Kataho supu d̄i kolam Betesda
5:1-18
5
Sawa'u b̄a ede wara aruraja dou Yahudi, ndad̄i Isa Al Masih laona aka Yerusalem. 2 D̄i Yerusalem d̄eni lab̄o <<Tad̄a Jimba>> wara sab̄ua kolam,j ade bahasa Ibrani tangarakai Betesda.k D̄i kolam ede wara lima mbua katerena. 3 D̄i saniki katere ede wara mboto dou masupu ma maru ndore; wara ma mbuda, wara ma mpako ro mpedu, wara ma made b̄inci. Siad̄oho sara'ana nangenaku kanggab̄o oi d̄i kolam ede. 4 B̄a one wara sakali-sakali mala'eka Ruma ma londo d̄i kolam ede ro kab̄ona oi. Ro dou masupu ma sarambakai lu'u d̄i ade kolam ede wakatu kanggab̄o oi d̄imataho sara'a au ra supuna. 5 D̄i hid̄i ede wara sab̄ua dou mone ma supu tolu mpuru waru mba'ara ntoina. 6 Isa edana sia ma wunga maru ndore ta aka, ro nab̄adeku b̄a one sia wa'ura ntoi poda supuna; ndad̄i sod̄i b̄a Isa d̄i sia, <<Sab̄ua ita mane'e taho?>>7 Cambe b̄a dou masupu ede, <<Wati wara dou ma ngawa kalu'u mada ade kolam ede ruma, nggara nakanggab̄osi oi. Ro mada wunga laoku aka kolam, dou makalai wa'ura ulu lu'u.>>
8 Edempara nggahi Isa Al Masih d̄i sia, <<Tu'ura, hantapu dipimu ro lampara.>> 9 Wakatu ede wa'u dou ede tahona. Sia hantana dipina ro lampana.
Lampa rawi ede ndad̄ina d̄i ainaina Sabat. 10 B̄ara ndedena nggahi dou-dou Yahudi d̄i dou ma b̄oupura taho supu ede, <<Ainaina ake ainaina Sabat. Nggomi aina hanta dipimu.>>
11 Pala cambe b̄a dou ede, <<Dou ma rakataho mada akande edeku ma rakau mada hanta dipi ro kauna lampa.>>
12 Sod̄i b̄a siad̄oho,<<Cousi dou ma rakau nggomi hanta dipi ro lampa?>>
13 Pala dou ma wa'ura taho ede wati b̄adena, cou dou ede, b̄a one Isa wa'ura mbora d̄i woha dou mamboto ede.
14 Edempara Isa Al Masih edana dou ede ade Bait Allah, ro nggahina d̄i sia, <<Ake ita wa'ura taho. Aina karawimu dosa wali, loakud̄u aina iumu lampa rawi ma ipi iha wali.>>
15 Ndad̄i dou ede laona edempara ngoana d̄i dou-dou Yahudi b̄a one Isa ma rakataho wea supuna. 16 Ro b̄ara ndedena siad̄oho nane'eku kancoki Isa, b̄ara Sia katahona dou masupu d̄i ainaina Sabat.
17 Pala nggahi Isa Al Masih d̄i siad̄oho, <<Ama Nahu nakarawi ncau sampe sa'ake, ndad̄i Nahu makarawi rau.>>
18 Nggahi ro eli ede nakamaiku dou-dou Yahudi nanaha ne'e hade Sia. Siad̄oho karawina ede, laina b̄ara Sia sapana atoran agama mpoa mab̄oha ainaina Sabat, pala b̄ara nggahi Sia b̄a one Allah Ta'ala ede Ama ndai Sia; aona Sia nakasamaku weki ndai-Na lab̄o Allah Ta'ala.
Isa Al Masih nuntu ro nggahina mab̄oha weki ndai-Na
5:19-47
19 Edempara Isa Al Masih cambena nggahi doud̄oho ede, <<Imbipu, Ana wati loana karawi au-au kai kuasa ndai-Na. Sia nakalampaku au ra eda-Na ra karawi b̄a Ama-Na. B̄a one au ra karawi b̄a Ama, ede rauku d̄ikarawi b̄a Ana. 20 B̄a one Ama nameci ro ca'uku Ana ro katadana d̄i Ana-Na ede sara'a au ra karawi b̄a ndai-Na. Ama katada rauna d̄i Ana rawi ma ipi na'e wali, ndad̄ina nggomid̄oho mbora mena akamu. 21 B̄a one sama b̄une Ama makamori mbali dou ma made, ro mbeina d̄i siad̄oho mori ma sapodakaina ro ma ede ro hid̄i; ndede rauku Ana mambei mori ma ede ro hid̄i d̄i dou ra kane'ekai b̄a Sia. 22 Ndai Ama wati kancarana cou-cou rau, malaisi wa'ura d̄onggo sara'ana kuasa d̄i Ana d̄imaparesana ncihi ro ncara ede. 23 Ama karawikaina ede loakud̄u samenana dou lia ro horomana Ana b̄une siad̄oho malia ro horoma Ama. Dou ma wati lia ro horoma Ana wati lia ro horoma rauna Ama ma ranggaduna Ana.
