Isa Al Masih lab̄o dou siwe Samaria
4:1-42
4
Dou-dou Farisi ringana haba b̄a one Isa Al Masih wa'ura rakana mboto dou ma b̄atu Sia ro kandeu rasona dou mancewi mboto ntewikaisi lab̄o la Yahya. 2 Sapodakaina ndai Isa wati kandeu rasona dou malaisi anamorid̄oho-Na mpa. 3 Wakatu b̄ade b̄a Isa b̄a one dou-dou Farisi wa'ura ringana haba ede, Sia tu'u wi'ina Yudea ro lao mbalina aka Galilea. 4 D̄i ade lampa ro laokaina ede, Sia pab̄uaku lampa saina dana ro rasa Samaria. 5 Ndad̄i ronggara Isa d̄i sab̄ua kota d̄i Samaria ma ngara Sikhar, d̄eni lab̄o dana ra mbei b̄a la Yakub ntoina d̄i ru'u b̄a anana la Yusuf. 6 Ta ede wara sab̄ua temba ntau la Yakub. Isa na'ipiku hompa b̄ara lampana, b̄ara ndedena Sia dohona d̄i kengge temba ede. Wakatu ede takasi b̄oe sampuru d̄ua aimarai. 7 Ndad̄i maira sab̄ua dou siwe Samaria ma ne'e b̄oru oi. Nggahi Isa d̄i dou siwe ede, <<Amancawa, loa Nahu raho oi nono?>> 8 Wakatu ede anamori Isa wati warana ta ede, siad̄oho wa'ura lao weli ngaha ro nono aka kota.9 Cambe b̄a dou siwe Samaria ede, <<Ita dou Yahudi, mada dou Samaria. ^Bab̄auku Ita rahokaimu oi nono d̄i mada?>> B̄ara dou Yahudi wati wara hubungana lab̄o dou Samaria.h
10 Cambe b̄a Isa Al Masih, <<Nggara b̄adesi b̄a nggomi au ra mbei b̄a Allah Ta'ala ro cou maraho nono d̄i nggomi, tantu ndai nggomi d̄imaraho nono d̄i Sia, ro Sia d̄imambei d̄i nggomi oi ma mori.>>
11 Nggahi dou siwe ede, <<Ita wati ntauta b̄oru, temba ake na'ipiku d̄eina. Ta b̄eku rakakai b̄a Ita oi ma mbei mori? 12 La Yakub, ama wa'i ro waro b̄a madad̄oho ma mbeina madad̄ohoi temba ake. Ndai sia rau naweha oi d̄i nonona ta ake; ndede rauku anad̄ohona ro binata ntadina. Sab̄ua kacai b̄a Ita, Ita mancewi na'e ntewikaisi lab̄o la Yakub?>>
13 Cambe b̄a Isa Al Masih,<<Dou ma nono oi ake d̄imamango wo'o wali, 14 pala cou-cou ma nono oi ra mbei b̄a Nahu, dou ede wati d̄imamango wo'o wali santoi-ntoina. B̄a one oi d̄imbei b̄a Nahu ede d̄imandad̄i mada oi d̄i ade sarumbuna ma sambura losa ro mambei sia mori masapodakaina ro ma ede ro hid̄i.>>
15 Nggahi dou siwe ede, <<Tambei to'ipu mada oi ede, loakud̄u mada wati d̄imamango wo'o wali; ro wati paralu walina mada mai wehaku oi ta ake.>>
16 Nggahi Isa Al Masih d̄i dou siwe ede, <<Laora, oupu rahimu, ro mai mbalipu ta ake!>>
17 Nggahi b̄a dou siwe ede, <<Mada wati ntauku rahi.>>
<<Ncihi romo nggahimu ede,>> nggahi Isa Al Masih. 18 <<B̄ara nggomi wa'ura nikamu lima kali, ro dou mone ma mori sama lab̄omu ake laina rahimu.>>
19 <<Ake mada wa'ura b̄adeku b̄a one Ita eded̄u nabi,>> nggahi dou siwe ede. 20 Wa'i ro waro madad̄oho nanembaku Allah Ta'ala d̄i doro to'i ake, pala nggahi b̄a dou-dou bangsa Ita b̄a one d̄i Yerusalem mpa hid̄i nembakai Allah Ta'ala.>>
