Isa Al Masih katahona dou mambuda
9:1-34
9
Isa Al Masih wunga ade lampa ro laokaina, Sia edana dou mambuda ra'aipu ranggana b̄a inana. 2 Anamori Isa sod̄ina d̄i Isa, <<Guru, cou ma rakarawi dosa, sab̄ua ndai dou ede atao dou matuana, ndad̄ina sia ede mbuda ra aipu ranggana b̄a inana?>>3 Cambe b̄a Isa Al Masih, <<Sia mbudana laina b̄ara dosa ndaina atao dosa dou matuana, pala b̄ara rawi Allah Ta'ala ma pab̄ua d̄ikatada d̄i ade weki dou ede. 4 Wakatu mbuipu taroa ai, ndai pab̄uaku kalampa au ra kane'ekai b̄a Sia ma ranggadu Nahu. Aimangad̄i d̄imawontu, ndad̄i wati wara kone sab̄ua dou rau ma loa karawi au-au. 5 Santoi Nahu mbuipu waraku d̄i dunia ake, Nahuku taroa dunia.>>
6 Sawa'u b̄a nggahi ndede Isa Al Masih, Sia katufena d̄i dana ro kacampona oi fela-Na ede lab̄o dana. Edempara kandaina d̄i mada dou ede, 7 ro nggahi Sia d̄i dou ede, <<Lao wacapu pahumu aka Kolam Siloam.>> (Siloam aona <^Dinggadu>.) Ndad̄i dou ede lao wacana pahuna. Wakatu dula mbalina, sia nawa'ura loa eda.
8 Dou-dou d̄i kompe ro peina ro dou-dou ma pata sia ma taki raho sadeka nggahi menana, <<Sia ake dou ma taki raho sadeka.>>
9 Wara ma nggahi, <<Ncihi, sia romo.>> Pala wara rau ma nggahi, <<Laina, pala sia sarai b̄une pahu dou ede.>>
Pala nggahi b̄a ndai dou ede, <<Ncihi romo, mada ake dou ma taki raho sadeka ede.>>
10 Nggahi siad̄oho d̄i dou ede, <<Rab̄unena nggomi loakaimu eda?>>
11 Cambe b̄a sia, <<Dou ma ngara la Isa ede kacampona dana sato'i lab̄o oi fela-Na, edempara kandaina d̄i isi madaku ro nggahi-Na, <Lao wacapu pahumu aka Kolam Siloam.> Edempara mada laoku. Ro sawa'u b̄a nggori wacaku pahu, mada loa laloku eda.>>
12 Edempara sod̄i b̄a siad̄oho, <<Ta b̄eku dou ede?>>
Cambe b̄a sia, <<Io mada wati b̄adeku.>>
Dou Farisi paliti rerona rab̄unena tahokai mada dou mambuda ede
9:12-34
13-14 Wakatu Isa Al Masih kacampona dana lab̄o oi fela-Na, edempara kandaina d̄i dou mambuda ede karawi b̄a Sia d̄i ainaina Sabat. Ndad̄i dou ma rambuda ede lao wa'a b̄a siad̄oho aka dou-dou Farisi. 15 B̄ara ndedena dou-dou Farisi sod̄ina d̄i sia rab̄unena sia loakaina eda. Cambe b̄a dou ede, <<Sia kandaina dana kared̄o d̄i isi madaku. Sawa'u b̄a ede mada lao wacaku pahu, ake mada kaloara eda.>>
16 Pila-pila dou ade weki dou Farisi ede manggahi, <<Dou ede laina ra maina ra d̄i Allah Ta'ala, b̄ara Sia wati kandad̄i auna ainaina Sabat.>>
Pala wara ma nggahi rau, <<^Buneku loana dou ma dosa karawi b̄isa ro guna b̄une ake?>> Edempara ndad̄ira cence ncihi d̄i ade weki siad̄oho.
17 Edempara sod̄i wali b̄a dou-dou Farisi d̄i dou ede, <<Au kananu b̄a nggomi mab̄oha Sia ma rakandad̄ina nggomi loa eda?>>
<<Sia eded̄u nabi,>> cambe b̄a dou ede.
