Isa Al Masih mbeina ngaha 5.000 dou
6:1-15
6
Pila-pila wakatu sawa'u b̄a ede Isa Al Masih laona aka ipa b̄ae b̄a Ndano Galilea, d̄itangara rau kai Ndano Tiberias. 2 Sawa'u b̄a ronggana ta aka, mboto dou ma b̄atu Sia b̄ara siad̄oho wa'ura edana rawi Isa ma b̄isa ro guna kai katahona dou-dou ma supu. 3 Isa tekana doro to'i, edempara dohona ta ede lab̄o anamorid̄oho-Na. 4 Wakatu ede d̄enira Ainaina Aruraja Paskah dou Yahudi. 5 Wakatu Isa ntanda hekona ro edana dou ma ipi mboto ma b̄atu Sia. Edempara nggahi Sia d̄i la Filipus, <<Ta b̄eku hid̄ina d̄iloakai weli roti, loakud̄u sara'ana dou ake naloa ngaha?>> 6 Isa nggahi ndedekaina, d̄i'ujikaina la Filipus, b̄a one ndai Sia nawa'ura b̄ade auku d̄ikarawi b̄a Sia.7 Cambe b̄a la Filipus, <<Roti ma co'i 200 piti salakal ake wati d̄imancihi d̄i ru'u b̄a doud̄oho ake, kone sanikina dou naraka hangga satob̄e to'i.>>
8 Sab̄ua dou d̄i ade weki anamori Isa Al Masih ma kalaina, eded̄u la Andreas ari b̄a la Simon Petrus, nggahina, 9 <<Ta ake wara ana dou mone ma wa'a roti lima mbua lab̄o uta d̄ua tembe. Pala auku onena d̄i ru'u b̄a dou mamboto ake?>>
10 Edempara nggahi Isa Al Masih, <<Kaupu dou-dou ede doho!>> D̄i hid̄i ede wara mboto mpori, ndad̄i dou-dou ede doho menana d̄i mpori – sara'ana wara takasi 5.000 dou mone. 11 Sawa'u b̄a ede, Isa wehana roti ede, edempara rentana syuku d̄i Allah Ta'ala. Edempara Sia cengga-cenggana roti ede d̄i dou mamboto. Ndede rau Sia cengga-cenggana uta ede, ro siad̄oho ngaha ro nonona sampe mbocu menana. 12 Sawa'u b̄a siad̄oho mbocuna, nggahi Isa d̄i anamorid̄oho-Na, <<Kab̄oropu ngaha ro nono mancewi ede ai to'ina wara ra paki!>> 13 Edempara siad̄oho kab̄orona ngaha ro nono ma ncewi wara sampuru d̄ua wonca b̄ini ra d̄i lima mbua roti ra ngaha b̄a dou mamboto ede.
14 Wakatu eda b̄a dou mamboto rawi mab̄isa ro guna ra karawi b̄a Isa Al Masih, nggahi siad̄oho, <<Poda, akeku Nabim ra sake d̄imamai d̄i dunia!>> 15 Isa nab̄adeku, b̄a one siad̄oho ma mai raka Sia ro nane'eku wa'a pakasa Sia ro nane'eku hanta ndad̄i sangaji d̄i ru'u b̄a siad̄oho. B̄ara ndedena Sia lao pesona weki aka doro to'i.
Isa Al Masih lampana ese wawo oi
6:16-21
16 Wakatu nane'era rindi ai, anamori Isa Al Masih laona aka ndano na'e, edempara ne'ena ese sampa. 17 Siad̄oho nane'e lao aka ipa b̄ae b̄a ndano lao aka Kapernaum. Wakatu wa'ura rindi ai, Isa wati ngge'epu mai rakana siad̄oho. 18 D̄i wakatu ede, ndano natampu'ura na'e galo b̄ara kente angi. 19 Sawa'u b̄a loja takasi lima atao ini kilo d̄o'ona, siad̄oho edana Isa ma lampa ese wawo oi ma mai raka sampa siad̄oho. Ndad̄i siad̄oho dahuna. 20 Pala nggahi Isa d̄i siad̄oho, <<Aina dahu, Nahu ake!>> 21 Edempara kai sana adena siad̄oho weha aona Sia lu'u ade sampa, ro wakatu ede wa'u sampa siad̄oho rongga aka kengge ndano, aka hid̄i d̄ilaokai siad̄oho.
