̄u siad̄oho aina mai mbalina d̄i Nahu,
ro Nahu katahoku supu siad̄oho.> >>
41 Nggahi ndedekai la Yesaya b̄ara sia wa'ura edana na'e kuasa Isa, ro nuntu ro nggahina mab̄oha Sia.
42 Kone ade ndedekaina, mboto dou d̄i ade weki dou mana'ekai Yahudi ma imbi d̄i Isa. Pala siad̄oho wati disana ngoa ntiri, b̄ara siad̄oho nadahuku d̄i dou-dou Farisi kombisi nakantaku lu'u d̄i ade uma sambea ro ibadakai. 43 Siad̄oho na'ipipu ca'una raka roi b̄a manusia ntewikaisi rakaco'i b̄a Allah Ta'ala.
Nggahi Ro Eli Isa Al Masih D̄imaparesa Ncihi Ro Ncara
12:44-50
44 Edempara nggahi Isa, <<Dou ma imbi d̄i Nahu, laina imbina d̄i Nahu, pala d̄i Sia ma ranggadu Nahu. 45 Ro dou ma eda Nahu, na'edaku Sia ma ranggadu Nahu. 46 Nahu maiku ara dunia d̄imandad̄i taroa, loakud̄u sara'a dou ma imbi d̄i Nahu wati ngge'ena d̄i ade marindi. 47 Dou ma ringa ro kade'e ngoa ro tei b̄a Nahu, pala wati b̄atuna – laina Nahu mahukum sia. B̄ara Nahu maiku laina d̄imahukumna dunia ake, pala d̄imakasalamana. 48 Dou ma wati ca'u Nahu ro wati kade'ena nggahi ro eli Nahu, wa'ura wara ma paresa ncihi ro ncarana. Nggahi ro eli ra karongga b̄a Nahu edeku d̄imaparesa ncihi ro ncarana d̄i Ainaina Kiama. 49 B̄ara Nahu wati nuntu ro nggahiku d̄i au ra kane'e ndai-Ku; Ama ma ranggadu Nahu, Sia ma rakau Nahu, auku d̄ipab̄ua karongga b̄a Nahu. 50 Ro Nahu kab̄ade b̄a one parenta-Na ede mambei mori ma sapodakaina ro ma ede ro hid̄i. Ndad̄i Nahu makaronggana b̄une ra nggahi b̄a Ama d̄i Nahu.>>