La Yahya Mataki kandeu raso dou
3:1-20
3
D̄i mba'a makasampuru limakaina d̄i ade Pamarenta Kaisar Tiberius, Pontius Pilatus ma ndad̄i gubernur d̄i Yudea, ro Herodes ma parenta d̄i Galilea. La Filipus ari Herodes ma parenta d̄i dana ro rasa Iturea ro Trakhonitis, la Lisanias ma parenta d̄i dana ro rasa Abilene. 2 Ma ndad̄i Imam-imam Agung eded̄u la Hanas ro la Kayafas.c D̄i mba'ana edeku Allah Ta'ala karonggana nggahi ro eli-Na d̄i la Yahya, ana la Zakaria d̄i so sarae. 3 Ndad̄i la Yahya laona aka sara'a dana ro rasa Sori Yordan ro karonggana haba ma ramai ra d̄i Allah Ta'ala. Nggahi la Yahya, <<Tobara ra d̄i dosa-dosamu ro nggomid̄oho pab̄uaku d̄onggo wekimu d̄ikandeu raso, loakud̄u Allah Ta'ala kangampu weana dosa nggomid̄oho.>> 4 Ede ncihi ncao b̄une ra tunti d̄i ade kitab Nabi Yesaya:Wara dou ma ou nggao d̄i so sarae,
<Sadiapu ncai d̄i ru'u b̄a Ruma,
kapiripu ncai d̄i ru'u b̄a Sia.
5 Sanikina so ^di'umbu
sanikina doro ro dorena ^dikapiri.
Ncai ma nteko ^dikarombo,
ro ncai ma d̄ese d̄ei ^dikapiri.
6 Sara'a dou d̄i dunia d̄ima'eda
Allah Ta'ala makasalama manusia!> >>
7 Mboto dou ma mai raka la Yahya mane'e d̄ikandeu raso. Nggahi la Yahya d̄i siad̄oho, <<Oe nggomid̄oho dou dab̄ae b̄une sawa ma wari! Cou ma nggahi b̄a one nggomid̄oho wati b̄oha b̄a hukuman Allah peade? 8 Katadapu kai ruku ro rawimu b̄a one nggomid̄oho wa'ura toba ra d̄i dosa-dosamu! Aina kananumu b̄a one la Ibrahim eded̄u wa'i ro waromu. D̄i kawaramu: Kai wadu-wadu ake rau Allah Ta'ala naloaku kandad̄i londo ro mai d̄i ru'u b̄a la Ibrahim! 9 Ponggo wa'ura sadia ^di^bo'okai fu'u haju sampe awa amuna. Sanikina fu'u haju ma wati mbua wua ma taho, ^di^bo'o ro ^dipaki d̄i ade afi.>>
10 <<Ndad̄i, auku d̄i pab̄ua karawi b̄a mada^doho?>> So^di b̄a dou-dou d̄i la Yahya.
11 Cambe b̄a la Yahya, <<Dou ma ntau d̄ua ndo'o ^baju, pab̄uaku mbeina sando'o d̄i dou ma wati ntau; ro dou ma ntau ngaha ro nono, pab̄uaku cengga-cenggana.>>
12 Dou-dou mataki tagi bea mai rauna d̄i hid̄i ede b̄a ne'ena kandeu raso b̄a la Yahya. So^di b̄a siad̄oho, <<Guru, auku d̄ipab̄ua karawi b̄a mada^doho?>> 13 Cambe b̄a la Yahya, <<Aina weha kancewimu au ra wa'u katantu b̄a pamarenta.>>
14 Wara rau tentara ma so^di, <<^Buneku mada^doho? Auku d̄i pab̄ua karawi b̄a mada^doho?>>
Cambe b̄a la Yahya, <<Aina weha rampamu piti d̄i cou-cou rau kai cara pakasa atao kai b̄ab̄u ro lo'omu ma wati poda. Ncihi mpa kai gajimu!>>
15 D̄i wakatu ede dou-dou tampu'ura so^di-sod̄ina, sab̄ua la Yahya edeku Sangaji Makasalama ra ngena b̄a siad̄oho. 16 B̄ara ndedena la Yahya nggahina d̄i siad̄oho sara'ana, <<Nahu kandeu rasoku nggomid̄oho kai oi, pala peade d̄imamai Dou ma ncewi na'e ntewikaisi nahu. Kone hengga wea ai sadopa-Na nahu wati patuna. Sia d̄imakandeu raso nggomid̄oho kai Roh Allah ro kai afi. 17 D̄i rima-Na wara d̄oku d̄imbed̄ikai sara'a gandum-Na sampe rasona. Gandum ^dika^boro-Na d̄i ade jompa, pala sara'a saroena ^dika'a-Na d̄i ade afi ma wati made-made!>>
18 Ndedeku la Yahya ngoa ro tei katahona dou-dou kai mboto cara, wakatu sia ngoa rerona Haba Mataho. 19 Pala Herodes, makuasa d̄i Galilea, rojo b̄a la Yahya mab̄oha nikana lab̄o la Herodias, wei arina, ro mab̄oha sara'a karawina ma da^bae. 20 Pala Herodes nanaha karawiku madab̄ae kai kalu'una la Yahya d̄i ade uma bui.
