Isa Al Masih lab̄o la Nikodemus
3:1-21
3
Wara sab̄ua dou Farisi mana'ekai agama Yahudi, ngarana la Nikodemus. 2 D̄i sab̄ua aimangad̄i, sia mai rakana Isa Al Masih ro nggahina, <<Guru, madad̄oho ma b̄ade b̄a one Ita ranggadu b̄a Allah Ta'ala. B̄a one wati wara kone sab̄ua dou rau ma loa karawi ma b̄isa ro guna b̄une ra karawi b̄a Ita, nggara watisi rad̄ende ro wa'a b̄a Allah Ta'ala.>>3 Cambe b̄a Isa Al Masih, <<Imbipu, wati kone sab̄ua dou rau ma loa ndad̄i anggota Karaja'an Allah, nggara sia watisi ranggana mbali.>>e
4 <<^Buneku loana dou ma wa'ura na'e d̄inggana mbali?>> Sod̄i b̄a la Nikodemus d̄i Isa. <<Sab̄ua sia naloa lu'u mbali ade loko inana, sawa'u b̄a ede d̄inggana mbali?>>
5 Cambe b̄a Isa Al Masih, <<Nahu mangoa nggomi, <Nggara dou watisi ranggana kai oi ro kai Roh Allah, dou ede wati loana ndad̄i anggota Karaja'an Allah. 6 Manusia sacara sarumbu kasana ranggana b̄a dou matuana, pala sacara rohani ranggana b̄a Roh Allah. 7 Aina mbora akamu nggara nggahisi b̄a Nahu: Nggomid̄oho sara'ana pab̄uaku d̄inggana mbali.f 8 Angi nalao ta b̄e rane'ekaina, ndai taringaku elina, pala wati b̄adeta ra ta b̄e maikaina ro ta b̄eku laokaina. Ndede rauku sanikina dou ranggana b̄a Roh Allah.>>
9 <<^Buneku loana ndad̄i lampa rawi ede?>> Sod̄i b̄a la Nikodemus.
10 Cambe b̄a Isa Al Masih, <<Nggomi guru d̄i Israel, sab̄ua poda nggomi wati b̄ademu? 11 Nahu manggahi d̄i nggomi, <Nami ma nuntu ro nggahi mpa mab̄oha au ra b̄ade b̄a nami, ro nami ma ngoa ro kahaba rero au ra wa'u eda b̄a nami mpa, pala nggomid̄oho wati ngawamu tarima au ra ngoa b̄a nami. 12 Nggomid̄oho wati imbimu nggara nuntusi b̄a Nahu mab̄oha lampa rawi d̄i dunia ake, b̄uneku loamu imbi b̄a nggomid̄oho, nggara ngoasi b̄a Nahu d̄i nggomid̄oho mab̄oha saroga? 13 Wati kone sab̄ua dou rau ma parana ne'e ese saroga, selasi Sia ma londo d̄i dunia, eded̄u Nahu, Ana Manusia.
14 Sama b̄une la Musa makane'e sawa romba kai satako haju d̄i so sarae, ndede rauku Ana Manusia pab̄uaku d̄ihanta, 15 loakud̄u sanikina dou ma imbi d̄i Sia naraka mori ma sapodakaina ro ma ede ro hid̄i.>>
16 B̄ara ndede na'e meci ro ca'u Allah Ta'ala d̄i dunia ake, ndad̄ina Sia mbeina Ana-Na ma kese weki, loakud̄u sanikina dou ma imbi d̄i Sia wati d̄ima'iha leli, malaisi d̄imaraka mori ma sapodakaina ro ma ede ro hid̄i. 17 B̄a one Allah Ta'ala nggaduna Ana-Na laina d̄imaparesa ncihi ro ncara dunia ake, pala d̄imakasalamana. 18 Dou ma imbi d̄i Sia wati d̄ihukum. Pala dou ma wati imbi wa'ura hukum b̄a Allah Ta'ala, b̄ara sia wati imbina d̄i Ana Allah3 ma kese weki. 19 Akeku hukuman ede eded̄u Taroa ma wa'ura mai d̄i dunia, pala manusia nancewi ca'upu d̄i marindi ntewikaisi d̄imataroa, b̄ara ruku ro rawi siad̄oho madab̄ae. 20 Sanikina dou ma karawi ma dab̄ae, wati ca'una d̄imataroa, sia wati ngawana mai raka d̄imataroa, loakud̄u ruku ro rawina ma dab̄ae wati tadana. 21 Pala dou ma karawi ra kane'ekai b̄a Allah Ta'ala, namai rakaku d̄itaroakaina loakud̄u ndad̄i tada b̄a one au ra karawina ede eded̄u ra kane'ekai b̄a Allah Ta'ala.
