16
Samenana ede ngoa b̄a Nahu d̄i nggomid̄oho loakud̄u nggomid̄oho aina murtad. 2 Nggomid̄oho d̄ikalosa ra d̄i ade uma-uma sambea ro ibadakai. Ro d̄imamai wakatuna b̄a one dou ma hade nggomid̄oho nakacaiku kai karawina b̄une ede siad̄oho nato'aku d̄i Allah Ta'ala. 3 Siad̄oho karawi ndedekaina d̄i nggomid̄oho b̄ara siad̄oho watipu patana Ama ro Nahu. 4 Pala ake, Nahu manggahi d̄i nggomid̄oho loakud̄u nggara narakasi wakatuna, nggomid̄oho d̄imakawara b̄a one Nahu wa'ura ngoaku d̄i nggomid̄oho.>>D̄i Karawi b̄a Roh Allah
16:4b-15
<<Lampa rawi ake watipu rangoa b̄a Nahu d̄i nggomid̄oho ra'aipu saramba wa'una, b̄ara Nahu mbuipu sama-samaku lab̄o nggomid̄oho. 5 Pala ake Nahu d̄imalao d̄i Sia ma ranggadu Nahu; ro wati kone sab̄ua dou rau d̄i ade weki nggomid̄oho masod̄i ta b̄eku laokai Nahu. 6 Pala b̄ara ngoa b̄a Nahu lampa rawi ede d̄i nggomid̄oho, ndad̄i nggomid̄oho ncoki mena ademu. 7 Nahu manggahi d̄i nggomid̄oho: Nancewi tahopu d̄i ru'u b̄a nggomid̄oho, nggara laosi Nahu. B̄a one nggara Nahu watisi laoku, Mabantu ede wati d̄imamai d̄i nggomid̄oho. Pala nggara laosi Nahu, Nahu d̄imanggadu Sia d̄i ru'u b̄a nggomid̄oho. 8 Nggara namaisi Sia, Sia d̄imangoa ro kawarana dunia mab̄oha dosa, ma poda ro ma ncihi ro mab̄oha hukuman Allah Ta'ala. 9 Sia d̄imangoa ro kawarana b̄a one watisi imbi d̄i Nahu eded̄u dosa; 10 b̄a one Nahu poda, b̄ara Nahu malao aka Ama ro nggomid̄oho wati d̄ima'eda Nahu wali; 11 ro Allah Ta'ala wa'ura tampu'u hukumna, b̄ara makuasakai dunia ake wa'ura b̄ab̄u kai hukuman.
12 Mboto walipu d̄ine'e nggahi b̄a Nahu d̄i nggomid̄oho, pala wakatu ake nggomid̄oho wati wa'umu sanggo tarima. 13 Pala nggara Roh ede namaisi, eded̄u Sia ma katadana lampa rawi ma poda ro ma ncihi mab̄oha Allah Ta'ala, nggomid̄oho d̄id̄ende b̄a Sia d̄i patakaimu sara'a lampa rawi ma poda ro ma ncihi. Sia wati d̄imanuntu ro nggahi ma ramai ra d̄i weki ndai-Na, pala d̄imanuntu ro nggahi au ra wa'u ringa-Na, ro Sia d̄imangoana d̄i nggomid̄oho auku d̄imandad̄i d̄i ainaina ma kento. 14 Sia d̄imakad̄ese ro kantasana Nahu, b̄ara au ra karongga-Na d̄i nggomid̄oho, ratarima b̄a Sia d̄i Nahu. 15 Samenana au-au ma wara d̄i Ama eded̄u ntau Nahu. B̄ara ndedena Nahu nggahi-Ku b̄a one au ra karongga b̄a Roh d̄i nggomid̄oho, ratarima b̄a Sia d̄i Nahu.>>
Susa Ro Sana
16:16-24
16 Sawa'u b̄a ede, Isa nggahi walina, <<D̄i samporo wali mpa nggomid̄oho wati d̄ima'eda Nahu wali, ro d̄i samporo wali mpa nggomid̄oho d̄ima'eda Nahu.>>
17 Pila-pila dou anamori Isa tampu'ura sod̄i sab̄ua lab̄o ma kalaina, <<Auku aona Sia nggahi ndedekaina d̄i ndaita: <D̄i samporo wali mpa nggomid̄oho wati d̄ima'eda Nahu wali ro d̄i samporo wali mpa nggomid̄oho d̄ima'eda Nahu?>Au rauku aona: <Nahu malao aka Ama?>>> 18 Siad̄oho sod̄i ntuwuna, <<Auku aona, <d̄i samporo wali mpa?> Ndai wati loata ka'ao nuntu ro nggahi-Na mab̄oha auku!>>
19 Isa nab̄adeku siad̄oho mane'e sod̄i d̄i Sia. Ndad̄i nggahira Sia, <<Nahu wa'ura nggahiku, <D̄i samporo wali mpa, nggomid̄oho wati d̄ima'eda Nahu wali, ro d̄i samporo wali mpa nggomid̄oho d̄ima'eda Nahu.> Sab̄ua b̄ara lampa rawi ede nggomid̄oho ngangokaimu?