Isa Al Masih kandeu b̄a la Yahya
3:21-22
21 Sawa'u b̄a nggori kandeu rasona dou-dou ede, la Yahya kandeu rauna Isa Al Masih. Ro wunga Sia do'ana, langi hengga lalona weki, 22 Roh Allah londona d̄i Isa b̄une nasi dara. Edempara wara ringa eli Allah Ta'ala ma nggahi, <<Nggomiku Ana meci ro ca'u b̄a Nahu. Nggomi makasanana ade Nahu.>>
Permandian Isa Al-Masih oleh Nabi Yahya
Dafta ngara wa'i ro waro Isa Al Masih
3:23-38
(Mat. 1:1-17)
23 Wakatu Isa Al Masih tampu'una ngoa ro tei, umu Sia takasi tolu mpuru mba'a. Ra nggahi b̄a dou, Sia ana la Yusuf, la Yusuf ana la Eli, 24 la Eli ana la Matat, la Matat ana la Lewi, la Lewi ana la Malkhi, la Malkhi ana la Yanai, la Yanai ana la Yusuf, 25 la Yusuf ana la Matica, la Matica ana la Amos, la Amos ana la Nahum, la Nahum ana la Hesli, la Hesli ana la Nagai, la Nagai 26 ana la Maat, la Maat ana la Matica, la Matica ana la Simei, la Simei ana la Yosekh, la Yosekh ana la Yoda, 27 la Yoda ana la Yohanan, la Yohanan ana la Resa, la Resa ana la Zerubabel, la Zerubabel ana la Sealtiel, la Sealtiel ana la Neri, 28 la Neri ana la Malkhi, la Malkhi ana la Adi, la Adi ana la Kosam, la Kosam ana la Elmadam, la Elmadam ana la Er, 29 la Er ana la Yesua, la Yesua ana la Eliezer, la Eliezer ana la Yorim, la Yorim ana la Matat, la Matat ana la Lewi, 30 la Lewi ana la Simeon, la Simeon ana la Yehuda, la Yehuda ana la Yusuf, la Yusuf ana la Yonam, la Yonam ana la Elyakim, 31 la Elyakim ana la Melea, la Melea ana la Mina, la Mina ana la Matata, la Matata ana la Natan, la Natan ana la Daud, 32 la Daud ana la Isai, la Isai ana la Obed, la Obed ana la Boas, la Boas ana la Salmon, la Salmon ana la Nahason, 33 la Nahason ana la Aminadab, la Aminadab ana la Admin, la Admin ana la Arni, la Arni ana la Hezron, la Hezron ana la Peres, la Peres ana la Yehuda, 34 la Yehuda ana la Yakub, la Yakub ana la Ishak, la Ishak ana la Ibrahim, la Ibrahim ana la Terah, la Terah ana la Nahor, 35 la Nahor ana la Serug, la Serug ana la Rehu, la Rehu ana la Peleg, la Peleg ana la Eber, la Eber ana la Salmon, 36 la Salmon ana la Kenan, la Kenan ana la Arpakhsad, la Arpakhsad ana la Sem, la Sem ana la Nuh, la Nuh ana la Lamekh, 37 la Lamekh ana la Metusalah, la Metusalah ana la Henokh, la Henokh ana la Yared, la Yared ana la Mahalaleel, la Mahalaleel ana Kenan, 38 la Kenan ana la Enos, la Enos ana la Set, la Set Ana la Adam, la Adam rakandad̄i b̄a Allah Ta'ala.