Isa Al Masih lab̄o arid̄oho-Na
7:1-9
7
Sawa'u b̄a ede Isa Al Masih lampa kalilina dana ro rasa Galilea, Sia wati ngawana ngge'e d̄i Yudea b̄ara ta aka dou-dou Yahudi nane'eku hade Sia.2 Wakatu ede d̄enira Aruraja Pondok Daun. 3 Ndad̄i nggahira arid̄oho-Na d̄i Isa Al Masih, <<Tu'u wi'ipu hid̄i ake ro laopu aka Yudea, loakud̄u anamori-Mu na'eda rauku au ra karawi b̄a Ita. 4 B̄a one wati wara dou macili au ra karawina, nggara nane'esi mbou ngarana. Nggara Ita makarawisi b̄une ede, katadapu wekita loakud̄u d̄ib̄ade b̄a dunia.>> 5 B̄a one arid̄oho-Na wati imbi rauna d̄i Sia.
6 Ndad̄i cambe b̄a Isa Al Masih d̄i siad̄oho, <<Watipu raka wakatuna d̄i ru'u b̄a Nahu, pala d̄i ru'u b̄a nggomid̄oho, nawara ncau wakatuna. 7 Dunia wati ntauna alasan d̄idaca'ukaina nggomid̄oho. Pala Nahu wati ca'u b̄a dunia, b̄ara Nahu maca'u nggahi d̄i dunia b̄a one ruku ro rawina madab̄ae. 8 Nggomid̄oho laopu aka hid̄i ndihakai ede. Nahu watipu ne'eku laop b̄a one watipu raka wakatuna d̄i ru'u b̄a Nahu.>> 9 Ndedeku nggahi b̄a Isa d̄i arid̄oho-Na, ro Sia ngge'e d̄i Galilea.
Isa Al Masih d̄i wakatu Aruraja Pondok Daun
7:10-24
10 Sawa'u b̄a lao arid̄oho-Na aka hid̄i ndihakai ede, pala kai wati b̄ade b̄a cou-cou rau Isa Al Masih lao rauna aka hid̄i ndihakai ede. 11 Santoi ndiha ede, dou-dou Yahudi ngupa rerona Sia ro sod̄ina, <<Ta b̄eku Sia?>>
12 Mboto dou manuntu nari mab̄oha Sia. Wara ma nggahi, <<Sia nawancuku tahona.>> Wara rau ma nggahi: <<Wati! Sia nakasantudaku ela ro dou.>> 13 Pala wati kone sab̄ua dou rau ma disa nggahi kana'e mab̄oha Sia b̄ara siad̄oho nadahuku d̄i dou-dou mana'ekai Yahudi.
14 Wakatu mbuipu acara ndiha ede, Isa Al Masih lu'una d̄i ade Bait Allah, edempara ngoa ro teina ta ede. 15 Dou-dou Yahudi mbora mena akana ro nggahina, <<^Buneku loana Dou ake mboto loa ro b̄adena, Sia watira sakolana?>>
16 Cambe b̄a Isa Al Masih d̄i siad̄oho, <<Ra ngoa ro tei b̄a Nahu ake laina ramaina ra d̄i weki ndai Nahu, pala ramaina ra d̄i Sia ma ranggadu Nahu. 17 Cou-cou ma ngawa kalampa au ra kane'ekai b̄a Allah Ta'ala, d̄imab̄ade sab̄ua ngoa ro tei b̄a Nahu ake ramaina ra d̄i Allah Ta'ala atao ramaina ra d̄i ndai Nahu. 18 Cou-cou ma ngoa ro tei kai loa ndaina, sia nangupaku d̄ilia ro horomakai d̄i ru'u b̄a weki ndaina. Pala dou ma ngupa lia ro horoma d̄i ru'u b̄a Sia ma ranggaduna, dou ede narombo, wati parana nuntu ro nggahi cowana. 19 Sab̄ua laina la Musa ma rambei Hukum Taurat d̄i nggomid̄oho? Pala wati wara kone sab̄ua dou rau d̄i ade weki nggomid̄oho ma kalampa Hukum Taurat ede. ^Bab̄auku nggomid̄oho ne'ekaimu hade Nahu?>>
20 Cambe b̄a dou mamboto ede, <<Nggomi ra lu'ukai b̄a roh setan; Cou ma ne'e hade Nggomi?>>
21 Cambe b̄a Isa Al Masih, <<Sab̄ua mpa b̄isa ro guna ra karawi b̄a Nahu d̄i ainaina sabat ro nggomid̄oho mbora mena akamu. 22 Ndad̄i la Musa mbeina atoran suna d̄i nggomid̄oho – sapodakaina suna ede laina ramaina ra d̄i la Musa, pala ramaina ra d̄i ama wa'i ro waro ndaita–pala nggomid̄oho ma sunaku dou d̄i ainaina Sabat. 23 Nggara dou nasunasi d̄i ainaina Sabat, loakud̄u aina sapana hukum la Musa, b̄ab̄auku nggomid̄oho mbanikaimu d̄i Nahu b̄ara kataho b̄a Nahu sara'a sarumbu sab̄ua dou ma supu d̄i ainaina Sabat? 24 Aina kancaramu dou b̄ara rawina ma tada, pala kancihi ro kancarapu dou kai adil.>>
Sab̄ua napoda Isa Al Masih eded̄u Sangaji Makasalama?