21 Nggahi Isa Al Masih,<<Imbipu, d̄imaraka wakatuna dou d̄imanemba Ama ma wara aka saroga, lai walina d̄i doro to'i ake, ro lai rauna d̄i Yerusalem.>> 22 Nggomid̄oho dou Samaria manembaku ma wati ra pata b̄a nggomid̄oho, pala nami dou Yahudi manembaku Sia ra pata b̄a nami, b̄ara salamakai ra sake b̄a Allah Ta'ala ramaina ra d̄i bangsa Yahudi. 23 Pala d̄imaraka wakatuna, ro ake wa'ura raka wakatuna b̄a one dou-dou ma nemba Ama ade Roh ma poda ro ma ncihi b̄une ra kane'ekai b̄a Ama. 24 B̄a one Allah Ta'ala ede eded̄u Roh, ro cou-cou ma nemba Sia pab̄uaku nembana ade Roh ma poda ro ma ncihi.>>
25 Nggahi dou siwe ede d̄i Isa Al Masih, <<Mada kab̄ade Sangaji Makasalama d̄ipehekai Al Masih d̄imamai. Nggara namaisi Sangaji Makasalama ede, Sia nangoa sara'aku au-au d̄i ndaita.>>
26 <<Nahuku Sia,>> nggahi Isa Al Masih, <<Nahu ma wunga nuntu ro nggahi lab̄o nggomi ake.>>
27 Wakatu ede, Anamori Isa Al Masih mai mbalina d̄i hid̄i ede. Siad̄oho nawancuku mbora akana, edana Isa ma wunga nuntu lab̄o dou siwe. Pala wati kone sab̄ua dou rau d̄i ade weki siad̄oho ma sod̄i d̄i dou siwe ede, <<Amancawa au paraluta?>> Atao ma sod̄i d̄i Isa, <<^Bab̄au Ita nuntu ro nggahita lab̄o dou siwe ede?>>
28 Edempara dou siwe ede tu'u wi'ina roana ta ede ro laona aka kota ro ngoana d̄i dou-dou ta aka, 29 <<Mai menapu! Ta aka wara sab̄ua Dou ma rangoa nahu sara'a au ra parana karawi b̄a nahu. Kombisi Sia ede Sangaji Makasalama?>> 30 Ndad̄i dou-dou ede tu'u wi'ina kota, edempara lao rakana Isa.
31 Wakatu ede anamori Isa Al Masih recena ngaha Isa. <<Guru,>> nggahi siad̄oho, <<Santab̄eta takatenggora weki.>>
32 Pala cambe b̄a Isa Al Masih, <<Wara ngaha ro nono d̄i Nahu, ngaha ro nono ede wati b̄ade b̄a nggomid̄oho.>>
33 Ndad̄i anamorid̄oho-Na tampu'ura nggahi d̄i sab̄ua lab̄o ma kalaina, <<Sab̄ua wara dou ma mai wa'a wea ngaha ro nono d̄i ru'u b̄a Sia?>>
34 Edempara nggahi Isa Al Masih, <<Ngaha ro nono d̄i ru'u b̄a Nahu eded̄u kalampa au ra kane'ekai b̄a Sia ma ranggadu Nahu, ro ma kanggorina karawi ra d̄onggo-Na d̄i Nahu. 35 Nggomid̄oho nggahimu, <D̄i upa wura walipu oru d̄iwehakai hasi.> Pala Nahu manggahi d̄i nggomid̄oho: Tio kab̄aepu oma-oma ma wa'ura monca ro tua, ro rakara wakatuna d̄iwehakai hasina! 36 Dou ma karawina wa'ura tampu'u tarima ufana ro kab̄orona hasi d̄i ru'u mori ma sapodakaina ro ma ede ro hid̄i. Ndad̄i dou ma pari d̄ei ro dou ma weha hasina sama-sama kad̄ihi mena adena. 37 Ncihi b̄une eli peribahasa ake, <Dou ma sab̄ua manggud̄a, ma kalaina ma weha hasina.> 38 Nahu makau nggomid̄oho lao weha hasi aka oma ma watira karawikai b̄a nggomid̄oho; dou-dou makalai wa'ura karawina ta aka ro nggomid̄ohoku ma weha hasina.>>
39 Mboto dou Samaria d̄i kota ede ma imbi d̄i Isa Al Masih, b̄ara ngoa b̄a dou siwe ede b̄une ake, <<Sia ngoana d̄i mada sara'a au ra parana karawi b̄a mada.>> 40 Ndad̄i wakatu dou-dou Samaria edana Isa, siad̄oho raho nembana d̄i Isa loakud̄u ngge'ena lab̄o siad̄oho. Ndad̄i Isa ngge'ena ta ede d̄ua nai ntoina.