Dou mamboto ngupana Isa Al Masih
6:22-24
22 B̄ala aisanai dou mamboto ma mbuipu wara d̄i ipa b̄ae b̄a ndano ede, siad̄oho wati wara edana kone sab̄ua sampa rau ta ede, selasi sab̄ua sampa mpa. Sampa ede wa'ura wa'a b̄a anamorid̄oho-Na, pala ndai Isa Al Masih wati lao b̄atuna anamorid̄oho-Na. 23 Edempara pila-pila mbua sampa ma ramai ra d̄i kota Tiberias lab̄u d̄eni d̄i hid̄i dou mamboto mangaha roti sawa'u b̄a Isa rentana syuku. 24 Wakatu eda b̄a dou mamboto ede b̄a one Isa ro anamorid̄oho-Na watid̄u warana ta ede, ndad̄i siad̄oho rau nentena sampa-sampa ede ro lao ngupana Isa aka Kapernaum.
Isa Al Masih eded̄u roti ma mbei mori
6:25-59
25 Wakatu dou mamboto ede edana Isa Al Masih d̄i ipa b̄ae b̄a ndano ede, siad̄oho sod̄ina Sia, <<Guru, rab̄une aina Ita ronggata ara ake?>>
26 Cambe b̄a Isa Al Masih, <<Nahu manggahi d̄i nggomid̄oho, sapodakaina nggomid̄oho ngupamu Nahu laina b̄ara edamu tanda-tanda ma b̄isa ro guna ra karawi b̄a Nahu, malaisi b̄ara nggomid̄oho wa'ura ngahamu roti sampe mbocumu. 27 Aina karawi d̄irakakaimu ngaha ro nono ma loa mpoi ro mbai. Karawipu d̄irakakaimu ngaha ro nono ma wati loa mbai ro ma loa mbei mori ma sapodakaina ro ma ede ro hid̄i. Ngaha ro nono ede d̄imbei b̄a Ana Manusia d̄i nggomid̄oho, b̄ara Sia wa'ura hanta b̄a Allah Ta'ala, Ama-Na.>>
28 Edempara siad̄oho sod̄ina d̄i Sia, <<Auku ma pab̄ua d̄ikarawi b̄a madad̄oho loakud̄u madad̄oho kalampamu au ra kane'ekai b̄a Allah Ta'ala?>>
29 Cambe b̄a Isa Al Masih, <<Akeku d̄i ne'e b̄a Allah Ta'ala d̄i nggomid̄oho: imbipu d̄i Sia ra nggadu b̄a Allah Ta'ala.>>
30 Nggahi siad̄oho, <<Nggara ndedesi, auku tandana d̄ikarawi b̄a Ita loakud̄u d̄i'eda b̄a madad̄oho ro madad̄oho imbi d̄i Ita? Auku d̄ikarawi b̄a Ita? 31 Wa'i ro waro madad̄ohon ngahana manna d̄i so sarae, b̄une ra tunti ade Kitab Suci, <Sia mbeina ngaha d̄i siad̄oho roti ma ralondo ra d̄i saroga.> >>
32 Edempara nggahi Isa Al Masih d̄i siad̄oho, <<Imbipu: Laina la Musa ma rambei nggomid̄ohoo ngaha roti ra d̄i saroga malaisi Ama Nahu ma rambeina d̄i nggomid̄oho roti ma sapodakaina ra d̄i saroga. 33 B̄ara roti ra mbei b̄a Allah Ta'ala eded̄u Sia ma ralondo ra d̄i saroga ro mambei mori d̄i ru'u b̄a manusia d̄i dunia.>>
34 Edempara nggahi siad̄oho wali, <<Ruma, tambei ntuwupu d̄i madad̄oho roti ede.>>
35 <<Nahuku roti ma mbei mori,>> nggahi Isa d̄i siad̄oho. <<Dou ma mai d̄i Nahu wati d̄imahid̄o wali santoi-ntoina. Ro dou ma imbi d̄i Nahu wati d̄imamango wo'o wali santoi-ntoina.