7:25-31
25 Wara pila-pila dou Yerusalem manggahi, <<Sab̄ua laina Sia akesi dou ra ngupa rero b̄a siad̄oho d̄ine'ena hade? 26 Tiopu Sia manuntu ro nggahi d̄i tando dou mamboto kai wati wara dou ma hakona, ro wati wara dou ma nggahi au-au d̄i Sia! Kombisi dou-dou mana'ekai ndaita nawa'ura b̄ade b̄a one Sia ake Sangaji Makasalama? 27 Pala mab̄oha Dou ake ndai tab̄adeku cou Sia ede, pala nggara namaisi Sangaji Makasalama wati wara kone sab̄ua dou rau mab̄adena Sia ramaina ta b̄e.>>
28 Wakatu Isa Al Masih wunga ngoa ro teina d̄i ade Bait Allah, nggahi Sia, <<Ncihi romo, nggomid̄oho mab̄adeku cou Nahu ake, ro ra ta b̄ena maikai-Ku? Nahu wati maiku kai rakane'ekai b̄a ndai-Ku. Pala Nahu ranggadu b̄a Sia ma wati ra pata b̄a nggomid̄oho. 29 Nahu kapataku Sia, b̄ara Nahu ramaiku ra d̄i Sia ro Sia edeku ma ranggadu Nahu.>>
30 D̄i wakatu ede siad̄oho nane'eku wa'u ro leto Isa Al Masih, pala wati wara kone sab̄ua dou rau ma disa tudu Sia, b̄a one watipu raka wakatuna. 31 Pala d̄i ade weki dou mamboto ede wara mboto dou ma imbi d̄i Sia, ro nggahi siad̄oho, <<Nggara namaisi Sangaji Makasalama, sab̄ua naloaku Sia karawi ma ncewi mboto lampa rawi mab̄isa ro guna ntewikaisi lab̄o Dou ake?>>
Dou-dou mana'ekai imam ro dou-dou Farisi nane'eku wa'u ro leto Isa Al Masih
7:32-36
32 Dou-dou Farisi naringaku mboto dou ma nuntu nari mab̄oha Isa Al Masih. B̄ara ndedena, dou-dou mana'ekai imam lab̄o dou-dou Farisi kauna pila-pila dou ma taki jaga Bait Allah wa'u ro leto Isa. 33 Ndad̄i nggahira Isa, <<D̄i samporo wali mpa Nahu wara sama-samaku lab̄o nggomid̄oho. Sawa'u b̄a ede Nahu d̄imalao dula mbali aka Sia ma ranggadu Nahu. 34 Nggomid̄oho d̄imangupa Nahu, pala wati rakamu eda Nahu; b̄ara nggomid̄oho wati loamu lao aka hid̄i ta b̄e ralaokai b̄a Nahu.>>
35 Dou-dou Yahudi ede nggahina d̄i sab̄ua lab̄o ma kalaina, <<Sia ake nane'e lao ta b̄e, ndad̄ina ndai wati d̄imaloa raka eda Sia? Sab̄ua Sia nane'e lao aka dou-dou Yahudi ma ngge'e d̄i woha dou-dou Yunani kai dou lai rasa, ro nangoa ro teiku dou Yunani? 36 Auku aona Sia nggahina b̄a one ndai d̄imangupa Sia pala wati d̄imaraka eda Sia ro b̄a one ndai wati loata lao aka hid̄i ta b̄e ralaokai Sia?>>
Isa Al Masih eded̄u Oi ma mbei mori
7:37-44
