Isa Al Masih Eded̄u Fu'u Anggo Ma Taho Poda
15:1-17
15
Isa nggahi walina, <<Nahuku fu'u anggo ma taho poda ro Ama Nahu eded̄u ma karawi nggarona. 2 Sanikina sanga ma wara d̄i Nahu ma wati mbua, nadompoku b̄a Sia, ro sanikina sanga ma mbua, ro'ona d̄ikaraso b̄a Sia loakud̄u wuana nanaha ipi mboto wali. 3 Nggomid̄oho wa'ura raso b̄ara ngoa ro tei ra mbei b̄a Nahu d̄i nggomid̄oho. 4 Ngge'epu sab̄ua lab̄o Nahu ro Nahu rau mangge'e mpa sab̄ua lab̄o nggomid̄oho. Sangana wati loana mbua ndaina, selasi nggara nambuipusi sab̄ua lab̄o fu'una. Ndede rau nggomid̄oho maloa mbua, nggara ngge'e mpa sab̄uamu lab̄o Nahu.5 Nahuku fu'u anggo, ro nggomid̄oho sanga-sangana. Dou ma ngge'e mpa sab̄uana lab̄o Nahu ro Nahu lab̄o sia, d̄imamboto wuana; b̄a one watisi lab̄o b̄a Nahu, nggomid̄oho wati loamu karawi au-au. 6 Dou ma wati sab̄ua lab̄o Nahu, d̄ipaki b̄une sanga anggo, edempara ndad̄i mango. Sanga-sanga b̄une ede d̄ikab̄oro ro d̄ipaki d̄i ade afi, edempara d̄ika'a. 7 Nggara nggomid̄oho mambuipusi sab̄uamu lab̄o Nahu ro rangoa ro tei b̄a Nahu ngge'e d̄i ademu, rahopu d̄i Ama au-au d̄i ne'e b̄a nggomid̄oho raho; ra rahomu ede d̄imbeina. 8 Ade lampa rawi ake, Ama Nahu d̄ikad̄ese ro kantasa; kai ndedena nggomid̄oho poda-poda ndad̄imu anamori Nahu. 9 ^Bune Ama ma meci ro ca'u Nahu, ndedeku Nahu ma meci ro ca'u nggomid̄oho. Pab̄uapu nggomid̄oho ngge'e mpa morimu b̄une dou ra meci ro ca'u b̄a Nahu. 10 Nggara kalampa sara'asi b̄a nggomid̄oho au ra kaukai b̄a Nahu, nggomid̄oho ngge'e mpa to'amu d̄imeci ro ca'u b̄a Nahu, sama b̄une Nahu mangge'e mpa to'a d̄imeci ro ca'u Ama b̄ara kalampaku au ra kaukai-Na.
11 Sara'ana ake ngoa b̄a Nahu d̄i nggomid̄oho loakud̄u sana ade Nahu wara ta d̄ei ademu, ro sana ade nggomid̄oho ndad̄i mpuruna. 12 Akeku d̄ikaukai b̄a Nahu: Meci ro ca'upu d̄i sab̄ua lab̄o ma kalaina, sama b̄une Nahu ma meci ro ca'u nggomid̄oho. 13 Dou ma ipi poda meci ro ca'u sobad̄ohona eded̄u dou ma mbei morina d̄i ru'u b̄a siad̄oho. 14 Nggomid̄oho eded̄u soba-soba Nahu, nggara makarawisi b̄a nggomid̄oho au ra kaukai b̄a Nahu d̄i nggomid̄oho. 15 Nggomid̄oho watid̄u oukai b̄a Nahu ada, b̄ara ada wati b̄adena au ma wunga karawi b̄a rumana. Nggomid̄oho oukai b̄a Nahu soba, b̄ara sara'ana ra ringa b̄a Nahu d̄i Ama, wa'ura ngoa b̄a Nahu d̄i nggomid̄oho. 16 Laina nggomid̄oho ma rakad̄ale Nahu. Nahuku ma rakad̄alena nggomid̄oho ro makau lao nggomid̄oho d̄imambua ma mboto – wua-wua ma wati d̄imaleli. Ndad̄i Ama d̄imambeina d̄i nggomid̄oho au-au ra raho b̄a nggomid̄oho d̄i Sia kai ngara Nahu. 17 Akeku d̄ikau b̄a Nahu d̄ikarawi b̄a nggomid̄oho: Meci ro ca'upu d̄i sab̄ua lab̄o ma kalaina.>>
Dunia Wati Ca'una D̄i Nggomid̄oho
15:18–16:4a
18 <<Nggomid̄oho wati ca'u b̄a dunia, kawarapu b̄a one Nahu wa'ura ulu wati ca'u b̄a dunia. 19 Paisi nggomid̄oho ra maimu ta dunia, nggomid̄oho d̄imeci ro ca'u b̄a dunia kai ntauna. Pala Nahu wa'ura kad̄aleku nggomid̄oho d̄i dunia ake, ndad̄i nggomid̄oho lai walina ntau dunia. B̄ara ndedena dunia wati ca'una nggomid̄oho. 20 Kawarapu au ra nggahi b̄a Nahu d̄i nggomid̄oho, <Ada wati ncewi esena ntewikaisi lab̄o rumana.> Nggara siad̄oho wa'ura kancokina Nahu, siad̄oho d̄imakancoki nggomid̄oho rau. Nggara siad̄oho nab̄atusi ngoa ro tei b̄a Nahu, siad̄oho nab̄atu rauku ngoa ro tei b̄a nggomid̄oho. 21 Sara'ana ede d̄ikarawi b̄a siad̄oho d̄i nggomid̄oho, b̄ara nggomid̄oho anamori Nahu, b̄a one siad̄oho wati patana Sia ma ranggadu Nahu. 22 Pai watisi mai Nahu ro wati ngoa sara'a b̄a Nahu ede d̄i siad̄oho, siad̄oho wati dosana. Pala ake siad̄oho wati loana kawati mab̄oha dosa siad̄oho. 23 Dou ma wati ca'u Nahu, wati ca'una Ama Nahu. 24 Paisi d̄i woha siad̄oho Nahu wati karawiku lampa rawi ma watipu ra karawi b̄a dou makalai, siad̄oho wati dosana. Pala ake siad̄oho wa'ura edana au ra karawi b̄a Nahu, ro siad̄oho wati ca'una Nahu ro Ama-Ku. 25 Pala pab̄uaku ndedena loakud̄u ndad̄ira au ra tunti d̄i ade Kitab Taurat ntau siad̄oho eded̄u Siad̄oho wati ca'una Nahu kai wati ntauna alasan.>
26 Nahu d̄imanggadu d̄i nggomid̄oho Mabantumu ma ramai ra d̄i Ama. Siaku Roh d̄imakatadana lampa rawi mapoda ro ma ncihi mab̄oha Allah Ta'ala. Nggara namaisi Sia, Sia d̄imanuntu ro nggahi mab̄oha Nahu. 27 Ro nggomid̄oho rau pab̄uapu nuntu ro nggahimu mab̄oha Nahu, b̄ara nggomid̄oho wa'ura sama-samamu lab̄o Nahu ra'aipu saramba wa'una.