Isa Al Masih eded̄u Dou ma'ompukai jimba ma taho
10:1-21
10
<<Nahu manggahi d̄i nggomid̄oho: Cou ma lu'u ade kanda jimba kai nggoncuna kuta ro wati lu'una ta tad̄a ncai, sia eded̄u dou ma mpanga ro parampo. 2 Pala cou-cou ma lu'u ta tad̄ana, sia eded̄u dou ma'ompukaina. 3 Dou majaga kanda nahengga weaku tad̄a ncai d̄i ru'una, ro jimba-jimbana naringa ro kade'eku elina wakatu sia ouna jimba-jimba ede kai ngara cua ndaina ro mad̄ende kalosana jimba-jimba ede. 4 Sawa'u b̄a jimba-jimba ede wa'a kalosana, dou ma'ompukaina nalampa ulu, ro jimba-jimba nalampa b̄atuku sia b̄ara jimba-jimba ede napataku elina. 5 Pala jimba-jimba ede wati d̄imangawa lampa b̄atu dou makalai, malaisi nanaha rai pesoku wekina b̄ara wati patana elina.>>6 Isa Al Masih caritana conto ro ibara ede, pala siad̄oho wati loana ka'ao auku aona nggahi ro eli Sia.
7 Ndad̄i nggahira Isa Al Masih sakali wali, <<Nahu manggahi d̄i nggomid̄oho, sapodakaina Nahuku tad̄a ncai d̄i ru'u b̄a jimba-jimba ede. 8 Samenana ma mai sawatipu b̄a Nahu eded̄u dou mampanga ro dou parampo, pala jimba-jimba wati kade'ena eli siad̄oho. 9 Nahuku tad̄a. Cou-cou malu'u kai ncai Nahu d̄imasalama; sia lu'u losana ro narakaku ngaha ro nono. 10 Dou ma mpanga mai b̄a ne'ena mpanga mpa, d̄imahade dou, ro d̄imane'e ka'iha ma wara. Pala Nahu maiku loakud̄u manusia rakana mori ma remba poda.
11 Nahuku Dou ma'ompukai jimba ma taho. Ma'ompukai jimba ma taho nad̄onggoku nawana d̄i ru'u b̄a jimba-jimbana. 12 Dou ra'ufa ma laina dou ma'ompukai jimba ro lai rauna dou ma ntau jimba-jimba ede, d̄imarai tu'u wi'i jimba-jimba ede, nggara na'edasi lako doro ma mai. Ndad̄i jimba-jimba ede nakumpa ro nakambari mburaku b̄a lako doro. 13 Dou ede narai tu'u wi'iku b̄ara sia dou ra'ufa. Sia naco'o wi'iku jimba-jimba ede. 14-15 Nahuku Dou ma'ompukai jimba ma taho. Sama b̄une Ama ma pata Nahu ro Nahu ma pata Ama, ndede rau Nahu kapata jimba-jimba-Ku ro jimba-jimba rau napataku Nahu. Nahu kad̄onggoku nawa-Ku d̄i ru'u b̄a jimba-jimba ede. 16 Wara walipu jimba-jimba ma kalai rau ntau Nahu, pala laina d̄i ade kanda ake; jimba-jimba ede pab̄uaku d̄ende rau b̄a Nahu, sara'a jimba-jimba ede d̄imaringa ro kade'e eli Nahu. Sara'a jimba-jimbay ede sab̄ua mpa ma'ompukaina.
