8
Pala Isa Al Masih laona aka Doro to'i Zaitun. 2 B̄ala aisanai sid̄i-sid̄i poda Sia lao walina aka Bait Allah, ro mboto dou mamai raka Sia. Isa dohona, edempara Sia tampu'ura ngoa ro teina siad̄oho. 3 Wakatu ede, ahli-ahli Taurat ro dou-dou Farisi mai wa'ana d̄i Sia sab̄ua dou siwe ra raka eda ma wunga karawi jina. Siad̄oho kauna dou siwe ede kid̄i d̄i woha siad̄oho, 4 edempara nggahina d̄i Isa, <<Guru, dou siwe ake raraka eda wunga karawina jina. 5 D̄i ade Hukum Taurat wara atoran b̄a one dou siwe b̄une ake pab̄uaku tob̄a kai wadu sampe madena. Ake auku d̄inggahi b̄a Ita?>> 6 Siad̄oho sod̄i ndedekaina loakud̄u wara alasan d̄ib̄ab̄ukaina Sia. Pala Isa na'oko mpa, ro tuntina d̄i dana kai kangge-Na. 7 Wakatu siad̄oho sod̄i ncau-ncauna d̄i Isa, Sia hantana tuta-Na ro nggahina d̄i siad̄oho, <<Dou ma wati wara dosa d̄i ade weki nggomid̄oho, co'opu sia d̄imatob̄a ulu kai wadu dou siwe ede.>> 8 Sawa'u b̄a ede, Isa oko mbalina ro tunti walina d̄i dana. 9 Sawa'u b̄a ringana nggahi ndede Isa, siad̄oho tu'u wi'ina hid̄i ede, sab̄ua-sab̄ua ratampu'u d̄i ma tuana. Cumpukaina Isa mpa ma wara ta ede lab̄o dou siwe ma mbuipu kid̄i d̄i hid̄ina. 10 Edempara Isa hantana tuta-Na ro sod̄ina dou siwe ede, <<Ta b̄eku siad̄oho sara'ana? Sab̄ua wati wara ma hukum nggomi?>>11 <<Io wati Ruma,>> cambena.
<<Taho,>> nggahi Isa Al Masih, <<Nahu rau wati d̄imahukum nggomi. Ake laora, ro aina karawi walimu dosa.>>]t
Isa Al Masih eded̄u taroa dunia
8:12-20
12 Isa Al Masih nuntu ro nggahi walina d̄i dou mamboto, nggahi-Na, <<Nahuku taroa dunia. Dou ma b̄atu Nahu wati d̄imalampa d̄i ade marindi, pala nantau taroa d̄i ade mori ro wokona.>>
13 <<Ake Nggomi manuntu ro nggahiku mab̄oha weki ndai-Mu,>> nggahi dou-dou Farisi ede d̄i Sia, <<Au ra nuntu ro nggahi-Mu ede wati podana.>>
14 Cambe b̄a Isa Al Masih, <<Nahu koneku nuntu ro nggahi mab̄oha weki ndai-Ku, au ra nuntu ro nggahi-Ku ede napoda; b̄ara Nahu kab̄ade ra ta b̄e maikai-Ku ro ta b̄e d̄ilaokai-Ku. Nggomid̄oho wati b̄ademu, Nahu ra maiku ta b̄e ro ta b̄eku d̄ilaokai Nahu. 15 Nggomid̄oho paresamu ncihi ro ncara dou kai cara manusiakai; Nahu wati b̄ab̄uku kai hukuman kone d̄i sab̄ua dou rau. 16 Pala nggara Nahu kaparesasi ncihi ro ncara dou, au ra paresa b̄a Nahu ede na'adil, b̄ara Nahu wati kese-Ku; Ama ma ranggadu Nahu wara sama-sama lab̄o Nahu. 17 D̄i ade Hukum Taurat wara ratunti ndake: Nuntu ro nggahi ma poda eded̄u nuntu ro nggahi ra karongga b̄a d̄ua dou. 18 Ma nuntu ro nggahi mab̄oha Nahu wara d̄uana – Nahu lab̄o Ama ma ranggadu Nahu.>>
19 <<Ta b̄eku Ama-Mu ede?>> Sod̄i b̄a siad̄oho.
