La Lazarus Made Ro Kamori Mbali
11:1-44
11
Wara sab̄ua dou mone ma wunga supu, ngarana la Lazarus. Sia nangge'e d̄i Betania sama-sama lab̄o amancawana la Maria lab̄o la Marta. 2 La Maria eded̄u dou siwe ma parana lua mina mengi d̄i ed̄i Ruma ro ma osa kamango kai honggona. 3 La Maria ro la Marta kakaina dou lao ngoa d̄i Isa, <<Ruma, amania madad̄oho ra meci b̄a Ita ede wunga supuna.>>4 Wakatu ringa b̄a Isa haba ede, nggahi Sia, <<Supu ede wati d̄imadekai, pala ede ndad̄ina loakud̄u Allah Ta'ala d̄ikad̄ese ro kantasa, ro b̄ara ndedena Ana Allah6 d̄ikad̄ese ro kantasa rau.>>
5 Isa nameci ro ca'uku la Marta, Maria ro la Lazarus. 6 Pala wakatu Isa ringana haba b̄a one la Lazarus wunga supuna, Sia ngge'e wa'una d̄i hid̄i ede d̄ua nai wali. 7 Sawa'u b̄a ede, nggahi Sia d̄i anamorid̄oho-Na, <<Mai ndai talao dula mbaliku aka Yudea.>>
8 Cambe b̄a siad̄oho, <<Guru, b̄ou podapu dou-dou Yahudi mane'e tob̄a Ita kai wadu, sab̄ua mbuipu ne'eta Ita dula mbali ta aka?>>
9 Cambe b̄a Isa, <<Sambia ai mantuki wara sampuru d̄ua jam ntoina. Cou-cou malampa d̄i wakatu aimarai, wati satununa b̄ara sia na'edaku taroa dunia ake. 10 Pala nggara dou nalampasi d̄i wakatu aimangad̄i, dou ede nasatunu, b̄ara wati wara taroa d̄i ndai dou ede.>> 11 Ndedeku nggahi b̄a Isa. Edempara Sia nggahi walina, <<Soba ndai la Lazarus nawa'ura maru, pala Nahu d̄imalao rod̄una.>>
12 Nggahi anamori Isa, <<Ruma, nggara la Lazarus namarusi, sia d̄imataho.>>
13 Isa nggahi ndedekaina b̄a one la Lazarus nawa'ura made. Pala kacai b̄a siad̄oho aona nggahi Isa b̄a one la Lazarus maru b̄une ranginakai. 14 B̄ara ndedena, Isa ngoa ntirina d̄i siad̄oho, <<La Lazarus nawa'ura made; 15 pala syuku, wakatu ede Nahu wati warana ta aka, b̄ara nancewi tahopu d̄i ru'u b̄a nggomid̄oho, loakud̄u nggomid̄oho imbimu. Maira ndai talaoku aka la Lazarus.>>
16 Edempara la Tomas d̄i'ou rau kai <<La Didimus>> nggahina d̄i anamori Isa ma kalaina, <<Mai ndai talao b̄atuku, konena ndai ta made samaku lab̄o Sia!>>
17 Wakatu Isa ronggana d̄i hid̄i ede, la Lazarus wa'ura upa nai ntoina ra'umbu. 18 Betania d̄eni lab̄o Yerusalem, takasi tolu kilo d̄o'ona. 19 Mboto dou Yahudi ma wa'ura mai lamba ro rere la Marta lab̄o la Maria b̄ara made amaniana.
20 Wakatu ringa b̄a la Marta b̄a one Isa wara maina, sia losa weha aona Isa, pala la Maria midi d̄i uma. 21 Nggahi la Marta d̄i Isa, <<Ruma, pai warasi Ita ta ake wakatu ede, tantu amania mada wati d̄imamade. 22 Pala ake mada kab̄ade b̄a one Allah Ta'ala d̄imambei au ra raho b̄a Ita d̄i Sia.>>
23 <<Amaniamu d̄imamori mbali,>> nggahi Isa d̄i la Marta.