17 Ama nameci ro ca'uku Nahu b̄ara Nahu mad̄onggo nawa-Ku d̄itarima mbalikaiku. 18 Wati kone sab̄ua dou rau maloana weha d̄i Nahu. Nahu mad̄onggo kai rakane'ekai b̄a ndai-Ku. Nahu kantau kuasa d̄imad̄onggona, ro kantau kuasa d̄imaweha mbali. Edeku taki ro puta ra tarima b̄a Nahu d̄i Ama-Ku.>>
19 B̄ara nggahi ndede Isa Al Masih, dou-dou Yahudi tampu'ura cence ncihina. 20 Mboto d̄i ade weki siad̄oho ma nggahi, <<Sia ralu'ukai b̄a setan! Sia naringu! D̄i'aukai ringa ro kade'ekaimu nggahi Sia?>>
21 Pala wara rau ma nggahi, <<Dou-dou ra lu'ukai b̄a setan wati nuntu ro nggahi ndedena! Sab̄ua naloa setan kandad̄i dou ma mbuda loa eda?>>
Dou Yahudi wati ngawana tarima Isa Al Masih
10:22-42
22 D̄i Yerusalem dou-dou wunga kandihana Ainaina Kasahakai Bait Allah. Wakatu ede oru b̄usi ai. 23 Isa Al Masih wunga lampana d̄i katere Sulaiman d̄i ade Bait Allah, 24 dou-dou Yahudi mai kab̄orona weki d̄i kompe Isa. Nggahi siad̄oho, <<Sampe b̄une aiku Nggomi co'omu nami mbali mbua ade? Tangoa ntiri to'ipu, nggara nggomi poda-podasi Sangaji Makasalama.>>
25 Cambe b̄a Isa Al Masih, <<Wa'ura nggahi b̄a Nahu d̄i nggomid̄oho, pala nggomid̄oho wati ne'emu imbi. Karawi ra kalampa b̄a Nahu kai ngara Ama-Ku, ma mbei bukuti mab̄oha Nahu. 26 Nggomid̄oho wati imbimu b̄ara nggomid̄oho laina jimba-jimba Nahu. 27 Jimba-jimba Nahu naringa ro kade'eku eli Nahu. Nahu kapata-Ku jimba-jimba ede, ro jimba-jimba ede nab̄atuku Nahu. 28 Nahu mambei jimba-jimba ede mori ma sapodakaina ro ma ede ro hid̄i, ro jimba-jimba ede wati d̄imaleli santoi-ntoina. Wati wara kone sab̄ua dou rau ma loana weha rampa d̄i rima Nahu. 29 Ama Nahu, ma wa'ura d̄onggo siad̄oho d̄i Nahu, mancewi na'ez ra d̄i samenana. Ro wati wara kone sab̄ua dou rau ma loana weha rampa siad̄oho d̄i ade rima Ama. 30 Nahu lab̄o Ama eded̄u sab̄ua.>>
31 Edempara dou-dou Yahudi weha walina wadu d̄itob̄akaina Isa. 32 Pala Isa nggahina d̄i siad̄oho, <<Nggomid̄oho wa'ura edamu Nahu makarawi mboto lampa rawi mataho, ra kaukai b̄a Ama d̄i Nahu. D̄i samenana ra karawi b̄a Nahu, lampa rawi ma b̄eku ma kandad̄ina nggomid̄oho ne'ekaimu tob̄a Nahu kai wadu?>>
33 Cambe b̄a dou-dou Yahudi ede, <<Laina b̄ara karawi-Mu ma taho ede, nami ne'ekaimu tob̄a Nggomi kai wadu, pala b̄ara Nggomi makab̄awa ro katunaku Allah Ta'ala. Nggomi sab̄ua dou manusia mpa, mawi'ikai wekimu sama lab̄o Allah Ta'ala.>>
34 Edempara cambe b̄a Isa, <<Wara ratunti ade Kitab Taurat ra nenti b̄a nggomid̄oho: Allah Ta'ala manggahi, <Nggomid̄oho eded̄u ruma?> 35 Ndai wa'ura b̄adeta b̄a one au ra tunti d̄i ade Kitab Suci ngge'e mpa santoi-ntoina. Ndad̄i, nggara Allah Ta'ala matangara kai <ruma> d̄i dou-dou ma tarima nggahi ro eli-Na, 36 b̄ab̄auku nggomid̄oho nggahimu d̄i Nahu ma katuna ro kab̄awa Allah Ta'ala, b̄ara Nahu manggahi, Nahu Ana Allah?5 Nahu poda ra kad̄ale b̄a Ama ro nggaduna d̄i dunia. 37 Nggara watisi karawi b̄a Nahu au ra kaukai b̄a Ama, aina imbimu d̄i Nahu. 38 Pala b̄ara Nahu makarawina, imbipu d̄i au ra karawi b̄a Nahu ede, konena nggomid̄oho wati ne'emu imbi d̄i Nahu. Kai ndedena nggomid̄oho mab̄adeku ro loa ka'ao b̄a one Ama ngge'e mpa sab̄uana lab̄o Nahu, ro Nahu ngge'e mpa sab̄ua lab̄o Ama.>>
39 Siad̄oho nane'e waliku wa'u ro leto Isa, pala Isa pesona weki.
40 Edempara Isa lao mbalina aka ipa b̄ae b̄a Sori Yordan, aka hid̄i la Yahya kandeu rasokaina dou, edempara Sia ngge'ena ta aka. 41 Mboto dou ma mai raka Sia ro nggahi siad̄oho, <<La Yahya poda wati karawina lampa rawi mab̄isa ro guna, pala sara'a au ra nggahina mab̄oha dou ake nancihi mena.>> 42 Ndad̄i mboto dou ta aka ma imbi d̄i Isa.