Cambe b̄a Isa Al Masih, <<Nggomid̄oho wati patamu Nahu ro Ama-Ku, nggara nggomid̄oho mapatasi Nahu, tantu nggomid̄oho mapata rauku Ama Nahu.>>
20 Sara'ana ede ranggahi b̄a Isa Al Masih wakatu Sia wunga tei-Na d̄i Bait Allah d̄eni lab̄o peti piti hid̄i d̄onggo ro mbeikai. Pala wati wara kone sab̄ua dou rau ma wa'u ro leto Sia, b̄ara watipu raka wakatuna.
Isa Al Masih laina ramaina ra d̄i dunia ake
8:21-30
21 Isa Al Masih nggahi walina d̄i siad̄oho, <<Nahu d̄imalao, ro nggomid̄oho d̄imangupa Nahu, pala nggomid̄oho d̄imamade ade dosamu. Aka hid̄i laokai Nahu, nggomid̄oho wati loamu lao ta aka.>>
22 Ndad̄i nggahi dou-dou Yahudi, <<Kombisi Sia nane'eku hade weki ndai-Na, b̄ara nggahi Sia, <Aka hid̄i laokai Nahu, nggomid̄oho wati loamu lao ta aka.>>>
23 Edempara nggahi Isa Al Masih d̄i siad̄oho, <<Nggomid̄oho ramaimu ta awa; pala Nahu ramai ese mai-Ku. Nggomid̄oho ramaimu ra d̄i dunia ake; Nahu laina ra d̄i dunia ake. 24 B̄ara ndedena Nahu manggahi d̄i nggomid̄oho, poda romo nggomid̄oho d̄imamade d̄i ade dosa-dosamu. Ro podana nggomid̄oho d̄imamade d̄i ade dosa-dosamu, nggara watisi imbimu b̄a one <Nahu akeku Sia d̄ipehekai NAHU WARA>.>>u
25 <<Nggomi ake cou sapodakaina?>> Sod̄i b̄a siad̄oho.
Cambe b̄a Isa Al Masih, <<Watid̄u wara one walina Nahu nuntuku lab̄o nggomid̄oho!v 26 Mboto walipu lampa rawi mab̄oha nggomid̄oho d̄ikarongga b̄a Nahu ro d̄ikancara b̄a Nahu. Pala Sia ma ranggadu Nahu eded̄u poda. Ro au ra ringa b̄a Nahu d̄i Sia, edeku d̄ikarongga b̄a Nahu d̄i dunia.>>
27 Siad̄oho wati loana ka'ao b̄a one Sia wunga nuntu ro nggahina d̄i siad̄oho mab̄oha Ama-Na. 28 B̄ara ndedena nggahi Isa Al Masih d̄i siad̄oho, <<Peasi, nggara nggomid̄oho mawa'usira hantamu Ana Manusia d̄i haju salib, nggomid̄oho d̄imab̄ade b̄a one <Nahuku Sia d̄ipehekai NAHU WARA>, ro b̄a one Nahu wati karawiku au-au kai ra kane'ekai b̄a weki ndai-Ku, pala Nahu kanuntu ro nggahi mab̄oha lampa rawi b̄une ra ngoa ro tei b̄a Ama d̄i Nahu. 29 Ro Sia ma ranggadu Nahu ma lab̄o ncauna Nahu, Sia wati tu'u wi'ina Nahu b̄ara Nahu makarawi ncau au ma kasana wea ade-Na.>>