41 Ndad̄i nanaha mboto wali dou ma imbi d̄i Isa Al Masih b̄ara au ra ngoa ro tei b̄a Sia d̄i siad̄oho. 42 Siad̄oho nggahina d̄i dou siwe ede, <<Nami ma'imbira ake, laina b̄ara ngoa b̄a nggomi d̄i nami, pala b̄ara ndai nami wa'ura ringamu d̄i Sia ro b̄ademu b̄a one poda Sia Makasalamana dunia.>>
Isa Al Masih katahona supu ana pagawe asi
4:43-54
43 Sawa'u b̄a d̄ua nai ngge'ena d̄i Sikhar, Isa Al Masih laona aka Galilea. 44 Ndai Isa nawa'ura nggahi ndake, <<Sab̄ua dou nabi wati d̄ikaco'i d̄i dana ro rasa ndaina.>> 45 Ndad̄i wakatu Sia ronggana d̄i Galilea, dou-dou ta aka weha aona Sia kai sana ade, b̄ara siad̄oho wara d̄i Yerusalem wakatu Ainaina Aruraja Paskah, ro wa'ura eda sara'ana au ra karawi b̄a Isa Al Masih.
46 Edempara Isa Al Masih dula mbalina aka Kana d̄i Galilea, ta aka Sia parana rungkana oi ndad̄i oi anggo. D̄i kota ede wara sab̄ua dou pagawe asi, anana wunga supuna d̄i Kapernaum. 47 Wakatu ringa b̄a sia b̄a one Isa wa'ura mai d̄i Galilea ra tu'una d̄i Yudea, sia lao rakana Isa ro rahona d̄i Isa loakud̄u Isa lao aka Kapernaum d̄imakataho wea supu anana ma ne'era made. 48 Nggahi Isa d̄i pagawe asi ede, <<Nggara watisi eda b̄a nggomid̄oho rawi mab̄isa ro guna, nggomid̄oho wati imbimu.>>
49 Nggahi b̄a pagawe asi ede, <<Tamai roci to'ipu sawatipu made ana mada.>>
50 Nggahi Isa Al Masih d̄i sia, <<Laora, anamu wa'ura taho.>>
Dou ede na'imbiku au ra nggahi b̄a Isa Al Masih, edempara sia laona. 51 D̄i woha ncai, adad̄ohona mai rakana sia ro ngoana, <<Ana Ita wa'ura taho.>>
52 Edempara sod̄ina d̄i siad̄oho b̄oe pila ana nahu ede tampu'u tahona. Cambe b̄a siad̄oho, <<Awina takasi jam satu aimarai mbora supuna.>> 53 Edempara ama b̄a ana dou ede kawarana b̄a one wakatu ede Isa Al Masih manggahi d̄i sia, <<Anamu wa'ura taho.>> Ndad̄i sia ro samenana iwa ro wekina imbi d̄i Isa.
54 Edeku rawi mab̄isa ro guna makad̄uakalikaina ra karawi b̄a Isa Al Masih d̄i Galilea.