Ndiha Nika d̄i Kana
2:1-12
2
D̄ua nai sawa'u b̄a ede wara ndiha nika aka kota Kana d̄i Galilea, ro ina Isa Al Masih wara ta aka. 2 Isa lab̄o anamorid̄oho-Na ra'unda rau d̄i ndihakai ede. 3 Wakatu cumpura oi anggo, nggahi ina-Na d̄i Isa, <<Siad̄oho nawa'ura cumpu oi anggona.>>4 Cambe b̄a Isa Al Masih, <<Ina, auku d̄ipab̄ua karawi b̄a Mada? Watipu raka wakatuna Mada d̄ikatadakai-Ku weki.>>
5 Pala ina Isa Al Masih nggahina d̄i dou-dou ma taki kab̄ua ngaha ro nono, <<Karawipu au ra kaukai b̄a Sia d̄i nggomid̄oho.>>
6 Ta ede wara ini mbua tune ra sadia d̄i ru'u karasokai rima ro ed̄i b̄atu rawi ranginakai b̄a agama dou Yahudi. Sanikina tune ede isina takasi 100 lite. 7 Nggahi Isa Al Masih d̄i dou-dou ma taki kab̄ua ngaha ro nono ede, <<Taupu oi d̄i tune-tune ede.>> Siad̄oho tau kab̄inina oi d̄i tune-tune ede. 8 Edempara nggahi Isa d̄i siad̄oho, <<Ake wehapu sato'i oi ede ro lao wa'apu d̄i dou mana'ekai ndiha.>> Siad̄oho wa'ana oi ede d̄i dou mana'ekaina ndiha, 9 ro sia tab̄aina oi ma wa'ura ndad̄i oi anggo ede. Sia wati b̄adena ra tab̄ena oi anggo ede, selasi dou-dou mataki kab̄ua ngaha ro nono ma lua oi ede mpa ma b̄adena. Ndad̄i dou mana'ekai ndiha ede lao rakana b̄unti mone, 10 edempara nggahina d̄i b̄unti mone ede, <<Ranginakai b̄a dou naka'ambi uluku oi anggo ma ipi caru ro sawa'u b̄a dou ra'unda nawa'ura manta adena nono, ede ampona kalosa oi anggo ma biasa. Pala nggomi mawi'iku oi anggo ma ipi caru saraka ake!>>
11 Edeku rawi mab̄isa ro guna ma saramba-rambakaina ra karawi b̄a Isa Al Masih. Sia karawina ede aka Kana d̄i Galilea. Kai tanda ede Sia natei katadaku d̄ese ro ntasa-Na. Ndad̄i anamorid̄oho-Na na'imbi d̄i Sia.
12 Sawa'u b̄a ede Isa laona aka Kapernaum sama-sama lab̄o ina-Na, arid̄oho-Na ro anamorid̄oho-Na. Siad̄oho ngge'ena ta aka sampe pila-pila nai ntoina.
Isa Al Masih lu'una d̄i ade Bait Allah
2:13-22
13 Wakatu d̄enira Aruraja Paskah Yahudi, Isa Al Masih laona aka Yerusalem. 14 Ade Bait Allah d̄i Yerusalem, Sia edana dou-dou ma wunga landa capi, jimba, ro nasi dara; ro dou-dou macepe piti ma doho ta ede. 15 Isa ndawina cambo kai ai edempara b̄aka kalosa sara'ana binata ede, nataho jimba ro capi d̄i ade Bait Allah. Meja-meja hid̄i cepekai dou piti, ponga b̄a Sia ndad̄ina piti siad̄oho mbari mbura sara'a. 16 Edempara nggahi Sia d̄i dou malanda nasi dara, <<Hanta peso sara'apu. Aina kandad̄imu Uma Ama Nahu hid̄i landa ro lajokai!>> 17 Ndad̄i kawara b̄a anamorid̄oho-Na b̄a one wara ratunti d̄i ade Kitab Suci, <<Meci ro ca'u Mada d̄i Uma Ita, Io Allah Ta'ala maka'ana ade Mada.>>
18 Dou-dou mana'ekai Yahudi nggahina d̄i Sia, <<Karawi to'ipu mab̄isa ro guna d̄imandad̄i tanda d̄i ru'u b̄a nami b̄a one Nggomi mantau hak karawi b̄une ake.>>
19 Cambe b̄a Isa Al Masih, <<^Dumbapu Bait Allah ake, ro ade wakatu tolu nai, Nahu d̄imatu'u mbalina.>>
20 Edempara nggahi siad̄oho, <<Upa mpuru ini mba'a ntoina, dou katu'una Bait Allah ake. Ro Nggomi mane'eku tu'u mbalina ade wakatu tolu nai?>>
21 Pala Bait Allah ra nggahi b̄a Isa Al Masih eded̄u sarumbu ndai-Na. 22 Ndad̄i, sawa'u b̄a ede Isa Al Masih d̄ikamori mbali, ede ampo kawara b̄a anamorid̄oho-Na b̄a one lampa rawi ede parana ranggahi b̄a Sia. Edempara imbi b̄a siad̄oho d̄i au ra tunti d̄i ade Kitab Suci ro d̄i au ra nggahi b̄a Isa.
Isa Al Masih napataku samenana dou
2:23-25
23 Isa Al Masih mbuipu warana d̄i Yerusalem wakatu Aruraja Paskah, mboto dou ma imbi d̄i Sia b̄ara siad̄oho wa'ura edana karawi-Na ma b̄isa ro guna. 24 Pala ndai Isa wati imbina d̄i siad̄oho, b̄a one Sia napataku samenana dou. 25 Wati pori ngoa b̄a dou d̄i Sia mab̄oha cou-cou rau, b̄ara ndai Sia nab̄adeku au ma wara d̄ei ade manusia.