30 Sawa'u b̄a nggahi sara'a b̄a Isa Al Masih ede, mboto dou ma imbi d̄i Sia.
Allah Ta'ala ma hori kalosana nggomid̄oho
8:31-47
31 Edempara nggahi Isa Al Masih d̄i dou-dou Yahudi ma imbi d̄i Sia, <<Nggara nggomid̄oho ma nentisi au ra ngoa ro tei b̄a Nahu, nggomid̄oho poda-poda anamori Nahu, 32 ndad̄i nggomid̄oho d̄imapata Allah Ta'ala ma poda ro ma ncihi b̄ara ndedena nggomid̄oho d̄ihori kalosa-Na.>>
33 <<Nami ake londo ro mai la Ibrahim,>> nggahi siad̄oho, <<Nami watipu iumu ndad̄i ada cou-cou rau! Auku aona nggahi Nggomi, <Nggomid̄oho d̄ihori kalosa?>>>
34 Nggahi Isa Al Masih d̄i siad̄oho, <<Nahu manggahi d̄i nggomid̄oho, sanikina dou ma karawi dosa eded̄u ada dosa.>> 35 Ro ada dou wati d̄imangge'e impi d̄i ade uma rumana, pala ana d̄imangge'e impi d̄i umana. 36 B̄ara ndedena, nggara Ana nahori kalosasi nggomid̄oho, nggomid̄oho tantu poda-poda d̄imahori weki. 37 Nahu kab̄ade b̄a one nggomid̄oho ake londo ro mai la Ibrahim. Pala nggomid̄oho mane'eku hade Nahu, b̄ara nggomid̄oho wati ngawamu tarima au ra ngoa ro tei b̄a Nahu. 38 Au ra eda b̄a Nahu d̄i Ama-Ku, edeku d̄inuntu ro nggahi b̄a Nahu. Ndede rau nggomid̄oho makarawiku au ra ringamu d̄i ama ndaimu.>>
39 Cambe b̄a siad̄oho d̄i Isa Al Masih, <<Ama nami eded̄u la Ibrahim.>>
Nggahi b̄a Isa Al Masih,<<Nggara poda-podasi nggomid̄oho ana-ana la Ibrahim, tantu nggomid̄oho makalampakuw au ra karawi b̄a la Ibrahim.>> 40 Nahu karonggaku d̄i nggomid̄oho lampa rawi ma taho ra ringa b̄a Nahu d̄i Allah Ta'ala, pala nggomid̄oho mane'eku hade Nahu. La Ibrahim wati karawina b̄une ede! 41 Nggomid̄oho makarawiku au ra karawi b̄a ama ndaimu.>>
Cambe b̄a siad̄oho, <<Nami laina ana-ana haram. Ama nami sab̄ua mpa, eded̄u ndai Allah Ta'ala.>>
42 Edempara nggahi Isa Al Masih d̄i siad̄oho, <<Nggara Allah Ta'ala ede napodasi Amamu, tantu nggomid̄oho d̄imameci ro ca'u Nahu, b̄ara Nahu ramaiku ra d̄i Allah Ta'ala. Nahu maiku laina rakane'ekai b̄a ndai-Ku, pala rakane'ekai b̄a Sia ma ranggadu Nahu. 43 ^Bab̄auku nggomid̄oho wati loakaimu ka'ao nggahi Nahu? B̄ara nggomid̄oho wati ngawamu tarima au ra ngoa ro tei b̄a Nahu. 44 Iblis ma ndad̄i amamu, ro nggomid̄oho mangawa b̄atu au ra kane'ekai b̄a amamu ede. Ra'aipu ntoi wa'una Iblis ede ma hade dou. Sia watipu parana lu'una d̄imapoda ro ma ncihi, b̄ara d̄i sia wati wara ruku ro rawina ma taho. Sia nanuntu ro nggahi cowa b̄ara nuntu ro nggahina ede ra kane'ekai b̄a weki ndaina b̄ara sia ede naca'u cowa ro ama b̄a sara'a cowa. 45 