18 Pala dou-dou Yahudi ede wati imbina b̄a one dou ede poda mbudana sawatipu b̄a ede ro ake nawa'ura loa eda. B̄ara ndedena siad̄oho kauna dou lao ou dou matuana, 19 ro sod̄ina, <<Sab̄ua poda ake anamu ra nggahimu ma mbuda ra'aipu ranggana wa'u? Nggara ndedesi b̄ab̄auku sia ake loakaina eda?>>
20 Ina ro ama ana dou ede cambena, <<Poda ake ana madad̄oho; ro podana sia mbudana ra'aipu ranggana wa'u. 21 Pala rab̄unena sia loakaina eda ake, madad̄oho wati b̄ademu. Ro cou ma rakandad̄ina sia loa eda, ede madad̄oho wati b̄ade raumu. Tasod̄i lalo mpa d̄i ndaina, sia nawa'ura na'e, sia naloa cambe b̄a ndaina.>> 22 Ina ro ama ana dou ede nggahi ndedekaina b̄ara siad̄oho nadahuku d̄i dou-dou mana'ekai Yahudi, b̄ara dou-dou mana'ekai Yahudi wa'ura mafakana b̄a one cou-cou ma mangaku Isa Al Masih eded̄u Sangaji Makasalama, wati loa walina lu'u d̄i ade uma sambea ro ibadakai. 23 B̄ara ndedena ina ro ama ana dou ede nggahina, <<Sia wa'ura na'e, tasod̄i lalo mpa d̄i ndaina.>>
24 Edempara siad̄oho ou walina dou ma rambuda ede, ro nggahina d̄i sia, <<Sumpapu b̄a one nggomi d̄imanggahi ma poda. Nami mab̄ade b̄a one dou ede dou madosa.>>
25 Cambe b̄a dou ede,<<Sab̄ua Sia nadosa atao wati, mada wati b̄adeku. Pala sab̄ua lampa rawi mada kab̄ade; ntoina mada mbudaku, ake mada kawa'ura loa eda.>>
26 Edempara siad̄oho sod̄i walina d̄i sia, <<Au ra karawi b̄a Sia ede d̄i nggomi? ^Buneku Sia kandad̄ina nggomi loa eda?>>
27 Cambe b̄a dou ede, <<Mada wa'ura ngoaku d̄i itad̄oho, pala itad̄oho wati ngawamu kade'e kab̄ae. ^Bab̄auku itad̄oho ne'ekaimu kade'e wali? Sab̄ua itad̄oho mane'e ndad̄i anamori Sia rau?>>
28 Edempara siad̄oho i'a ro b̄a'ana sia ro nggahina, <<Nggomiku anamori-Na, laina nami! Nami mab̄atuku la Musa. 29 Nami mab̄adeku b̄a one Allah Ta'ala wa'ura nuntu ro nggahina d̄i la Musa. Pala mab̄oha dou ede, nami wati b̄ademu, Sia ramaina ta b̄e?>>
30 Cambe b̄a dou ede, <<Wati lu'u b̄a aka nggara itad̄oho wati b̄adeta ra ta b̄e ramaikai-Na, pala Sia wa'ura kandad̄ina mada loa eda. 31 Ndai tawa'ura b̄ade b̄a one Allah Ta'ala wati ringa ro kade'ena nggahi ro eli dou madosa, malaisi dou ma lia ro horoma Allah Ta'ala, ro makalampa au ra kane'ekai-Na. 32 Ra'aipu tampu'u kandad̄i dunia saraka ake watipu wara ringata dou maloa kandad̄i dou ranggana mbuda loa eda. 33 Nggara podasi dou ede laina ramaina ra d̄i Allah Ta'ala, Sia wati loana karawi au-au.>>
34 Cambe b̄a siad̄oho, <<Au? Nggomi ma b̄ini b̄a dosa ra'aipu ranggana b̄a inamu, nggomi mane'eku ngoa ro tei nami?>> Ro tampu'u ede siad̄oho kantana dou ede lu'u d̄i uma sambea ro ibadakai.
Mbuda fiki ro kananu
9:35-41
35 Isa Al Masih ringana haba b̄a one siad̄oho wa'ura kantana dou ede lu'u d̄i uma sambea ro ibadakai. Isa lao ngupana dou ede edempara nggahina d̄i sia, <<Sab̄ua nggomi ma'imbiku d̄i Nahu, Ana Manusia?>>
36 Cambe b̄a dou ede, <<Cou Sia, Ruma? Tangoa to'ipu d̄i mada loakud̄u mada imbi d̄i Sia.>>
37 <<Nggomi wa'ura edamu Sia,>> cambe b̄a Isa Al Masih. <<Sia ma wunga nuntu lab̄o nggomi ake.>>
38 <<Mada ka'imbi, Ruma,>> nggahi dou ede, edempara sujuna d̄i tando Isa Al Masih.
39 Nggahi Isa Al Masih, <<Nahu maiku d̄i dunia ake d̄imaparesa ncihi ro ncara; loakud̄u dou mambuda naloa eda, ro dou ma loa eda d̄imandad̄i mbuda.>>
40 Pila-pila dou Farisi ma wara ta ede ma ringa nggahi ndede Isa Al Masih, edempara sod̄i b̄a siad̄oho d̄i Sia, <<Aona nggahi Nggomi ede, nami ake rau mbuda?>>
41 Cambe b̄a Isa Al Masih, <<Nggara nggomid̄oho mambudasi, nggomid̄oho wati dosamu. Pala b̄ara nggahi b̄a nggomid̄oho, <Nami maloa eda, ndad̄i dosamu ngge'e mpa warana d̄i nggomid̄oho.> >>