36 Pala b̄une ra nggahi b̄a Nahu d̄i nggomid̄oho, nggomid̄oho konemu wa'ura eda Nahu, nggomid̄oho ngge'e mpa wati imbimu. 37 Samenana dou ra mbei b̄a Ama d̄i Nahu d̄imamai d̄i Nahu. Nahu wati tula aoku cou-cou rau ma mai d̄i Nahu. 38 B̄ara Nahu londoku ra d̄i saroga, laina d̄imakarawi b̄era ne'e ndai-Ku, malaisi ra kane'ekai b̄a Sia ma ranggadu Nahu. 39 Ro akeku ra kane'ekai b̄a Sia ma ranggadu Nahu: loakud̄u sara'a dou ra d̄onggo-Na d̄i Nahu, wati kone sab̄ua dou rau d̄imambora; pala loakud̄u Nahu makamori mbali siad̄oho d̄i Ainaina Kiama. 40 Poda romo akeku ra kane'ekai b̄a Ama Nahu: loakud̄u sara'a ma ra'eda Ana ro imbina d̄i Sia nantau mori ma sapodakaina ro ma ede ro hid̄i, ro Nahu d̄imakamori mbalina d̄i Ainaina Kiama.>>
41 Dou-dou Yahudi natampu'ura badared̄ena d̄i Isa Al Masih, b̄ara nggahi Sia: <<Nahuku roti ma ralondo ra d̄i saroga.>> 42 Nggahi siad̄oho, <<Sab̄ua laina Sia akesi la Isa, ana la Yusuf? Ndai tapataku ina ro ama-Na! ^Buneku loana nggahi b̄a one Sia ra londona ra d̄i saroga?>>
43 Edempara nggahi Isa Al Masih d̄i siad̄oho, <<Aina badared̄e. 44 Wati kone sab̄ua dou rau ma loa mai d̄i Nahu, nggara Ama ma ranggadu Nahu, watisi wa'ana sia d̄i Nahu; ro cou ma mai raka Nahu, d̄ikamori mbali b̄a Nahu d̄i Ainaina Kiama. 45 D̄i ade Kitab Nabi-nabi wara ratunti ndake: <Sara'a dou d̄ingoa ro tei b̄a Allah Ta'ala. Ndad̄i sanikina dou ma wa'ura ringa ro tarimana ngoa ro tei b̄a Ama, namai d̄i Nahu.> 46 Ede aona laina b̄ara wara dou ma wa'ura eda Ama. Selasi Sia ma ramai ra d̄i Allah Ta'ala mpa, ma wa'ura eda Ama.
47 Nahu manggahi d̄i nggomid̄oho, <<Cou-cou ma imbi d̄i Sia nantau mori ma sapodakaina ro ma ede ro hid̄i. 48 Nahu akeku roti ma mbei mori. 49 Wa'i ro waromu ngahana manna d̄i so sarae ro siad̄oho namade rau. 50 Pala wati ndedena lab̄o roti ma ralondo ra d̄i saroga; dou ma ngaha roti ede wati d̄imamade. 51 Nahuku roti ma ralondo ra d̄i saroga – roti ma mbei mori. Nggara dou nangahasi roti ake d̄imamori santoi-ntoina. Roti d̄imbei b̄a Nahu d̄i ru'u mori manusia d̄i dunia ake eded̄u hi'i ndai Nahu.>>
52 Ndede ringana nggahi ede, dou-dou Yahudi cence ncihina d̄i ade weki ndai siad̄oho, <<^Buneku loana dou ake mbei hi'i-Na d̄ingaha b̄a ndai?>>
53 Edempara nggahi Isa Al Masih d̄i siad̄oho, <<Nahu manggahi d̄i nggomid̄oho, nggara nggomid̄oho watisi ngahamu hi'i Nahu eded̄u Ana Manusia ro nonomu ra'a-Na, nggomid̄oho wati d̄imantau mori ma sapodakaina. 54 Dou ma ngaha hi'i Nahu ro ma nono ra'a Nahu nantau mori ma sapodakaina ro ma ede ro hid̄i ro Nahu d̄imakamori mbali siad̄oho d̄i Ainaina Kiama. 55 B̄ara hi'i Nahu poda-poda ngaha ro nono, ro ra'a Nahu poda-poda oi nono. 56 Dou ma ngaha hi'i Nahu ro manono ra'a Nahu, nangge'e mpa sab̄uana lab̄o Nahu, ro Nahu sab̄ua lab̄o sia. 57 Ama ma mori ede, ma ranggadu Nahu ro Nahu rau mori ra d̄i Ama. Ndede rau dou ma ngaha hi'i Nahu d̄imamori ra d̄i Nahu. 58 Akeku roti ma ralondo ra d̄i saroga: laina roti b̄une ra ngaha b̄a wa'i ro waromu. B̄ara sawa'u b̄a ngahana roti ede, siad̄oho namade rau. Pala dou ma ngaha roti ake d̄imamori santoi-ntoina.>>