20 Imbipu, nggomid̄oho d̄imanangi nduru, pala dunia d̄imaneo ade. Nggomid̄oho d̄imasusa ade, pala susamu ede d̄imandad̄i neo ade. 21 Nggara sab̄ua dou siwe narakasi wakatu d̄ingganakaina, sia nasusaku, b̄ara wa'ura raka wakatuna sia d̄imasusa ro ncoki iu. Pala nggara wa'usira losa anana, dou siwe ede nanefaku susa ro ncoki iuna b̄ara neo adena b̄a sab̄ua anana wa'ura wara d̄i dunia. 22 Ndede rauku lab̄o nggomid̄oho: Ake nggomid̄oho masusa ade, pala Nahu d̄ima'eda angi wali lab̄o nggomid̄oho, ndad̄i ademu d̄imasana; ro wati kone sab̄ua dou rau maloana weha neo ade ede d̄i ade nggomid̄oho.
23 D̄i ainaina ede, nggomid̄oho wati d̄imasod̄i au-au wali d̄i Nahu. Imbipu: Au-au rau ra raho b̄a nggomid̄oho d̄i Ama kai ngara Nahu, ede d̄imbei b̄a Ama d̄i nggomid̄oho.i 24 Sampe wakatu ake nggomid̄oho watipu rahomu au-au kai ngara Nahu. Rahopu, ndad̄i nggomid̄oho d̄imatarimana, loakud̄u mpuruna neo ademu.>>
Ngolukai D̄i Dunia
16:25-33
25 <<Sara'ana lampa rawi ake nggahi b̄a Nahu d̄i nggomid̄oho kai conto ro ibara. Pala d̄imaraka wakatuna, Nahu wati d̄imakani conto ro ibara wali, pala kai ngoa ntiri d̄i nggomid̄oho mab̄oha Ama. 26 Wakatu ede nggomid̄oho d̄imaraho d̄i Ama ade ngara Nahu; d̄i b̄ademu, Nahu wati d̄imaraho d̄i Ama d̄i ru'u b̄a nggomid̄oho, 27 b̄ara ndai Ama mameci ro ca'u nggomid̄oho. Sia meci ro ca'ukaina nggomid̄oho b̄ara nggomid̄oho mameci ro ca'u Nahu, ro imbimu b̄a one Nahu ma ramai ra d̄i Allah Ta'ala. 28 Ncihi romo Nahu ma ramai ra d̄i Ama, ro wa'ura maiku d̄i ade dunia. Pala ake Nahu tu'u wi'iku dunia d̄i lao mbalikaiku aka Ama.>>
29 Edempara anamori Isa nggahina d̄i Sia, <<Ake Ruma, Ita ma ngoa ntirira ro watid̄u kanita conto ro ibara, 30 ro madad̄oho mab̄adera b̄a one Ruma mab̄ade sara'ana. Kone sab̄ua dou rau wati porina sod̄i au-au d̄i Ita. B̄ara ndedena, madad̄oho imbi b̄a one Ruma ma ramai ra d̄i Allah Ta'ala.>>
31 Cambe b̄a Isa d̄i siad̄oho, <<Ndad̄i sab̄ua ma'imbiku b̄a nggomid̄oho ake? 32 Kawarapu! Wakatuna d̄imamai, ro ake wa'ura mai, nggomid̄oho d̄imambari mbura. Nggomid̄oho d̄imadula aka cua-cua uma ndaimu ro d̄imatu'u wi'i Nahu kese. Pala Nahu wati keseku b̄ara Ama wara sama-sama lab̄o Nahu. 33 Sara'ana ake nggahi b̄a Nahu loakud̄u nggomid̄oho rakamu taho ro ntai b̄ara sab̄uamu lab̄o Nahu. D̄i dunia nggomid̄oho d̄ima'iu susa ro ncoki. Pala katenggopu weki ro kalembopu ademu! Nahu wa'ura kakoaku dunia!>>