Isa Al Masih lab̄o la Yahya Mataki kandeu raso dou
3:22-30
22 Sawa'u b̄a ede Isa Al Masih ro anamorid̄oho-Na lao aka Yudea. Sia lab̄o anamorid̄oho-Na ngge'ena ta aka pila-pila wakatu ntoina ro kandeu rasona dou. 23-24 Wakatu ede la Yahya watipu lu'una d̄i ade uma bui. Sia kandeu rasona dou d̄i Ainon, wati d̄o'ona lab̄o dana ro rasa Salim, b̄a one ta aka wara mboto oi. Dou-dou mai rakana sia, ro sia kandeu rasona siad̄oho.
25 Pila-pila dou anamori la Yahya tampu'u cence ncihina lab̄o dou Yahudig mab̄oha atoran karaso weki. 26 Siad̄oho laona d̄i la Yahya, ro nggahina, <<Guru, sab̄ua ita mbuipu kawarata dou ma sama-sama lab̄o Ita ipa b̄ae b̄a Sori Yordan ede, ra turu tei b̄a ita d̄i madad̄oho ntoina? Sia ake nakandeu raso rauku dou, ro sara'ana dou nalao rakaku Sia!>>
27 Cambe b̄a la Yahya, <<Manusia wati loana ntau au-au nggara watisi rambei b̄a Allah Ta'ala d̄i sia. 28 Ndai nggomid̄oho wa'ura ringamu nggahi nahu, <Nahu laina Al Masih eded̄u Sangaji Makasalama. Nahu ranggadu ulu sawatipu b̄a Sia.> 29 Ma ntau b̄unti siwe eded̄u b̄unti mone. Soba b̄unti mone ede nakid̄i dampi mpa ro nakade'eku, ro naneo adena nggara naringasi eli b̄unti mone. Ndede rauku lab̄o nahu, ake nahu neo poda adeku. 30 Sia pab̄uaku naha na'e-Na, pala nahu naha to'i.>>
Sia ma ramai ra d̄i saroga
3:31-36
31 Sia ma ramai ese mai nancewi eseku d̄i sara'ana. Ma ramai ra d̄i dunia nalu'u d̄i kalompo dou dunia, ro nanuntu ro nggahiku mab̄oha lampa rawi dunia. Sia ma ramai ese mai nancewi na'e d̄i sara'ana. 32 Sia nuntu ro nggahina mab̄oha au ra wa'u eda ro ringa-Na, pala wati kone sab̄ua dou rau ma imbi d̄i nggahi ro eli-Na. 33 Dou ma imbi d̄i nuntu ro nggahi-Na ede, namangakuku b̄a one Allah Ta'ala ma ncihi. 34 B̄a one dou ra nggadu b̄a Allah Ta'ala nakaronggaku nggahi ro eli Allah Ta'ala, b̄ara Allah Ta'ala wa'ura mbei kancihina Roh-Na d̄i sia. 35 Ama nameci ro ca'uku Ana-Na, ro nawa'ura d̄onggo sara'a kuasa d̄i Sia. 36 Cou-cou ma imbi d̄i Ana ede, sia d̄imaraka mori masapodakaina ro ma ede ro hid̄i. Pala dou ma wati to'a d̄i Ana ede wati d̄imaraka mori malaisi d̄ihukum b̄a Allah Ta'ala santoi-ntoina.