59 Sara'ana ede nggahi b̄a Isa Al Masih wakatu Sia ngoa ro tei-Na d̄i uma sambea ro ibadakai d̄i Kapernaum.
Nggahi ro eli ma mbei mori ma sapodakaina ro ma ede ro hid̄i
6:60-71
60 Sawa'u b̄a ringana nggahi ro eli Isa Al Masih ede, mboto d̄i ade weki anamorid̄oho-Na ma nggahi, <<Tana'o ake na'ipiku tanina. Couku ma wa'una tarima!>>
61 Ndai Isa Al Masih nab̄adeku b̄a one anamorid̄oho-Na mabadared̄e mab̄oha lampa rawi ede. Ndad̄i nggahira Sia, <<Sab̄ua nggomid̄oho ma'iha ademu b̄ara nuntu ro nggahi ede? 62 ^Buneku ndad̄ina peasi nggara edasi b̄a nggomid̄oho Ana Manusia ne'e mbalina aka hid̄i ra maikai-Na? 63 Roh Allah ma rambei mori. Tenggo ro wale manusia wati wara onena. Nggahi ro eli ra karongga b̄a Nahu d̄i nggomid̄oho ake eded̄u nggahi ro eli Roh Allah ma mbei mori. 64 Pala wara rau d̄i ade weki nggomid̄oho ma wati imbi.>> Isa wa'ura b̄adena d̄i ai saramba wa'una cou-cou ma wati ne'e imbi, ro couku d̄imad̄onggo Sia d̄i dou-dou ma musu-Na. 65 Edempara Isa nggahi walina, <<B̄ara ndedena Nahu mangoana d̄i nggomid̄oho b̄a one wati kone sab̄ua dou rau maloa mai d̄i Nahu, nggara watisi rakane'ekai b̄a Ama.>>
66 Tampu'u wakatu ede mboto dou ma b̄atu Isa Al Masih matu'u wi'i Sia, ro wati ngawa walina b̄atu Sia. 67 Edempara sod̄i b̄a Isa d̄i sampuru d̄ua dou anamori-Na, <<Sab̄ua nggomid̄oho rau mane'e tu'u wi'i Nahu?>>
68 Nggahi la Simon Petrus d̄i Sia, <<Ruma, couku d̄ilao b̄atu b̄a madad̄oho? Nggahi ro eli Ita mpa ma mbei mori ma sapodakaina ro ma ede ro hid̄i. 69 Madad̄oho wa'ura imbi poda-podamu b̄a one Ita Ruma eded̄u Dou maraso ra nggadu b̄a Allah Ta'ala.>>
70 Cambe b̄a Isa Al Masih, <<Sab̄ua laina ndai Nahu ma rakad̄ale nggomid̄oho sampuru d̄ua dou ake? Pala sab̄ua dou d̄i ade weki nggomid̄oho eded̄u Iblis!>> 71 Ra nggahi b̄a Isa eded̄u la Yudas ana la Simon Iskariot. B̄a one siaku ma d̄onggo Isa d̄i dou-dou ma musu-Na. Sapodakaina la Yudas ede eded̄u sab̄ua dou d̄i ade weki sampuru d̄ua dou anamori Isa ede.