37 D̄i ainaina macumpukaina ade ndihakai ede, eded̄u ainaina ma ipi penti poda, Isa Al Masih tu'u kid̄ina edempara nggahi-Na, <<Cou-cou ma mango wo'o pab̄uaku mai nonona d̄i Nahu. 38 Cou-cou ma imbi d̄i Nahu, b̄une ra tunti d̄i ade Kitab Suci: <Ra d̄i tad̄ei adena d̄imawara oi ma rai ma mbei mori.> >>q 39 Isa nuntu ro nggahina mab̄oha Roh Allah d̄itarima b̄a dou-dou ma imbi d̄i Sia. B̄a one wakatu ede Roh Allah watipu maina; b̄ara Isa watipu rakad̄ese ro kantasa.
40 Pila-pila dou d̄i ade weki dou mamboto ede ma ringa ro kade'ena au ra nggahi b̄a Isa Al Masih, ro d̄i ade weki siad̄oho wara ma nggahi, <<Dou ake tantu Nabi d̄imamai ede!>>r
41 Ma kalaina manggahi, <<Akeku Sangaji Makasalama ede!>>
Pala wara rau dou ma nggahi, <<Ah, wati lu'u b̄a aka Sangaji Makasalama ramaina ra d̄i Galilea? 42 D̄i ade Kitab Suci wara ratunti b̄a one Sangaji Makasalama eded̄u londo ro mai la Daud ro ramaina ra d̄i Betlehem eded̄u kampo ro mporo la Daud.>> 43 Edempara dou-dou tampu'ura cence ncihina mab̄oha Isa. 44 Wara ma ne'e wa'u ro leto Sia, pala wati kone sab̄ua dou rau ma disa tudu Sia.
Dou-dou mana'ekai Yahudi wati imbina
7:45-52
45 Wakatu dou-dou ma taki jaga Bait Allah rakau lao wa'u ro leto Isa Al Masih mai mbalina, dou-dou mana'ekai imam ro dou-dou Farisi ede sod̄ina d̄i siad̄oho, <<^Bab̄auku nggomid̄oho wati wa'a ca'arakaimu Sia?>>
46 Cambe b̄a dou-dou ma taki jaga Bait Allah ede, <<Watipu parana warana dou manuntu ro nggahi b̄une Sia!>>
47 <<Sab̄ua nggomid̄oho wa'ura kasantuda rau b̄a Sia?>> Nggahi b̄a dou-dou Farisi ede. 48 <<Sab̄ua wara d̄i ade weki dou-dou mana'ekai ndai atao dou Farisi ma imbi d̄i Sia? 49 Pala dou mamboto ake, siad̄oho wati b̄adena Hukum Taurat, ro siad̄oho wa'ura b̄oha b̄a b̄a'a b̄a Allah Ta'ala.>>
50 Sab̄ua dou d̄i ade weki dou-dou Farisi ede eded̄u la Nikodemus ma wa'ura parana mai raka Isa Al Masih. Nggahi la Nikodemus d̄i dou-dou Farisi ma kalaina, 51 <<Nggahi b̄a Hukum Taurat, sab̄ua dou wati loa d̄ihukum sawatipu b̄a ringa wa'u parakarana ro paresa au ra karawina.>>
52 <<Sab̄ua nggomi rau dou Galilea?>> Sod̄i b̄a siad̄oho. <<Baca lalo mpa d̄i ade Kitab Suci! Nggomi d̄imab̄ade b̄a one wati wara nabi ra d̄is Galilea!>>
Sab̄ua dou siwe ra raka eda wunga jinana
7:53–8:11