24 Ncihi poda nggahi Nahu ake: Dou ma kade'e kab̄ae nggahi ro eli Nahu, ro na'imbiku d̄i Sia ma ranggadu Nahu, nantau mori masapodakaina ro ma ede ro hid̄i. Sia wati d̄ihukum; sia wa'ura hori weki ra d̄i ade madekaina ro narakaku mori ro woko. 25 Imbipu: D̄imaraka wakatuna – ro wa'ura raka wakatuna – dou ma made d̄imaringa eli Ana Allah.4 Ro dou ma ringa Sia d̄imamori. 26 B̄a one sama b̄une ndai Ama mantau fu'u mori, ndede rauku ra mbeina d̄i Ana-Na nantau fu'u mori. 27 Sia wa'ura mbeina kuasa d̄i Ana-Na d̄imaparesa ncihi ro ncara, b̄ara Sia Ana Manusia. 28 Aina mbora akamu nggomid̄oho b̄ara ringamu lampa rawi ede, b̄a one d̄imaraka wakatuna sara'a dou ma wa'ura made naringaku eli-Na, 29 edempara losana d̄i ade rade. Dou ma wa'ura karawi mataho d̄imamori mbali d̄irakakaina mori ma ede ro hid̄i. Pala dou ma wa'ura karawi madab̄ae d̄imamori mbali ro d̄ihukum.>>
30 <<Nahu wati loaku karawi au-au kai ra kane'ekai b̄a ndai-Ku. Nahu paresaku ncihi ro ncara ncihi ncao b̄une au ra ringa b̄a Nahu ro au ra b̄ab̄ukai b̄a Nahu ede adil, b̄ara Nahu wati b̄atu-Ku au ra kane'ekai b̄a ndai Nahu, malaisi ra kane'ekai b̄a Ama ma ranggadu Nahu.
31 Nggara Nahu kanuntu ro nggahisi mab̄oha weki ndai-Ku, ndad̄i nuntu ro nggahi Nahu ede wati loa d̄i'imbi. 32 Pala wara Makalai ma mbei sakasi mab̄oha Nahu ro Nahu kab̄ade b̄a one au ra nuntu ro nggahi-Na ede napoda. 33 Nggomid̄oho wa'ura kaumu dou lao aka la Yahya, ro sia wa'ura nuntu ro nggahina ma poda ro ma ncihi mab̄oha Nahu. 34 Pala Nahu wati tarimaku nuntu ro nggahi ra karongga b̄a manusia, pala Nahu karonggaku lampa rawi ake loakud̄u nggomid̄oho d̄ikasalama. 35 La Yahya b̄une santika ilo ma kalea ro makataroana. Ro nggomid̄oho neo ademu tarima taroana ma samporo ede. 36 Pala nuntu ro nggahi Nahu nancewi na'e ntewikaisi au ra nuntu ro nggahi b̄a la Yahya. Au ra karawi b̄a Nahu ake, eded̄u karawi rad̄onggo b̄a Ama d̄i Nahu, d̄i bukutikai b̄a one Ama ma wa'ura nggadu Nahu. 37 Ama ma ranggadu Nahu, Sia edeku ma mbei sakasi rau mab̄oha Nahu. Nggomid̄oho watipu ringamu eli-Na atao edamu pahu-Na. 38 Nggahi ro eli-Na wati ngge'e impina d̄ei ademu b̄ara nggomid̄oho wati imbimu d̄i Nahu ra nggadu b̄a Ama. 39 Nggomid̄oho tana'o kapodamu Kitab Suci b̄a kacai b̄a nggomid̄oho b̄ara kai karawimu b̄une ede nggomid̄oho mantau mori ma sapodakaina ro ma ede ro hid̄i. Ro kone Kitab Suci wara ratunti mab̄oha Nahu, 40 pala nggomid̄oho wati ngawamu mai d̄i Nahu d̄irakakaimu mori ma ede ro hid̄i ede.
41 Nahu wati ngupaku d̄iroi b̄a manusia. 42 Pala mab̄oha nggomid̄oho, Nahu kapataku b̄a one d̄ei ademu wati meci ro ca'umu Allah Ta'ala. 43 Nahu maiku kai kuasa Ama-Ku, pala nggomid̄oho wati tarima aomu Nahu. Pala nggara maisi dou ma kalai kai wa'ana ngara ndaina, nggomid̄oho matarimaku sia. 44 ^Buneku loa imbi b̄a nggomid̄oho, nggara nggomid̄oho mangupasi d̄iroi b̄a dou ro wati ngupamu roi ma ramai ra d̄i Allah Ta'ala Ma Kese Weki? 45 Aina kacaimu Nahu d̄imada'awa nggomid̄oho d̄i tando Ama. D̄imada'awa nggomid̄oho eded̄u la Musa, b̄a one sia edeku ra kane'ekai b̄a nggomid̄oho. 46 Nggara nggomid̄oho ma'imbisi d̄i la Musa, tantu nggomid̄oho d̄ima'imbi rau d̄i Nahu, b̄ara sia wa'ura tuntina mab̄oha Nahu. 47 Pala nggara nggomi watisi imbimu d̄i au ra tunti b̄a la Musa, b̄uneku loamu imbi mab̄oha au ra nggahi b̄a Nahu?>>