Isa Al Masih Do'a Weana D̄i Ru'u B̄a Anamorid̄oho-Na
17:1-26
17
Sawa'u b̄a nggahi ndedena, Isa d̄ongana langi ro nggahina, <<Ama, ake wa'ura raka wakatuna. Kad̄ese ro kantasapu Ana-Mu, loakud̄u Ana-Mu makad̄ese ro kantasa rau Ita, Ama. 2 Ama wa'ura d̄onggo kuasata d̄i Ana d̄i ru'u b̄a samenana manusia loakud̄u Ana ma mbeina mori ma ede ro hid̄i d̄i samenana dou ra d̄onggo b̄a Ama d̄i Ana. 3 Akeku mori ma sapodakaina ro ma ede ro hid̄i b̄a one dou-dou mapata Ita eded̄u Allah Ta'ala ma kese weki ro ma poda, ro mapata Isa Al Masih eded̄u Sangaji Makasalama ra nggadu b̄a Ita. 4 Mada wa'ura kad̄ese ro kantasaku Ita, Ama, ese wawo dunia ake kai kanggoriku karawi ra kaukai b̄a Ita, Ama d̄i Mada. 5 B̄ara ndedena, Ama! Kad̄ese ro kantasato'ipu Mada ake d̄i tando Ita Ama, kai d̄ese ro ntasa ma wara d̄i Mada ma sama-sama lab̄o Ita Ama sawatipu b̄a kandad̄i dunia ake.6 Mada wa'ura kapata weaku ngara Ita Ama d̄i sara'a dou d̄i dunia ake ra wa'u mbei b̄a Ita d̄i Mada. Siad̄oho eded̄u ntau Ama, ro Ita wa'ura mbeita siad̄oho d̄i Mada. Siad̄oho wa'ura b̄atuna nggahi ro eli Ita Ama. 7 Ake siad̄oho nawa'ura b̄ade b̄a one sara'a ra mbei b̄a Ita d̄i Mada ramaina ra d̄i Ita Ama. 8 Wa'ura karongga b̄a Mada d̄i siad̄oho nggahi ro eli Ita au ra d̄onggo b̄a Ita d̄i Mada, ro siad̄oho wa'ura tarimana. Siad̄oho nab̄adeku b̄a one Mada poda-poda ma ramai ra d̄i Ita ro siad̄oho na'imbiku b̄a one Ita ma ranggadu Mada.
9 Mada do'aku d̄i ru'u b̄a siad̄oho. Mada wati do'aku d̄i ru'u b̄a dunia malaisi d̄i ru'u b̄a dou-dou ra wa'u mbei b̄a Ita d̄i Mada, b̄ara siad̄oho eded̄u ntau Ita, Ama. 10 Samenana ntau Mada eded̄u ntau Ama rau ro samenana ntau Ita eded̄u ntau Mada rau. Ro Mada wa'ura kad̄ese ro kantasa d̄i woha siad̄oho. 11 Ake Mada mai satando Ita, io Ama. Mada wati ngge'e waliku d̄i dunia; pala siad̄oho wara d̄i dunia. Ama ma wancu raso! Tajaga ro sandaka to'ipu siad̄oho kai kuasa ngara Ita, eded̄u ngara ra wa'u d̄onggo b̄a Ita Ama d̄i Madaj– loakud̄u siad̄oho ndad̄i sab̄ua, sama b̄une Ama ma sab̄ua lab̄o Mada. 12 Wakatu Mada mbuipu lab̄o siad̄oho, Mada wa'ura jagaku siad̄oho kai kuasa ngara Ita Ama – ngara ra mbei b̄a Ita d̄i Mada.k Mada wa'ura jaga ro sandakaku siad̄oho ro wati kone sab̄ua dou rau d̄i ade weki siad̄oho ma leli, selasi sia ma pab̄ua romo d̄imaleli; loakud̄u ndad̄ira au ra tunti ade Kitab Suci. 13 Ake Mada ma mai satando Ita, Ama. Sara'ana ake nggahi b̄a Mada wakatu Mada mbuipu d̄i dunia; loakud̄u siad̄oho iu podana neo ade Mada. 14 Mada wa'ura karonggaku d̄i siad̄oho nggahi ro eli Ita Ama, ro dunia wati ca'una siad̄oho, b̄ara siad̄oho laina ra maina ra d̄i dunia, sama b̄une Mada laina ramaiku ra d̄i dunia. 15 Mada wati rahoku loakud̄u Ita Ama ma weha siad̄oho d̄i ade dunia ake, pala raho b̄a Mada loakud̄u Ita majagana siad̄oho d̄i la dab̄ae. 16 Siad̄oho laina ra maina ra d̄i dunia sama b̄une Mada laina ramaiku ra d̄i dunia. 17 Karasoto'ipu siad̄oho kai lampa rawi ma poda ro ma ncihi; nggahi ro eli Ita edeku lampa rawi ma poda ro ma ncihi. 18 Sama b̄une Ita Ama ma wa'ura nggadu Mada d̄i dunia, ndede rauku Mada wa'ura nggaduku siad̄oho d̄i dunia. 19 D̄i ru'u b̄a siad̄oho, Mada mad̄onggo weki kai ntau ra kalai b̄a Ita Ama, loakud̄u siad̄oho rau mandad̄i ntau ra kalai b̄a Ita Ama kai lampa rawi ma poda ro ma ncihi.
20 Laina d̄i ru'u b̄a siad̄oho mpoa mpa Mada do'aku. Mada do'aku d̄i ru'u b̄a dou-dou ma imbi d̄i Mada ma ngoa ro kahaba haba ma taho. 21 Mada maraho poda-poda d̄i Ita Ama loakud̄u siad̄oho sara'ana ndad̄i sab̄ua lab̄o Ndaita b̄une Ita Ama masab̄ua lab̄o Mada, ro Mada ma sab̄ua lab̄o Ita loakud̄u dunia na'imbiku b̄a one Ita Ama ma ranggadu Mada. 22 Mada wa'ura mbeiku siad̄oho d̄ese ro ntasa ra mbei b̄a Ita Ama d̄i Mada, loakud̄u siad̄oho ndad̄i sab̄ua, sama b̄une Ndaita ma ndad̄i sab̄ua rau; 23 Mada lab̄o siad̄oho, ro Ama lab̄o Mada; loakud̄u siad̄oho poda-poda sab̄uana. Ndad̄i dunia d̄imab̄ade b̄a one Ama ma ranggadu Mada, ro Ama ma meci ro ca'u siad̄oho b̄une Ama ma meci ro ca'u Mada.
24 Ama, Mada kane'e loakud̄u siad̄oho, ra d̄onggo b̄a Ita d̄i Mada, wara sama lab̄ona Mada d̄i hid̄i warakai Mada, loakud̄u siad̄oho edana d̄ese ro ntasa Mada eded̄u d̄ese ro ntasa ra mbei b̄a Ama d̄i Mada, b̄ara Ama ma meci ro ca'u Mada sawatipu kandad̄i dunia ake. 25 Io, Ama ma adil! Dunia wati patana Ita Ama, pala Mada kapataku Ita Ama ro dou-dou ake nab̄adeku b̄a one Ama ma ranggadu Mada. 26 Mada wa'ura kapataku Ita Ama d̄i siad̄oho; ro Mada ma karawi ncau b̄une ede, loakud̄u meci ro ca'u Ita Ama d̄i Mada ngge'e mpa d̄i ade siad̄oho ro Mada masab̄ua lab̄o siad̄oho.>>