24 Cambe b̄a la Marta, <<Mada kab̄ade la Lazarus d̄imamori mbali wakatu kamori mbali dou ma made d̄i Ainaina Kiama.>>
25 <<Nahuku ma mbei mori ro makamori mbali dou mamade,>> nggahi Isa d̄i la Marta. <<Dou ma imbi d̄i Nahu d̄imamori mbali, konena sia nawa'ura made. 26 Ro sanikina dou ma mori ro ma imbi d̄i Nahu, wati d̄imamade santoi-ntoina. Sab̄ua nggomi ma'imbiku d̄i lampa rawi ede?>>
27 <<Ruma,>> cambe b̄a la Marta, <<Mada ka'imbiku b̄a one Ita eded̄u Ana Allah,7 Sangaji Makasalama d̄imamai d̄i dunia ake.>>
28 Sawa'u b̄a nggahi ndede la Marta, sia lao ouna la Maria, sa'ena ro ngoa narina d̄i sia, <<Guru wara ta ake, Sia sod̄ina nggomi.>> 29 Ndede ringana haba ede la Maria tu'u rocina, edempara lao rakana Isa. 30 Wakatu ede, Isa watipu lu'una d̄i rasa ede. Sia mbuipu d̄i hid̄i weha aokai b̄a la Marta. 31 Wakatu dou-dou Yahudi ma wunga rere la Maria d̄i umana, siad̄oho edana b̄a one la Maria ma tu'u ro ma rai losa, ndad̄i siad̄oho lao b̄atuna sia, b̄ara kacai b̄a siad̄oho sia nalao nangiku aka rade.
32 Wakatu la Maria ronggana d̄i hid̄i Isa ro edana Sia, la Maria sujuna d̄i tando Isa ro nggahina, <<Ruma, pai warasi Ita ta ake wakatu ede, tantu amania mada wati madena.>>
33 Wakatu Isa edana la Maria ma nangi ro dou-dou Yahudi ma mai sama lab̄o la Maria manangi rau, Isa nata adena. Edempara sod̄ina, 34 <<Ta b̄e ra'umbukai b̄a nggomid̄oho sia?>>
<<Mai tatiopu, Ruma,>> cambe b̄a siad̄oho.
35 Edempara Isa nangina. 36 Ndad̄i nggahira b̄a dou-dou Yahudi ede, <<Tiopu, Sia nawancuku mecina la Lazarus!>>
37 Pala wara pila-pila dou d̄i ade weki siad̄oho ma nggahi, <<Sia naloa kandad̄i dou ma mbuda loa eda, sab̄ua Sia wati loana kandad̄i dou ede loakud̄u wati madena?>>