Pala b̄ara Nahu manggahi mab̄oha lampa rawi ma poda ro ma ncihi d̄i nggomid̄oho, b̄ara ndedena nggomid̄oho wati imbimu d̄i Nahu. 46 Cou d̄i ade weki nggomid̄oho ma loa mbei bukuti b̄a one Nahu karawiku dosa? Nggara nggahisi b̄a Nahu lampa rawi ma poda ro ma ncihi, b̄ab̄auku nggomid̄oho wati imbikaimu d̄i Nahu? 47 Dou ma mai ra d̄i Allah Ta'ala, naringa ro kade'eku nggahi ro eli Allah Ta'ala. Pala nggomid̄oho laina ra d̄i Allah Ta'ala, b̄ara ndedena, nggomid̄oho wati ngawakaimu kade'e.>>
Isa Al Masih wa'ura wara sawatipu wara la Ibrahim
8:48-59
48 Cambe b̄a dou-dou Yahudi d̄i Isa Al Masih, <<Sab̄ua nancara nggahisi b̄a nami b̄a one Nggomi dou Samaria ralu'ukai b̄a setan?>>
49 Cambe b̄a Isa Al Masih, <<Nahu wati ralu'ukai b̄a setan. Nahu malia ro horoma Ama-Ku, pala nggomid̄oho makab̄awa ro katunaku Nahu. 50 Nahu wati ngupaku lia ro horoma d̄i ru'u b̄a weki ndai-Ku. Wara ma ngupa wea d̄i ru'u b̄a Nahu, ro Sia ma paresa ncihi ro ncara. 51 Nahu manggahi d̄i nggomid̄oho: Cou-cou ma b̄atu nggahi ro eli Nahu, sia ede wati d̄imamade santoi-ntoina.>>
52 Edempara nggahi dou-dou Yahudi ede d̄i Isa, <<Ake nami poda-poda mab̄adera b̄a one Nggomi wa'ura lu'ukai b̄a setan! Ndai la Ibrahim wa'ura made, ndede rau sara'a nabi. Pala nggahi b̄a Nggomi, <Dou ma b̄atu nggahi ro eli Nahu, santoi-ntoina wati d̄imamade.> 53 Nggara ndai la Ibrahim wa'ura made, ro nabi-nabi sara'ana wa'ura made rau, Nggomi ake couku? Sab̄ua na'epu Nggomi ntewikaisi lab̄o ama nami la Ibrahim?>>
54 Cambe b̄a Isa Al Masih, <<Nggara ngupasi b̄a Nahu d̄ese ro ntasa d̄i ru'u b̄a ndai Nahu, d̄ese ro ntasa ede wati wara onena. Allah Ta'ala Ama-Ku ma kad̄ese ro kantasa Nahu. Mab̄oha Sia nggomid̄oho manggahiku Sia eded̄u Allah Ta'ala b̄a nami. 55 Sapodakaina nggomid̄oho wati patamu Sia. Pala Nahu kapataku Sia. Nggara nggahisi b̄a Nahu b̄a one Nahu wati pataku Sia, ndad̄i Nahu dou ma cowa, sama b̄une nggomid̄oho. Nahu kapataku Sia, ro kato'a d̄i ngoa ro tei-Na. 56 Amamu la Ibrahim naneo poda adena b̄a one sia d̄ima'eda ainaina d̄ikad̄ese ro kantasakai Nahu. Sia wa'ura edana ro Sia neo poda adena!>>
57 Edempara nggahi dou-dou Yahudi d̄i Isa Al Masih, <<Umu Nggomi watipu wa'una 50 mba'a, ro Nggomi wa'ura eda-Mu la Ibrahim?>>x
58 Cambe b̄a Isa Al Masih, <<Poda Nahu manggahi d̄i nggomid̄oho: sawatipu wara la Ibrahim, Nahu wa'ura wara.>>
59 Edempara dou-dou Yahudi ede wehana wadu d̄itob̄akaina Sia; pala Isa Al Masih cilina weki, edempara tu'u wi'ina Bait Allah.