38 Isa na'ipiku nata ade wali-Na, edempara laona aka rade. Rade ede eded̄u sab̄ua karombo rab̄onto kai wadu na'e.
39 Nggahi Isa, <<Kiri pesopu wadu ede!>>
Cambe b̄a la Marta, amancawa dou ma made ede, <<Ruma, sia wa'ura upa nai ra'umbu. Tantu nawa'ura wou mbai!>>
40 Nggahi Isa d̄i la Marta, <<Nahu wa'ura nggahikud̄i nggomi: Nggara nggomi ma'imbisi, nggomi d̄ima'eda b̄a one na'ipiku na'ena kuasa Allah Ta'ala!>> 41 Edempara siad̄oho pesona wadu ede. Sawa'u b̄a ede, Isa d̄ongana langi ro nggahi-Na, <<Io Ama, mada marenta syuku d̄i Ita, b̄ara Ita wa'ura ringa ro kade'eta Mada. 42 Mada kab̄ade b̄a one Ita maringa ncauku Mada, pala Mada manggahi ake, d̄i ru'u b̄a dou-dou ma wara ta ake, loakud̄u siad̄oho imbina b̄a one Ita ma ranggadu Mada.>> 43 Sawa'u b̄a nggahi ndedena, Isa nggahi kana'ena, <<Lazarus losara!>> 44 Edempara dou ma wa'ura made ede losana. Rima ro ed̄ina mbuipu raponte kai salolo, ro pahuna rab̄onto kai satob̄e salolo. Nggahi Isa d̄i siad̄oho, <<Salo'a weapu salolona, loakud̄u sia naloa lampa.>>
Mafaka Ne'e Hade Isa Al Masih
11:45-57
45 Mboto dou d̄i ade weki dou-dou Yahudi ma mai lamba la Maria ro ma eda madana au ra wa'u karawi b̄a Isa ma ndad̄i imbi d̄i Isa. 46 Pala wara pila-pila dou d̄i ade weki siad̄oho ma lao aka dou-dou Farisi ro ngoana au ra wa'u karawi b̄a Isa. 47 B̄ara ndedena, dou-dou Farisi ro dou-dou mana'ekai imam mbolona lab̄o Mahkama Agama. Nggahi siad̄oho, <<Auku d̄ikarawi b̄a ndai? Dou ede karawina mboto rawi ma b̄isa ro guna! 48 Nggara co'o kantuwusi b̄a ndai b̄une ede sara'a dou d̄ima'imbi d̄i Sia ro dou-dou Roma d̄imamai ro d̄imakuasakaina Bait Allah ro sara'a bangsa ndaita!>>
49 Sab̄ua dou d̄i ade weki siad̄oho ma ngara la Kayafas, ma ndad̄i Imam Agung wakatu mba'ana ede, nggahina d̄i siad̄oho, <<Nggomid̄oho wati b̄ademu au-au. 50 Sab̄ua nggomid̄oho wati kawaramu weki b̄a one d̄i ru'u b̄a ela ro dou, natahopu made sab̄ua dou ntewikaisi leli sara'a bangsa?>> 51 Sapodakaina la Kayafas nggahi ndedekaina, laina b̄ara kananu ndaina. Pala kai Imam Agungkaina wakatu mba'ana ede, sia karonggana nggahi Ruma b̄a one Isa d̄imamade d̄i ru'u b̄a bangsa Yahudi. 52 Ro laina d̄i ru'u b̄a bangsa Yahudi mpoa, pala d̄imakab̄oro ro d̄imakasab̄uana ana-ana Allah ma mbari mbura rero.
53 Tampu'u ainaina ede dou-dou mana'ekai Yahudi mafakana ne'e hade Isa. 54 B̄ara ndedena, Isa watid̄u nuntu ro nggahi walina d̄i tando dou mamboto d̄i woha dou Yahudi, Sia tu'u wi'ina Yudea, edempara laona aka kota ma ngara Efraim d̄eni lab̄o so sarae. Ta ede Sia ngge'e sama-samana lab̄o anamorid̄oho-Na.
55 Wakatu ede d̄enira Ainaina Aruraja Paskah Yahudi. Mboto dou Yahudi ma ramai ra d̄i kampo-kampo ma lao aka Yerusalem d̄ikalampakaina upacara karaso weki sawatipu b̄a Aruraja Paskah ede. 56 Siad̄oho ngupana Isa, ro wakatu kab̄oro weki d̄i Bait Allah, nggahi siad̄oho d̄i sab̄ua lab̄o ma kalaina, <<^Buneku kananu b̄a nggomi, sab̄ua Sia namai d̄i ndihakai ake?>> 57 Siad̄oho nggahi ndedekaina b̄ara dou-dou mana'ekai imam ro dou-dou Farisi wa'ura kalosana parenta b̄a one dou ma b̄ade ta b̄e-b̄e rawarakai Isa, pab̄uaku ngoana loakud̄u Sia d̄iwa'u.